رمضان މަހަކީ މުސްލިމުންނަށް އެތައް އުފަލެއް ގެނެސްދޭ މަހެކެވެ. އެމަހަކީ ކީރިތި ގުރުއާން ބާއްވާލެވުނު މަހެވެ. އެތައް ދަރުމަޔަކާ ސަވާބެއް އެމަހުގައި ރޯދަވެރިޔާއަށް ހޯދުމުގެ ފުރުސަތުތައް ތަނަވަހެވެ. އެމަހުގައި އެއްހާސް މަސްވަރަށްވުރެ ހެޔޮކަން ބޮޑުވެގެންވާ ލައިލަތުލް ގަދްރި ވިލޭރޭ ހިމެނެއެވެ.
ޒައިދު އާ އަހުސަންއަކީ ދެބެންނެވެ. ޒައިދުގެ އުމުރަކީ އަށާރަ އަހަރެވެ. އަހުސަންގެ އުމުރަކީ ދިހަ އަހަރެވެ. ދެބެންނަކީ އެކަކު އަނެކަކުދެކެ ނުލާހިކު ލޯބިވާ ދެމީހުންނެވެ. ޒައިދުއަކީ ރައްޓެހިން ގިނަ ކުއްޖެކެވެ. އޭނާއަކީ ބައެއްފަހަރު އަޅުކަންތަކަށް ފަރުވާ ކުޑަކުރާ ކުއްޖެކެވެ. އަހުސަންއަކީ އޭގެ އިދިކޮޅެވެ. އުމުރުން ނުވަ އަހަރުގައި ކީރިތި ގުރުއާން ޙަތިމްކުރިއެވެ. އަދި ދިހަ އަހަރު ފުރުނުއިރު ކީރިތި ގުރުއާންގެ ދެބައިކުޅަ އެއްބައި ހިތުދަހެވެ. ދަރުހެއް އޮވެއްޖެނަމަ އެތަނަކަށް މައިންބަފައިންނަށް އާދޭސްކޮއްގެންވެސް ގޮސްހަދައެވެ. އަހުސަން ނުދަންނަ މީހަކު މިސްކިތެއްގައި ވަރަށް މަދުވާނެއެވެ. ގިނަ މީހުންގެ ލޯބި އޭނާއަށްވަނީ ލިބިފައެވެ.
رمضان މަސް އަންނަން އޮތީ އެންމެ މަހަކަށްވެފައެވެ. އެމަހަށް ތައްޔާރުވުމަށް ޝައުބާންމަހުގެ ރޯދަތައް އަހުސަން ހިފަންފެށިއެވެ. ބައެއްފަހަރު ޒައިދު އަހުސަންއާ ސަމާސަ ކޮއްލުމަށް ކާތަކެތި ހިފައިގެން އައިސް އަހުސަން ކުރިމަތީ އިށިންދެ ކާންފަށައެވެ. މިކަމާ އަހުސަން އަންނަނީ ހިންޔެވެ. ބޭބެ ކުރާ ސަމާސާ އަބަދުވެސް ބަލައިގަނެއެވެ. ރޯދަ ވިއްލާ ގަޑި ޖެހެންވާއިރަށް ޒައިދު އޭނާގެ ކޮއްކޮއަށް އެކި އެއްޗެހި ގެނެސްދީފައި ބަހައްޓައެވެ. ރޯދަ ވިއްލާ ގަޑީގައި އަހުސަންގެ ރޯދަވިއްލުމުގައި ބައިވެރިވުމަށް ޒައިދުއަށް ދައުވަތުދެއެވެ. ނަމަވެސް ޒައިދު ބައެއްފަހަރު ބައިވެރިނުވެއެވެ.
