ސުހާއަކީ އާއިލާއެއްގައިހުރި ހަމައެކަނި އަންހެންކުއްޖާއެވެ. ކިޔެވުމަށް މޮޅު ކުއްޖެކެވެ. އޯލެވެލް ނިންމުމަށްފަހު މަތީ ތައުލީމު ހާސިލްކުރަމުންދާ ސުހާއަކީ އަބަދުވެސް އޭނާ ބޭނުންވާ ކަމެއް ހާސިލްކުރުމަށް ގަދައަޅާ މަސައްކަތްކުރާ ކުއްޖެކެވެ. މަންމައާ ބައްޕަ ހައްޖަށް ފޮނުވުމަކީ ސުހާ ދެކެމުން އަންނަ ހުވަފެނެކެވެ. ސުހާއަކީ އެހެން ކުދިންނާ އަޅާބަލާއިރު މަޑުމައިތިރި ބަސްމަދު ކުއްޖެކެވެ. މިކަމުގެ ސަބަބުން ކްލާސް ކުދިންގެ ލޯބި އޭނާއަށްވަނީ ލިބިފައެވެ.
ކިޔަވަމުން އާދައިގެ ފިހާރައެއްގައި ވަޒީފާ އަދާކުރަމުން އައި ސުހާއަށްވެސް ދަނީ ބައެއް ޒުވާނުންގެ ދުއްތުރާތައް ލިބެމުންނެވެ. ފިހާރައަށް އެއިން މީހަކު ވަދެއްޖެނަމަ ސުހާއާ ވާހަކަދައްކަން ވަރަށް މަސައްކަތްކުރެއެވެ. ބައެއްފަހަރު ނަމްބަރު ދޭތޯ އާދޭސްވެސް ކުރެއެވެ. ނަމަވެސް ސުހާ އެފަދަ މީހުން ދައްކަމުންދާ ވާހަކަތަކަށް މާބޮޑު ސަމާލުކަމެއްނުދެއެވެ. ސުހާގެ ނަސީބު ރަނގަޅުކަމުން ވަޒީފާ އަދާކުރަމުން އައި ފިހާރަވެސް ހުންނަނީ ގެއާ ޖެހިގެންނެވެ. ކިޔަވަންދާން ވެއްޖެނަމަ ބައްޕަ އަބަދުވެސް ސުހާ ގެންގޮސްދޭން އާދެއެވެ. ނާދެވިއްޖެނަމަ މަންމައާއެކުދެއެވެ.
ކިޔެވުންނިމި ރަނގަޅު ވަޒީފާއެއް ހޯދުމަށް ސުހާ މަސައްކަތްފެށިއެވެ. އެތައް ތަނަކަށް ސިޓީ ފޮނުވުމަށްފަހު ޖަވާބެއްގެ އިންތިޒާރުގައި މަޑުކޮއްގެން ހުއްޓާ އިންޓަވިއުތަކަށް ގުޅަންފަށައިފިއެވެ. އެންމެ ރަނގަޅު މުސާރަ ލިބެންހުރި ތަނަކަށް ސުހާ ވަނެވެ. ވަޒީފާގެ އާ މާހައުލުގައި ތަފާތު މީހުންނާ ސުހާއާ ދިމާވެއެވެ. އެގޮތުން ބައެއް މީހުންގެ ދުއްތުރާވެސް ޖެހެންފެށިއެވެ. އެގޮތުން އެންމެ ފުރުތަމަ ސުހާ ވަޒީފާ އަދާކުރަމުން އައި އޮފީހަށް އަލަށްވެއްދި ހަކީމްގެ އުނދަގޫ ޖެހެންފެށިއެވެ. ހަކީމް ސުހާގެ ނަމްބަރު ހޯދައިގެން އޮފީހުގެ ފަހުން ގުޅާހަދައެވެ. އަދި ބައެއްފަހަރު އޭނާގެ މުއްސަނދިކަމުގެ ވާހަކަތައް ދައްކައެވެ. ނަމަވެސް ސުހާ އޭނާއަށް ރީތިގޮތުގައި ނަސޭހަތްދިނެވެ. އަދި އިތުރަށް ގުޅައިފިނަމަ މައްސަލަ އޮފީހު ވެރިމީހާއާ ހަމައަށްވެސް ގެންދާނެވާހަކަ ބުނެލިއެވެ. އޭގެ ދުވަސްކޮޅެއް ފަހުން ހަކީމް އަމިއްލައަށް އޮފީހުން ކެނޑުނެވެ.
