އޯގާތެރި އެކުވެރިންނަކީ ވަރަށް މަދު ބަޔެކެވެ. އެއީ ރަން މުތުންނޭ ބުންޏަކަސް ގޯހަކަށް ނުވާނެއެވެ. ތިމާ އެންމެ ބޭނުން ޖެހޭ ދުވަހު ތިމާއަށް އަޅާލާ ފަޅުފިލުވާދީ އެކަނިވިޔަނުދޭނި ހަމަ އެފަދަ އެކުވެރިންނެވެ.

މީސް މީޑިޔާއަކީ އަބަދުވެސް އަހަރެން ކޮންމެ ދުވަހަކު ހާވާއެއްޗެކެވެ. މީހުން ކޮށްފައި ހުންނަ ޕޯސްޓްތައް ބަލާލާ ސަމާސަކޮށްލުން އެއީ އަބަދުވެސް އަހަރެން ކުރާހިއްވާ ކަމެކެވެ. މިހެން އުޅުމުގެ ތެރޭގަ އަހަރެންނަށް އާ ރަހްމަތްތެރިޔަކު ލިބިގެންދިޔައެވެ. އަންހެން ރަހްމަތްތެރިޔެކެވެ. ވަރަށްވެސް ސަމާސާބޮޑު އަނގަތަޅާ ތަފާތު އަންހެނެކެވެ. ޖެއްސުންވެސް ބައެއްފަހަރު އެހާމެކޮށްލައެވެ. އޮންލައިންވާއިރަށް އެންމެ ފުރުތަމަވެސް ގޮވާލާނެއެވެ. ނުކައި ނުބޮއެ ހުރިކަން އިނގިއްޖެނަމަ ހަޅޭއްވެސް ލަވާނެއެވެ. މިވަރުގެ އަންހެނަކު އަދި އަހަރެން ދުވަހަކުވެސް ނުދެކެމެވެ.

ރޯދަމަސް އައިސްވެސް ޖެހިއްޖެއެވެ. އެކުވެރިޔާ އަބަދުވެސް އަހަރެންގެ ހާލު ބަލާހަދައެވެ. އެކަނި ދިރިއުޅުމެއް އުޅެމުންދާތީ ރޯދަ ވިއްލަން ހަދަނީ ކިހިނެއްތޯ އަބަދުވެސް ސުވާލުކުރެއެވެ. ނަމާދަށް ބަރާބަރަށް ދޭތޯ ބަލައެވެ. ދީނީގޮތުން ދޭންވާ އެތައް ނަސޭހަތެއްދެއެވެ. އަދި މީހަކާ އަވަހަށް އިނުމަށް ނަސޭހަތްތެރިވެއެވެ. އެކުވެރިޔާގެ ނަސޭހަތްތައް އަބަދުވެސް އަހަރެން އަޑުއަހަނީ އަޑުއަހާ ހިތުންނެވެ. އެންމެ ފަހަށް މީސްމީޑިއާއިން ނަމްބަރު ލިބި ވައިބާއިން ދެމީހުން ވާހަކަދައްކަންފެށީމެވެ. އެކަކު އަނެކަކަށް ބައެއްފަހަރު ގުޅާ ޖެއްސުންކުރަންވެސް ފެށިގެންދިޔައެވެ. އެކުވެރިޔާ އަބަދުވެސް އެދެނީ އޭނާ ގޭގަ އޮންނަން ފޫހިވާތީ ބޭރަށް ގެންދިޔުމަށްށެވެ. އަހަރެން ވީވަރަކުން ވަގުތު ހޯދައިގެން އެކުވެރިޔާ ގޮވައިގެން ބޭރަށްދާންފެށިމެވެ. މިހެން އުޅުމުގެތެރޭގަ އޭނާ ގޮވައިގެން ގެޔަކަށް ދިޔުމަށް އެދުނެވެ. އެގެޔަކަށް ދިޔުމުން އަހަރެންނަށް ލިބުނީ އިތުރު އުފަލެކެވެ. އަހަރެންގެ އެކުވެރިޔާއަކީ އަހަރެންގެ ވަރަށް ގާތް ރައްޓެއްސެއްގެ ދޮންތައެވެ. އެހިސާބުން ގުޅުން އިތުރަށް ވަރުގަދަވިޔެވެ.

ދުވަސްގަނޑަކަށްފަހު ދެމީހުން ދެމެދުގާ ވަރަށް ބޮޑަށް އިތުބާރު އުފެދުނެވެ. އެކުވެރިޔާގެ ފޮރުވިފައިވާ ބޮޑެތި ހިތާމަތައް އޭނާ އަހަރެންނާ ހިއްސާކުރިޔެވެ. އޭނާއަކީ ބަލިމީހެއްކަން އަހަރެންނަށް އެހިސާބުން އެނގުނެވެ. އަދި ހަޔާތުގާ ކަންތައް ދިމާވެފާނީ ވަރަށް ހިތްދަތިކޮށްކަން އެނގިގެންދިޔައެވެ. އެހިސާބުން އަހަރެންނަށް ވެވުނު އެހީއެއް އެކުވެރިޔާއަށް ވާންފެށިމެވެ. އެކަމާ އެކުވެރިޔާ ވަރަށް އުފާކުރިޔެވެ. އަދި އަބަދުވެސް ޝުކުރުއަދާކުރެއެވެ. މިއަދު އޭނާ މިދުނިޔޭގަ އެންމެ އިތުބާރުކުރާ މީހަކަށް އަހަރެން ވެގެންދިޔައެވެ.

އަހަރުތަކަށްފަހު އަހަރެން ކައިވެނިކޮށްފީމެވެ. އެކުވެރިޔާ އެކަމާ ވަރަށްވެސް އުފާކުރިޔެވެ. ކައިވެނިކޮށްގެން އަހަރެން އަންހެނުން ރަށަށް ބަދަލްވެ އެހެން އަންނަ ދަތުރުވަރެއްގާ ވަރަށް މަދުފަހަރަކުނޫނީ އެކުވެރިޔާއާ ދިމާވެސްނުވެއެވެ. މިހެން އުޅެމުން ގޮސް އަހަރެންގެ ކައިވެންޏަށް އަހަރެއްވީ ދުވަހު އަހަރެން ހެނދުނު ސައިބޮއެގެން އައިސް ފޯނު ބަލާލިތަނުން ފެނިގެންދިޔައީ މިސްކޯލްއަކާ މެސެޖެކެވެ. މިސްކޯލްއަކީ އަހަރެން އެކުވެރިޔާގެ ބޭބެގެ މިސްކޯލްއެކެވެ. މެސެޖްގައިވަނީ އެކުވެރިޔާ ނިޔާވި ވާހަކައެވެ. އަހަރެންނަށް ގަބޫލްވެސް ފުރުތަމަ ނުކުރެވުނެވެ. އަވަސްއަވަހަށް ގުޅާލީމެވެ. ގުޅާލުމުން އެނގިގެންދިޔައީ ބަލިވެގެން ހޮސްޕިޓަލަށް ގެންދިޔަތާ ހަތަރުވަނަ ދުވަހު ކުއްލިއަކަށް ނިޔާވިކަމެވެ. ހުރި ހިތާމައެއްގެ ބޮޑުކަމާއެވެ. އަހަރެންގެ ހިތް ހަމަ ދިޔައީ ފަޅަފަޅާގެންނެވެ. ލޮލުން ކަރުނަ ބާލާހާލު އަންގަންވާ ބަޔަކަށް އަންގަމުންދިޔައީމެވެ. އެންމެ ބޮޑަށް ދެރަވީ އެކުވެރިޔާގެ މޫނު ނުފެނި ޖަނާޒާގާ ބައިވެރި ނުވެވޭތީއެވެ. ނަމަވެސް އަބަދުވެސް ތި ލޯބި އެކުވެރިޔާއަށް އަހަރެން ހެޔޮ ދުއާކުރާނަމެވެ.

– ނިމުނީ –

ނޯޓް : މިއީ އަޅުގަނޑުގެ ލޮބުވެތި އެކުވެރިޔާ ފާތިމަތު ނަދީމާގެ ހަޔާތަށް ބިނާކޮށް ލިޔެވިފާވާ ވާހަކައެކެވެ. الله سبحان و تعالىٰ. ނަދީގެ ފުރާނައަށް ހެޔޮ ރަހްމަތްލައްވާ ކަށްވަޅުގެ އަޒާބުން ރައްކާތެރިކުރެއްވާ ސުވަރުގޭގެ ދާއިމީ ނިއުމަތް ދެއްވާށެވެ. އަދި އާއިލާއަށް ކެތްތެރިކަން ދެއްވާށެވެ.

ނިއުމަތް ދެއްވަނީ الله سبحان و تعالىٰ. އެވެ. ނިއުމަތް އަނބުރާ ގެންދަނީވެސް الله سبحان و تعالىٰ. އެވެ. ނިއުމަތެއް ލިބުމުން އެ ނިއުމަތަކަށް ޝުކުރުނުކޮށް ހިތުހުރިހާ ގޮތަކަށް މިދުނިޔޭގަ އެއްވެސް ބިރެއްނެތި އުޅޭ އިންސާނުންވެސް މަދެއްނޫނެވެ.

އެމެރިކާގެ ބިލިޔަނަރެއްކަމުގާވާ ޓްރެވޯއަކީ އޭނާގެ މުއްސަނދިކަމަށް މަޝްހޫރު މީހެކެވެ. މީސްމިޑިއާގަވެސް އެހާ މަގްބޫލް މީހެކެވެ. ފައިސާއިން އޭނާއަށް ނުކުރެވޭ ކަމެއް ނޯވެޔެވެ. ޒަމާނީ ހަތިޔާރާއެކު އޭނާގެ ގެދޮރު ފޯރިމެރުމަށް ބައިތިއްބާފަ ތިބެނީ އެންމެ އަގުބޮޑު އަދި އެންމެ ތަޖުރިބާކާރު ސިފައިންނެވެ. މިލްކިއްޔާތުގާ ފަސް މެންޝަން އަދި ތިން އިމާރާތާ އެތައް އުޅަނދެއްއޮވެއެވެ.

އެހެން ދުވަސްތަކެކޭ އެއްގޮތަށް މިއަދުވެސް ޓްރެވޯ ދިޔައީ އޭނާގެ ވިޔަފާރިޔާގެން ކުރިޔަށްށެވެ. އޮފީހުގާ އިނދެގެން އެކި މީހުންނަށް ގުޅާ ވާހަކަދައްކަމުންނެވެ. ދުވަހުގެ ތާވަލް ރޭވިފާވާ ގޮތުން މިއަދަކީ މެންދުރުން ފަށައިގެން ދިހަ ދުވަހަށް އޭނާ ޗުއްޓީ ހަދާލަން ތާކަށްދާދުވަސްކަމުން މަސައްކަތް މަޑުޖައްސާލާފަ އަމިއްލަ ޖެޓަށް ގުޅުމަށްފަހު އެއާޕޯޓްއަށްދިޔައެވެ. ޖެޓްއަށް އެރުމަށްފަހު ޕައިލްޓް ކައިރި އޭނާ އިޓަލީއަށް ގެންގޮސްދިނުމަށް އެދުނެވެ.

ދިގު ދަތުރަކަށްފަހު ޓްރެވޯއަށް އިޓަލީއަށް އާދެވިއްޖެއެވެ. އެންމެ ފުރުތަމަވެސް އޭނާ ބޭނުންވީ ވިއެންސްއަށް ގޮސްލާށެވެ. ދުވަހަކީ ހުކުރުދުވަހެވެ. ވިއެންސްގައި އުޅުމުގެތެރޭގައި އޭނާއަށްފެނިގެން ދިޔައީ ބޮޑެތި ޖަމާއަތްތައް ހަދައިގެން ބަޔަކުމީހުން ހަށަށްބަނދެގެންތިބިތަނެވެ. ޓްރެވޯ އޭނާގެ ހަށިފާރަވެރިޔެއް ކައިރި އެއީ ކޮންބައެއްތޯ އަހާލުމުން އެނގިގެންދިޔައީ އެއީ މުސްލިމުންކަމަށްށެވެ. ކޮންމެޔަކަސް ވިއެންސްގާ އިތުރަށް މަޑުނުކޮށް ދެން ޓްރެވޯ އެންމެ ބޭނުންވީ ފެރާރީއެއް ގަންނަންށެވެ. އެގޮތުން ފެރާރީގެ އެންމެ ފަހުގެ ވައްތަރު ވިއްކާ ފިހާރައަކަށް ދިޔުމުން އެފިހާރަގައި ބަންދުބޯޑު އަޅުވާފައި އިނެވެ. އެ ބޯޑުގާވާ ލިޔުންކޮޅު ކިޔާލިއިރު އޭގަ ލިޔެފައިވަނީ ވެރިފަރާތްވަނީ ހުކުރުނަމާދަށް ގޮސްކަމެވެ. އަދި ހުޅުވާނީ ދެގަޑި ބައިގަކަމަށްށެވެ.

