ޒަމާނަށް އައި ބަދަލާއެކު ޓެކްނޯލަޖީވަނީ ވަރަށް ކުރިއަރާފައެވެ. ކޮންމެ މީހަކު ކޮންމެ ތަނެއްގާ ހުއްޓަސްވެސް އެމީހަކާ ވާހަކަ ދައްކާލާ ދެކިލުމަކީ މިހާރު އުނދަގޫ އެއްވެސް ކަމެއްނޫނެވެ. ނަމަވެސް މި ކުރިއަރާފަވާ ޒަމާނުގާވެސް އެންމެ އުނދަގޫބޮޑު އެއް ބަޔަކީ ވަގުންނެވެ. ފައިސާ ހޯދަމުންދަނީ ހީނުކުރާހާވެސް ބޮޑެތި މަކަރުތައް ހަދައިގެންނެވެ.
ޒާންއަކީ އުމުރުން ފަންސަވީސް އަހަރުގެ ޒުވާނެކެވެ. އޭނާއަކީ މައިންބަފައިން ދިނުމުން ކައިގެން ހުންނަ މީހެކެވެ. ދުވާލު އޭނާ ކަމަކީ ނިދުމެވެ. ރޭގަނޑު ވެއްޖެނަމަ އުޅޭނީ މުޅިންވެސް ބޭރުގައެވެ. އޭނާ ދެކޭ ގޮތުގާ ނައިޓްލައިފްއޭ މި ކިޔާ ދިރިއުޅުމަކީ ދިރިއުޅުމެވެ. ގެޔަށް ވަންނާނީ ފަތިސްނަމާދަށް ބަންގި ދިނުމާއެކުގައެވެ. ޒާންގެ މަންމަ ޒާން ވަޒީފާއަކަށް ނުދާތީ ވަރަށް އެއްޗެހި ކިޔައެވެ. އަބަދަކު މައިން ބަފައިން ނުތިބޭނެކަމަށް އަބަދުވެސް ބުނަމުން ގެންދިޔައެވެ. މިހެން އުޅެނިކޮށް ޒާންގެ ބައްޕަ ދުނިޔެއަށް އަލްވަދާއު ކިޔަންޖެހުނީ ނުރައްކާތެރި އެކްސިޑެންޓްއެއްގައެވެ. މިހާރު ޒާންގެ ހުރީ މަންމަ އެކަންޏެވެ. ޒާންގެ ނައިޓްލައިފް ދޫކޮށް ވަޒީފާއަށް ނުކުންނަން މަޖްބޫރުވިޔެވެ. ފުރުތަމަވެސް ވަނީ އާދައިގެ ފިހާރައަކަށްށެވެ. ފިހާރައިން ލިބޭ އެތިކޮޅު މަދުކަމުން ޒާން އެކަމާ އަބަދުވެސް ޝަކުވާކުރެއެވެ. މިހެން އުޅެނިކޮށް ޒާންގެ ވަރަށް ގާތް ރައްޓެއްސެއް ކަމަށްވާ ހޫދު އެއްދުވަހަކު ފިހާރަޔަށް އައިސް ވަދެލިޔެވެ.
ހޫދު : އަހަ ސޭޓާ ވިޔަފާރި ކިހިނެއް؟
ޒާން : މި ވައި ތަނެއް
ހޫދު : (ހިނިގަނޑެއް ޖަހާލާފަ) ތިތާ އިނުމުގެ ބޭނުމަކީ ކޮބާ ދެން؟
ޒާން : މަޖްބޫރީ
ހޫދު : (ޖީބުން ފަހުގެ އައިފޯނެއްނަގާ ދައްކާލާފަ) މަ ނުދަން ވަޒީފާއަކަށް އެކަމު ބަލާ މަ އަތުގަ އޮތް އެއްޗެއް
ޒާން : ކަލޭ ހަކުރު ވިއްކަނީދޯ
ހޫދު : ނޫނޭ ހަކުރު ވިއްކަން ގާތްވެސް ނުވޭ
ޒާން : ދެން؟
ހޫދު : ފިހާރަ ނިންމާފަ މަށާ ދިމާކޮށްލާ އޭރުން ކިޔާދޭނަން
ޒާން : އެންމެ ރަނގަޅު
ފިހާރަ ނިމުމާއެކު ޒާން ހޫދުއަށް ގުޅާގެން ވެސްޓް ޕާކްއަށް ކޮފީއަކަށްދިޔައެވެ. އަދި އެއްޗެއްހި އޯޑަރު ކުރުމަށްފަހު ކެތްމަދުވެފާއިން ޒާން ފަށާގަތެވެ.
