ދުންފަތުގެ އިސްތިއުމާލްކުރާމީހުން އަޅުގަނޑުމެން ތެރޭގައި މަދެއްނޫނެވެ. ދަވާލަކަށް ސިނގިރޭޓް ފޮއްޓަކުން ނުފުދޭ މީހުންވެސް އުޅެއެވެ. ނަމަވެސް ދުންފަތުން ތިމާގެ ހަށިގަނޑަށް ލިބެނީ ކިހާ ބޮޑު ގެއްލުމެއްކަމެއް އެކަކަށްވެސް ނޭންގެއެވެ. އެކަން އެނގެނީ ހިތްދަތިވާވަރުގެ ހިތާމައަކާ ކުރިމަތިލާން ޖެހުމުންނެވެ.
މަތީންއަކީ އުމުރުން ވިހި އަހަރުގެ ޒުވާނެކެވެ. މަތީން ކިޔަވާ ނިންމުމަށްފަހު އޭނާގެ ބޭބެގެ އޭނާއަށް މާލެއިން ވަޒީފާއެއް ހޯދާދެންދެކަށް ރަށުގައި މަސްވެރިކަމު ދިޔުމަށް މަޑުކުރިއެވެ. މަސްވެރިކަމަކީ ބުރަ މަސައްކަތެއްކަން މަތީންއަށްވެސް އެނގެއެވެ. ވެހޭ ވާރެޔާ ގަދަ ހޫނާ ފިނީގައި ކެތްތެރިވާން ޖެހޭނެކަން އެނގެއެވެ. ފުރުތަމަ ފަހަރަށް މަތީން މަސްވެރިކަމު ނުކުތެވެ. އަދި އެންހިފަން އެރި ނިންމާލުމަށްފަހު ދޯންޏަށް އެރިއެވެ. ހީކަރުވާވަރުން ހީފިލުވޭނެ ގޮތެއް ނެތިފައި އިން މަތީންއަށް އޮޑިވެރިޔަކު ރޯކޮއްފައި އިން ސިނގިރޭޓެއް ދިއްކޮލިއެވެ. ހަށިގަނޑު ހޫނުކޮއްލުމަށް އެ ސިނގިރޭޓް ބޯލުމަށް އޭނާ އެދުނެވެ. ނަމަވެސް މަތީން އެކަމާ އިދިކޮޅު ހެދިއެވެ. އަދި ކެތްތެރިކަމާއެކު މަޑުކުރިއެވެ. ނަމަވެސް އުޑުމަތި ބަނަވެ ވިއްސާރަވިލާ ހަދާ ފިނި އިތުރަށް ގަދަވެއްޖެއެވެ. ހީކަރުވައިގަނެފައި އިން މަތީން ފަޅުވެރިޔާ ކައިރީ އަމިއްލައަށްގޮސް ސިނގިރޭޓެއް ހޯދައިގެން ފުރުތަމަ ފަހަރަށް ބުޔެވެ. ފުރުތަމަ ދަމާލުމުން އެރީ ކޮއްޓެވެ. ފަޅުވެރިޔާ ހިނިގަނޑެއް ޖަހާލުމަށްފަހު ބޮޑަށް އެތެރެއަށް ދަމާލާފައި ދޫކޮއްލުމަށް ބުނިއެވެ. މަތީން ސިނގިރޭޓް އެމީހާ ބުނިގޮތައް ދަމާލިއެވެ. އަސްތާ ސިކުނޑިއަށް އެޔޮށް ލިބުނު އަރާމެކެވެ. މަތީންގެ ފުރުތަމަ ސިނގިރޭތް ބޮއެ ނިންމާލުމަށްފަހު އަދި އެކަތި ދިނުމަށް އެދުނެވެ. ނަމަވެސް ފަޅުވެރިޔާ އެކަމަށް އިންކާރުކުރިއެވެ. އެއީ ހައްޓަށް ވަރަށް ގެއްލުން ހުރި އެއްޗެކަން ބުނިއެވެ. ދުވާލަކު އެކަތިން ފުއްދަން ބުނިއެވެ. ނަމަވެސް ސިނގިރޭޓް ބޮވައިގެންފާ އިން މަތީން އިނީ ރަށަށް ޖައްސަން ދެކަށްށެވެ.
