ހަޔާތަކީ ކުޑަ ވަގުތުކޮޅެކެވެ. މި ދުނިޔެއަށް އަޅުގަނޑުމެން ފޮނުވިފައިވަނީ الله سبحان و تعالىٰ އަށް އަޅުކަން ކުރާށެވެ. ނަމަވެސް މިއަދު އަޅުގަނޑުމެން ތެރެއިން ގިނަ ބަޔަކަށް ވަނީ އަޅުކަން ކޮއްލުމަށް 24 ގަޑިއިރުން އެންމެ 5 މިނިޓްވެސް ނުދެވޭހާ ބިޒީވެފައެވެ.
ނަދީމް އަކީ މުއްސަނދި އާއިލާއަކަށް ނިސްބަތްވާ ކުއްޖެކެވެ. ސްކޫލްގެ މޮޅު ދަރިވަރެކެވެ. ނަދީމްގެ އެންމެ ގާތް އެކުވެރިޔާ ފާރިޝްއަކީ ކިޔެވުމަށް އެހާ މޮޅު ކުއްޖެކަމުގައި ނުވިޔަސް ދީނީ ގޮތަކުން ބަލާނަމަ ވަރުގަ ހިތެއްގެ ވެރިއެކެވެ. އޭނާއަކީ ސްކޫލްގައި ކިޔަވާދޭ މާއްދާ ތަކުން މެދު މިންވަރަކަށް ފާސްވާ ދަރިވަރެކެވެ. ސްކޫލް ނިމިއްޖެނަމަ ގިނައިން އުޅޭނީ އިސްލާމްދީންއާ ބެހޭ ތަރީޙީ މައުލޫމާތު އެއްކޮއް އެ ދަސްކުރުމުގައެވެ. ދެ ރަހްމަތްތެރިން އަބަދުވެސް ދިމާވެއްޖެނަމަ އެކަކު އަނެކަކާ ކުރިމަގު ބިނާ ކުރުމަށް ޙިޔާލް ބަދަލްކުރެއެވެ. މިގޮތުން ނަދީމް އަބަދުވެސް ބޭނުންވަނީ އޭނާގެ އަމިއްލަ ކުންފުންޏެއް ހުޅުވާ މައިބަފައިންގެ ލާރީގާ ނުޖެހި އަމިއްލަ މުއްސަންދިކަމެވެ. ނަމަވެސް ފާރިޝް ބޭނުންވަނީ އެންމެ ކަމެކެވެ. އެއީ އެންމެ މަތީ ފަންތީގެ އިލްމުވެރިއަކަށް ވުމަށްށެވެ.
ދުވަސްތައް ފާއިތުވެގެންގޮސް ދެމީހުންގެ އިމްތިހާވެސް ނިމިއްޖެއެވެ. އެކަކު އަނެކަކު ނަތީޖާ ދައްކާލުމަށް ބައްދަލްކުރިއެވެ. ކޮފީ މޭޒުގައި ޖައްސާލިގޮތަށް ނަދީމް ޖީބުން ފުރުތަމަވެސް ނެގީ އެންމެ ފަހުގެ ފޯނެކެވެ. އަދި ފާރިޝްގާތު އެއީ އެނާގެ މައިންބަފައިން އޭނާގެ ނަތީޖާ ރަނގަޅުވުމުން ދިން ހަދިޔާއެއްކަމަށް ބުނެލިއެވެ. އެޔަށްފަހު ނަތީޖާ ގަނޑު ފާރިޝްއަށް ދައްކާލިއެވެ. ނަދީމްއަށް ވަނީ ހުރިހާ އެއްޗަކުން އޭ ޕްލަސް ލިބިފައެވެ. ފާރިޝްވެސް އޭނާގެ ނަތީޖާ ނަގާ ދައްކާލިއެވެ. ގިނަ މާއްދާތަކުން މެދު މިންވަރަކަށް ފާސްވެފައި ހުރިތަން ފެނުމުން ނަދީމް ހޭންފެށިއެވެ. ނަމަވެސް ފާރިޝްއަށް އެކަމުން އެއްވެސް އަސަރެއް ނުކުރެއެވެ. ހަމަ ޖެހިލައިގެން އިނދެ ކޮފީބޮއެ ނިންމާލި ތަނާހެން ބަންގި ގޮވިއަޑު އިވުނެވެ. ނަދީމް ގާތު ނަމާދަށް ދާން އަންނާށޭ ބުނުމުން އޭނާގެ އަދި އިތުރު ރައްޓިއްސަކު އަންނާތީވެ މަޑުކޮއްލާނެ ކަމަށް ބުނެލިއެވެ. އަދި ފަހުން ނަމާދުކޮއްލާނެކަމަށް ބުނެ ފާރިޝް އެތަނުން ފޮނުވާލިއެވެ.
