އެ ބައްޔެއްގެ ވާހަކަ އިވުމުން އެންމެންވެސް ބިރުގަނެއެވެ. އެބައްޔެއް ޖެހި އެތައް ބަޔަކު މިދުނިޔެއާ ވަކިވެއްޖެއެވެ. އެއްވެސް ހުއްޓުމެއްނެތި އެ ބަލި މިދަނީ އަދިވެސް ފެތުރެމުންނެވެ. ސަރުކާރުތަކުން އެތައް ބާވަރު ފިޔަވަޅުތަކެއް އެބަލިން ރައްކާތެރިވުމަށް އަޅާފިޔެވެ. ނަމަވެސް މަދު ބޯހަރު ބަޔެއްގެ ސަބަބުން އެބަލި ފެތުރުން އިތުރުވާން ފުރުސަތުލިބެއެވެ.
އަލީއާ އޭނާގެ ރަހްމަތްތެރިންނަކީ އަބަދުވެސް މަޖަލުގާ އުޅެމުން އަންނަ ބަޔެކެވެ. ދީނީ އެއްވެސް ކަމަކަށް ސަމާލުކަމެއްނުދެއެވެ. ނަމާދަށް ގޮވިޔަސް އަޅާވެސްނުލައެވެ. ކުޅިވަރާ މަޖަަލަށް އެމީހުންވަނީ ގެއްލި ހުސްވެފައެވެ.
ދެހާސް ވިހި ފެށުމާއެކު އެމީހުންގެ ސަކަރާތްޖެހުން އާ އުސްމިންތަކަކަށް ނެގުން ގަސްދުކުރިޔެވެ. އެގޮތުން ދަތުރުތައް ދިޔުން ގިނަކުރަން ރޭވިޔެވެ. ނަމަވެސް އިވެންފެށި ހަބަރެއްގެ ސަބަބުން އެމީހުން ދަތުރު ފަސްކޮށްލަން ޖެހުނެވެ. ޗައިނާގާ ނުރައްކާތެރި ރޯގާއެއް ފެތުރި އެތައް ބަޔަކު މަރުވެ ދުނިޔެއަށް އެ ފެތުރެންފެށި ވާހަކައެވެ. މީސް މީޑިޔާގާ މީހުން މަރުވެގެން ވެއްޓޭ ވީޑިއޯތައް ގިނަވާންފެށިޔެވެ. އަދި ހޮސްޕިޓަލްތައް ތޮއްޖެހިފާވާ ވީޑިއޯތައްވެސް އަންނަންފެށިޔެވެ. ނަމަވެސް އަލީއާ އޭނާގެ ރައްޓެހިންނަށް މިކަންވީ މަޖާ ކަމަކަށްށެވެ. އެތަނުން އެކަކު ވަގުތުން މީސްމީޑިޔާގާ ތިމަންނައަށް ކޮރޯނާ ޖެހޭނަމައޭ ކިޔާފަ ސްޓެޓަސް އަޕްޑޭޓްއެއް ޖަހާލިޔެވެ. އެޔާއެކު މީހަކު އޭނާއަށް އެއީ ކީއްވެތޯ ސުވާލުކޮށްލުމުން އޭނާ ބުނީ އެއީ ސަޅިކަމަކަށްވާނެތީއެވެ. އެ ސްޓެޓަސްގެ ސަބަބުން އަލީގެ ރަހްމަތްތެރިޔާއަށް މަލާމާތާ ނުރުހުން ލިބެން ފެށުމުން އޭނާ އެ ސްޓެޓަސް ނެގިޔެވެ. އެކަމާ އަލީމެން ހޭންފެށިޔެވެ.
