ދުލަކީ އިންސާނާއަށް ދެއްވައިފައިވާ އެންމެ ބާރުގަދަ އަދި އެންމެ ނުރައްކާތެރި ހަތިޔާރެވެ. ބުނެވޭ ބަހަކުން ތިބާއަށް ނުވަތަ އަނެއްކާއަށް ފޫނުބެއްދޭވަރު ގެއްލުމެއް ލިބުމަކީ ދުރުގައިވާކަމެއްނޫނެވެ.
އަރީޝްއަކީ މުއްސަންޖެކެވެ. އޭނާގެ ތިން އަނބިންނާ ނުވަ ދަރިން ތިބެއެވެ. އަރީޝްގެ ވިޔަފާރިގައި ފަސް ފިހާރައާ ދެ ރެސްޓުއަރެންޓްގެ އިތުރަށް ޔޮޓެއްވެސްއޮވެއެވެ. ނަމަވެސް އެވަރަކުން އޭނާގެ ހިތް ނުފުރެއެވެ. ހަލާލް ތިން އަނބިން ތިބި އިރުވެސް ޒުވާން ހިތްތަށް ފަތަހަކުރުމަށް އޭނާގެ ފައިސާ އޭނާ ބޭނުންކުރެއެވެ. މިއީ އޭނާގެ ހަށީގައި ހިފާފައި ހުންނަ ވަރަށް ނުބައި އާދައެކެވެ. ގިނަފަހަރު ފަގީރަކު ފައިސާއެއްގެ އެހީއެއް ހޯދާލަން އަޔަސް އެމީހަކު ފައްސާލައެވެ. ދުވަހަކުވެސް އަތުގައި ފައިސާ ނުހުނަކަމަށް ހަދާ ވިޔަފާރި ދަށް ވާހަކަ ދައްކައެވެ.
އެއްދުވަހެއްގެ ހެނދުނެވެ. ހެނދުނު ނާސްތާއަށް އަރީޝް އޭނާގެ ރެސްޓުއަރެންޓަށް ދިޔައެވެ. ރެސްޓުއަރެންޓްއަށްވަދެ ރަނގަޅަށް ނަޒަރު ހިނގާލިއެވެ. މީހުން އެހާގިނައެވެ. ވިޔަފާރިވެސް ރަނގަޅެވެ. ކައުންޓަރު ކައިރިއަށްގޮސް އަލަށް ވަޒީފާއަށް ވައްދާފައި އިން އަންހެންކުއްޖެއްކަމަށްވާ ޒުލޭހާއާ ސަމާސާކޮށް ބޮޑުވާހަކަ އަޅުވާލިއެވެ. އެއަށްފަހު އަރީޝްއާއެކު ސައިބޯން އައުމަށް ދައުވަތުދިނެވެ. ޒުލޭހާ ދައުވަތު ގަބޫލްކޮއް އަރީޝްއާއެކު އޭނާއަށް ރެސްޓުއަރެންޓްގައި ހާއްސަކުރެވިފައިވާ ފިނި ކޮޓަރިއަށް ދިޔައެވެ. އަރީޝް ޒުލޭހާކައިރިން މައުލޫމާތު ހޯދަންފެށިއެވެ. އެންމެ ފުރުތަމަވެސް އަހާލީ މީހަކާ އިންދެގެން އުޅޭތޯއެވެ. ޖަވާބުގައި ޒުލޭހާ ރަނގަޅު މީހަކު ހޯދަމުންދާ ވާހަކަ ބުނިއެވެ. ހުޅުވިފައިވާ ފުރުސަތެއްހެން ފެނުމާއެކު އަރީޝް އިތުރަށް ބޭނުންވާ މައުލޫމާތު އޮޅުން ފިލުވުމުން ޖަވާބުގައި ޒުލޭހާ ބުނެލީ އެމީހަކީ ފަސްވަގުތު ނަމާދުކޮއް ސަދަގާތްދީ ހަދާ މީހަކަށް ވާންވާނެކަމަށްށެވެ. އަދި އެއްވެސް ގުރުއާން ގަވައިދުން ކިޔަވާ އަނބިމީހާއަށް ހެޔޮމީހަކަށްވާންވާނެކަމަށެވެ. ޒުލޭހާގެ ހިތް އަތުލުމަށް ނުބައި ރޭވުމެއް އަރީޝް ރޭވިއެވެ. ޒުލޭހާއަކީ ބަލައިލަން ވަރަށްވެސް ރީތީ އަދި ލޫޅާފަތި ހަށީގަނޑެއް ލިބިފައިވާ ކުއްޖެއްކަމުން އަރީޝްގެ ހަތަރުވަނަ އަނބިމީހާއަށް ހެދުމަށް ހެދުނުހާ ދޮގެއް ހަދައިގެން ދުވަސްކޮޅަކު ނަމާދުކޮއް ގުރުއާން ކިޔަވާ ސަދަގާތްކޮއް ދެއްކުންތެރިކަން ގިނަކުރިއެވެ.