ނަމާދުކޮއްލައިގެން ފާރިޝް ގެއަށް ދިޔަ މަގުމަތީ ނަދީމްއާ ދިމާވިއެވެ. އަދި ނަދީމް ދަނީ ކޮންތާކަށްތޯ ސުވާލުކޮއްލުމުން ވިޔަފާރީގެ ފުރުސަތެއް ލިބިގެން ވަރަށް އަވަހަށް ބައްދަލްވުމަކަށް ދާ ވާހަކަ ބުނުމަށްފަހު ބާރު ހިނގުމެއްގައި ގޮސް ލޯމައްޗަށް ގެއްލުނެވެ. ފާރިޝް ގެއަށްގޮސް އޭނާގެ މަގްސަދް ހާސިލްކުރުމަށް ބޭނުންވާ މަސައްކަތައިގެން ކުރިއަށް ދިޔައެވެ. ޖެހިގެން އައި ދުވަހު ނަދީމްއާ ދިމާވެގެން ވިޔަފާރީގެ ފުރުސަތަށް ވީ ކިހިނެއްތޯ ސުވާލުކޮއްލިއެވެ. ޖަވާބުގައި ވަރަށް ކާމިޔާބުކަމަށް ނަދީމް ބުންލިއެވެ. އަދި އެއަށް ފަހު އޭނާ ވަރަށް ބިޒީކަމަށް ބުނެ އަވަހަށް ހިނގައިގަތެވެ. ދަވަހަކަށްފަހު ދުވަހެއް ފާއިތުވެގެން ދިޔައިރު ނަދީމް ގެ ޙަބަރުވުންވެސް މަދުވެއްޖެއެވެ. ނަމަވެސް ފާރިޝް އޭނާގެ އެކުވެރިޔާ ފެންނާނެ ދުވަހަކަށް ދިޔައީ އިންތިޒާރުކުރަމުންނެވެ. މަސް ދުވަސް ފާއިތުވުމަށް ފަހު ފާރިޝްއަށް ނަދީމް ފެނުނެވެ. އެކުވެރިޔާ ފެނުމުން ސަލާމް ގޮވާލުމުން ޖަވާބުވެސް ނުދީ ފޯނެއްގައި ހުރެ އަތް ހޫރުވާލާފައި ކާރަކަށް އަރައިގެން ނައްޓާލިއެވެ. މިކަމާ ފާރިޝް ވަރަށް ދެރަވިއެވެ. ނަމަވެސް އެކުވެރިޔާ އަދި އަންނާނެކަމަށަށް އުންމީދުކުރިއެވެ.
