އަނިޔާވެރިން ތިބެނީ އެކި ސިފަސިފާގައެވެ. ބައެއްފަހަރު އެއީ ދުރުހިލޭ މީހަކަށްވެދާނެއެވެ. އަދި ބައެއްފަހަރު އެއީ ގާތްމީހަކަށްވެސް ވެދާނެއެވެ. އެފަދަ އަނިޔާވެރިޔެއްގެ ސަބަބުން ކުރިމަގުގާ ބޮޑު ލަދެއްގާ ބެދޭ މީހުން މަދެއްވެސް ނޫނެވެ.
މަދީހާގެ އުމުރަކީ 8 އަހަރެވެ. މަދީހާއާ އޭނާގެ މަންމަ ދިރިއުޅެމުން ދަނީ ހިތްފަސޭހަ މާހައުލެއް ލިބިފައިވާ ރީތި ރަށެއްގައެވެ. މަދީހާގެ ބައްޕަވަނީ މަދީހާގެ އުމުރުން ފަސްއަހަރުގާ ނިޔާވެފައެވެ. މަދީހާމެންގެ ކަންތަ އެހިސާބުން ބަލަހައްޓަމުންދަނީ މަދީހާގެ ބޮޑުބޭބެ ބަކުރުއެވެ. ބަކުރަކީ މަސްވެރިޔެވެ. ހީވާގި މީހެކެވެ. ބަކުރު ރަށް އަންނަ ކޮންމެ ފަހަރަކު އެގެޔަށް މަސްގެނެސް ކަނޑާދީހަދައެވެ. އެއަށްފަހު މަދީހާއާއެކު ވަގުތު ހޭދަކުރެއެވެ. ފެންވަރާ ރީތިވެލާގެން އައިސް މަދީހާ ގޮވައިގެން ބޭރަށްގޮސްހަދައެވެ. މިކަމާ މަދީހާ މަންމަ ހުންނަނީ ވަރަށްވެސް އުފާވެފައެވެ. އަދި ބަކުރަށް ކުރާ އިތުބާރު ލައްކަ ބޮޑުވެގެންދިޔައެވެ.
އަހަރު ތަކަކަށްފަހު ބަކުރު ހައްޖަށްގޮސްފާއައެވެ. މަދީހާގެ އުމުރަކީ މިހާރު 13 އަހަރެވެ. ބަކުރު އަންނަމުން ބައިވަރު ހަދިޔާ ދެމައިންނަށް ގެނައެވެ. ގިނައީ މަދީހާއަށް ގެނައި އެއްޗިއްސެވެ. ރަން ކެވެއްޔާ ފަށެވެ. ހަމަ އެގޮތުން ރަންފަށާ ކެވެލި މަދީހާ މަންމައަށްވެސް ދިނެވެ. ބަކުރު ވަރެއް އެދަމައިންނަކަށް ހަމަ ނެތެކޭ ބުންޏަސް ގޯހަކަށްނުވާނެއެވެ. މިހެން ދުވަސްތައް ގުނަމުންދަނިކޮށް ބަކުރާ އޭނާގެ އަނބިމީހާއާ ދެމީހުން ކުއްލިގޮތަކަށް ވަރިވެއްޖެއެވެ. ބަކުރުގެ ހިތާމާގަ އެންމެ ބޮޑަށް ބައިވެރިވީ މަދީހާގެ މަންމައެވެ. ބަކުރުއާ ވަރަށްވެސް ގާތްކޮށް މަންމަ އުޅެންފެށިއެވެ. ރޭގަނޑު އެތައް ވަގުތެއް ވާހަކަ ދެއްކުމުގާ ޖޯލީގާ ބަކުރާ މަދިހާގެ މަންމަ ހޭދަކުރަންފެށިއެވެ. މިކަން މަދީހާއަށް ފާހަގަވެ ބަކުރު ގިނައިން އެގެއަށް އައިސް އޮންނާތީ ވަރަށް ހިތްހަމަޖެހުނެވެ.
