މާތް ﷲ އެކި މީހުންނަށް އެކި އިމްތިހާން ޖައްސަވަނީ އެކި ގޮތްގޮތައްށެވެ. އެއްބަޔަކު ނިކަމެތިކަމުގައެވެ. އަނެއްްބަޔަކު މުއްސަނދިކަމުގައެވެ. މި ދެގޮތުން އިމްތިހާންކުރެވޭ މީހާގެ ނިމުން ހެޔޮގޮތުގާ ހޯދުންވަނީ އެމީހާގެ އަތްމަތީގައެވެ.
ހަސަންކޮއެއަކީ ނިކަމެއްޗެކެވެ. އޭނާ ދިރިއުޅެނީ ރަށުގެ އަތިރިމަތީ ހަދާފާވާ އޭނާގެ ފަން ޖިފުޓީގައެވެ. އާމްދަނީ ހޯދުމަށް ކުރާ މަސައްކަތަކީ މީހުންނަށް ރުއް ކަނޑާދިނުމާ ކެޔޮކެނޑުމުގެ މަސައްކަތެވެ. ހަސަންކޮއެ ގެއާ މާކަށް ދުރުނޫން ހިސާބެއްގާ ހުންނަނީ އަބްދުބެއްޔާ ދިރިއުޅޭގެއެވެ. އަބްދުބެއްޔާއަކީ އުމުރުން ދުވަސްވީ އެކަނިމައި އެކަނީ އެގޭގާ ދިރިއުޅޭ މީހެކެވެ. ދަރިންވަނީ ބޮޑެތިވެ މީހުންނާ އިނދެގެން އެކި ދިމަދިމާލަށް ގޮސްފައެވެ. ނަމަވެސް އަބްދުބެއްޔާގެ ގެޔަކީ ތިޔާގި ގެޔެކެވެ. އެކި ވައްތަރުގެ ރުއް ގަސްތަކުން ފުރިފާވާ ގެޔެކެވެ. ހިކަނދިފަތާ ކެޔޮގަސް އަދި ބިލިމަގު ގަހާ ރާނބާފަތްގަހުން މުޅި ގޭތެރެހެންވަނީ ޒީނަތްތެރިވެފައެވެ. ކޮންމެ ދުވަހަކުވެސް ހަސަންކޮއެ އެގެޔަށް ގޮސް އަބްދުބެއްޔާއަށް ކެޔޮކަނޑާދީހަދައެވެ. އަދި އެކި ކަންތަކުގާ އެހީވެއެވެ. ތެދުވެރިކަމާއެކު އަބްދުބެއްޔާ ގެއިން ކަނޑާ އެއްޗެއްނަމަ ގެންގޮސް ބޯޓަށްލާދެއެވެ. މިކަމާ އަބްދުބެއްޔާ ހުންނަނީ ވަރަށްވެސް ހިތްހަމަ ޖެހިފައެވެ.
އެހެން ދުވަސް ދުވަހެކޭވެސް އެއްގޮތައް މިއަދުވެސް ހަސަންކޮއެ އަބްދުބެއްޔާގެ ގެޔަށްދިޔައެވެ. ހަސަންކޮއެ އެގެޔަށްވަދެ ތިން ފަހަރު ސަލާމް ގޮވާލުމަށްފަހު ޖަވާބު ނުދިނުމުން އެގެއިން ނުކުންނަން ހިނގައިގަތެވެ. އެހިނދު ގޭތެރޭން މީހަކު ކެއްސާއަޑު އިވިގެން އަނެއްކާވެސް ސަލާމް ގޮވާލިޔެވެ. އެއާއެކު އެތެރެއިން އަބްދުބެއްޔާ ސަލާމް ބަލައިގަނެ އެތެރެޔަށް އައުމަށް ބުނެލިޔެވެ. ހަސަންކޮއެ ވަނުމާއެކު އަބްދުބެއްޔާ އެދުނީ އޭނާ ގޮވައިގެން މަރުކަޒަށް ގޮސްދިނުމަށްށެެވެ. ހަސަންކޮއެގެ އެހީއާއެކު އަބްދުބެއްޔާ މަރުކަޒަށް ގެންދިޔައެވެ. އަދި މަރުކަޒުގާ ބޭއްވުނެވެ. އެއަށްފަހު މަރުކަޒު ފަރާތުން އޭނާގެ ދަރިންނަށް އެންގިޔެވެ. އަބްދުބެއްޔާގެ ދަރިން އަންނަންދެން އަބްދުބެއްޔާގެ ހުރިހާ ކަމެއް ބެލެހެއްޓީ ހަސަންކޮއެއެވެ. ނަމަވެސް