رمضان މަސް އައިސް ޖެހިއްޖެއެވެ. ހާރުކައިގެން ފަތިސްނަމާދު ބަންގީގެ އިންތިޒާރުގައި އަހުސަން އިނީ ކެތްމަދުވެފައެވެ. އެއިރު ޒައިދު އޮތީ ނިދާފައެވެ. ބަންގި ގޮވުމާއެކު މިސްކިތައް ދިޔުމަށް ޒައިދުއަށް އަހުސަން ގޮވިއެވެ. ނަމަވެސް ޒައިދު މިތެދުވަނީއްޔޭ ކިޔާފައި ބަހަނާ ދެއްކިއެވެ. ޖަމާއަތަށްދާން ލަސްވާތީ އަހުސަން އޭނާގެ ބައްޕައާއެކު މިސްކިތައް ދިޔައެވެ. ނަމާދުކޮއް ނިމިގެން އިރުއަރަންދެކަށް ގުރުއާން ކިޔަވާލަން އިނުމަށްފަހު ޝުހާ ނަމާދުކޮއްލައިގެން ގެއަށް އައިސް ނިދިއެވެ. ރޯދަ މަހުގެ ފުރުތަމަ ދިހައެއް ނިމުނުތަނާހެން އަހުސަން ކީރިތި ގުރުއާން އެއްކޮއް ހިތުދަސްކުރިއެވެ. އެކަމުގެ އިނާމެއްގެ ގޮތުން މުދިމްބެ އެއްރޭ ތަރާވީސް ނަމާދު އިމާމްވެ ކޮއްލުމުގެ ފުރުސަތު އަހުސަންއަށްދިނެވެ. ވީ އުފަލުން އެންމެ ފުރުތަމަވެސް އެވާހަކަ ހިއްސާކޮއް ތަރާވީސް ނަމާދަށް ދައުވަތުދިނީ ޒައިދުއަށްށެވެ. ކޮއްކޮ ގެ ދައުވަތު ގަބޫލްކޮއް ޒައިދުއާ އިތުރު ރައްޓެހިންކޮޅެއް އެރޭ ތަރާވީހުގައި ބައިވެރިވިޔެވެ. އަހުސަންގެ އަޑުން ކީރިތި ގުރުއާން ކިޔަވަންފެށުމާއެކު ޒައިދުއާ އޭނާގެ ރައްޓެހިންގެ ލޯތައް ފެންކަޅިވެގެންދިޔައެވެ. އެހާމެ ރާގު ރީއްޗެވެ. އެއްވެސް ކުށެއް ނުޖެހި މަޙްރަޖަށް ކިޔަވަމުން ދިޔައެވެ. ޒައިދުއާ އޭނާގެ ރައްޓެހިން ހަތަރު ރަކުއަތް ކުރުމަށްފަހު މިސްކިތުން ނުކުންނަމުން ކިޔަވަމުން ދިޔަ އަހުސަންއަށް ބަލައިލިއެވެ. އަހުސަން ކިޔަވަމުންދަނީ އޭނާ ކުރިމަތީ ބަހައްޓާފައިވާ ޙަތިމްއަށް ނުބަލައި އިސްޖަހައިގެން ހުރެއެވެ.
رمضان މަހުގެ ފަހު ދިހައެއް އައިސް ޖެހުމުން އަހުސަން ކުރިޔަށްވުރެ އަޅުކަމައިގެން ބުރަވެގަތެވެ. ލައިލަތުލްގަދުރި ވިލޭރޭ އަތުކުރުމަށް އަޒުމްވަރުގަދަކުރިއެވެ. މެންދުރު ނަމާދަށް ގޮސްފިނަމަ އަންނާނީ އަސުރުކޮއްގެންނެވެ. މައްރިބަށް ގޮސްފިނަމަ އަންނާނީ ތަރާވީސް ނިންމައިގެނެވެ. އަހުސަންގެ ފަހަތުން ޒައިދުވެސްދިޔައީ އޭނާއަށް ކުރެވުނުވަރެއް ކުރަމުންނެވެ. ކޮއްކޮގެ ހިތްވަރުގަދަކަންފެނި އޭނާ ބައެއްފަހަރު އަމިއްލަ ނަފްސާމެދު ލަދުވެސްގަނެއެވެ. ނަމަވެސް އަހުސަން އިސްވެ ދިޔައީ އޭނާގެ ބޭބެއަށް ހިތްވަރުދެމުންނެވެ.
رمضان މަސް ނިމެން އެންމެދުވަހަށް ވެއްޖެއެވެ. މައްރިބަށް ދިޔަ އަހުސަން ދިހައެއް ޖެހިއިރުވެސް ގެއަށް ނައިސްގެން ކަންބޮޑުވެގެން މަންމަ ޒައިދުއަށް ގުޅިއެވެ. ޒައިދުއާ އޭނާގެ އެކުވެރިން އަހުސަން އާއްމުކޮއް އަރާ މިސްކިތައް ދިޔައިރު ބައްޕައާ ދިމާވިއެވެ. ބައްޕަހުރީ ހިނިތުންވުމާއެކު ފެންކަޅިވެފައެވެ. ވެގެން އުޅޭގޮތް އޮޅުން ފިލުވާލުމުން އަހުސަންވަނީ ސަޖިދައިގައިވާހާލު ނިޔާވެފަކަމަށް ބައްޕަ ބުނެލިއެވެ. މި ބަސްތައް ވެގެން ދިޔައީ ގަބޫލްވެސް ނުކުރެވުނު ބަސްތަކަކަށްށެވެ. ޒައިދު ދުވެފައި އެތެރެޔަށް ވަތްއިރު މަންޒަރު ސާފުކޮއް ފެނުނެވެ. ރޮމުން އައިސް ކޮއްކޮ ކައިރީ އިށީނެވެ. އެއަށްފަހު ތައުރީޕްގެ ބަސްތައް އޮއްސާލިއެވެ. މިއަދު އަހުސަން މިދުނިޔެއާ ވަކިވިއެއްކަމަކު އޭނާ އެވަނީ ދެދުނިޔޭގެ ބާއްޖަވެރިކަން ހޯދާފައެވެ.
No comments:
Post a Comment