ހަކީމް އޮފީހާ ވަކިވިތާ ދުވަސްގަނޑެއްފަހުން ސުހާއަށް އާދަޔާ ޙިލާފަށް އުނދަގޫތަކެއްވާންފެށިއެވެ. ބައެއްފަހަރު ބިރުގަނެ ހާސްވާގޮތްވެއެވެ. ނިދަން އޮށޯވެއްޖެނަމަ ބިރުވެރި ހުވަފެންތައް ފެނެއެވެ. ބައެއްފަހަރު މަހާނަގާތަކާ ހަރުފައެވެ. ނުވަތަ ގަބުރުތަކާ ދަޅުފަޅާފައި ތިބޭ ކަޅު މަޙްލޫގުންނެވެ. މި އުނދަގޫތަކުގެ ސަބަބުން ސުހާ ވަޒީފާއަށްވެސް ފަރުވާކުޑަވެ އޮފީސްމަތިންވެސް ފޫހިވާންފެށިއެވެ. މަޑުމައިތިރި ބަސްމަދު ސުހާއަކީ މިހާރު ރުޅިގަދަ ބަސްގިނަ ކުއްޖެކެވެ. ސުހާއަށް ވަމުންދާ އުނދަގޫތައް ބަލަން ކެތްނުވެގެން ސުހާގެ ބައްޕަގެ ރަހްމެތްތެރިޔެއްގެ ދަރިއެއްކަމަށްވާ ހާފިޒް ގެނެވުނެވެ. ހާފިޒްއަކީ ރުގްޔާ ކުރަން މޮޅު ޒުވާނެކެވެ. ހާފިޒް ރުގްޔާ ކުރަން ފެށުމާއެކު ކަންތައް ހިނގާފައިވާގޮތް އޮޅުން ފިލަންފެށިއެވެ. ސުހާއަށްވަނީ ހަކީމްގެ އެސްފީނާޖެހިފައެވެ. އަދި ނުވިތާކަށް ސިހުރުވެސް ހަދާފައެވެ. ސިހުރު ވަޅުލެވިފައިވަނީ މަހާނައެއް ކައިރީކަމުން ހާފިޒްއާ ސުހާގެ ބައްޕަ އެބުނާ މަހާނައެއް ހުރިތަނަށް ދިޔައެވެ. މަހާނަ ކައިރި ކުޑަކޮއް ކޮނެލިތަނުން އޮޅާލާފައި އޮތް ކަރުދާސްގަނޑެއް ފެނުނެވެ. އެ ކަރުދާސްގަނޑު ނެގިތަނުން ސުހާ ބައްޕަގެ ފޯނު ރިންގްވިއެވެ. ފޯނު ނެގިތަނުން ” ކަލޭ އަންހެނުން ކަރުގަ ހިފައިގެން މަ މިހުރީ ހަމަ މިހާރު ތި ބާއްވާ ” ބަރު އަޑަކުން ސުހާ ބުނެލިއެވެ. ސުހާ ބައްޕަގެ މޫނުން ހާސްކަންފެނުމާއެކު ހާފިޒްއަށް ގޯހެއް ހިނގައިފިކަން އެނގުނެވެ. ނެގި ކަރުދާސްގަނޑު އޮތްތަނުގައި ބާއްވާފައި ގެއަށް ދެމީހުން ގޮސް ވަތްތަނުން ދެމީހުންގެ ފައިބުޑަށް ފުރޮޅެމުން އައިސް ޖެހުނީ ސުހާގެ މަންމައެވެ. އެއިރު ސުހާ ހުރެގެން ބަރު އަޑަކުން ހެނީއެވެ. އެންމެން ބަލަން ތިއްބާ ފަހަތަށް ދަމުންގޮސް ފާރުގައި ތަތްވެގެން އެރީ ސީލިންގްގަ ބޯޖެހޭ ހިސާބަށްށެވެ. އެއަށްފަހު ދެލޯ ބޮޑުކޮއްލައިގެން އެންމެނާ ދިމާލަށް ބަލަހައްޓައިގެން ފަތިސް ވަންދެކަށް އިނުމަށްފަހު މަޑު މަޑުން ތިރިއަށް އައިސް ހުއްޓާ ފަތިސްނަމާދު ބަންގީގެ އަޑަށް ސުހާ ހޭނެތިގެން ވެއްޓިއްޖެއެވެ.