ދުވަސްކޮޅެއްފަހުން ސަރުކާރުން ވަރަށް ވަރުގަދަ ފިޔަވަޅުތަކެއް މި ބަލިމަޑުކަމާ ވިދިގެންއެޅިޔެވެ. އެގޮތުން ގިނަ ގިނައިން އަތްދޮވުމާ ބަލީގެ އަލާމާތްތައް ފެނިއްޖެނަމަ އަމިއްލަޔަށް ކަމާބެހޭ ފަރާތައް އެނގުމާ ބޭރަށް ނުނިކުމެ އުޅުމަށް އިލްތިމާސްކުރިޔެވެ. އެއިރުގާ އަލީމެން ތިބީ ރިސޯޓެއްގައެވެ. ގެސްޓުންނާއެކު ވަގުތު ހޭދަކޮށް ސަކަރާތުގައެވެ. ސަކަރާތުގެ ތެރޭ ތިއްބާ އެތަނުން ގެސްޓަކު ވަރަށް ގަދަޔަށް ކިނބިހި އެޅުމަށްފަހު ނޭފަތް ފޮޅާލިޔެވެ. އެއަށްފަހު އޭނާގެ ކޮޓަރިޔަށް ދިޔައެވެ. އަލީގެ ކޮނޑުގާ އޭނާގެ ރައްޓެއްސަކު ކޮއްޓާލުމުން އެކަމާ ހާސްނުވުމަށް ބުނިޔެވެ. އަލީމެންނަކީ ޒުވާނުންކަމާ ޒުވާނުންނަށް ވައިރަސް ނާރާނެކަމަށް ބުނެ އޭނާގެ ރައްޓެހި މީހާ ހަމަޖައްސާލިޔެވެ.
ގެސްޓުންނާއެކު ވަގުތު ހޭދަކުރުމަށްފަހު އަލީމެން މާލެއައެވެ. އަލީ އޭނާގެ ރައްޓެހިންނަށް އަލްވަދާއު ކިޔުމަށްފަހު ގެޔަށްގޮސްވަނެވެ. އަރާމުކޮށްލަން ޖައްސާލިތަނުން ނިދިއްޖެއެވެ. އިރުކޮޅަކުން އަލީ ހޭލާގެން ކާރީގަ ހުރި ސުޕަމާޓްއަށްދިޔައެވެ. އަލީ ހުރީ ރޯގާ ވައްތަރު ވެފާކަމުން އެތަނުން ޓިޝޫއާ އެހެނިހެން ތަކެތި ގަތުމަށްފަހު ކައުންޓަރަށްގޮސް ފައިސާ ދައްކަން ހުއްޓާ ކިނބިސެއް އެޅުނެވެ. ކައުންޓަރުގާ ހުރި ކުއްޖާ އަލީ މާސްކްއަޅާން އުޅުމަށް އިލްތިމާސްކުރުން އެކުއްޖާއާ ދިމާލަށް އަލީ އެއްޗެއްހި ގޮވުމަށްފަހު އެތަނުން ނުކުމެ ގެޔަށް ދިޔަ މަގުމަތީ ކިނބިހިތައް ފުލުފުލުން އެޅެން ފެށިޔެވެ. ޓިޝޫތަކުން ނޭފަތް ފޮހެ ފޮހެފާ މަގުމައްޗަށް އުކަމުން އަދި ޓިޝޫ ހުސްވުމުން ޖެހުނު ތަނެއްގާ އަރުދަފުސް އުނގުޅާ ފޮޅަމުން އަލީ ގޮސް ގެޔަށްވަނެވެ. ވަތްގޮތައްވަދެ އަތް ޓިޝޫއަކުން ސާފުކޮށްލުމަށްފަހު ނުވެސްދޮވެ ކާތަކެތީގާ އަތްލާހެދިޔެވެ. ބަނޑުފުރާލާގެން އަލީ މަގުމައްޗަށްނުކުމެ ކޭފޭއަކަށް އޭނާގެ ރައްޓެހިން ގޮވައިގެންގޮސް ވަގުތުތައް ހޭދަކުރުމަށްފަހު ގެޔަށް އައިސް ވަތްތަނުން ގައިގަ ވަރުދާކަހަލަ ގޮތެއް ވާންފެށިޔެވެ. އަލީ އަވަހަށް ގޮސް އެނދުގާ ޖައްސާލުމާއެކު ނިދިއްޖެއެވެ.