ޒާން : ދެން ކިޔާދީބަލަ
ހޫދު : މިއީ އާދައިގެ ކަމެއްނޫން މިއީ ވަރަށް ކެރިގެން ކުރަންޖެހޭ ކަމެއް. ވަރަށް ރިސްކީވެސްވާނެ. ކަލެޔަށް ވާނެތަ
ޒާން : ކިޔާދިނީމައެއްނު އެނގޭނީ
ހޫދު : އެންމެ ރަނގަޅު އަޑުއަހާ. އަހަރެން ނުދަންނަ ނަމްބަރުތަކަށް ގުޅާފަ މި ޖައްސަނީ މޮޅު ސްޓޯރީއެއް ޖައްސާން ފައިސާ ހޯދަނީ.
ޒާން : އެހެން.
ހޫދު : (ތަނުގާ މީހުން މަދުތޯ ބަލާލާފަ ނުދަންނަ ނަމްބަރަކަށް ގުޅާލާފަ) ހަލޯ މިއީ ކާކުކަން އެނގޭތަ. ވަރަށް ގާތް ރައްޓެއްސެއްކޭ. އެނގޭނެ ދެން. އާނ މިއީ އައްސަދުއޭ. މަބުނީ ކަމެއް ކޮއްލާދީބަލަ މަ މާދަން އަނބުރާދޭގޮތައް ދީބަލަ ތިންސަތޭކަ ރުފިޔާ. އަންހެނުން ބަނޑުގަ ރިއްސާތީ ކޮންމެހެންވެސް ރަށަށްދާން އެބަޖެހޭ. އާނ ތި ފޮނުވާލަނީ ދޯ. މި ފޮނުވަނީ އެކައުންޓް ނަމްބަރު މިއީ މަ ރައްޓެއްސެއްގެ އެކައުންޓް ނަމްބަރު މަ ނަމްބަރަށް ޖަމާކޮށްފިއްޔާ ލޯނަށް ކަނޑާނެ. އޯކޭ ބޭއްވިއްޔޭ. (ޒާންއަށް ބަލާލާފަ) ގެނޭ ކަލޭ އެކައުންޓް ނަމްބަރު.
ޒާން : (އެކައުންޓަށް ފައިސާ ޖަމާވިތަން ފެނިގެން) އޯ މީމާ ސަޅި ގޮތެއްދޯ. ފަސޭހައިން ފައިސާ ހޯދަން. ކީއްކުރަން ވަޒީފާއަށް ދާކަށް
ހޫދު : ދެވި ނުހިފާތި މިކަމަށް
ޒާން : ފައިސާ ހޯދާލާނަން މިފަހަރު. ލިބޭ ކޮންމެ ފަހަރަކު ކަލެޔަށް ކޮފީ އޮންނާނެ.
ޒާން ގެޔަށް ދިޔަ މަގުމަތީ ތަނަކަށްވަދެ ދިހަ ސިމްކާޑް ބޭރު ބަޔަކަށް ފައިސާދީގެން ނެގުވިޔެވެ. އަދި ބައްތި ފޯނެއް ގަތުމަށްފަހު ގެޔަށް ގޮސް ފަހަރަކު ސިމްއެއް ލައިވާގެން ހޫދު ކަންތައް ކުރި ގޮތައް ކަންތައް ކުރަމުން ގެންދިޔައެވެ. އިސާހިތަކު ޒާންގެ އެކައުންޓަށް ހިތްފުރޭވަރަށް ފައިސާ ވަންނަންފެށިޔެވެ. އެއްރޭ މަތިން ފަސްހާސް ހަމަކޮށްލިޔެވެ. ޒާންއަށް މިކަންވީ ވަރަށް މޮޅު ކަމަކަށްށެވެ.