ކައިރީގަ ހުރި ކޮފީ ޝޮޕްއަކަށްވަދެ ޓްރެވޯ މަޑުކޮށްލައިގެން އިނދާ އިރުކޮޅަކުން ފިހާރާއިގެ ވެރިމީހާ އައިސް ފިހާރަ ހުޅުވިތަން ފެނިގެންދިޔައެވެ. ފިހާރަ ހުޅުވުމާއެކު އަވަސް އަވަހަށް ޓްރެވޯ ގޮސް ފިހާރައަށްވަނެވެ. އަދި އެންމެ ފަހުގެ ފެރާރީ މޮޑެލް ދައްކާލުމަށްއެދުނެވެ. ވެރިމީހާ އެންމެ ފަހުގެ މޮޑެލް ދައްކާލުމުން ވަގުތުން ފައިސާ ދައްކާފަ ޓްރެވޯ އޭނާގެ ފެރާރީ ގަނެގެން ނުކުތެވެ. އެއަށްފަހު ފެރާރީގައި މުޅި އިޓަލީގަ ބުރެއްޖަހަން ނިންމިއެވެ. އެތައް އިރަކު ދުއްވުމަށްފަހު ވަރުބަލި ފިލުވާލުމަށް ފެހިކަން ގަދަ ރީތި މާތައްހުރި ބިމަކަށް މަޑުކޮށްލިޔެވެ. އެއަށްފަހު ފެރާރީއާއެކު ސެލްފީއެއްނެގިއެވެ. އަދި އަޕްލޯޑްކުރަމުން ސްޓޭޓަސްގާ ޖަހާލިޔެވެ. މިއީ އަހަރެންނާއެކު ދެން އޮތް ދުނިޔެއަށްވެސް ގެންދާނެ ކާރެވެ. އަހަރެން މިކާރުގާ ދިގުދެމިގެންވާ ދަތުރުތައް ކުރާނަމެވެ.

އަޕްލޯޑްކުރުމާއެކު ތައުރީފްގެ ބަދަލްގާ ޓްރެވޯއަށް ލިބެންފެށީ މަލާމާތާ ލަދެވެ. މީހުންގެ ނުރުންވި ބަސްތައް ފަތިފަޗަށް ޓްރެވޯގެ ދެލޮލަށް ދިޔައީ ފެންނަމުންނެވެ. މި ސްޓޭޓަސްގެ ސަބަބުން ބައެއް ޙަބަރުތަކުގާވެސް އިސާހިތަކު އެ ވާހަކަ ލިޔެވިގެންދިޔައެވެ. ބުނާނެ އެއްވެސް އެއްޗެއް ނޭނގި ހުރެ އެ ސްޓޭޓަސް ފުހެލިޔެވެ. އެއަށްފަހު ފެރާރީއަށް އަރާ ދުއްވާލިޔެވެ. މިހެން ދުއްވުމުގެ ތެރޭގަ ކުޑަ އަވަށަކަށް އާދެވިއްޖެއެވެ. އެ އަވަށުގެ މީހުންވަނީ ގެޔަކަށް ވަނުމަށް ދިގު ސަފެއް ހަދާފައެވެ. ވެގެން އުޅޭގޮތް ބަލާލުމަށް ޓްރެވޯ އަވަސްވެގަތެވެ. އެތަނުން މީހަކާ ސުވާލުކޮށްލުމުން މީހަކު މަރުވެގެން އުޅޭ ވާހަކަ ބުނެލިޔެވެ. އަދި މޫނު ބަލާލަން އައުމަށް ދައުވަތުދިނެވެ. ޓްރެވޯ އިރުކޮޅަކު ކިޔުގަ ހުރެފަ އެތެރެޔަށްވަނެވެ. ފުރުތަމަވެސް ނޭފަތުގާ ޖެހުނީ ދުވަހަކުވެސް ނުދުވާހާ މީރުވަހެވެ. މައްޔިތާއާ ކައިރިވިވަރަކަށް ދިޔައީ މީރުވަސް ގަދަވަމުންނެވެ. މައްޔިތާއާ ކައިރި ވުމާއެކު ފެނިގެންދިޔައީ އުޖާލާ މޫނެކެވެ. އެމޫނުގާ އުފާވެރި ހިނިތުންވުމެއްހުއްޓެވެ. ހައިރާންވެފާހުރި ޓްރެވޯ އެތައް އިރަކު ބަލަން ހުރުމަށްފަހު އެގެއިން ނުކުތެވެ. އަދި މައްޔިތާގެ އާއިލާ މީހުންނާ ބައްދަލްކުރިޔެވެ. މައްޔިތާގެ ބައްޕަ ޓްރެވޯ ގޮވައިގެން ގޮސް ހަލާކުވާން ކައިރިވެފާހުރި ޖިފުޓިގަނޑަކަށްވަނެވެ. އެއަށްފަހު ކިޔާދޭންފެށިއެވެ.

” މިއީ އަހަރެންގެ ދަރިފުޅު އުޅެ ބޮޑުވިގެ. އޭނާއަށް ކުއްލި މުއްސަނދިކަމެއްލިބުނު ނަމަވެސް އޭނާ އެ ބޭނުންކުރީ އަހަރުމެން ހީވެސް ނުކުރާގޮތަށް. އޭނާއަށް ލިބުނު މުއްސަނދިކަމުން އޭނާ އެންމެ ފުރުތަމަވެސް އަހަރުމެން ގޮވައިގެން ދިޔައީ ހައްޖަށް އަދި ހައްޖަށް ނުދެވިފާތިބި އެތައް ބަޔަކު ފޮނުވާދިން. އެއަށްފަހު ސަދަގާތްގިނަކުރި އަދި މިތަނުގާ މިސްކިތެއްވެސްއެޅި. އޭނާގެ ކޮންމެ ދަތުރަކީ އިންސާނިއްޔަތައް އެހީވުމަށްކުރި ދަތުރެއް. އެތައް ބަޔަކަށް އޭނާގެ ފަރާތު އެހީލިބުން. މިހެން އުޅެނިކޮށް ދުވަސްގަނޑަކަށްފަހު އޭނާ ވަރަށް ބަލިވި އަދި އަނބުރާ މިތަނަށް އައި. އެ އައި ގޮތަށް އޭނާ ބޭނުންވީ މި ޖިފުޓީގަ އޭނާގެ ބާކީ ދުވަސްތައް ހޭދަކުރަން. ކޮންމެ ދުވަހަކު އޭނާ އެތައް ކުދިންނަށް އިލްމު އުނގަނާދޭ ހާއްސަކޮށް ގުރުއާން. އިއްޔެ އޭނާ ހަބަރެއް ނުވެގެން އައިސް އަހަރެން ބެލިއިރު ކުނާމަތީގާ އޭނާ އޮށޯވެލައިގެން އޮތް އަހަރެން ވަތްތަނުން އެދުނީ ވަރަށް އަވަހަށް ގޭތެރެ ރީތިކޮށްދިނުމަށް މެހެމާނުންތަކެއް އޭނާ ބަލާ އައިސް އެބަތިބިކަމަށް. އަހަރެން އަވަސް އަވަހަށް ގޭތެރެ ސާފުކޮށް ދޮރަށް ބަލަހައްޓައިގެން ހުރި ނަމަވެސް އަހަރެންނަށް އެބުނާ މެހެމާނުންނެއް ނުފެނުން. އެންމެ ފަހަށް ދަރިފުޅަށް ބަލާލިއިރު އޮތީ ހިނިތުންވުމާއެކު ނިޔާވެފަ. އަދިވެސް އޭނާގެ މިލްކިއްޔާތުގާ އެތައް އެއްޗެއް އެބަހުރި. އެކަމު އޭނާ ދާން އެ ޖެހުނީ ހުސްއަތާ. ގެންދެވުނީ ފިލާކޮޅަކާ ފޮތިކޮޅެއް އަދި އޭނާގެ ހެޔޮ އަމަލް. އޭ އަހަރެންގެ މެހެމާނާ. މިއަދު އަހަރެން އުފާކުރަމެވެ. އަހަރެންގެ ދަރިފުޅަށް އެވަނީ الله سبحان و تعالىٰ. ހެޔޮމަރެއް ދެއްވާފައެވެ. މި ދުނިޔެއަކީ ވަގުތީ ތަނެއް ކިތަންމެ ބޮޑު މުއްސަނޖަކަސް ރަނުންނާ ޖަވާހުރުން ސަންދޯކް ހަދައިގެން އުޅުނަސް އެކައްޗެއްވެސް ދެން އޮތް ދުނިޔެއަކަށް ނުގެންދެވޭނެކަން ހަނދާންކުރާތި ”

މައްޔިތާގެ ބައްޕަ ކިޔާދިން ވާހަކަ ޓްރެވޯ ރަނގަޅަށް އަޑުއެހުމަށްފަހު ފުންކޮށް ވިސްނަންފެށިއެވެ. އަދި އޭނާ ގަނެފައިވާ ފެރާރީއަށް ބަލާލިޔެވެ. އެއީ އޭނާގެ ހަރުމުދާކަން އެނގެއެވެ. ނަމަވެސް މާދަންވެސް އޭނާ މަރުވެއްޖެނަމަ އެ ނުގެންދެވޭނެކަން އޭނާއަށް ވިސްނެންފެށިއެވެ. މައްޔިތާ ބައްޕަގެ އެހީއާއެކު އިސްލާމްދީންގެ ހުރިހާ މައުލޫމާތެއް ޓްރެވޯ ހޯދިޔެވެ. އަދި ޝަހާދަތްކިޔާ އިސްލާމްވުމަށްފަހު އޭނާގެ މިލްކިއްޔާތު ހެޔޮގޮތުގާ ބޭނުންކުރުމަށް އަޒުމް ކަނޑައެޅިޔެވެ.

މެންދަމު ތިނެއް ޖެހުމާއެކު އަހަންމާކަލޯ އެނދުން ފުންމާލައިގެން ގޮސް ދޮންވެލިން ދަތް އުނގުޅާލައިގެން ގޮސް ކުރާ އުނދުނަށް އެރުވުމަށްފަހު ގޭގައި ހަމައެކަނި އޮތް ކްރީމް ކްރެކަރު ބިސްކޯދުއުރަ ކަނޑާލުމަށްފަހު ބިސްކޯދެއްނަގާ ހަފާލިއެވެ. އެއަށްފަހު ކުރާ ކެކުމުން އުނދުނުން ނަގާ ސާފަތްދަޅުން ސާފަތްއަޅާ ނިކަން ކަޅުކަންގަދަ ކަޅުސަޔެއް ތައްޔާރުކޮށްލިއެވެ. އެއަށްފަހު ބިސްކޯދާ ސަޔާ ޖަހައިގެން ކެއުމަށްފަހު ސައިޖޯޑު ދޮވެލާ ބެހެއްޓުމަށްފަހު ގެއިން ބޭރަށް ނުކުތެވެ. ފިނި މާހައުލުގައި ދެއަތް ފުރަގަހަށް ލައިގެން ހިނގަމުން ގޮސް ރެކީކަލޯމެންގެޔާ އަރާ ހަމަވުމާއެކު ދެއަތުން މުއްކަވާފައި ދޮރުގާ ތަޅާގަނެ މަހަށްދާން ގޮވިއެވެ. ” އޭތް މަހަށް ދާން ތެދުވޭ އަނބި ކައިރި އޮތަސް ބަނޑެއް ނުފުރޭނެ ” އެއާއެކު ރެކީކަލޯ ދޮރު ހުޅުވާލާފައި ނުކުތެވެ. ދެމީހުން އޮލަ ވާހަކައިގައި ހިނގަމުންގޮސް ތުއްތީދިމެންގެއާ އަރާ ހަމަވުމާއެކު ދެމީހުން އެއްފަހަރާ ގޮއްމުށުން ދޮރުގައި ތަޅައިގަނެ ތުއްތީދި ހޭލައްވާލުމަށްފަހު އަތިރިމައްޗާ ދިމާލަށް ހިނގާގަތެވެ. މިހެން ދިޔުމުގެ ތެރޭގައި ދޯނިންދާ އިތުރު ދެ ފަޅުވެރިޔަކު އައިސް އަހަންމާކަލޯމެނާ އަރާ ހަމަކުރިއެވެ. އެއީ ސައްތާރުސޮރާ މުހަންމާކަލޯއެވެ.