އެއްދުވަހެއްގެ ހަވީރު މަދީހާ ސްކޫލްއިން ގެއަށް ވަރަށް ބޮޑަށް ބަލިވެގެން ގެނައެވެ. އެދުވަހަކީ މަދީހާގެ މަންމަ ކައިރި ރަށަކަށް ގޮސްފާ އިރުއޮއްސެންވާއިރަށް އަންނަން އޮތްދުވަހެވެ. އެދުވަހު މަދީހާ ގެޔަށް ގެނެވުނުއިރު ގޭގާ ބަކުރު އުޅެއެވެ. ބަކުރާ ހަވާލުކުރުމަށްފަހު ސްކޫލުން ފޮނުވިމީހާ އަނބުރާ ދިޔަތާ މާ ގިނައިރުތަކެއްނުވެ މަދީހާ އަނބުރާގަތެވެ. އެވަގުތު ބަކުރު މަދީހާ ނަގާގަނެގެން ކޮޓަރިއަށް ގެންދިޔައެވެ. އަދި އެނދުގާ ބޭއްވުމަށްފަހު މޫނުގާ ފެން އުނގުޅިޔެވެ. އަދި މަދީހާ ހޭއަރުވަން ވަރަށް މަސައްކަތްކުރިޔެވެ. އެވަގުތަކީ މަދީހާގެ މަންމައަށް ގެޔަށް ވަދެވުނު ވަގުތެވެ. އެނދުގާ ބޭއްވިފާއޮތް މަދީހާގެ ކަނައަތުގާ ބަކުރު އަތްލާގެން އިން ގޮތް ނުބައިކޮށް މަދީހާގެ މަންމައަށް ފެނިގެންދިޔައެވެ. ބަކުރު އޭނާ ދަރިފުޅުގެ އުރަމަތީ އަތްލައިގެން އިންފަދައެވެ. އެހިނދު އަޑުގެ ނެތްކޮޅަށް ބަކުރާ ދިމާލަށް ހަޅޭއްލަވާގަތެވެ. އަދި ހެއްދެވި ނުހެއްދެވި ބަކުރާދިމާލަށް ގޮވަމުން މީހުން އެތަނަށް އެއްކުރިޔެވެ. ކިހިނެއްވެގެންތޯ ގިނަ މީހުން ސުވާލުކުރަންފެށުމުން މަދީހާ މަންމަ ބަކުރު އޭނާގެ ދަރިފުޅު ގަޔަށްއެރި ކަމުގެ ތުހުމަތުކުރިޔެވެ. އެހިނދު އެއްވެފާ ތިބި އެންމެން ބަކުރު ގައިގާ ހިފާގަނެ ތަޅާގަތެވެ. ބިންމައްޗަށް ވައްޓާލާ ފައިންތަޅާ ވެއްޔާލާ މޮޑެލިޔެވެ. އެވަގުތަކީ މަދީހާވެސް ހޭއެރި ވަގުތެވެ. ވެގެން މިއުޅެނީ ކީއްކަން އެކުއްޖާއަކަށްވެސް ނޭނގެއެވެ. ފެނުނީ މީހުންތައް މީހެއް ގައިގާ ތަޅާތަނެވެ. ބަކުރުކަން އެނގުމުން މަދީހާ ދުވެފާގޮސް ބަކުރުގައިގާ ބައްދާގަނެ އޭނާގެ ބުރަކަށިން ބަކުރު ދިފާއުކުރިޔެވެ. އެހިނދު މީހުންތައް ދުރަށް ޖެހެންފެށިއެވެ. މަދީހާ އައިސްފާހުރި ރުޅިން އެންމެނާ ދިމާލަށް ހަޅޭއްލެވިޔެވެ. ބަކުރު ގައިގާ ތެޅީ ކީއްވެތޯ އެހިއެވެ. އެވަގުތު މަދީހާ މަންމަ ހުރިހާ އެއްޗެއް ކިޔާދިނެވެ. މަންމަ ކިޔާދިނީ ތެދެއްތޯ މަދީހާ ބަކުރާ ސުވާލުކުރިޔެވެ. ބަކުރު ކަން ހިނގިގޮތް ރީއްޗަށް ކިޔާދިނެވެ. އަދި ދުވަހަކުވެސް މަދީހާ ގަޔަކު އެފަދަ ނިޔަތެއްގާ އަތްވެސް ނުޖައްސާނެކަމަށްބުނިއެވެ. ބަކުރުގެ ބަސް ގަބޫލްކޮށް މަދީހާއަށް ކިޔުނު އެއްޗެއް އޭނާގެ މަންމައާ ދިމާލަށް ކިޔާލިޔެވެ. އަދި އެއްވެފާ ތިބި މީހުންވެސް އެތަނުން ދިޔުމަށް އެނގިޔެވެ. ބަކުރުވެސް ތެދުވެގެން ގައިން ވެލި ފޮޅާލުމަށްފަހު އެގެއިން ނުކުމެގެންދިޔައެވެ.
ރަށުތެރޭގާ ބަކުރުގެ ނަން މިހާރުވަނީ ވަރަށް ބޮޑަށް ވެއްޔާލާ މޮޑެވިފައެވެ. ބަކުރަކީ ކުޑަކުދިންނާ ބެހޭ މީހެއްކަން މުޅި ރަށުގާވަނީ ފެތުރިފައެވެ. މަގުމަތިން ބަކުރު ފެނުމުން ބަކުރަށް އަނިޔާކުރާމީހުންވެސް މަދެއްނޫނެވެ. ދުވަސްގަނޑަކަށްފަހު ބަކުރު ޖަލަށްވެސް ގެންދިޔައެވެ. ތިން އަހަރަށްށެވެ. އެތިންއަހަރު ވެގެންދިޔައީ މަދީހާއާ އޭނާގެ މަންމައަށް ވޭންދެނިވި ތިން އަހަރަށްށެވެ. ކާނެ އެއްޗެއް ގިނަފަހަރަކު ނުލިބެއެވެ. ގާތްތިމާގެ މީހުންނާ ރަހްމަތްތެރިންގެ އަޅާލުމެއްނުލިބެއެވެ. އަދި ނުވިތާކަށް މަދީހާގެ ނަން ދިޔައީ ރަށުތެރޭ ކިލަނބުވަމުންނެވެ. މަދީހާ ޖެހެނީ އިސްޖަހާލައިގެން ރަށުތެރޭ ހިނގާށެވެ. މީހަކާ އަނގައިން ބުނާކަށްވެސް ނުކެރެއެވެ. އެންމެ މީހެއް ތަނެއް ދޮރެއް ބަލާނުލާ ކުރި ކަމެއްގެ ސަބަބުން ދެފަރާތަށްވެސް މިވަނީ ފޫނުބެއްދޭފަދަ އަނިޔާތަކެއްލިބިފައެވެ. ހަގީގަތް މިއަދު ކިތަންމެ ފަހަރަކު ކިޔާދިނަސް އެކަން އެކަކުވެސް ގަބޫލްއެއްނުކުރާނެއެވެ.
- ނިމުނީ -
No comments:
Post a Comment