ޖެހިގެން އައި ދުވަހު ފާރިޝްއަށް ނަދީމް ފެނުމުން ކައިރިއަށް ގޮސް ސަލާމް ގޮވާލިއެވެ. ނަދީމްވެސް ސަލާމް ބަލައިގަތެވެ. ނަމަވެސް އޭނާގެ ދެލޯ އޭނާ ގެންގުޅޭ ފޯނަކުން ނުނައްޓައެވެ. ކީއްކުރަނީ ތޯ އަހާލުމުން ރުޅިވެރިކަމާއެކު ވިޔަފާރިވެރިންނަށް ޖަވާބުދެނީކަމަށް ބުނެލިއެވެ. ވަގުތު އެހާ ރަނގަޅު ނޫންކަން ފާރިޝްއަށް އެނގިޖެއެވެ. އިތުރަށް ރަހްމަތްތެރިޔާއަށް އުނދަގޫވެދާނެތީ ދަނީކަމަށް ބުނެލުމަށްފަހު ހިނގާގަތެވެ. ތަންކޮޅަކަށް ދެވުނުތަނާހެން ނަދީމް ފާރިޝްއަށް ގޮވާ ގެނެސް ކައިރީގައި ހުރި ކެފޭއަކަށް ވެއްދިއެވެ. ކޮފީތަށި ނުބޮވެނީސް ނަދީމްގެ ފޯނަށް ކޯލްތައް އަންނަން ފަށާފިއެވެ. ނަދީމް ކޯލްތައް ނިންމާލުމަށްފަހު ކުއްލިއަކަށް ދާންޖެހިއްޖެކަމަށް ބުނެލިއެވެ. ކުރިއަށް އޮތީ ވަރަށް ބުރަ ވަގުތުތަކެއް ކަމަށް ބުނެ އަވަސް އަރުވާލާފައި ބިލް ދައްކާލުމަށްފަހު ކެފޭއިން ނުކުމެގެން ދިޔައެވެ. ފާރިޝް އޭނާގެ އެކުވެރިޔާގެ ބިޒީކަން ފެނި އިތުރަށް އޭނާއާ އެހާބޮޑު ގުޅުމެއް ނުބޭއްވުމަށް ނިންމިއެވެ. ކޮފީ މޭޒުން ތެދުވެގެން ކެފޭއިން ނުކުތްތަނުން ފާރިޝްގެ ފޯނަށް ކޯލްއެއްއައެވެ. އެއީ އޭނާ އުންމީދުކުރަމުން އައި ކޯލްއެވެ. އޭނާގެ ސްކޮލަރޝީޕް ހަމަޖެހުމުގެ އުފާވެރި ކޯލްެއެވެ. މަދީނާއަށް ކިޔަވަން ދިޔުމުގެ ފުރުސަތު އޭނާއަށް ލިބުނުކަމުގެ އުފާވެރި ޙަބަރު އެންމެ ފުރުތަމަވެސް ދޭން ބޭނުންވީ އެކުވެރި ނަދީމްއަށްށެވެ.
ފުރަން ފަސް ދުވަސް ވުމުން ނަދީމްއާ ބައްދަލް ކޮއްލަން ގުޅާލިއެވެ. އެތައް ފަހަރަކު ގުޅިއިރުވެސް ނަމްބަރު ހަމަ ބިޒީއެވެ. އެންމެ ފަހު ފަހަރެއްކަމަށް ބަލާ ގުޅާލިތަނާހެން ނަދީމް ފޯނަށް ޖަވާބުދިނެވެ. އުފާވެރި ޙަބަރު ދިނުމުން ތި ވާހަަކަ ފަހުން ތިމަންނަ އަޑުއަހާނަމޭ ތިމަންނަ މިދަނީ ވަރަށް އަވަހަށް ބައްދަލްވުމަކަށްށޭބުނެ ފޯން ކަނޑާލިއެވެ. ފާރިޝް ވީ ދެރައިން ނަދީމްގެ ނަމްބަރު ފޯނުން ފުހެލިއެވެ. އަދި ފުރުމުގެ ކުރިން ގަންނަން ބޭނުންވާ ތަކެތި ގަތުމަށް ބޭރަށް ނުކުތުމަށް ހިނގައިގަތްތަނާހެން ބާރު އަޑުފައް ގަނޑެއް އިވިގެން ދިޔައެވެ. ދުވެފައި ނުކުތް ފާރިޝްއަށް ފެނުނީ އޭނާގެ އެކުވެރި ނަދީމް ލޮރީއެއް ދަށުވެ އެކްސިޑެންޓްވެފާ އޮއްވާއެވެ. ލޮރީ ޑްރައިވަރު ބޮލުގައި އަތް އަޅައިގެން ހުރެ ނަދީމް އައީ ފޯނުގައި ހުރެ ސައިކަލް ދުއްވަމުންކަމަށް ބުނަމުން ދިޔައެވެ. މަންޒަރު ބަލަން ހުރި ފާރިޝް އޭނާގެ އެކުވެރިޔާގެ ވިންދު ހުރިތޯ ބެލުމަށް އެދުނެވެ. ލޮރީ ޑްރައިވަރު ލޮލުން ކަރުނަ ފައިބަމުން ނަދީމްގެ އެއްވެސް ވިންދެއް ނެތް ވާހަކަ ބުނެލިއެވެ. ހިތާމައިން ފޯވެފައި ހުރި ފާރިޝްއަށް ނަދީމްގެ ދިރިއުޅުން ވެގެން ދިޔައީ އަގުހުރި ފިލާވަޅަކަށްށެވެ.
No comments:
Post a Comment