އޮލަވާހަކައިގާ އެންމެންގޮސް އަތިރިމައްޗަށް ފާބައި އަހަންމާކަލޯއާ ރެކީކަލޯ މޫދަށް އެރިގަނެގެންގޮސް ދޯންޏަށް އަރާ ދޯނި އަތިރިޔާ ކުރެވުނުހާ ގާތެއްކުރިޔެވެ. އެއަށްފަހު ރެކީކަލޯ ދޯނީގެ ދިޔަ ހިއްކައި ފަލިތައް ރަނގަޅުތޯ ބަލާލިއެވެ. އިރުކޮޅަކުން ތުއްތީދިބެވެސް އަތިރިމައްޗަށް އަތުވެއްޖެއެވެ. އެއާއެކު އެންމެން ދޯންޏަށް އަރާ ފަލިތައްނެގުމަށްފަހު ފަލިޖަހަންފެށިއެވެ. ނެރުން ބޭރުވުމާއެކު ރިޔާ ނެގުމަށްފަހު ދަތުރު ފަށާގަތެވެ. އެންދެމުމަށްޓަކާ ދާގަނޑު ތައްޔާރުކުރުމުގާ އެންމެން އަވަދިނެތި އުޅުނެވެ. އެން ދަމަން މަޑުކޮށް ދާގަނޑު ހިފައިގެން ތުއްތީދިއާ ސައްތާރުސޮރު ފޭބިއެވެ. އެއިރު ރެކީކަލޯ އުޅެނީ ދޯނި ދިޔަހިއްކުމުގައި އަވަދިނެތިއެވެ. މުހަންމާކަލޯއާ އަހަންމާކަލޯ ދޯނީގާ ތިބެގެން އެންދަމަމުން ދިޔައެވެ. އެން ދަމާ ނިންމުމަށްފަހު ކައިރިން ފެންނަންއޮތް ފަޅުރަށަކަށް ދޯނި ގާތްކުރިއެވެ. އެއަށްފަހު ދޯނީގައި ހުރި އެމުން އެންކޮޅެއް ހިފާގެން ފާބައި ކާއްޓާ ކުރުންބާ އެޅުމަށްފަހު އަލިފާންގަނޑެއް ރޯކޮށް އެންކޮޅު ފިހެލައިގެން ކާގެން ދޯންޏަށް އަނބުރާ އެންމެން ގޮސް މަހަށް ފުރުމަށްޓަކާ ދަތުރުފެށިއެވެ.

މެންދުރާ ހަމައަށް އެރުމާއެކު މަސްއައިނަކާ ލައްވާލާލާފިއެވެ. ރެކީ ކަލޯއާ އެން އުކަން ހަވާލުކުރުމަށްފަހު ސައްތާރުސޮރާ ދިޔަ ހިއްކަން ހަވާލުކުރިއެވެ. އަދި ބާކީ ތިބި އެންމެން ދޮށިއުކަމުންގޮސް ފޯރިއާއެކު މަސްބާނަމުންދިޔައެވެ. އިރުކޮޅެއްތެރޭ މުޅި ދޯނި ފުރިގެންދިޔައެވެ. ހިތްހަމަ ޖެހޭވަރުވުމުން ރަށަށް އަނބުރާ ދިޔުމަށްޓަކައި ފަލިޖަހަންފެށިއެވެ. ނަމަވެސް އޮއެ ބާރުކަމުން ޖަހަމުން ދިޔަ ފަލީގެ އެއްވެސް އަސަރެއް ނުކުރިއެވެ. އެންމެ ފަހަށް ވާގަދަވާން ފަށާފިއެވެ. އަހަންމާކަލޯއާ ރެކީކަލޯވެގެން ރިޔާ ލުއްސާލިއެވެ. ދެން ތިބި މީހުން އަތަށް ބާރުލާ ފަލިޖަހަންފަށާފިއެވެ. ނަމަވެސް ޖެހެމުން ދިޔަ ގަދަވަޔާ ކަނޑުގެ އޮއެވަރު ގަދަވުމުގެ އިތުރަށް ވިއްސާރަވިލާތައްވެސް ނަގަންފަށާފިއެވެ. ކުދިކަނީގައި ނަގަމުން ދިޔަ ވިއްސާރަވިލާތައް ކަޅުކަން ގަދަވެސް ގުގުރުމާއެކު ބޯކޮށް ވާރޭ އޮއްސާލިއެވެ. ތަނެއް ދޮރެއް ފެންނަވަރެއްނޫނެވެ. އެންމެ ފަހަށް އެތައް އިރެއް ވަންދެން ކަނޑުތެރޭ ތެޅުވުމަށްފަހު އަހަންމާކަލޯމެން ގޮސް ރަށެއްގެ ފަޅުތެރެޔަށް ވައްދާލާފިއެވެ. ފަޅުތެރޭ ތިބުމަށްވުރެ ރަށަށް އެރުން ބުއްދިވެރިކަމަށް މުހަންމާކަލޯ ހިޔާލު ދިނުމުން އެކަމާ އެންމެން އެއްބަސްވެ ރަށާ ދިމާލަށް ފަލިޖަހަމުން ގޮސް ގޮނޑުދޮށަށް ދޯނި ބީއްސާލިއެވެ. އެއަށްފަހު ރަށުތެރެޔަށް މުހަންމާކަލޯއާ އަހަންމާކަލޯ ވަދެގަނެގެން ދިޔައެވެ. ފަނުން ހެދިފައިވާ ގޭގެ ވަރަށް މަދު މަދުން ދުރު ދުރުގާ ހުއްޓެވެ. ބެލެވޭގޮތުގާ މިއީ މީހުން އުޅެފާވާ ރަށެކެވެ. އެހެންކަމުން އަނބުރާ ދޯންޏަށް ގޮސް ބާކީ ތިބި އެންމެންގާތު ބޭނުނު މަސްތައް ހިފާގެން އައުމަށް އެންގިއެވެ.

ބޭނުނު ހުރިހާ މަހެއް ގެނެއުމަށްފަހު މަސްތައް ބަހާލިއެވެ. އަދި ކޮންމެ ދެމީހަކަށް ގެޔެއް ނެގިއެވެ. އެއަށްފަހު މޫސުން ރަނގަޅުވަންދެން އެރަށުގައި ތިބެން ނިންމިއެވެ. މަސްކަނޑާ ނިންމާލުމަށްފަހު އަހަންމާކަލޯ ގޭތެރެ ހާވާލަންވަނެވެ. ގޭގައި ހިފާ ގެންގުޅޭ ސާމާނުވެސް ހުއްޓެވެ. ބަދިގެ ބަޔަށްވަދެ ދަރު އުނދުން ރޯކޮށްލުމަށްފަހު ތެއްޔެއްނަގައިގެންގޮސް ގިފިއްޔަށްވަދެ ވަޅުމަތީ ބޭއްވިފައި އޮތް ދާނިން ވަޅަށް ތިރިކޮށް ފެންނަގާ ތެލި ރަނގަޅަށް ދޮވެލުމަށްފަހު ގެންގޮސް އުނދުންމައްޗަށްލާ ގަރުދިޔަ ކެއްކުމަށް މަސްތައް އަޅާލިއެވެ. އެވަގުތު ރެކީކަލޯ ބަދިގެތެރެޔަށް ވަނުމުން ގަރުދިޔައެތި ބެލުމަށް ހަވާލުކޮށް ފެންވަރާލަން ގިފިއްޔަށް އަހަންމާކަލޯ ދިޔައެވެ. ދާނި ވަޅަށްލާ ދެތިން ފަހަރަކުން ފެންނަގާ ގަޔަށް އަޅާލުމަށްފަހު އެންމެ ފަހު ފެންދާނީ ނެގުމަށް ވަޅަށް ދާނި ލީބޮނޑީ އެއްޗެއްގަ ޖެހޭހެން ހީވެގެން ވަޅުތެރެޔަށް ބޯދިއްކޮށްލިއެވެ. އެވަގުތު ގައިން ހީބިހި ނަގައިގެންދިޔައެވެ. ވަޅުތެރޭގައި އިސްއުފުލާލާއިގެން ބަލަހައްޓައިގެން އެހުރީ މީހެކެވެ. ހުސްގަޔާ މުންޑެއް ހަމައެކަނި އަނދެލައިގެން ހުރި އެމީހާގެ ދެލޯވަނީ ކޮނެލާފައެވެ. ގަތް ބިރުން އަހަންމާކަލޯ ދުވަމުން ގިފިލިން ނުކުތެވެ. ނުކުތުމާއެކު ދިޔައީ އިތުރަށް ސިއްސައިގެންދާފަދަ މަންޒަރެކެވެ. ގަރުދިޔަތެލި ބެލެހެއްޓުމަށް ހަވާލުކުރެވުނު ރެކީކަލޯ އެހުރީ ގަރުދިޔަ އެތިތެރެޔަށް ދެއަތް ލައިގެން ހޫނު ގަރުދިޔައެތި ހާވާށެވެ. ތެޅިފޮޅެމުން ގެއިން ނުކުމެ އަހަންމާކަލޯ ދުވަމުންގޮސް ސައްތާރުސޮރާ މުހަންމާކަލޯގެ ގެޔަށްވަނެވެ.

ސައްތާރުސޮރު : (ހައިރާންވެފަ) އަހަންމާކަލޯ ކިހިނެއްވީ ހާދަ ބިރުގަނެފަ
އަހަންމާކަލޯ : (މާނޭވާލަމުން) ކިހިނެއް ނުވަނީ…. އަހަރެންގޭ ގިފިލިން ފެންވަރަމުން ގޮސް ދާނި ވަޅަށް އެންމެ ފަހުފަހަރަށްލީއިރު އެއްޗެއްގައި ޖެހޭހެންހީވެގެން ބަލާލިއިރު ވަޅުތެރޭގައިހުރީ މީހެއް
މުހަންމާކަލޯ : މީހެކޭ؟
އަހަންމާކަލޯ : އާނ. މީހެއް. އޭނާ އިސް އުފުއްލާލައިގެން އަހަރެންނާދިމާލަށް ބަލަހައްޓައިގެންހުރީ އޭނާގެ ދެލޯވެސްވަނީ ކޮނެލާފަ
ސައްތާރުސޮރު : ދޮގުނަހަދާ
އަހަންމާކަލޯ : އަދި ނިމުނީކީނޫން. ގަރުދިޔައެތި މަ ހަވާލުކުރިން ރެކީކަލޯއާ ގިފިލިން ނުކުތްއިރު އެސޮރު އޮތީ ދެ އަތް ހޫނު ގަރުދިޔައެތިތެރެޔަށްލާގެން
ސައްތާރުސޮރު : ނާހަމަ ތެދެއް
އަހަންމާކަލޯ : އާއެކޭ. ގަބޫލް ނުކުރަންޏާ ހިނގާބަލަ މަށާއެކީ

ތިން މީހުން އެއްކޮށް އަހަންމާކަލޯއާ ރެކީކަލޯ ނެގި ގޭކައިރިއަށް ދިޔައެވެ. އެކުގައި ގޭތެރެޔަށް ވަތްއިރު ގަރުދިޔައެތި ކެކި އަރަނީއެވެ. ނަމަވެސް އެތާކު ރެކީކަލޯއެއްނެތެވެ. ދެން އެންމެން އެކުގައިވަނީ ގިފިއްޔަށްށެވެ. ވަދެ ވަޅުތެރެ ބަލާލިއިރު އެކަކުވެސް ފެންނާކަށްނެތެވެ. ތިންމީހުން އެއްކޮށް ނުކުމެ އުނދުންމަތީހުރި ގަރުދިޔައެތި ބޭލުމަށްފަހު ގެއިން ނުކުތްތަނާ ކުރިމައްޗަށް ރެކީކަލޯ ދަރުބޮނޑިއެއް ހިފާގެން އައިސް ހުއްޓުނެވެ. އެވަގުތު ތިން މީހުން އެއްފަހަރާ ހަޅޭއްލަވައިގަނެއް ތިން ދިމާލަށް ދުއްވާގަތެވެ. ހައިރާންވެފާ ހުރި ރެކިކަލޯގާތަށް އައީ ހިންޏެވެ. ވެގެން މިއުޅެނީ ކިހިނެއްކަން ބަލަން ފަހަރަކު މީހެއްގެ ނަމުން ގޮވަން ފަށާފިއެވެ.