މަސްވެރިކަން ނިންމާލައިގެން ރަށަށް ލެފުމާއެކު އޮޑިން ފުންމާލައިގެން މަތީން ގޮސް ފިހާރައަކަށްވަދެ ތިން ސިނގިރޭޓްއާ ލައިޓަރެއް ގަތެވެ. އެއަށްފަހު ގޭގެ ފާހާނާއަށް ވަދެ ތިން ސިނގިރޭޓް ބޮއެ ހުސްކޮއްލިތަނުން ބޯ އަނބުރަން ފަށައިފިއެވެ. ވީ އެންމެ އަވަހަކަށް ފާހާނައިން ނުކުމެގެން ގޮސް އެނދުމަށްޗަށް ވެއްޓުނުތަނާހެން ނިދިއްޖެއެވެ. މަތީންއަށް ހޭލެވުނީ އޭނާގެ ފޯނު ރިންގްވާ އަޑަށްށެވެ. ފޯނުނަގާ ކަންފަތުގައި ޖައްސާލިތަނުން ވާހަކަ ދައްކަންފެށީ އޭނާގެ ބޭބެއެވެ. ޖެހިގެން އަތް ދުވަހު މާލެ ފުރުމަށް ތައްޔާރުވުމަށް އެނގިއެވެ.
މާލެ އާދެވުމުން ބޭބެގެ ބެލުމުގެ ދަށުން މަތީން އޮފީހަކަށް ވެއްދިއެވެ. ކުޑަ ދުވަސްކޮޅެއްތެރޭ އެންމެނާ މަތީން ރަހްމަތްތެރިވިއެވެ. ސަޔަށް އެކުގައި ދެއެވެ. ސައި ނިންމާލަނީ ސިނގިރޭޓަކުންނެވެ. އެއަށްފަހު ކޮންމެ ދުވަހަކު އޮފީހަށް ދަމުން ރެޑްބުލްއަކާ ސިނގިރޭޓްއެއް ބޯންފަށާފިއެވެ. އޮފީސް ގަޑީގައިއާ އަދި އޮފީސް ނިންމުމަށް ފަހު ކަޅުކޮފީއާއެކު ސިނގިރޭޓް ބުއިންވެސް ގިނަވެއްޖެއެވެ. ދުވާލަކު ފޮއްޓަކުން ނޫނީ މަތީންއަކަށް ނުފުދެއެވެ. މިގޮތަށް ދުވަސްތައް ފައިތުވަމުން ގޮސް މަތީން އާދަޔާ ޙިލާފަށް ބަލިވާން ފަށައިފިކަން އޭނާއަށް އިހުސާސްކުރެވުނެވެ. އެންމެ ފުރުތަމަ ފާހަގަވީ ކުޑަކަމުދާއިރު ލޭ އަންނަކަމެވެ. އަދި ކެއްސާ އަނގައިން ލޭ އައުމެވެ. މިކަން ބޮޑުވެގެން އެންމެ ފަހަށް ބޭބެގެ އެހީގައި ޑޮކްޓަރަށް ދިޔައެވެ. ތަހުލީލްތަށް ކުރުމަށްފަހު ނަތީޖާ ހިފައިގެން ޑޮކްޓަރު އައިސް މަތީންއާ އޭނާގެ ބޭބެއާ ބައްދަލްކުރިއެވެ. އެކަކު އަނެކަކުމޫނަށް ބަލައިލާފައި އިސްދަށަށް ޖަހާލުމަށްފަހު ނަތީޖާ ކިޔާދިނެވެ. މަތީންގެ ދެކިޑްނީ ވަނީ ފެއިލްވެފައެވެ. އަދި މޭގައި ވަނީ ފެންހެދިފައެވެ. އަދި މަތީންވަނީ ލަންގް ކެނސަރުގެ ތިންވަނަ ސްޓޭޖްގައިކަން ބުނިއެވެ. މި ވާހަކަތައް އިވުމުން މަތީންގެ ފައިދަށުން ހީވީ ބިންގަނޑު ދަމައިގަތްހެނެވެ. މިއަދު އޭނާ ވަނީ ހިތާމައިން ފޯވެފައެވެ. މިއަދު އޭނާގެ އުމުރަކީ އެންމެ ބާވީސް އަހަރެވެ. ނަމަވެސް އޭނާގެ ހަށިގަނޑުވަނީ އެއްކޮއްހެން ހަލާކުވެފައެވެ.
– ނިމުނީ –
No comments:
Post a Comment