ސްޕޯޓްސް ފިޝިންގްއަކީ ރާއްޖޭގާ ވަރަށް ގިނަ ބަޔަކު ހިތްހަމަ ޖައްސާލަން ކުރަމުން އަންނަކަމެކެވެ. އެއީ ފަށައިފިނަމަ ފޫހިނުވާކަމެކެވެ. އަގުބޮޑެތި ދޮށްޓާ ރީލް އެމީހަކަށް ގަނެވޭ ފެންވަރުގާ ގަނެލާގެން ގޮސް ބާނާލާ މަސްތައް މީސްމީޑިޔާއަށް ދޫކޮށް އެއްބަޔަކު އަނެއްބަޔަކާ ވާދަކުރަމުންދަނީވެސް އަމަށަކު ވަރަކަށްނޫނެވެ. ދުރު ދިމަ ދިމާލަށް ގޫރޫޕް ހަދާލާގެން ދަތުރުގޮސް ވީހާވެސް އަޑިންޔަށް ދޫކޮށްލާން އެހެރަ ޖެހިލާ މަސްތަކުގެ ސަބަބުން ކުރަންޖެހޭ މަސައްކަތް ބައެއްފަހަރު ވަރަށް ބުރަވެގެންދެއެވެ. ނަމަވެސް ހިތަށް އެލިބެމުންދަނީ ހާދަހާވާ ބޮޑު ހިތްހަމަޖެހުމެކެވެ.
މޫނިސްއަކީވެސް ސްޕޯޓްސް ފިޝިންގްއަށް އަލަށް ނުކުތް ޒުވާނެކެވެ. ކުޑަ ދުވަސްކޮޅެއްތެރޭ މީސްމީޑިޔާގާ މީހުންނާ ވާދަޖަހައިގެން އޭނާގެ ހުނަރާ ކުޅަދާނަކަން ވީޑިޔޯތަކުން ފެންނަމުންދިޔައެވެ. މޫނިސް ވަޒީފާ އަދާކުރަމުންދަނީ ކޮނޮށްޓާގައެވެ. އެއްދުވަހު ރިސޯޓަށް އަލަށް މުވައްޒިފަކުއައެވެ. އޭނާގެ ނަމަކީ ބަޝީރުއެވެ. ބަޝީރަކީ މޫނިސް މީސްމީޑިޔާއިން ފެނި ރަހްމަތްތެރިވެފާވާ މީހަކަށްވީތީ މޫނިސްއާ އޭނާގެ ރަހްމަތްތެރިން ތިބޭ ކޮޓަރީގާ ބަޝީރު ބެހެއްޓިޔެވެ. ކުޑަ ދުވަސްކޮޅެއްފަހުން ބަޝީރުވެސް ދޮށްޓަކާ ރީލްއެއް ގެނެސްގެން މޫނިސްއާ ވާދަކުރަމުންދިޔައެވެ. މިހެން އުޅެލާފާ ދެމީހުން އެއްކޮށް ކޮފީއަކަށް އަރާ މީސްމީޑިޔާ ހާވަން ތިއްބާ ރަހްމަތްތެރިޔަކު އައިސް މަސްދަތުރެއް ރާވަން ބުންޏެވެ. މޫނިސްއާ ބަޝީރު މަޝްވަރާކޮށް ދުވަސް ކަނޑައަޅާ ސާމާނުތައް ތައްޔާރުކުރިޔެވެ. މި ދަތުރުގާ ބައިވެރިވަނީ ހަތަރު ބައިވެރިންނެވެ. އެއީ މޫނިސްއާ ބަޝީރުގެ އިތުރުން ޝިޔާޒްއާ މޫސައެވެ. އެންމެން ޑިޔުޓީ ނިންމާލުމަށްފަހު ޑިންގީއެއްނަގާގެން ހަވީރު ފުރީ ކޮނޮށްޓާ ކައިރީގާ އޮންނަ ބޮޑު ފަރެއް ކައިރިޔަށްށެވެ. ދަތުރު ކޮށްތަށް މާކަށް ބޮޑު އެއްޗެއް ނުގެންދިޔައީ އަވަހަށް އަނބުރާ އައުމުގެ ނިޔަތުގައެވެ. އިސާހިތަކު އަޑިޔަށް ޖިގްތައް ފޮނުވާލާ މަސްބާނާ މަހެއް ޖެހޭތޯ މަސައްކަތްފެށިޔެވެ. އުޅެ އުޅެ ހަމަ އެކަތިވެސް ނުޖެހުނެވެ. އެހެންކަމުން ފަރުގެ އަނެއްފަޅިޔަށް ދާން ނިންމިޔެވެ. ޑިންގީ ސްޓާޓްކޮށްލުމަށްފަހު ދުއްވާފާ ގޮސް ފަރުގެ އަނެއް ފަޅީގާ ވޭއްވުމަށްފަހު ނަގިލިއެޅިޔެވެ. އެއިރު އިރުއޮއްސިއްޖެއެވެ. ގަޑިން ރޭގަނޑު ހަތެއް