ހަސަންކޮއެއަށް އެ ދަރިންގެ ފަރާތުން ޝުކުރުގެ ބަހެއްވެސް ނުލިބުނެވެ. ލިބުނީ މަލާމާތެވެ. ހަސަންކޮއެ އުޅެނީ މަކަރުން އެމީހުންގެ ބައްޕަގެ މުދާ ބޭނުންވެގެންކަމެވެ. ގިނަދުވަސްތަކެއްނުވެ އަބްދުބެއްޔާ މާލެ ގެންދެވުނެވެ. އަބްދުބެއްޔާ ނެތްތާނގަ އަބްދުބެއްޔާ ގެޔަށް ވަންނަ ވަގުން ފަހައިގަތުމަށް ހުށިޔާރުވެ އެގައަށް ފާރަލައިގެން ހުންނަނީ ހަސަންކޮއެއެވެ. ކޮންމެ ދުވަހަކުވެސް ވަގުން އެގެޔަށް ވަނުމަށް ދިމާކުރެއެވެ. ނަމަވެސް ހަސަންކޮއެ ފެންނަ އިރަށް ޖެހިލުންވެއެވެ. ހަސަންކޮއެއަކީ ނިކަމެއްޗެއްކަމަކު ވަރަށް ބާރުގަދަ މީހެކެވެ.
ދެ ހަފްތާ ފަހުން އަބްދު ބެއްޔާ ރަށަށް ގެނެވުނެވެ. ނަމަވެސް އަބްދުބެއްޔާ ބެހެއްޓީ އޭނާގެ ދަރިޔެއް ކައިރީގައެވެ. ހަސަންކޮއެއަށް ކާއެއްޗެއް ދިއްކޮށްލާ މީހާ ނެތުމުން ވަރަށްވެސް ދަތިވާންފެށިޔެވެ. މިހެން އުޅެމުން އެއްދުވަހަކު ރަހްމަތްތެރިޔަކު ދިން މަހެއް ގަރުދިޔަ ކައްކާލަން ހިތައްއެރިޔެވެ. ނަމަވެސް ހިކަނދިފަތްކޮޅެއް ބޭނުންވާތީ އަބްދުބެއްޔާ ގޯއްޗަށް ވަނުމުގެ ހުއްދަ ހޯދުމަށް އަބްދުބެއްޔާއާ ބައްދަލްކުރިޔެވެ. އަބްދުބެއްޔާ ހަސަންކޮއެއަށް ހުއްދަދިނެވެ. ކޮންމެ ދުވަހަކުވެސް ވަދެ ބޭނުންވަރަކަށް ފަތް ނަގާށެވެ. ހަސަންކޮއެ ވަރަށް އުފަލުން ގޮސް އެގެޔަށްވަނެވެ. ވަތްއިރު ގޭގެ މޭޒުމަތީ ކުޑަ ދޮންކެޔޮ އަރިޔެއްއޮތެވެ. ދޮންވެ އެހާމެ މީރު ފޮނިވަސްދުވައެވެ. ވަރަށްވެސް ކާހިއްވިއެވެ. އެހާވެސް ބަނޑުހައެވެ. ނަމަވެސް އެވަގުތު ނިއުމަތުން ފުރިގެންވާ ސުވަރުގޭގާ އޭނާއަށްވާނެ ނިއުމަތްތަކުން ހަނދާންކުރަންފެށިޔެވެ. އެއަށްފަހު ގޮސް ހިކަނދިފަތްކޮޅެއް ބިނދެލައިގެން ނުކުމެގެންދިޔައެވެ. ތިންދުވަސްފަހުންވެސް ހަމަ އެގެޔަށް ހިކަނދިފަތްކޮޅެއް ބަލާ ވަންނަންޖެހުނެވެ. މިފަހަރު އަބްދުބެއްޔާ ބުނެގެންނެވެ. ވަތްއިރު މޭޒުމަތީގާ ދޮންވެ ފައްކާވެފާވާ ބޮޑު ދޮންކެޔޮގަނޑެއް އޮތްގޮތައްއޮތެވެ. ވަރަށްވެސް މީރު ފޮނިވަސްދުވައެވެ. ހަސަންކޮއެ އެދުވަހު ހުރީ އެއްވެސް އެއްޗެއްވެސް ބަނޑަށްނުލައެވެ. ނަމަވެސް ކެތްތެރިކަމާއެކު ސުވަރުގޭގާ އޭނާއަށްވާނެ ނިއުމަތްތައް މަތިން ހަނދާން ބެހެއްޓިއެވެ. އެއަށްފަހު ކުރަން އައި ކަންތައްކޮށް އެގެއިން ނުކުތެވެ.