ރެކީކަލޯ : އޭ ބަލަ އަހަންމާކަލޯ، ސައްތާރުސޮރާ، މުހަންމާކަލޯ ކިހިނެއް ވެގެން ތިއުޅެނީ
އަހަންމާކަލޯ : (ގަސްގަނޑެއްތެރޭ ފިލާއޮވެ) ތިޔައީ އަހަރުމެންގެ ރެކީކަލޯތަ އަނެއްކާ
ރެކީކަލޯ : މީހަކު މޮޔައެއްނުވާނެތަ އަޅެ ފަހެ. އަޅޭ ސައްތާރުސޮރާ ކިހިނެއްވެގެންތަ ކަލޯމެނަށް ތިއުޅެނީ

ފިލާތިބި ތަންތަނުން އެންމެން ނުކުމެގެން އައިސް ރެކީކަލޯ ކުރިމައްޗަށް ހުއްޓުނެވެ. އެއަށްފަހު އަހަންމާކަލޯ ހުރިހާ އެއްޗެއް ކިޔާދިނެވެ. ރެކީކަލޯ ވަރަށް ރަނގަޅަށް އެވާހަކަ އަޑުއެހުމަށްފަހު އޭނާގެ ހިތަށްވެސް ބިރުވެރިކަން ވަދެއްޖެކަން ބުނެލިއެވެ. އެއަށްފަހު ގެނެސްފައިވާ ދަރުތައް ގޭތެރެޔަށްލުމަށްފަހު ތުއްތީދީ ހޯދުމަށް މުހަންމާކަލޯ ހިނގާގަތެވެ. މުހަންމާކަލޯގޮސް ތުއްތީދި ހޯދުމަށްޓަކާ ގެއަށްވަދެ ގޮވާލިއެވެ. ނަމަވެސް ޖަވާބެއް ނުލިބުމުން ގޭތެރޭގައި ނެތްކަން އެނގުމުން ކުޑަކޮށް ހޯދާލުމަށް ގޭކައިރި ބަލަންފެށިއެވެ. މިހެން ހޯދަމުންދަނިކޮށް ތުއްތީދިބެ ގަހެއްގެ ފުރަގަހުން ނުކުތްތަންފެނުނެވެ. މުހަންމާކަލޯ ތުއްތީދިބެ ގާތު އަހަންމާކަލޯމެންގެޔަށް ކާންދާން އައުމަށް ބުނެލިއެވެ. އެއާއެކު ތުއްތީދި ބޯޖަހާލިއެވެ.

މުހަންމާކަލޯގެ ފަހަތުން ތުއްތީދި ހިނގަމުންދިޔައެވެ. މުހަންމާކަލޯ ތުއްތީދިއާ އަނގަތަޅަމުންގޮސް ފަހަތަށް އެނބުރި ބަލާލިއިރު ތުއްތީދި ފަހަތުން ވަރަށް ރުޅިއައިސްފާހުރި އަންހެނަކު އަންނަތަންފެނުނެވެ. ރަތް ލިބާހެއްލާފައިި ހުރި ދޮން ބުޅި އިސްތަށިގަނޑެއް ލިބިފައިވާ އެ އަންހެންމީހާ ތުއްތީދިއާ ދިމާލަށް އިނގިލި ދިއްކޮށް އައީ އައުގުރާނަގޮވަމުންނެވެ. ނަމަވެސް ތުއްތީދިއަށް އަޑުވެސް ނީވޭތީ މުހަންމާކަލޯ ހައިރާންވިއެވެ. އަދި ހުއްޓި ތުއްތީދި ކައިރި އެވާހަކަ ބުނުމުން ތުއްތީދިވެސް ހައިރާންވެ ފަހަތަށް އެނބުރުނެވެ. އެވަގުތު އެ އަންހެންމީހާ ލޯމައްޗަށް ގެއްލުމާއެކު ދެމީހުން އެއްފަހަރާ ދުއްވައިގަތީ އަހަންމާކަލޯ ގެއާދިމާލަށްށެވެ. ދުވަމުން އައިސް އަހަންމާކަލޯމެންގެޔަށްވަދެ މާނޭވާލާންފެށުމުން ދެންތިބިމީހުންވެސް ހާސްވިއެވެ.

އަހަންމާކަލޯ : ކިހިނެއްވީ؟
މުހަންމާކަލޯ : ތުއްތީދި ފަހަތުން އަންހެނަކު އެއްޗެއްހި ގޮވަމުން އައީ
ސައްތާރުސޮރު : އޭނ. އަންހެނެކޭ؟ މި ފަޅުރަށުގަ؟
ތުއްތީދި : މުހަންމާކަލޯ ބުނެގެން އަހަރެން ފަހަތް ބަލާލިން އެ އަންހެންމީހާ ފެނުން ވަރަށް ރުޅިވެސް އައިސްފަހުރީ. ކުއްލިއަކަށް އަހަރުމެން ލޯކުރިމަތީ އޭނާ ގެއްލުނީ
ރެކީކަލޯ : ތިވާނީ ހަންޑިއަކަށް އަވަހަށް ހިނގާ މިރަށުން ފާބަމާ
މުހަންމާކަލޯ : ކިހިނެއް ފާބާނީ ކަނޑު އެހާ ގަދަ ވިއްސާރަވެސްވެހޭ
ތުއްތީދި : (ހާސްވެފަ) ފަޅުތެރޭވެސް ތިބެވޭނު
އަހަންމާކަލޯ : މާދަމާ ތިކަމާ އުޅޭނީ އިހަށް ކާންއުޅޭ. މިރޭ އަދި ދޯނިގަ ބާކީ ހުރި މަސްތައް ބަލާ އަހަރެން ދާނަން

އިރުއޮއްސި އަނދިރިވުމުން އަހަންމާކަލޯ ދޯނިދޮށަށްދިޔައެވެ. ދޯނީގައި ބާކީ ހުރި މަސްތައް ދޯނީގައި ހުރި ބޮޑު ތެއްޔަކަށް އެޅުމަށްފަހު ބޯމަތީ ތެލި ބަހައްޓާގެން ހިނގާގަތެވެ. އިރުކޮޅަކުން ފަހަތުން މީހަކު އަންނަހެން ހީވެގެން ވަށްކަޅިން ބަލާލިއެވެ. އެއާއެކު ފަހަތުން މީހަކު އަންނަތަން ފެނުނެވެ. މަސްވެރިން އަޅާކަހަލަ ބޮޑު ތޮތްޕެއްއަޅާފައި މުންޑެއް އަނދެ ހުސްގަޔާހުރި އެމީހާ މަޑު ހިނގުމެއްގާ އާދެއެވެ. އަހަންމާކަލޯ ދުވެލި ކުޑަކޮށް ބާރުކޮށްލުމުން ބޯމަތީހުރި ތެލީގެ ބަރުކަން ލުއިވާހެން ހީވެގެން ފަހަތް އަނެއްކާވެސް ބަލާލިއެވެ. އެއްކަލަ މީހާ ހުރި ހިސާބުގައި ހަމަ ހުއްޓެވެ. ނަމަވެސް ފެނިގެން ދިޔައީ ބިންމަތީ ދަމާލެވިފައިވާ ދިގު ހިމަ ހިޔަންޏެކެވެ. އެ ހިޔަނި އައިސް ހުރީ ހަމަ ސީދާ އަހަންމާކަލޯ ބޯމަތީގައިހުރި ތެއްޔާދިމާލަށްށެވެ. އާދަޔާ ހިލާފަށް ތެލި ލުއިވުމުން ބޯމަތިން ތެލިބާލާ ބަލާލިއިރު ހަމަ ހިލާ އެންމެ މަހެއްވެސްނެތެވެ. ބިރުން ތުރުތުރު އަޅައިގަނެފައި ތެލި ހޫރުވާލާފަ ގެއާ ދިމާލަށް ބާރު ބާރަށް ދުއްވާގަތެވެ. އެދިޔަގޮތަށްގޮސް އެންމެން ތިބި ގެޔަށްވަދެ އަވަސް އަވަހަށް ދޮރު ބޭންދުމަށްފަހު އެއްސިއެވެ. އެއަށްފަހު ކަންވީގޮތް އެންމެނަށް ކިޔާދިނެވެ. އެއާއެކު އެންމެން ހިތްތަކުގާ ބިރުވެރިކަން އުފެދި ބޭރަށް ނުކުންނަން ނުކެރިފާ ތިއްބެވެ. މިހެން ތިއްބާ އިރުކޮޅަކުން ނާމާން އަޑުތައް އިވެންފަށާފިއެވެ. ގޭ ކައިރިން މީހަކު ހިނގާ އަޑާ ބަރު ނޭވާގެ އަޑެވެ. ބޭރުގާ މިއުޅެނީ އިންސާނެއްތޯ ބަލަން އަހަންމާކަލޯ ބޭނުންވިއެވެ. ފަންގަނޑުން ކުޑަ ތަންކޮޅެއް ހަލާކުކޮށްލުމަށްފަހު ލޯ ޖަހާ ބޭރު ބަލާލިއިރު ގޭ ކުރިމަތީ ފުރަގަހަށް އެނބުރިގެން އާދަޔާ ޙިލާފު އެއްޗެއްހުއްޓެވެ. ހަންގަނޑު ނޫކުލަލިބި މުޅި ގައިގާ ވަނީ ކަސްއަޅާފައެވެ. ބޮލުގާ ތޫނު ކަށިތަކެއް ހުއްޓެވެ. އަތުގެ ވަކިތައް ތޫނުވެފާ ދިގެވެ. ކުއްލިއަކަށް އެ އެއްޗެއް ގެއާ ދިމާލަށް އެނބުރި ދުވަފައި އައިސް ކޮނޑުން ފަން ފާރުގާ ޖެހިގަތެވެ. އެއާއެކު ބާގަނޑެއް ހެދިގެން ދިޔައެވެ. ކުރިމަތިލުންނޫން އިތުރު ގޮތެއް ނެތުމުން ގޭތެރޭހުރި ހިފާގެންގުޅޭތަކެތި ހާވަމުންދަނިކޮށް ވަޅިއާ މަސްފިހަން ގެންގުޅޭ ދަގަނޑު ފެނުމުން އެ އެއްޗެހި ނަގައިގެން ތައްޔާރުވިއެވެ.