ވަގުތަކީ އެންމެ ރަނގަޅު ވަގުތުކަމަށް ބަލާ ހާފިޒް ސައިކަލަށް އަރައިގެން ބާރު ބާރަށް ގޮސް ސަހަރާއަށްވަދެ ކަރުދާސްގަނޑު ނަގައިގެން އައިސް ސުހާމެންގެއަށްވަނެވެ. އަދި ސުހާ ބައްޕަ އަތަށް އެކަރުދާސްގަނޑު ދިނުމަށްފަހު އަނެއްދުވަހު މެންދުރަށް ހުރިހާ ކަމެއް ނިމޭނެކަމަށް ބުނިއެވެ. ސުހާގެ ބައްޕަ ހާފިޒް އެގޭގައި މަޑުކޮއްދިނުމަށް އެދުނެވެ. ދައުވަތު ގަބޫލްކޮއް އެގޭގައި ވަކިން ހުރި ކޮޓަރިއެއްގައި ހާފިޒް މަޑުކުރިއެވެ. ހެނދުނު އިރު އެރުމާއެކު ހާފިޒްއަށް ހޭލެވުނީ ސުހާގެ މަންމައާ ބައްޕަ ހަޅޭއްލަވާ އަޑަށްށެވެ. ވެގެން އުޅޭގޮތް ބެލުމަށް ނުކުތްއިރު ކަމަކުދާކަށްނެތެވެ. ސުހާ ހުރީ މަންމަގެ ކަރުގައި ފޯއްވަޅި ޖައްސާ ފިއްތާލައިގެންނެވެ. ކަރުން ތަންގަނޑެއް ކަނޑައިގެން ގޮސް އެއިރު ދިޔައީ ލޭފައިބަމުންނެވެ. ” ކީއްކުރަން އެ ގަނޑު ގެނައީ މިތަނަށް މަ ބުނިންދޯ އެ އޮތްތާ ބާއްވަން މިފަހަރު މި ރުނޑި މަރާލާނަން ” ބަރު ބިރުވެރި އަޑަކުން ސުހާ ބުނެލިއެވެ. ހާފިޒް ވަގުތުން ބާރު ބާރަށް ބަންގި ގޮވަންފެށިއެވެ. ބަންގީގެއަޑަށް ސުހާ ދެކަންފަތުގައި އަތްއެޅިތަނުން ސުހާގެ މަންމަ ސަލާމަތްވާން ދުއްވައިގަތެވެ. ހާފިޒް ވަގުތުން ރުގްޔާ ކުރަން ފެށުމާއެކު ސުހާގެ ގައިތެރޭގައިވާ ޖިންނި ހައްޔަރުވެއްޖެއެވެ. ކާކު ކީއްކުރަން ކުރި ކަމެއްތޯ ސުވާލުކުރުމުން އެކަން ކުރީ ސުހާއާއެކު މަސައްކަތްކުރި ހަކީމް ކިޔާ މީހެއްކަން ބުނިއެވެ. އޭނާގެ މަގްސަދު ހާސިލް ނުވެގެން ސުހާގެ ދުވަސް ދުއްވާލަން ނިންމީކަމަށް އެ ޖިންނި ބުނިއެވެ. ހުރިހާ އެއްޗެއް ކިޔާދިނުމުން ޖިންނި އިސްލާމްވުމަށް ދައުވަތުދެވުނެވެ. ވިސްނުންތަކެއް ވިސްނުމަށްފަހު އެ ޖިންނި އިސްލާމްވިއެވެ. އަދި ސިހުރު ބާތިލްކޮއް އެސްފީނާވެސް ރަނގަޅުކޮއްދިނެވެ.
ސުހާ ހޭއެރުމާއެކު މަންމައާ ބައްޕަ ދުވެފައި އައިސް ސުހާ ގައިގާ ބައްދާގަތެވެ. ކިހިނެއް ވީތޯ އެންމެން ކައިރި ސުވާލުކުރަންފެށިއެވެ. ސުހާ ލޯ މަރާލާފައި ހުޅުވާލިއިރު ކަންވީގޮތް ކިޔާދިނުމަށް ކަރުނަ ބާލާހާލު އާދޭސްކުރަންފެށިއެވެ. އެންމެ ފަހަށް ހާފިޒް ހުރިހާއެއްޗެއް ކިޔާދިނެވެ. ކިޔާދީ ނިމުމާއެކު ސުހާ ވަގުތުން ފޯނުނަގާ ހަކީމްއަށް ގުޅާލިއެވެ. އަދި ބައްދަލްކޮއްލަން އެގެއަށް އައުމަށް އެދުނެވެ. ރީތިވެލައިން ސެންޓްތަޅާލައިގެން އައި ހަކީމް ގެއަށް ވަނުމާއެކު ސުހާ އޭނާގެ ގަޔަށް ފުރުތަމަވެސް ހޫރުވާލީ އޭނާ ސުހާއަށް ހެދި ސިހުރު ކަރުދާސްގަނޑެވެ. އެއަށްފަހު ފުލުހުންނާ ހަކީމް ހަވާލުކުރެވި ދައުވާކޮއް ފަނަރަ އަހަރަށް ޖަލަށްލެވުނެވެ.
No comments:
Post a Comment