ޒުލޭހާއާ އަރީޝްގެ ކައިވެނި ކުރެވިއްޖެއެވެ. ކައިވެނިކޮއްގެން ތިންމަސްވީތަނާހެން ޒުލޭހާ ބަނޑުބޮޑުވެއްޖެއެވެ. އަދި އަރީޝްގެ އުޅުން އިހުގެ އުޅުމަށް ބަދަލްކޮއްލައިފިއެވެ. އަނބިމީހާ ދެމުން އައި ނަސޭހަތްތަކަށް ދެމުން ދިޔައީ ބީރު ކަންފަތެވެ. މާބަނޑު އިރުގައި ގާތުގައި ގިނަ ފަހަރު މަޑުނުކޮއް މެއިޑަކު ބަހައްޓައެވެ. މިގޮތުގައި އުޅެމުންގޮސް ޒުލޭހާއަށް ލޯބި ލޯބި ދޮން އަންހެން ދަރިޔަކު ލިބިއްޖެއެވެ. އެކުއްޖާގެ ރުއިމުގެ އަޑުޖެހުމުން ގިނަ ފަހަރު އަރީޝްއަށް ބޮލަށް އުނދަގޫވެއެވެ. އަދި ނުނިދިގެން ދެމައިންނާ ދިމާލަށް އައުގުރާނަވެސް ގޮވަންފެށިއެވެ. ނަމަވެސް ޒުލޭހާ ބުނަމުން ދިޔައީ ދޫ ރައްކާތެރިކުރުމަށްށެވެ. ޒުލޭހާގެ އަޑު ނާހައި ޒުލޭހާއާ ދިމާލަށް ހިތުހުރި އެއްޗެއް އަރީޝް ދިޔައި ގޮވަމުންނެވެ. ކަރުނައަޅާ ހާލު ހިތައް ތަދުވެގެންގޮސް އެފަކީރު ބައެއްފަހަރު ހުންނަންޖެހެނީ ނުނިދައެވެ. އަނބިމީހާ ގާތުން އެދުން ފުއްދާ އަރީޝްގެ ހުންނަ އަނިޔާވެރިކަމުގެ ސަބަބުން ގިނަފަހަރު ޒުލޭހާއަށް ހިރިވެސް ނުލެވެއެވެ. އެދުން ފުއްދަން ނުދީފިނަމަ ދޭ އަނިޔާ އަދި ވަކިން ބޮޑެވެ. ގޮއްމުށުންތަޅާ މީހާ ނަގާ ފާރަށް ޖަހަނީ ހިތުގައި އެއްވެސް ރަހުމެއްނެތިއެވެ.