ގޭގެ ފުރަގަހުން އެންމެން ނުކުމެ ގެއަށް ހަމަލާދެމުންދިޔަ ފުރޭތައާ ދިމާކުރިއެވެ. އެމީހަކަށް ދެވުނު ހަމަލާއެއްދެމުން ދަނިކޮށް ސައްތާރުސޮރު ފުރޭތަގެ އަތުވެ ކަރުބުރިވެއްޖެއެވެ. އެއާއެކު އެންމެން ދުއްވާގަތީ ސަލާމަތްހޯދާށެވެ. ދިޔަގޮތަށް ރުއްރުކަށްއަރާ ތިއްބެވެ. މިހެން ތިއްބާ މަރާލެވިފައިވާ ސައްތާރުސޮރުގެ މަސްގަނޑު ދަމަމުން ފުރޭތަ އައިސް އަހަންމާކަލޯމެން އަރާތިބި ރުއްތައް ކައިރީ މަޑުކޮށް ދެފާ ވައްކޮށްލައިގެން އިށީންދެ އެމީހުންނާ ދިމާލަށް ބަލަމުން ސައްތާރުސޮރުގެ މަސްގަނޑު ކޮނެ ފަޅާގެން ކަމުންދިޔައެވެ. ހިތްދަތިކަމާއެކު އެކުވެރިޔާ ކެވެމުން ދިޔަ ތަން ބަލަން ތިއްބާ މުހަންމާކަލޯ އޮތް ރުކުން އޭނާ ފޭބިއެވެ. އައިސްފާހުރި ރުޅިގަނޑުގެ ސަބަބުން މަރުވިޔަސް ހެޔޮކަމަށް ފުރޭތައާ ކުރިމަތިލާން އޭނާ ދުއްވާގަތެވެ. މުހަންމާކަލޯ އަރާ ހަމަވުމާއެކު ސައްތާރުސޮރުގެ މަސްގަނޑުކާން އިން ފުރޭތަ ކުއްލިއަކަށް ތެދުވެ ފަހަތަށް އެނބުރި ކަނައަތުގެ ވަކިތައް މުހަންމާކަލޯ ބަނޑަށް ކޮޕާލުމަށްފަހު އުފުއްލާލާ ވައަތުގެ ވަކިތައްވެސް ބަނޑަށް ކޮއްޕާލުމަށްފަހު މުހަންމާކަލޯގެ ހަށިގަނޑު ދެބުރިކޮށްލިއެވެ. އެއަށްފަހު ފާބަމުން ދިޔަ ލޭތައް ބުއިމަށް ހަށިގަނޑު އަނގަޔާ ދިމާކުރިއެވެ.

މަންޒަރު ބަލަށް ރުކަށް އަރާތިބި އަހަންމާކަލޯއާ ރެކީކަލޯ އަދި ތުއްތީދީ ތިބީ ބިރުން ފިއްކަނޑައިގެން ގޮސްފައެވެ. ރޮއެ ހޭރެމުންވެސް ސަލާމަތްވާނެ ގޮތެއް ހޯދަން މަސައްކަތްފެށިއެވެ. ނަމަވެސް ރުކަށް އަރާ ގިނައިރު ނުތިބެވޭނެކަން އެމީހުންނަށްވެސް އެނގެއެވެ. މުހަންމާކަލޯގެ މަސްގަނޑު ކާ ނިންމާލުމަށްފަހު ފުރޭތަ އައިސް ރެކީކަލޯ އަރާ އޮތް ރުއް ހަލުވަންފަށާފިއެވެ. އެއަށްފަހު އެ ރުއް ރެކީކަލޯއާއެކު ވައްޓާލުމާއެކު ރުއްދަށުވެ ރެކީކަލޯ ހައްޔަރުވިއެވެ. އެއާއެކު ފުރޭތަ އައިސް ރެކީކަލޯ ބުރަކައްޓަށް ފުލު ފުލުން ވަކިތައް ހަރާލިއެވެ. އަދި ރެކީކަލޯގެ މަސްގަނޑުކާންފެށިއެވެ. ރުކަށް އަރާތިބި ތުއްތީދިއާ އަހަންމާކަލޯތިބީ ހަދާނެގޮތްހުސްވެފައެވެ. މިހެން ތިއްބާ ރެކީކަލޯ ކައި ހުސްކޮށްލުމަށްފަހު ފުރޭތަ ބިންމަތީ އޮށޯތެވެ. ބެލެވޭގޮތުގައި އެސޮރު ބަނޑު ފުރުނީއެވެ. އިރުކޮޅަކުން ބޮޑު ގުގުރިދަމަމުން ނިދާފިއެވެ. ދަނޑިވަޅު ބަލާފައި އަހަންމާކަލޯއާ ތުއްތީދި ރުކުން ފާބައިގެން އަވަސް އަވަހަށް ދޯންޔާދިމާލަށް ދިޔައެވެ. އަދި ދޯނި މޫދަށް ބޭލުމަށްފަހު ފަލި ޖަހާފާ ފަޅަށް ދޯނި ވައްދާ އިރުއަރަންދެން ފޯރިމަރަންތިއްބެވެ.

ނަސީބު ދިމާކުރިގޮތުން ޖެހިގެން އައި ދުވަހަކީ އުޑުމަތި ސާފު ހެޔޮވަރަށް ވައިޖެހޭ ދުވަހެއްކަމުން ރިޔާ ލުއްސާލާ މާކަނޑަށް ދޯނިނެރެ ދުއްވަން ފެށިއެވެ. މިހެން ދަނިކޮށް މަސްބާނަން އޮތް ދޯންޏެއް ފެނުމުން އެ ދޯންޏާ ގާތްކުރިއިރު އެއީ އަހަންމާކަލޯމެން ރަށު ދޯންޏެކެވެ. އެ ދޯނީގެ އެހީގައި ރަށަށްގޮސް ހަރު މީހަކު ހޯދައިގެން މީހުން އެއްކޮށްގެން ހިނގި ހާދިސާ ކިޔާދިނެވެ. އެއާއެކު ފުންނޭވާއެއްލާފައި އެ ހަރު މީހާ ވާހަކަ ފަށާގަތެވެ.

” ކަލޯމެން ނަސީބު ރަނގަޅު ނަމަވެސް މަރުވެ ދިޔަ ރަހްމަތްތެރިންނަށް އަހަރެން ހިތާމަކުރަން. މިއަދު ކަލޯމެން ކައިރި މި ބުނަނީ ތިޔަ ރަށުގެ ހަގީގަތް. އެރަށަށް ކިޔަނީ ކެޔޮޅުފުށި އެރަށަށް އެ ނަންދެވުނީ އެ ރަށަކީ ވަރަށް ރަނގަޅަށް މަސްވެރިކަން ކުރަމުން އައި ރަށެއް އެރަށުން މީހުން ފާބަން ޖެހުނީ ތިޔަބުނާ ފުރޭތައެއްގެ އުނދަގުލާހެދި ކޮންމެ ފަހަރަކު ބާނާން އަންނަ މަސްކޮޅު ކާލާ. އެންމެ ފަހަށް މަސްނުލިބޭ ދުވަސްވަރު އިންސާނުންނާ އެސޮރު ދިމާކުރޭ. ފުރުތަމަ ވަޅުން ފެނުނު ދެލޯ ކޮނެލާފައިވާ މީހާއަކީ އޭތީގެ ފުރުތަމަ ޝިކާރަ އެއީ އަލިތަކުރު. އޭނާ އެ ފުރޭތަޔާ ކުރިމަތިލައިގެން އޭނާގެ ދެލޯ ގެއްލުނީ. ދެން ތިޔަ ފެނުން އަންހެންމީހާއަކީ އަލިތަކުރު އަންހެނުން އޭނާ އަލިތަކުރު ނުދާން އެތައް ފަހަރަކު ގޮވި ނަމަވެސް އަލިތަކުރު އަޑުނަހާ ދިޔައީ. އެ ފުރޭތަ އަރަނީވެސް މަސްވެރިޔެއްގެ ސިފާގަ އެކަން ފަޅާއެރީވެސް އަލިތަކުރަށް. ”

އަހަންމާކަލޯމެންގެ ހަދިސާގެ ވާހަކަ އެތައް ޒަމާނަކަށް ދެމިގެންދިޔައެވެ. ބިރުވެރި އެހާދިސާ އަހަންމާކަލޯއާ ތުއްތީދި ދުނިޔޭގައި ތިބި އިރު އަބަދުވެސް ދިޔައީ ހޮޅުހަށިތަކުގާ ކިޔާދެމުންނެވެ.

ހަޔާތުގާ ހެދޭ ޅަ އެއްޗަކުން ކުރިމަގު މުޅިން ހަލާކުވެދިޔުމަކީ ވަރަށްވެސް ޔަގީންކަމެކެވެ. ކޮންމެ އިންސާނެއްގެ އޮންނަނީވެސް ހިތެކެވެ. އެ ހިތް ހަލާކުކޮށްފި މީހަކަށް އެކަމުގެ ބަދަލް ވަރަށް ހިތި ގޮތްގޮތަށް ލިބިފާ އެބަހުއްޓެވެ.

މުނީރުއަކީ އުމުރުން އެކާވީސް އަހަރުގެ ޒުވާނެކެވެ. ވަޒީފާއެއްގެ ގޮތުން އަދާކުރަމުން އަންނަނީ މަސައްކަތު މީހެއްގެ މަގާމެވެ. އެއީ އޭނާގެ އަލަތު ވަޒީފާއެވެ. މާކަށް ބޮޑު އާމްދަނީއެއްވެސް ނުލިބެއެވެ. ލިބެނީވެސް އެންމެ ސޯޅަ ސަތޭކަ ރުފިޔާއެވެ. އޭގެން ގެޔަށް ލާރި ދީފަ އަތުގާ ހޭދަކޮށްލަން އޮންނަނީ ވަރަށްވެސް މަދު އެއްޗެކެވެ.

ދުވަސްވަރަކީ ރާއްޖެއަށް ފުރުތަމަ ފަހަރަށް މޯބައިލް އިންޓަނެޓް ދޫކުރި ދުވަސްވަރެވެ. މުނީރު ތިން މަހު މުސާރަ ރައްކާކޮށްގެން އެއިރުގެ އެންމެ ރަނގަޅު ނޮކިޔާ ބްރޭންޑްގެ ފޯންއެއްގަތެވެ. އިންޓަނެޓް ހިދުމަތް ލިބޭތީއާއެކު މުނީރު ހަމަޖެހިލައިގެން އޭނާ ބޭނުން އެއްޗެއް ބަލާލައެވެ. މިހެން އުޅުމުގެ ތެރޭގައި މުނީރުގެ އެކުވެރިޔަކު މިގް ތާޓީތްރީ ކިޔާ ޗެޓް އެޕްލިކޭޝަންއެއް މުނީރުއަށް ތައާރަފްކޮށްދިނެވެ. އޭގެން އެކި ގައުމުތަކުގެ މީހުންނާ ދިމާވެ ވާހަކަ ދެއްކޭނެކަން މުނީރުއަށް އެކުވެރިޔާ ކިޔާދިނެވެ. ހާއްސަކޮށް ރާއްޖެ ކުދިންނަށް ވަރަށް މަގްބޫލްވެފައޮތް އެއްޗެއްކަން ބުންޏެވެ.

އެކުވެރިޔާގެ ވާހަކަ އަޑުއެހުމަށްފަހު މުނީރުވެސް މިގް ތާޓީ ތްރީ އަޅާގެން ޗެޓްރޫމްތަކަށް ވަންނަންފެށިއެވެ. އެތައް ގައުމެއްގެ ޗެޓްރޫމްތަކަށް ވަދެ އެކިމީހުން އެޑްކޮށް ވާހަކަދައްކާހެދިއެވެ. އަދި އެވަރުން ނިމުނީކީނޫނެވެ. ރާއްޖޭގެ ޗެޓްރޫމްތަކަށްވަދެވެސް އެތައް އެކުވެރިންނެއް ހޯދިއެވެ. މުނީރުގެ އޮންލައިންގާ އިންނަލެއް ގިނަކަމުން އޭނާގެ މަގްބޫލްކަން ބޮޑުވިއެވެ. އެތައް ރައްޓެހިންނަކާ ވާހަކަދައްކަން އެތައް އިރަކު ގެއަށް ވަދެއްޖެނަމަ އޮންނާނެއެވެ. ބައެއް ފަހަރު ރާއްޖެ ޗެޓްރޫމްތަކުން ދިމާވާ ކުދިންނާއެކު ކޮފީއަށްވެސްދެއެވެ.

