މަލަކީ އިންސާނުންގެ ހިތަށް ހިތްހަމަޖެހުން ގެނުވައިދޭ އެއްޗެކެވެ. ބައެއް މާތަކުގެ ޗާލުކަން ވަރަށްވެސް ބޮޑެވެ. އަދި ވަސްވެސް އެހާމެ މީރެވެ. ނަމަވެސް މަލުގައިވެސް ގާތްނުވާން ޖެހޭ ވައްތަރުތަކެއް ހުންނަކަން މިއަދު އެނގިއްޖެއެވެ. ބައެއް މާ ތަކުގެ އަހުލުވެރިންނަކީ ނުފެންނަ ބައެކެވެ. އެފަދަ މަލަކާ ގާތްވެއްޖެނަމަ ހިތާމަވެރި ހާދިސާއެއް ހިނގުން ގާތެވެ.
ހައިފާއަކީ ޓިޗަރެކެވެ. ހައިފާ ދިރިއުޅެނީ މީހުންމަދު ގިނަ ފަޅުގެ ހުންނަ ރަށެއްގައެވެ. ހައިފާއަކީ އެކި ވައްތަރުގެ މާތަކަށް ވަރަށް ޝައުގުވެރިވާ ކުއްޖެކެވެ. ރަށުގެ ބޮޑުމަގުގައި ހުންނަ ސްކޫލްއަށް ހައިފާ ކޮންމެ ދުވަހަކުވެސް ދާއިރު ގޭގޭގައި އިންދާފައި ހުންނަ މާ ގަސްތައް ފެނެއެވެ. ބައެއްފަހަރު އެ މާތަކުގެ ފޯޓޯ ނަގާލަން ހައިފާ މަޑުކޮއްލައެވެ. މިގޮތުގައި އުޅެނިކޮއް އެދުވަހަކު ބޮޑުމަގު ހަތަރު އަނގޮޅި ކަންމަތީހުރި ގެއަކުން ފެހިކަންގަދަ ގަހެއް ފެންނަންފެށިއެވެ. އެ ގަހުގައި އަޅަނީ ކޮންވައްތަރެއްގެ މަލެއްތޯ ބަލަން ހައިފާ ހުރީ ކެތްމަދުވެފައެވެ.
ދުވަސްތައް ފާއިތުވެގެން ގޮސްފިއެވެ. ނަމަވެސް އުންމީދުކުރަމުން އައި ގަހުގައި އެއްވެސް މަލެއް ނުފެންނާތީ އެކަމާ ހައިފާ އޭނާގެ ރައްޓެހިންގާތު ޝަކުވާވެސް ކުރެއެވެ. މިގޮތުގައި އުޅެނިކޮއް އެއްރޭ ދެނަމާދު ދޭތެރޭގައި ސްކޫލްއިން ގެއަށް އަންނަނިކޮއް ހަތަރު އަނގޮޅި ކަންމައްޗާއަރާ ހަމަވިތަނާހެން މީރުވަހެއް ދުވަންފަށައިފިއެވެ. އެވަސް އަންނަނީ ކޮންދިމާލަކުންކަން ހައިފާއަށް ވަގުތުން އެނގިއްޖެއެވެ. އެއްކަލަ ފެހިކަންގަދަ ގަސް ކައިރިއަށް ދިޔައިރު އެގަހުން ކުދި ރީންދޫ މާތަކެއް ފޮޅިފައި ހުއްޓެވެ. އެމާތަކުގެ ފޮޓޯ ހައިފާ ނަގަން ބޭނުންވިއެވެ. ފޯނުނަގައި ދެ ގަނޑު ނަގާލުމަށްފަހު ތިންވަނަ ގަނޑު ނަގާލިތަނާހެން މާތައް ކަޅުވާން ފަށައިފިއެވެ. ފޮޅިފައިވާ މާތައް މޯޅިވަނީކަމަށް ހީކޮއް ހައިފާ އިތުރަށް ފޮޓޯ ނުނަގާ ގެއަށް ދިޔައެވެ.