ޖަހިތަނުން އެހެރަ މަސްތައް ގަންނަން ފެށީޔެވެ. ބައެއް މަސްތައް މައްޗަށް އެރުވުމުގެ ކުރިން މިޔަރުތައް ދިޔައީ ކަމުންނެވެ. މިހެން ތިއްބާ ބޮޑު ފެމުނެއްވެސް އައިސް އެނބުރެންފަށާފިޔެވެ. އެމީހަކަށް ނެގުނު މަހެއް އަވަސް އަވަހަށް ދިޔައީ ނަގަމުންނެވެ. މަސްބާނާ ނިންމާލަން ބެލިއިރު ގަޑިން 10 ޖަހާފިޔެވެ. އަލިކޮށްލަން ދިއްލާފާ އިން އަލިވެސް ނިވާލާފިޔެވެ. ނަގިލި ނަގަން މޫނިސް މަސައްކަތްފެށިތަނުން ކަނޑުތެރެއިން ނޫކުލައިގެ އެއްޗެއް ދިއްލިލާފާ ގެއްލެން ފަށާފިޔެވެ. މާކަށް ބޮޑު ސަމާލުކަމެއްނުދީ މޫނިސް ދިޔައީ ނަގިލި ނަގަމުންނެވެ. އެވަގުތު ހަމަ އެއްކަލަ ނޫ އަލި ދިއްލިލާފާ ގެެއްލެމުންދިޔައެވެ. ނަގިލި ނަގަނަގާ ހުއްޓާ ނަގިލި ވާގަނޑުގާ ހިފާ ފިސާރެ ބާރަށް ކަނޑުތެރެރެޔަށް ދަމައިގެންފިޔެވެ. އެހިނދު މޫނިސްގެ އަތް ވަލުގަ ހިފަހަށްޓާގެން އޮތުމުން ފިހިގެންދިޔައެވެ. މޫނިސް ޑިންގީތެރެޔަށް ވެއްޓުމުން މޫސަ އައިސް މޫނިސް ނެގިޔެވެ. އިރުކޮޅަކުން އިވުނީ ބަޝީރު ހޭންފެށިއަޑެވެ. އޭނާ ޑިންގީ ކޮޅަށް އިނގިލި ދިއްކޮށްފާ އެތަނުގާ ކަޅު ވަރުގަދަ ކެހެރިބޯ އެއްޗެއް ހުރި ވާހަކަ ބުނަމުންދިޔައެވެ. އަދި މިފަހަރު ސަލާމަތެއް ނެތްކަމުގާ ބުނެ ބިރުވެރި އަޑަކުން ހެމުންދިޔައެވެ. މޫނިސް އާ މޫސައާ ދެމީހުންނަށް ކަނޑާ ދިމާލަށް ބަލާލެވުނުލިއިރު ޑިންގީ ދަށުން ނޫކުލައިން ދިއްލެން ފަށާފިޔެވެ. އިސާހިތަކު ނާމަން އަޑުތައް އިވެންފެށިޔެވެ. ވާރޭ ވެހޭހެންވެސް ހީވެގެންދިޔައެވެ. ދެން ފެނިގެންދިޔައީ ސަންދޯކާ ގަބުރު ފަދަ ތަކެތި ކަނޑުން މައްޗަށް އަރަމުންދިޔަތަނެވެ. ހަދާނެ ގޮތް ހުސްވެފާ ތިއްބާ ޝިޔާޒް ކުރިޔަށް ޖެހިލުމަށް ފަހު ބާރަށް ބަނގިގޮވަންފެށިޔެވެ. އެއާއެކު ބަޝީރު ހޭނެތިގެން ވެއްޓިއްޖެއެވެ. ފެންނަމުންދިޔަ ބިރުވެރި މަންޒަރުތައް ގެއްލެންފަށާފިޔެވެ. އަވަސް އަވަހަށް ނަގިލި ނަގާ އިންޖީނު ސްޓާޓުކޮށް ލޯންޗް ދުއްވާލިޔެވެ. ސާޅިސް ފަސްމޭލު ބާރުގާ ދިޔަ ލޯންޗްއާ އެއްވަރަށް ކަނޑުތެރެއިން ނިވިއްދިލަމުން އަލިގަނޑު އަންނަމުންދިޔައެވެ. ލޯންޗްއާ އެއްވަރުކުރުމަށްފަހު އަލިގަނޑު ކަނޑުތެރެޔަށް ގެއްލިގެންދިޔައެވެ. އަވަސް އަވަހަށް ރިސޯޓަށްގޮސް ލޯންޗް އެޅުމަށްފަހު ހޭނެތިފާވާ ބަޝީރު ނަގައިގެން ގެންގޮސް ރިސޯޓްގެ މިސްކިތާ ހަވާލުވެގެންހުރި އިމާމްލައްވާ ރުގްޔާކޮށް ބަޝީރު ރަނގަޅުކުރިޔެވެ.