ދުވަސްތައް ފާއިތުވެގެންގޮސް މުނީރު ވަޒީފާއިން ކެނޑުނެވެ. ކުޑަ މުސާރައަކަށް ތިން އަހަރު ކެތްކުރުމަށްފަހުގައެވެ. އާ ވަޒީފާއެއް ހޯދުމަށް ކުރި ބުރަ މަސައްކަތުން ތަނެއްގެ ޕިޔޯނުކަން ލިބިގެންދިޔައެވެ. ހަތަރު ހާސް ރުފިޔާގެ މުސާރައަކާއެކުއެވެ. މަސައްކަތްވެސް އެހާ ބުރައެއްނޫނެވެ. މިކަމާ މުނީރު ވަރަށް ހިތްހަމަޖެހުނެވެ. ހުސްވަގުތު ތަކުގައި މިގް ތާޓީތްރީއަށް ވަދެގެން އެކި ކުދިންނާ ވާހަކަ ދައްކަމުންދަނިކޮށް ދިވެހި ޗެޓްރޫމްއަކުން ކަމުދާ އައިޑީއެއްފެނިގެން އެޑްކޮށްލިއެވެ. މައުލޫމާތު ސާފުކޮށްލިއިރު އެއީ ލާމު އަތޮޅަށް ނިސްބަތްވާ ކުއްޖެކެވެ. ކިޔަވަނީ މާލޭގައެވެ. ދިރިއުޅެނީ ހުޅުމާލޭގައެވެ. ކޮންމެ އަކަސް މުނީރު އަބަދުވެސް މިކުއްޖާއަށް ފާރަލާންފެށިއެވެ. އޮންލައިން ވާއިރަށް ގޮވާލައެވެ. ނަމަވެސް ބަސްމަދު އެކުއްޖާ ވަރަށް އަވަހަށް އޮފްލައިންވެއެވެ. ނަމަވެސް މުނީރު މަސައްކަތް ހުއްޓާކަށް ބޭނުމެއްނުވިއެވެ. ވަރަށްވެސް ނަމްބަރު ލިބޭތޯ މަސައްކަތްކުރިއެވެ. ދުވަސްގަނޑަކަށްފަހު އެކުއްޖާގެ ނަމްބަރު ލިބުނެވެ. މަދު ގުޅުމަކަށްފަހު ދޭތެރެޔަކުން ގުޅުން ގިނަވިއެވެ. އަދި އެކުއްޖާގެ އޯގާތެރިކަން މުނީރުއަށް ލިބުނެވެ. ކިޔަވާ ނިންމުމަށްފަހު ރަށަށްގޮސްވެސް މުނީރު ހާލުބަލަން އަބަދުވެސް ގުޅާހަދައެވެ. މިކަމާ މުނީރު ވަރަށްވެސް އުފާކުރިއެވެ. ވާހަކަ ދައްކަން މިހާރު އެއް ގަޑިއިރުވެސް މުނީރުއަށް މަދެވެ. ފޯން ކާޑަކަށްފަހު ކާޑެއް އަޅާގެން ވިޔަސް އެކުއްޖާއަށް ގުޅައެވެ. އެންމެ ފަހަށް ދެމީހުންނަށް އެކަކު އަނެކަކަށް އިތުބާރުކުރެވޭ ހިސާބަށްދިޔައެވެ. އެންމެ ފަހަށް އަންހެން ކުއްޖާ ފޮރުވައިގެން ހުރި ސިއްރެއްވެސް މުނީރުއަށް ކިޔާދިނެވެ. އެކުއްޖާއަކީ ކުރިން މީހަކާ އިނދެ ވަރިވެފާވާ ކުއްޖެކަމެވެ. އެހެން ބުނުމުން މުނީރުގެ ވިސްނުން ކުޑަކޮށް ބަދަލްވާންފެށިއެވެ. މިހެން ހުރެ މިގް ތާޓީތްރީއަށް ވަދެގެން އުޅެނިކޮށް އައިޑިއަކުން މުނީރު އެޑްކުރިއެވެ. އެއީވެސް އަންހެން ކުއްޖެކެވެ. އުޅެނީ މާލޭގައެވެ. ކޮންމެއަކަސް މިހިސާބުން މުނީރު އެކުއްޖާއާ ބައްދަލްކުރިއެވެ. އަދި އެތައް ފަހަރަކު ގުޅާހަދައެވެ. ނަމަވެސް އެކުއްޖާ އެހާ މުނީރަކާ ގަޔާނުވެއެވެ. ނަމަވެސް މުނީރުގެ ވިސްނުން ގޯސްވާންފެށީ މިހިސާބުންނެވެ. ދުރުގާ ހުރި މީހަކަށްވުރެ ކައިރީ ހުރި މީހަކު މާ ކަމުދާކަމަށް މުނީރުގެ ހިތާ ސިކުނޑިވެސް ބުނަންފެށިއެވެ. ގޮތެއްވެސް ނިންމަން މަޖްބޫރުވިއެވެ. އެންމެ ފަހަށް ލާމު އަތޮޅުގާ ހުރި ކުއްޖާއަށް މުނީރު އެއްރެޔަކު ގުޅިއެވެ. ގުޅުމުން އެކުއްޖާގެ ޝަކުވާތައް މުނީރަށް ބަންޑުންކޮށްލިއެވެ. ގުޅުން މަދުވުމާ އޮންލައިގަ އިންނައިރުވެސް ގޮވާނުލަނީ ކީއްވެކަން އަހާލިއެވެ. ނަމަވެސް މުނީރު އެ ސުވާލަށް ޖަވާބުނުދީ ކުރިޔަށް ގެންދަން ބޭނުންނުވާ ވާހަކަ ބުނިއެވެ. އެއްވެސް ކުށެއް ނެތް ނިކަމެތި އެކުއްޖާގެ ހިތް އެވަގުތު ފަޅަފަޅައިގެންދިޔައެވެ. ފޯނުގާ އޮވެ ރޮއެ ހޭރުނެވެ. އެންމެ ފަހަށް މުނީރުއާ އެފަދަ ގޮތަކަށް ކަންތައް ކުރީތީ ދިމާލަށް ދުވަހަކުވެސް އުފަލެއް ނުލިބޭނެކަމަށް ބުންޏެވެ. އެއަށްފަހު އެކުއްޖާ ރޮމުން ފޯނު ބޭއްވިއެވެ. އެކަމުން މުނީރުގެ ހިތަށް އެއްވެސް އަސަރެއްނުކުރިއެވެ.

ޖެހިގެން އައި ދުވަހު މުނީރުގެ މަސައްކަތާގެން ކުރިޔަށްދިޔައެވެ. ވަރުގަދަ އަޒުމަކާގެން މާލޭގަ ހުރި ކުއްޖާގެ ހިތް ކާމިޔާބުކުރަން މަސައްކަތްފަށާގަތެވެ. ދުވާލަކު އެތައް އާދޭހެއްކުރެއެވެ. އެތައް މެސެޖެއް ފޮނުވައެވެ. އެންމެ ފަހަށް މަޑުމަޑުން އެކުއްޖާގެ އިތުބާރު ހޯދިއެވެ. އަދި އެކުއްޖާ ބުނި ކޮންމެ ކަމެއް ކޮށްދޭންފެށިއެވެ. އެންމެ ފަހަށް އެކުއްޖާ މުނީރުއަށް އޭނާއަކީވެސް ވަރިވެފާވާ ކުއްޖެއްކަން އަންގާލިއެވެ. ނަމަވެސް މުނީރު ބޭނުންވީ ކުރިޔަށްދާށެވެ. އެކުގައި އުޅެމުން ގޮސް އެންމެ ފަހަށް އެކުއްޖާ ގެޔަށް ގެންގޮސް އާއިލާއަށް ތައާރަފްކޮށްދިނެވެ. އެކުއްޖާވެސް މުނީރު އޭނާގެ އާއިލާއަށް ތައާރަފްކޮށްދިނެވެ.

ދުވަސްތައް ފާއިތުވެގެންގޮސް އަންހެންކުއްޖާގެ އަސްލު ސިފަ މުނީރުއަށް ފެންނަށްފެށިއެވެ. މުނީރުއަށް ލިބޭ މުސާރައިން އޭނާއަށް ހަރަދުކުރުމަށް މަޖްބޫރުކުރުވައެވެ. ނުއިނދެ އުޅުނަސް ލޯބިވެރިން ހަރަދުކުރާ ވާހަކަ އަބަދުވެސް ދައްކައެވެ. މިހެން އުޅެމުން މުނީރު އޮންލައިން އިން ފެނިއްޖެޔާ ޝަކުވާކުރެއެވެ. އަދި ޝައްކުކުރެއެވެ. ދިމާވާތަނުން މުނީރުއާ ދިމާލަށް އެއްޗެހިކިޔައެވެ. މަގުމަތީގަ މީހުން ކުރިމަތީ ބޮޑާދައްކާހަދާ މުނީރު ބަދުނާމްކޮށް ލަދުގަންނުވާލައެވެ. އަދި ނިމުނީކީނޫނެވެ. މުނީރު ފަހަތުން ހަމަ އެއްގޮތަކަށްވެސް ނުނައްޓައެވެ. ދާކޮންމެ ތާކަށްދެއެވެ. މުނީރު ވަޒީފާވެސް ގިނަފަހަރު އަދާކުރިޔަނުދެއެވެ. މުނީރު އެއްޗެކޭ ބުނެފިއްޔާ ރުޅި އައިސްގެން މުނީރުގާގަ ތަޅާނުގަންނަ ދުވަހެއް ނުދާނެއެވެ. ވިކާ ހަންނޮޅާ ތަންތަނުން ލޭދުއްވާލައެވެ. އެންމެ ފަހަށް ދެރެއިން އެއްރޭ މުނީރު ގޭގާ އޭނާ ރޭކުރަން ފެށިއެވެ. މިނީރުގެ ފޯނުވެސް ދެދުވަހުން އެއްދުވަހު ގެންދެއެވެ. މިގޮތަށް އުޅޭތާ ދެ އަހަރުފަހުން މުނީރުއަށް ސަލާމަތްވާނެ ގޮތެއް ހޯދަން މަޖްބޫރުވިއެވެ. އެންމެ ފަހަށް މުނީރުގެ އާއިލާ މީހުންނަށް ހުރިހާ އެއްޗެއް ކިޔާދިނެވެ. އާއިލާގެ އެހީއާއެކު މުނީރު އެކުއްޖާގެ ކަންތައް ގަނޑު ނިންމާލިއެވެ.

މުސީބާތުން ސަލާމަތްވުމުން މުނީރު އެކަމާ އުފާކުރިއެވެ. ނަމަވެސް ދެރަވެސްވިއެވެ. އަދި މުނީރު ލާމު އަތޮޅުގާހުރި ކުއްޖާ މަތިން ހަނދާންވާންފެށިއެވެ. ރޮއެ ގިސްލާހަދަން ފެށި މުނީރުއަށް މިއަދުވަނީ ރަނގަޅު ފިލާވަޅެއް ލިބިފައެވެ. މިހާރު ބޭނުންވަނީ އެކުއްޖާ ގާތުން މައާފްއަށް އެދޭށެވެ. ހިތްވަރުކޮށްލާފަ ފޯނުނަގާ މިގް ތާޓީތްރީއަށް ވަދެ އިންތިޒާރުގާ ސައްވީސް ގަޑިއިރު އިން އިރުވެސް އެކުއްޖާ ޙަބަރެއްނުވިއެވެ. އެތައް ދުވަހަކު މިގޮތަށް އުޅެނިކޮށް އެއްދުވަހަކު އެކުއްޖާ އޮންލައިންގަ އިންދާ ފެނިގެން އަވަހަށް ގޮވާލިއެވެ. އެކުއްޖާ އަނބުރާ ޖަވާބުދިނެވެ. މުނީރު ހިތުގާވާ ހުރިހާއެއްޗެއް ލަސްނުކޮށް ބަނޑުންކޮށްލިއެވެ. އަދި އެކުއްޖާއަށް ދެރަ ދެވުނީތީ އެކަމަށް މައާފްއަށް އެދުނެވެ. މިއަދު މުނީރުއަށް ކަންތައް ވެފާވާގޮތް ކިޔާދިނެވެ. އެހިސާބުން އެކުއްޖާ މުނީރުއަށް މައާފްދިނެވެ. ނަމަވެސް ދެން ދިން ޖަވާބު ހިތްޗެވެ. މިހާރު އޭނާ އުޅެނީ މީހާކާ އިންދެގެންކަން ބުންޏެވެ. އަދި ދެންވެސް މީހުންނަށް ދެރަކޮށް ކަންތައް ނުކުރުމަށް އޭނާ މުނީރުއަށް ވަރަށް ބޮޑަށް ނަސޭހަތްތެރިވިއެވެ.