ޖެހިގެން އައި ދުވަހު އަލީ އުޅުނީ ބޯއަނބުރާފަ ހޮޑުލެވޭތީޔެވެ. ހުންވެސް އެހާވަރަށް ގަދަޔެވެ. ބޭރަށްވެސް އެހާވަރަށް ހިނގައެވެ. ނޭވާލާންވެސް އުނދަގުލެވެ. ހީވަނީ މޫދަށް މީހާ ގެނބިގެންއުޅޭހެނެވެ. ފުއްޕާމޭގާ ފުޅިތޮށި ހެރޭފާޑު ތަދެއް ހުރެއެވެ. ކަންބޮޑުވެފާހުރި އަލީ ކާރަކަށް ގުޅާގެން ހޮސްޕިޓަަލަށްދިޔައެވެ. އަލީ ބެލި ޑޮކްޓަރަށްވެސް ވާނުވާ ނޭނގިގެން އަލީ އެޑްމިޓްކުރިޔެވެ. މިހެން އޮއްވާ އަލީ ބަލާ ރައްކާތެރި ހެދުން އެޅި ހަތަރު މީހަކުއައެވެ. އެމީހުން އަލީ ވަކިން ތަނަކަށް ގެންގޮސް ބަންދުކޮށް ފަރުވާދޭންފެށިޔެވެ. ނަމަވެސް އަލީގެ ހާލު ދިޔައީ ގޯހުން ގޯހަށްށެވެ. މިހާލުގާ އޮއްވާ ދެން އިވެންފެށި އަދި މާ ބިރުވެރި ހަބަރެކެވެ. އަލީވަނީ ކޮރޯނާއަށް ޕޮސިޓިވްވެފައެވެ. އަދި އަލީމެންނާއެކު މަޖާކުރި ގެސްޓްމީހާ މަރުވި ހަބަރެވެ. އެމީހާ މަރުވެފާވަނީ ކޮރޯނާ ވައިރަސް ޖެހިގެންނެވެ.
ދުވަސްގަނޑަކަށްފަހު އަލީ ކޮންމެވެސް ވަރަކަށް ހަމަޔަކަށް އެޅުނެވެ. ނަމަވެސް އަލީއާ ގާތްވެލާނެ މީހަކުވެސް ނުވެއެވެ. މުޅި ހޮސްޕިޓަލްވަނީ ފުރި ބާރުވެފައެވެ. ފެންނަމުންދަނީ ބިރުވެރިކަމާ ނާމާންކަމެވެ. އެތައް ބަޔަކުވަނީ އެޑްމިޓްކުރެވިފައެވެ. ގިނަ މީހުން ތިބީ ތަޅުންގަނޑުގައެވެ. ވަރަށްވެސް މަންޒަރު ހިތްދައްޗެވެ. ކުޑަކުދިންނާ އަންހެނުން ރޮނީއެވެ. ބަޔެއް މައިން އެމީހުންގެ ފުރާނަނެތް ދަރިންގެ މަސްގަނޑުގާ ބައްދާގެން ތިއްބެވެ. އެ އެންމެނަށް ފަރުވާދޭނެ ގާބިލްކަންވެސް މިވަނީނެތިފައެވެ. މި މަންޒަރު ބަލަން އަލީ އޮންނަންޖެހުނީ ކަރުނަ ބާލަބާލައެވެ. މިއީ އޭނާގެ ސަބަބުން ވީކަމެއްކަން މިއަދު އޭނާއަށް އެނގެންފެށިޔެވެ. މިކަމާ އޭނާ ހިތާމަކޮށް ކަރުނައަޅާ ރޯންފެށިޔެވެ. ނަމަވެސް މިއަދު މިވަނީ ވަގުތު ފާއިތުވެފައެވެ.
- ނިމުނީ -
No comments:
Post a Comment