އޭގެ އަހަރެއްފަހުން ބަޝީރު ވަޒީފާއިން ކެނޑުނެވެ. ދުވަސްކޮޅެއްފަހުން ހަބަރު ލިބިގެންދިޔައީ އޭނާ ގެނބިގެން ނިޔާވި ހަބަރެވެ. ބަޝީރު ނިޔާވި ހަބަރު ލިބުމާއެކު ދަތުރުދިޔަ އެންމެންވެސް ވަރަށް ހިތާމަކުރިޔެވެ. ބަޝީރު ނިޔާވިތާ ދުވަސްކޮޅެއްފަހުން ކާޑެއްދޫ ކައިރި އޮންނަ ފަޅުރަށެއްކައިރިޔަށް މޫނިސްއާއެކު ކުރިން ދިޔަ ދެކުދިންކަމުގާވާ މޫސައާ ޝިޔާޒް މަސްބާނަންގޮސް ތިއްބެވެ. އެރޭ އައި ކޮޅިގަނޑެއްގާ ތަނެއް ދޮރެއް ނުފެންނަވަރަށް ވިއްސާރަ އޮއްސާލާ ކަނޑުވެސް ގަދަވެއްޖެއެވެ. މޫނިސް އޭނާގެ ފޯނުން ޗާޓު ބަލާގެން ލޯންޗް މަޑުމަޑުން ދެ ފަޅުރަށެއްގެ ދޭތެރޭ އޮންނަ ފަޅަކަށް ވެއްދިޔެވެ. މާކަށް ގިނައިރެއްނުވެ ވިއްސާރަ ހުއްޓާލާފިޔެވެ. ހަނދުވަރެއްނެތް ކަޅުފޮއެ އެރޭގާ ކަނޑު މަޑުވެލުމުން ނުކުންނަން ތައްޔާރަށް ފޯނުން ޗާޓުބަލާގެން ތައްޔާރުވަމުންދަނިކޮށް ކައިރީގަ އޮތް އެއް ފަޅުރަށުން އަލިގުޅަޔެއް މައްޗަށްއަރާފިޔެވެ. އެ ދިޔަގޮތައް ދެރަށް ދެމެދަށް އެރުމާއެކު މުޅި ސަރަހައްދު ވަރުގަދަ އަލިގަނޑަކުން ދިއްލާލިޔެވެ. އެއާއެކު ދެން ފެނިގެން ދިޔައީ ދެރަށުގެ އެތެރެ ވަރުގަދަޔަށް ރަތްކުލާންދިޔަތަނެވެ. ހީވަނީ ދެރަށު އެތެރޭގާ އަލިފާންރޯވެފައޮތްހެނެވެ. އިރުކޮޅަކުން އަލިފާން ބޯޅަތައް މައްޗަށް އަރާ އަލިފާން ވެއްޓެމުންދިޔައެވެ. ހީވަނީ އުޑުން އަލިފާން ފައިބަމުންދިޔަހެނެވެ. މަންޒަރު ބަލަންތިއްބާ އިރުކޮޅަކުން ލޯންޗު ކުރިމަތީ ދުރުގާ އޮތް ފަރެއްގެ މައްޗަށް ފިރުކިފާ މީހަކު އަރަމުންދިޔަތަންފެނިގެންދިޔައެވެ. އެމީހާ ކޮޅަށް ތެދުވިވަގުތު އަލިގުޅަޔެއް އެމީހާ މަތިން ދިއްލާލިޔެވެ. އެޔާއެކު އެންމެނަށް ފެނިގެންދިޔައީ ގެނބިގެން ނިޔާވި ހަބަރު ލިބުން ބަޝީރުއެވެ. އޭނާ ހިނިއައިސް ހުރެ އެއްއަތުން ހަނާ އަޅަމުން މޫދަށް ފައިބަންފެށިޔެވެ. އެހިނދު އެންމެންވެސް ބާރު ބާރަށް ބަނގިގޮވާ ކިޔުނު ހެޔޮއެއްޗެއް ކިޔަމުންދިޔައެވެ. އަވަސް އަވަހަށް ލޯންޗް ސްޓާޓްކޮށްލާގެން ބާރު ބާރަށް ގަދަ ކަނޑުތެރެޔަށް ނެރެގެން އަނބުރާ ރިސޯޓަށްދިޔައެވެ. އެ ހާދިސާތަކަށްފަހު އެންމެންވެސް އިމާންތެރިކަން ވަރުގަދަކުރިޔެވެ. ބަރާބަރަށް ނަމާދުކުރަންފެށިޔެވެ. ނަމާދު އެއްގޮތަކަށްވެސް ނާޅައެވެ. ކޮންމެތާކު ހުއްޓަސްމެއެވެ. އެމީހުންނަށް ދިމާވި ހާދިސާތައް ދުވަހަކުވެސް ހަނދާންނުނެތޭނެއެވެ.
- ނިމުނީ -
No comments:
Post a Comment