އެއްރެޔެއްގެ ދަންވަރެވެ. ޒުލޭހާއަށް އޮތީ ކުޑަމީހާ ނިންދެވުމަށްފަހު ނިދިފައެވެ. އަރީޝްގެ އިންތިޒާރުގައި އެތައް އިރަކު މަޑުކުރުމަށްފަހުގައެވެ. ޒުލޭހާއަށް ހޭލެވުނީ އަރީޝް އައިސް ދޮރުހުޅުވާލި އަޑަށްށެވެ. އަރީޝް އެއައިގޮތަށް އައިސް ޒުލެހާ ލައިގެން ހުރި ހެދުން އިރާލަން މަސައްކަތްކުރިއެވެ. ނަމަވެސް މިފަހަރު ޒުލޭހާ ވަކި ދުލެއް ނުކުރިއެވެ. އަރީޝް ކޮއްޕާލިއެވެ. އަދި ހުރި ނުބައި ނުލަފާކަމުގެ ވާހަކަބުނެލާ ވެގެން ތިއުޅެނީ ކީއްކަން ބުނެދޭން އެދުނެވެ. އަރީޝްގެ އަމަލްތަށް ހުރިގޮތުން އޭނާހުރީ މަސްތުގެ ހާލުގައިކަން ޒުލޭހާއަށް ފާހަގަކުރެވުނެވެ. ދެމީހުންގެ ޒުވާބަށް ކުޑަދަރިފުޅު ހޭލައިގެން ރޯންފެށިއެވެ. ޒުލޭހާ ދުވެފައިގޮސް ދަރިފުޅު ނެގިތަނުން ފަހަތުން އައި އަރީޝް އައިސް ކުޑަދަރިފުޅުގައިގާ ބޮނޑިއެއްއެޅިއެވެ. އެއަށްފަހު ޒުލޭހާ ގައިގާވެސް ބޮނޑިއެއްއެޅުމުން ޒުލޭހާ އަނެއްކާވެސް އަރީޝް ކޮއްޕާލިއެވެ. މިފަހަރު އަރީޝް އައި ރުޅީގައި ހެއްދެވި ނެހެއްދެވި ގޮވަންފެށިއެވެ. އެންމެ ފަހަށް ހެއްދެވި ފަރާތާ މާތް ނަބިއްޔާއާ މުހައްމަދު صلى الله عليه وسلم އާ ދިމާލަށްވެސް އޭނާގެ ދުލުން ހަޑި ބަސްތައް ބޭނުންކުރަންފެށިއެވެ. އެވަގުތު ބިރުންހުރި ޒުލޭހާ ދިޔައީ އަރީޝްގެ ދޫ ރައްކާތެރިކުރުމަށް ބުނެ ރޮމުންނެވެ. އަތުވެދާނެ ކޯފާއަކަށް ބިރުވެތި ވުމަށްށެވެ. ކުއްލިއަކަށް އަރީޝް ހުއްޓުންއެއިއެވެ. އޭނާގެ ދޫ ބޭރަށް ނުކުމެ އޮޅިގެންދިޔައެވެ. ހީވަނީ އޮޅާފައިވާ ތުވާއްޔެއްހެނެވެ. އަނގައިން ބައިވަރު ލޭފައިބަންފެށިއެވެ. އެހިނދު އަރީޝް މައްޗަށް ބަލާލިއެވެ. އަރީޝްގެ ކަރު ބަނޑިބަނޑިލާންފެށިއެވެ. އެއަށްފަހު މުޅި ހަށިގަނޑު އަޑުފައްގަނޑު ފުލުފުލުން ގޮވަންފެށިއެވެ. ދެފައިވެސް އިދިކޮޅަށް އެނބުރިއްޖެއެވެ. މަންޒަރު ބަލަންހުރި ޒުލޭހާ ހުރީ ބިރުން ތުރުތުރު އަޅައެވެ. ރޮމުންދިޔަ ދަރިފުޅުވެސްވަނީ ރުއިން ހުއްޓި އަރީޝްއާ ދިމާލަށް ނަޒަރު ހުއްޓިފައެވެ. ދެން ފެނިގެން ދިޔައީ އަރީޝް ބިންމައްޗަށް ވެއްޓުނުތަނެވެ. އޭނާގެ ފުރާނަ ހުރިތޯ ބަލަން ޒުލޭހާ އޭނާއާ ކައިރިވިއިރު ފުރާނަ ހުއްޓެވެ. އަވަސް އަވަހަށް އެނބިއުލެންސްއަށްށާ ފުލުހުންނަށް ގުޅިއެވެ. އަދި އަރީޝް ކައިރީ ކުޑަ ދަރިފުޅު ގޮވައިގެން އިށީނުމަށްފަހު ޒުލޭހާ ދެމުން ދިޔަ ހެޔޮ ނަސޭހަތުގައި ނުހިފައި ދޫރައްކާތެރިނުކުރީތީ މިއަދު އަރީޝްއަށް ދިމާވިގޮތާމެދު ހިތާމަ ފާޅުކުރަންފެށިއެވެ. މިއަދު އަރީޝްއަށް ދިމާވި ހާދިސާއަކީ އިންސާނަކު ވިސްނައިފިނަމަ ވަރަށް ބޮޑު ފިލާވަޅެއް ލިބިގެންދާނެ ހާދިސާއެކެވެ.
No comments:
Post a Comment