ރައްޓެހިންނަކީ އަބަދުވެސް ތިބޭނެ ބަޔެކެވެ. ރައްޓެހިންނުލާ މިދުނިޔެއަކު ނޫޅެވޭނެއެވެ. ނަމަވެސް ރައްޓެހިންނޭ ކިޔާފަ ގިނަފަހަރު ތިބޭނީ ވަގުތީ މީހުންނެވެ. ހަގީގީ ރައްޓެހިން ފެންނާނީ ތިމާއަށް އެންމެ ބޮޑަށް ބޭނުންޖެހޭ ދުވަހުއެވެ.

އަދީލްއަކީ މުއްސަންޖެކެވެ. ރައްޓެހިން ގިނަ މީހެކެވެ. ދުވާލަކު އެތައް ކޯލްއެއް އޭނާއަށް އާދެއެވެ. ދުވާލަކު އެތައް ތަނަކަށް ދަތުރުކޮށް މަހެއްގެ މައްޗަށް އެތައް ޙަރަދެއް އޭނާގެ ރައްޓެހިންނަށްކުރެއެވެ. މީހަކަށް ދައްޗެއް ވެގެން އުޅޭކަން އެނގޭހިނދު އަދީލް އަމިއްލައަށް އެމީހަކާ ބައްދަލްކޮށް ހާލަތު އޮޅުންފިލުވާލުމަށްފަހު އަބަދުވެސް އެހީވެއެވެ. އޭނާގެ މަގްބޫލްކަމުގެ ސަބަބުން އޭނާ ނުދަންނަ މީހެއްވެސް ވަރަށް މަދެވެ.

އެހެން ދުވަސްތަކެކޭ އެއްފަދައިން މިއަދުވެސް އަދީލް އޭނާގެ ރަހްމަތްތެރިންތަކެއް ގޮވައިގެން ތަނަކަށްދާން ނިންމިއެވެ. މިފަހަރު މަސްދަތުރެކެވެ. ރޭގަނޑުގަޑީގަ ފީނައިގެންކުރާ މަސްވެރިކަމަށްށެވެ. ހުރިހާ ރައްޓެހިންނާއެކު ދަތުރު ކަންތައް ދާންވީގޮތް ރޭވުމަށްފަހު އަދީލްގެ އަމިއްލަ ބޯޓުގާ އެންމެން މަހަށްފުރިއެވެ. ދިޔައިކީ ހަމައެކަނި ފިރިހެނުންނެއްނޫނެވެ. އަންހެން ކުދިންވެސް ބައިވެރިވިއެވެ. މަސްހިފަން ފުޅިތަކާއެއްޗެހި އަޅައިގެން އެންމެން ފޭބިއެވެ. އަދީލް ދިޔައީ ކަނޑުއަޑީގެ ރީތިކަން ބަލާ މަންޒަރުތައް ނަގަމުންނެވެ. އަދި ރަހްމަތްތެރިން ދަގަނޑު ޖަހައިގެންނާ ބަޑި ބޭނުންކޮށްގެން މަސް ހިފަމުން ދިޔަތަންވެސް ދިޔައީ ނަގަމުންނެވެ. މިހެން އޮށްވާ އަދީލްގެ ކަނައަތު ފަޔަށް ތަދުވާންފަށާފިއެވެ. އެއާއެކު ފަހަތް ބަލާލިއިރު ވެނެއް އައިސް މިއޮތީ އަދީލްގެ ފަލަމަސްގަނޑުގާ ދަތްއަޅައިގެންނެވެ. އަޅަމުން ދިޔަ ވޭނުގެ ސަބަބުން އަދީލް ތެޅިފޮޅިގަތެވެ. އަދީލް އޭނާގެ ރަހްމަތްތެރިންނަށް އަތްހޫރުވާލުއެވެ. އަދީލް އަތްހޫރުވާ މަންޒަރު ރައްޓެއްސަކަށް ފެނިގެން އަދީލް ކައިރިއަށް ދިޔުމަށްފަހު ދަތްއަޅަމުން ދިޔަ ވެނަށް ދަގަނޑު ހަރާ މަރާލިއެވެ. އެއަށްފަހު އަދީލް ގޮވައިގެން އަވަހަށް މައްޗަށް އެރިއެވެ. އަދީލްމެންގެ ފަހަތުން އެންމެން ބޯޓަށް އެރިއިރު އަދީލްގެ ފައިން ފައިބަމުންދިޔަ ލޭތައްވަނީ މުޅި ތައްޓުމައްޗަށް ފައިބާފައެވެ. އެންމެން އަވަސްކޮށްލައިގެން މާލެ އަނބުރާ އައިސް އަދީލް ގޮވައިގެން ހޮސްޕިޓަލްއަށްދިޔައެވެ. އެކްސްރޭތަކާ އެއްޗެއްހި ނެގުމަށްފަހު ޑޮކްޓަރު ނަތީޖާ ހިފައިގެން އައިސް އަދީލްމެން ކައިރި އިށީނެވެ. އަދި އަދީލްގެ ފައިގެ ނާރެއްވަނީ ހަލާކުވެފާކަމަށް ބުނިއެވެ. އޮޕްރޭޝަން ކޮށްގެން ދުވަސްގަނޑަކު ހިނގަން ޖެހޭނީ ދަނޑިގަނޑުތަކުގެ އެހީގަކަމަށްބުނިއެވެ. އެއަށްފަހު އަދީލް ގެއަށް ފޮނުވާލިއެވެ.

ޖެހިގެން އައި ދުވަހު އަދީލްއާއެކު އޭނާގެ ރައްޓެހިން ހޮސްޕިޓަލްއަށްދިޔައެވެ. އަދީލްގެ އޮޕްރޭޝަން ކަންތައް ހަމަޖެއްސުމަށްފަހު ހުރިހާ ރައްޓެހިން މަޑުކޮށްލިއެވެ. އަދީލް އޮޕްރޭޝަންކޮށްގެން ނެރުމަށްފަހު ހަފްތާއެއްވަންދެން އެޑްމިޓްކުރަން ޖެހޭނެ ވާހަކަ ޑޮކްޓަރު ބުނެލިއެވެ. އެއާއެކު ރައްޓެހިންގާތު އަދީލްއަށް އެހީވުމަށް އެ ހަފްތާގައި އައިސްދިނުމަށް އަދީލް އަމިއްލައަށް އެދުނެވެ. ތިން ހަތަރު ދުވަހު ފުރިހަމައަށް ހުރިހާ ރައްޓެހިންއައެވެ. ނަމަވެސް ބައެއް ރައްޓެހިން ނާދެއެވެ. ގުޅާލުމުން ބުނަނީ ބިޒީކަމަށްށެވެ. ދިރިއުޅުމާ ވަޒީފާގެ ކަންތަކުން ނާދެވޭކަމަށްބުނެ އެތައް ބަހަނާއެއް ބައެއް ރައްޓެހިން އަދީލްއަށް ދެއްކުމަށްފަހު އޭނާއަށް ގޮވާލަންވެސް ނާދެއެވެ. އެންމެ ފަހަށް އަދީލްއަށް އެހީވަމުން އައީ ހޮސްޕިޓަލްގާތިބި ބޭރުމީހުންނެވެ.

އަދީލް ހޮސްޕިޓަލްއިން ދޫކޮށްލުމުން ގެޔަށްގޮސް ކައްކާނެ ރަނގަޅު މީހަކު ހަމަޖެއްސިއެވެ. އަދި ބައެއް ރައްޓެހިންނަށް ގުޅާ ކާން އައުމަށް ދައުވަތުދިނެވެ. ނަމަވެސް އައީ ވަރަށް މަދުބަޔެކެވެ. ބާކީ ތިބި މީހުން ކޮބާތޯ އަހާލުމުން އެންމެންވެސް އެދުވަސްވަރު ބިޒީކަމަށް ބުނެލިއެވެ. ކާ ނިންމާލުމަށްފަހު އަދީލްއާއެކު ވާހަކަދައްކާލާ މަޖާކޮށްލަން މަޑުކޮށްލުމަށް އެދުމުން މަޑުކުރީ އެންމެ ދެ ރަހްމަތްތެރިންނެވެ. ބާކީ އެންމެން ބަހަނާއެއް ދައްކާފަ އަވަހަށް ނުކުމެގެންދިޔައެވެ. ދެން ތިބި ދެ ރައްޓެހިންވެސް ގިނައިރުތަކެއްނުވެ އަވަހަށް ނުކުމެގެންދިޔައެވެ. މިހިސާބުން އަދީލްއަށްވެސް ހިތްދަތިކަން ލިބެންފަށާފިއެވެ.

ރައްޓެހިންނަށް ބަރޯސާނުވެ އެންމެ ފަހަށް އަދީލް ހިތްވަރުކޮށްފާ އަމިއްލައަށް ހޮސްޕިޓަލަށް ކާރުގާ ދާންފެށިއެވެ. ހޮސްޕިޓަލް މީހުންގެ އެހީއާއެކު ދުވަސްތައް ގުނަމުންގޮސް އެންމެ ފަހަށް ނަތީޖާ ލިބޭ ދުވަސް އަތުވެއްޖެއެވެ. ޑޮކްޓަރާ ބައްދަލްކުރުމުން ލިބުނީ އިތުރު ހިތާމައެކެވެ. އަދީލް މުޅި އުމުރަށްވެސް ހިނގަން ޖެހޭނީ ދަނޑިގަނޑުގެ އެހީގަކަން ޑޮކްޓަރު ހާމަކުރިއެވެ. މިކަމާ އަދީލް ވަރަށް ހިތާމަކުރިއެވެ. އެންމެ ބޮޑަށް ހިތާމަކުރަނީ ގެންގުޅުން ރަހްމަތްތެރިން އޭނާއަށް ޒިޔާރަތްވެސް ނުކޮށްލާތީއެވެ. މިހެން ދުވަސްތައް ގުނަމުން ދަނިކޮށް އެއްދުވަހަކު އަދީލް ހަވީރުގަޑީގަ އަތިރިމަތީ އިންދާ އޭނާގެ ހަތަރު ރައްޓެހިން ފެނުނެވެ. އެމީހުން ތިބީ ބާބަކިޔު ހަދާށެވެ. އަދީލް އެމީހުންނަށް އަތްހޫރުވާލިޔެވެ. ނަމަވެސް އެއިން އެކަކުވެސް އިޖާބަނުދިނެވެ. ވަރަށް ހިތްވަރު ކޮށްލާފާ ދަނޑިގަނޑުތަކުގެ އެހީގަ އަދީލް އެމީހުން ކައިރިޔަށް ދިޔައެވެ. އެމީހުން އަދީލް ފެނުމުން ހިނިތުންވެލިޔެވެ. އަދީލް އެމީހުންނާ ސަމާސާކޮށް ވާހަކަ ދައްކާލަން މަސައްކަތްކުރިއެވެ. ނަމަވެސް އެމީހުން މާކަށްބޮޑު ސަމާލުކަމެއް ނުދިނުމުން އަދީލް ވަރަށް ހިތުގާޖެހުނެވެ. ދަނިއްޔޭ ބުނެލާފާ އެތަނުން އަވަހަށް ދިޔައެވެ.