ޖެހިގެން އައި ދުވަހުވެސް ދެނަމާދު ދޭތެރޭ ހައިފާ ސްކޫލް ނިންމާފައި އަންނަނިކޮއް އެކަލަ ގަހުގެ މާތައް ފޮޅިފައި ހުއްޓާ ފެނުނެވެ. ވަސް އެހާމެ މީރެވެ. ނަމަވެސް ގަހާ ގާތްނުވެވި އުޅެނިކޮއް އިޝާއަށް ގޮވައިފިއެވެ. އިޝާއަށް ގޮވާއަޑަށް މާތައް ލެއްޕޭތަން ހައިފާއަށް ފެނުމުން ވަރަށް ހައިރާންވިއެވެ. ގެއަށް ގޮސް އިންޓަނެޓުން މައުލޫމާތު ހޯދަމުން ދަނިކޮއް ލޮލުގައި އަޅައިގަތީ ދެނަމާދު ދޭތެރޭ ފޮޅޭ މަލަކާ އެ މާ އަޅާ ގަހާ ބެހޭ މައުލޫމާތެވެ. ރަނގަޅަށް އެމައުލޫމާތު ކިޔާލިއިރު ކަމަކުދާކަށްނެތެވެ. އެއީ ޖިންނި ގަހެކެވެ. މިކަމާ ހައިފާ ވަރަށް ބިރުގަތެވެ. މިވާހަކަ އެކުވެރިންނާ އޭނާ ވައިބާއިން ހިއްސާކުރިއެވެ. އަދި އެކަންތައް ސްކޫލްގެ ވައިބާ ގްރޫޕްގައިވެސް ހިއްސާކުރިއެވެ. ބޭނުންވާ ހުރިހާ ބަޔަކަށް މެސެޖްކުރުމަށްފަހު ހައިފާ ފާޙާނާއަށްވަނެވެ. ފެންވަރަށް ހުއްޓާ މީހަކު އޭނާއަށް ފާހާނާ ބޭރުން ގޮވާލިއަޑުއިވުނެވެ. ކާކުތޯ އަހާލުމުންވެސް އެއަޑުން ހައިފާގެ ނަމުން ގޮވާލިއެވެ. މިކަމާ ހައިފާ ބިރުން ފާޙާނައިން ނިކުތެވެ. އެރޭ ނިދަން އުޅެއުޅެ ހައިފާއަށް ނުވެސް ނިދުނެވެ. ގަޑިން ބާރަޖެހިތަނުން ހައިފާގެ ފިރިމީހާ ޖުނެއިދު އައިސް ކޮޓަރިއަށްވަނެވެ. ޖަނެއިދު ހައިފާއާ ދިމާލަށް ބަލާލުމަށްފަހު ހިނގާފައިގޮސް ފާރުތެރެއަށްވަދެ ގެއްލިއްޖެއެވެ. ހައިފާގެ ބިރުވެރިކަން އިތުރަށް ބޮޑުވެގެންދިޔައެވެ. އަދި ކޮޓަރިން ދުވެފައި ނުކުތްތަނުން ޖުނެއިދެ މޭމަތީގައި ހައިފާ އައިސް ޖެހުނެވެ. ވެގެން އުޅޭގޮތް ހައިފާ ވަގުތުން ޖުނެއިދުއަށް ކިޔާދިނެވެ. އެރޭ ހައިފާ ކޮޓަރިއަށް ވަނުމަށްފަހު އެއްގޮތަކަށްވެސް ނުނިދެއެވެ.
ގަސް ކަނޑާލެވެން ކައުންސިލްއިން ނިންމާފައިއޮތީ ދެދުވަސް ފަހުންކަމުން ހައިފާ ނިމޭ ގަޑިއަށް ޖުނެއިދު ހުންނަނީ ބަލާގޮހެވެ. ސްކޫލް ނިމުމުން އަތުގުޅުވައިލައިގެން ދެމަފިރިން ހިނގަމުން އަންނަނިކޮއް ބޮޑުމަގު ހަތަރު އަނގޮޅި ކަންމައްޗާ އަރާ ހަމަވިތަނުން ހައިފާ ޖުނެއިދު ގައިގާ ބާރަށް ބައްދައިގެތެވެ. ވެގެން އުޅޭގޮތް ކިޔައިދޭން ޖުނެއިދު ބުނުމުން ހައިފާއަށް ފެންނަ އެއްޗެއް ޖުނެއިދުއަށް ފެންނަނަމައޭ ބުނެލިއެވެ. އަދި އެއްކަލަ މާ ގަސް ކައިރީ ކަޅު ކުޑަކުއްޖެއް މިވަގުތު ހުރި ވާހަކަ ހައިފާބުނިއެވެ. ޖުނެއިދު ވަގުތުން ހައިފާ ކައިރި ކުރުސި ކިޔުމަށް ބުނިއެވެ. އަދި އެއްވެސް ގޮތަކަށް އެދިމާލަށް ނުބަލާ ގެއާދިމާލަށް ހިނގައިގަތުމަށް ބުނިއެވެ. ދެމަފިރިން ބާރު ބާރަށް ހިނގާފައި އައިސް ގެއަށްވަނެވެ. އޭގެ އަނެއް ދުވަހު އެ ގަސް ހެދިފައި އިން ގޭގެ ވެރިމީހާ ނުކުމެ އެ ގަސް ކޮށާލިޔެވެ.
No comments:
Post a Comment