ޒާން އޭނާގެ ނައިޓްލައިފް އަލުން ފަށާގަތެވެ. އިސާހިތަކު އޭނާއަށް ލިބެމުންދިޔަ މުއްސަނދިކަމާމެދު އޭނާގެ ރައްޓެހިން ސުވާލުކުރަންފެށިޔެވެ. ނަމަވެސް ޒާން ބުނަނީ އެއީ އަމިއްލަ މަސައްކަތުންކަމަށްށެވެ. ތެދުވާނީ ތެދަށްށެވެ. އަމިއްލަ މަސައްކަތެވެ. ނަމަވެސް ޒާންއަށް ނޭނގި މި ކުރެވެމުންދާ ބޮޑު ވައްކަމާ ފޭރުން އޭނާއަށް ހިތިވާނެކަމަށް އޭނާ ކުޑަކޮށްވެސް ހިތަށް ނާރުވާލަޔެވެ. މިހެން އުޅެނިކޮށް އެއްދުވަހަކު ޒާން ކުރި ކޯލްއަކުން މީހެއް އަތުން ފަންސަވީސްހާސް ރުފިޔާ ދަމައިގަތެވެ. އޭގެ ދުވަސްކޮޅެއް ފަހުން ޒާންގެ އެކުވެރިޔަކު ކަމުގާވާ މަހްމޫދު އައިސް ޒާންއާ ބައްދަލްކޮށްލިޔެވެ. މަހްމޫދުއަކީ ސައިބާ ސެކިޔުރިޓީ ކިޔަވާންހުރި މޮޅު ކުއްޖެކެވެ. އޭނާ އައިސް ޒާން ކައިރީގަ އޭނާާގެ ބައްޕައަށް އޮޅުވާލާ މަކަރު ހަދައިގެން ޒާން ނެގި ފައިސާއަކީ އޭނާ ބައްޕަ ހައްޖަށްދާން ބަހައްޓާފަހުރި ފައިސާކަމަށްބުނެ އެ އަނބުރާ ދިނުމަށް އެދުނެވެ. ނަމަވެސް ޒާން އެތައް އުޒުރެއް ދެއްކިޔެވެ. ޒާން އެފަދަ ކަމެއް ނުކުރާކަމަށް ބުނަމުންދަނިކޮށް މަހްމޫދު ޒާންގެ ފޯން ޓްރެކްކުރި ގޮތްތައް ކިޔާދިނެވެ. އަދި ފައިސާ ފޮނުވާފާވާ އެކައުޓްއަކީ ޒާންގެ އެކަންޓްކަން އެނގުމާއެކު ބޭންކްއަށްވެސް މައްސަލަ ޖައްސާފަވާނެކަމަށް ބުންޏެވެ. މިހިސާބުން ޒާން ވަރަށް ބިރުގަންނަންފެށިޔެވެ. އޭނާ ހުރީ އޭނާ ދުވަހަކުވެސް ފަލީހަތްނުވާނެ ކަމަށް ނިންމާންނެވެ. އެންމެ ފަހަށް އެ ފައިސާ އެކައުންޓްއިން ނަގާ މަހްމޫދާ ހަވާލުކޮށް ފުލުހަށް ނުގެންދަން އާދޭސްކުރަންފެށިޔެވެ.
މަހްމޫދު : ޒާން. އަހަރެން ކަލެޔަށް މައާފްކޮށްފިން. ނަމަވެސް ކުރެވެމުންތިޔަދާ ކަންތައް އަވަހަށް ހުއްޓާލާ. ތިކަމުގެ ސަބަބުން ޒާންއަށްހުރީ އާހިރަތުގާ ކިހާބޮޑު ދެރަޔެއްކަން އެނގޭނަމައޭ އަހަރެން ހިތަށް އަރާ. ސީދާ ތި ކުރެވޭނީ ވައްކަމާ ފޭރުން. ޒާން... އަހަރެން މިއަދު މިދޭ ފުރުސަތުގެ ބޭނުން ހެޔޮގޮތުގާ ހިފާ. ކަލޭ އެކައުންޓްގާހުރި ފައިސާތައް އޭގެ ވެރިފަރާތްތަކަށް އަވަހަށް ރައްދުކޮށް ތިކަމުން ސަލާމަތްވެ ތައުބާވޭ. އަދި ހަރުދަނާ މީހަކަށްވެ ކިތަންމެ ބުރަ މަސައްކަތެއް ކޮށްގެންވިޔަސް ހަލާލު ފައިސާ ހޯދަންފަށާ. ޝައިތާނަގެ ބަހަށް ނުހެއްލޭ. އެއީ ސީދާ އަހަރުމެެންގެ އަދުއްވެއް.
މަހްމޫދު ދިޔުމުން ޒާން ވަރަށް ފުންކޮށް ވިސްނަންފެށިޔެވެ. ސަލާމަތް މިވީ ހަމަ ކިރިޔާކަން އޭނާއަށް ވިސްނުނެވެ. އަވަސް އަވަހަށް އޭނާ އެކައުންޓްގަވާ ފައިސާތައް އޭގެ ވެރިފަރާތްތައް ހޯދާގެން ޓްރާންސްފާކުރަންފެށިޔެވެ. އެކަން ނިމުމުން އެކަމާ ރޮއެ ހިތާމަކުރަންފެށިޔެވެ. އަދި ﷲ އަށް ކުއްތަންވެ ބިރުވެތިވެ އެފަދަކަމެއް ދުވަހަކުވެސް ނުކުރުމަށް ހިތުގާ ވަރުގަދަ އަޒުމެއް ކަނޑައެޅިޔެވެ.
- ނިމުނީ -
No comments:
Post a Comment