އެއްމަސްދުވަސްފަހުން އަބްދުބެއްޔާ ނިޔާވެއްޖެއެވެ. އެ އޯގާތެރި މީހާ ނިޔާވުމުން އެންމެ ބޮޑަށް ހިތާމަކުރީ ހަސަންކޮއެއެވެ. އަބްދުބެއްޔާ ޖަނާޒާ ކަންތައް ނިންމާފަ އައިސް ގެއަށްވަނުމާއެކު މީހަކު އައިސް ސަލާމްގޮވާލިޔެވެ. ހަސަންކޮއެ ސަލާމް ބަލައިގަނެ އެތެރެޔަށް އެމީހަކު އައުމަށް ދައުވަތުދިނެވެ. އެތެރެޔަށްވަނީ ރަށު ކޯޓުގެ މީހެކެވެ. އޭނާ އަތުގާ ސިޓީއެއްއޮތެވެ. އެސިޓީގާވަނީ ހަސަންކޮއެ ކޯޓަށް ހާޒިރުވުމަށްށެވެ. ވަރަށް ހާސްވެފަ ވެގެން މިއުޅެނީ ކީއްކަން ނޭނގިހުރެ ކޯޓަށް ގޮސް ވަނުމުން ހަސަންކޮއެ ފަހަތުން އަބްދުބެއްޔާގެ އާއިލާ އެންމެންވަނެވެ. އިރުކޮޅަކުން ގާޒީ ހާޒިރުވިޔެވެ. ގާޒީ އަތުގާ ގަނޑެއްއޮތެވެ. އެ ގަނޑު ހުޅުވާލުމަށްފަހު ކިޔަންފެށިޔެވެ.
" މިއީ އަހަރެން (އަބްދުބެއްޔާ) ގެ ވަސިއްޔަތެވެ. މިއީ މަރްހޫމް އާދަމްކޮއެގެ ދަރި ހަސަންކޮއެއަށް އަހަރެންގެ ގޯތިން އޭނާ ބޭނުން އެއްޗެއް ނެގުމުގެ ހުއްދައެވެ. އަހަރެން ނެތް ތަނުގާ އެއީ އޭނާގެވެސް ތަނެއްކަމަށް ބަލައިގެން އެތަނަށް ކަމޭހިތާ އެތަނުން ލިބޭ އެއްޗަކުން ކައިބޮއެ ހަދައިގެން ހަސަންކޮއެ ދިރިހުރިހާ ދުވަހަކު އުޅެންވީއެވެ. މިކަމުގާ އަހަރެންގެ ދަރިންނަށް ބުނެލަންއޮތީ ކަލޭމެން މިކަމަށް އެއްބާރުލުން ސަބަބަކީ ހަސަންކޮއެއަކީ އިހްލާސްތެރި މީހެކެވެ. ބައްޕަގެ އެއްވެސް މުދަލަކުން ވައްކަންނުކުރެއެވެ. ބައްޕަކައިރީ އެއްޗެއްހި ދޭންވެސް ނުކިޔައެވެ. މިއަދު މިކަމަށް ތިޔަކުދިން އެއްބާރުލުން ދޭނެކަމަށް އުންމީދުކުރަމެވެ. "
ވަސިއްޔަތް ކިޔާ ނިމުމަށްފަހު ގާޒީ ހުރިހާ އެންމެންގެ ސޮޔާ އިނގިލީގެ ނިޝާންނެގިއެވެ. އެއަށްފަހު އެންމެން ފޮނުވާލިޔެވެ. ހަސަންކޮއެ އެންމެ ފުރުތަމަވެސް ކޯޓުން ނުކުމެގެން ދިޔައީ މިސްކިތައްށެވެ. ގޮސްޖެހީ ޝުކުރުގެ ސަޖިދައެވެ. މިއަދު އޭނާ ބެހެއްޓި ހެޔޮކަމުގެ ނަތީޖާގެ ފޮނިކަން އޭނާއަށްވަނީ ލިބިފައެވެ.
- ނިމުނީ -
No comments:
Post a Comment