ހިތާމައިން ފޯވެފާވާ އަދީލް ކޮންމެ ދުވަހަކު ދިޔައީ އޭނާގެ ރައްޓެހިންނަށް ގުޅާ އާދޭސްކުރަމުންނެވެ. އެންމެ ކުޑަމިނުން ޒިޔާރަތެއް ކޮށްލާދިނުމަށްށެވެ. ފޫހި ފިލުވާލަން އައިސް ދިނުމަށްށެވެ. ނަމަވެސް ހަމަ ހިލާ އެކަކުވެސް ދައްކާނުލިއެވެ. މިކަމުގެ ސަބަބުން އަދީލްއަށް އެއްޗެއް ވިސްނުނެވެ. ފައިސާ ހުއްޓަސް ރަހްމަތްތެރިކަމަކީ ފައިސާއަށްވުރެ އަގުހުރި އެއްޗެއްކަމެވެ. އެ ރަހްމަތްތެރިކަން ނުބެހެއްޓޭނީ އެއްވެސް އަގެއް ނެތް ބަޔެކެވެ. މިއަދު އަދީލް މިވަނީ ބާކީވެފައެވެ. މިއަދު އޭނާއަށްވަނީ ހެޔޮލަފާ އާ ރައްޓެހިން ހޯދުމަށް އާ ހިތްވަރެއްލާފައެވެ. އެ ގޮތުން ހަޔާތުގައިވެސް ފުރުތަމަ ފަހަރަށް މިސްކިތްތަކަށް ޒިޔާރަތްކުރަންފެށިއެވެ. ގިނަ ދުވަސްތަކެއްނުވެ އަދީލްއަށް ހެޔޮއެދޭ އެތައް ރަހްމަތްތެރިންނެއް ލިބެންފެށިއެވެ. އަދީލްގެ ފައިސާގެ ދަހިވެތިކަމަކުނޫނެވެ. އަޙްވަންތަ ކަމުގެ ލޯތަބަށްޓަކައެވެ. މިސްކިތުން ދިމާވި ރަހްމަތްތެރިން އަދީލްއަށް އަބަދުވެސް ޒިޔާރަތްކުރެއެވެ. ހާލުބަލަން ގުޅާވެސްހަދައެވެ. މިކަމުގެ ސަބަބުން އަދީލްގެ މާޔޫސްކަން ފިލައިގެންދިޔައެވެ. އަދި އާ ރަހްމަތްތެރިންގެ އެހީގަ މައްކާގެ މާތް ބިމަށްވެސްދިޔައެވެ. ހައްޖުގެ މާތް އަޅުކަމަށްށެވެ. އެއަށްފަހު ދެން ދިޔައީ ތިން ހަރަމްގެ ދަތުރަކަށްށެވެ. އަދި ރަމްޝާންމަހުގެ އުމްރާއަށްށެވެ. އަދީލްގެ ފައިސާ އޭނާ ހެޔޮގޮތުގާ ބޭނުންކުރަންފެށިފަހުން ގިިނަ ރަށްތަަކަށް ކޮންމެ ރޯދަމަހަކު ސާމާނު ފޮނުވައެވެ. އަދި ހަލާކުވެ މަރާމާތަކަށް ބޭނުންވެފާވާ މިސްކިތްތައް ހެދުމަށް އަމިއްލަ ކުންފުންޏެއް އުފެއްދިއެވެ. މިއަދު އަދީލްގެ ކުރީގެ ރައްޓެހިންނަށް އޭނާ ބާކީ މީހަކަށްވިޔަސް الله سبحان و تعالىٰ. ގެ ހަޒްރަތުގައި އަދީލްއަކީ ޖަވާހިރެކެވެ.

އޭ އިންސާނާއެވެ. ދުނިޔެއަށް ގެއްލި ތިޔަދަނީ ކީއްވެގެންހެއްޔެވެ؟ މިއީ ވަގުތީތަނެކެވެ. ކުރުމުއްދަތެއްގެ އުމުރަކާގެން މި ފަނާވަނިވި ދުނިޔެއަށް ތިބާ ފޮނުއްވުނީ ސަކަރާތްޖަހާކަށްނޫނެވެ.

ފަތިސްނަމާދަށް އެލާމް ޖެއްސުމަށްފަހު މުހީން ނިދަން އޮށޯތެވެ. ފަތިސްނަމާދަށް ތެދުވުމުގެ އުންމީދުގައެވެ. އިހު ސުންނަތް އަތުލުމުގެ އުންމީދުގައެވެ. މުހީންގެ އެންމެ ބޮޑު ބިރަކީ ނުހޭލެވިދާނެތީއެވެ. ނަމަވެސް އަޒުމް އަބަދުވެސް ވަރުގަދަކުރެއެވެ. ޝަހާދަތް ކިޔާލާން ނިދާލި މުހީންއަށް ހޭލެވުނީ ތިންގަޑި ބާގައެެވެ. ލިބުނު ފުރުސަތުން ދަމުނަމާދުވެސްކޮށްލިއެވެ. އަދި ޙަތިމް ހިފައިގެން ފަތިސް ނަމާދަށް ގޮވަންދެން ގުރުއާން ކިޔަވާލަން އިނުމަށްފަހު ބަންގިގޮވަން ފަސްމިނެޓަށްވުމުން ފެންވަރާ ނަލަ ހެދިލާން މިސްކިތައް ގޮސް އޭނާގެ މަގްސަދު ހާސިލްކުރިއެވެ.

ފަތިސްނަމާދުން ފާބާގެން އަންނަނިކޮށް އެކުވެރި އަމީރުއާ ދިމާވިއެވެ. އަމީރުއަކީ މުއްސަނދި އާއިލާއަކަށް ނިސްބަތްވާ ކުއްޖެކެވެ. ގިނަވަގުތު އެކުވެރިންނާއެކު ބޭރުގަ ހޭދަކުރެއެވެ. ގެޔަށް ނިދަންވަންނަނީ އިރުއެރުމުންނެވެ. މުހީން ފެނުމުން އަމީރު ހިނިތުންވެލިއެވެ.

އަމީރު : އަހަ މުހީން ކޮބާ ކިހިނެއް ހާލު؟
މުހީން : ٱلْـحَـمْـدُ للهِ‎ ވަރަށް ރަނގަޅު. ކީއްކޮށްލަނީ މިތާ
އަމީރު : ސީމާ ބަލާ އައިސް
މުހީން : ސީމާ؟
އަމީރު : އާނ މިހާރު މަ ގެންގުޅޭ ޗިކު
މުހީން : (ހިނިގަނޑެއްޖަހާލާފަ) އަބަދުވެސް ހާލަތު
އަމީރު : ދޯ
މުހީން : ކިހިނެއް މަންމައާ ބައްޕަމެން؟
އަމީރު : ވަރަށް ރަނގަޅު
މުޙީން : (ސިމާ އަންނަތަން ފެނިގެން) އެޔޮށް އަންނަނީ ކަލޭ ޗިކް މަ ގޮސްލީދެން
އަމީރު : (ސީމާ އައިސް ސައިކަލަށް އެރުމުން) ސީމާ މިއީ މުހީން އެނގޭ
ސީމާ : އާނ އޯކޭ ދެން ހިނގާ އަވަހަށް ދާން
އަމީރު : (ރުޅި އައިސްފަ) އޭތް…. މަ މި ތައާރަފްކޮށްދިނީ މަގޭ ރަހްމަތްތެރިޔެއް ކަލެޔަށް މަގޭ ރައްޓެހިންނަށް ހަމްދަރުދީއެއް ބަހައްޓަން ނޭނގެންޏާ ހަމަ މިހާރު ފާބާ ސައިކަލުން. ފާބާށޭ މި ބުނީނު
ސީމާ : ކަލެޔަށް ކަލޭގެ ރައްޓެހިން އަހަރެންނަށްވުރެ މާ މުހިންމު ވިއްޔަ
އަމީރު : ދެން ހެވޭ ދަތުރު ކެންސަލް ގޮސް ނިދާދެން
ސީމާ : (ރުޅިގަދަވެގެން ގެޔާދިމާލަށްދަމުން) ކަލެޔާ ކަލޭގެ ރައްޓެހިން މީގެ ފަހުން މަށަށް ނުގުޅާތި
އަމީރު : ތިއީ ގުޅާވަރުގެ މީހެއްވިއްޔަ ރީތި މީހެއްނަމަ އެންމެ ރަނގަޅޭ ހަޅޭއްލަވަން
މުހީން : އަހަރެންނާހެދި މުޅިން ގޯހެއްނު މިވީ
އަމީރު : ނޫނޭ އެއީ ކަލޭގެ މައްސަލައެއްނޫން އެ މަންޖެ އެއީ ވަރަށް ފޮނި ޒީލަގަދަ އެއްޗެއް
މުހީން : (ހިނިގަނޑެއްޖަހާލާފަ) އޭ ދެންދަނީ އެނގޭ ނިދާލާފަ ޝުހާ ނަމާދުކޮށްލައިގެން މަސައްކަތުދާންޖެހޭ މިއަދު
އަމީރު : އާނ އޯކޭ

ދެރަހްމަތްތެރިން އަލްވަދާއުކިޔުމަށްފަހު މުހީން ގެއަށް އައިސް އޮށޯތެވެ. ކުޑަކޮށް ނިދާލާފަ ތެދުވެ ޝުހާ ނަމާދުކޮށްލާގެން އަވަހަށް މަސައްކަތުދިޔައެވެ. މުޅި ދުވަހު ބުރަކޮށް އުޅެމުންވެސް މުހީން ހުރިހާ ނަމާދެއް ވަގުތަށް އަތުލިއެވެ. އިޝާކޮށްލައިގެން ގެޔަށް އައި މަގުމަތީގަ އަނެއްކާވެސް އެކުވެރި އަމީރުއާ ދިމާވިއެވެ. އަމީރުގެ ދައުވަތަށް ދެ އެކުވެރިން ކެއުމަށް ތަނަކަށް ދިޔައެވެ. ދެ އެކުވެރިންވެސް ވަރުގަދަ ވާހަކަގަނޑަކުން ކުރިޔަށް ދަމުން ކެއުން ނިންމާލިއެވެ. ކުއްލިޔަކަށް އަމީރު ހިތުގާ ފޮރުވިފާވާ އެއްޗެހި ބަންޑުންކޮށްލިއެވެ.

އަމީރު : މުހީން އަހަރެންނަށް އެނގޭ އަހަރެންނަށް މި އުޅެވެނީ ރަނގަޅަކަށްނޫންކަން
މުހީން : ތިބުނީ ކީކޭ؟
އަމީރު : އަހަރެންނަށް އެނގޭ ނަމާދަކީ މުހިންމު އެއްޗެއްކަން އެކަމުވެސް އެޔާ ގާތްނުވެވޭ އެންމެ ކުޑަމިނުން ހަތިިމްގަވެސް އަތްލީ މިދިޔަ ރޯދަމަހު ދެން އެ އޮންނަނީ ރީއްޗަކަށް ބާއްވާފަ
މުހީން : އަހަރެން ނުބެހޭނަން ކަލޭގެ ދިރިއުޅުމަކާ އެކަމު އަހަރެން މި ދައްކާ ވާހަކަ އަޑުއަހާނެކަމަށް އުންމީދުކުރަން. މިރޭ ކަލޭ ނިދަންގޮސް މާދަމާއަށް އެތައް ކަމެއް ރޭވުމަށްފަހު ނިދާނެ ނަމަވެސް މާދަން ކިހިނެއް އެނގެނީ ކަލޭ ތެދުވާނެ ކަމެއް. އަބަދުވެސް ރޭޑިއޯއާ ޓީވީއިން އެބަ ގޮވާ ކޮންމެވެސް މީހަކު މަރުވެގެން މިއީ އަބަދުވެސް އަހަރުން ކަންފަތުގަ ޖެހޭއަޑު. ދެން ބަލާބަލަ މިދުނިޔެއާ އާޙިރަތުގާ ހުރި ތަފާތު. މިދުނިޔޭގަ އެތައް އިމްތިހާންއަކުން އަހަރުމެންނަށް ފާސްވެވިދާނެ ނަމަވެސް ގިޔާމަތްދުވަހުން އެންމެ ފުރުތަމަވެސް ސުވާލުކުރެވޭނީ ނަމާދާ ބެހޭގޮތުން އެ އިމްތިހާން އިން ފެއިލްވާ މީހުންނަށް ހުރީ ކިހާބޮޑު ވޭންދެނިވި ހިތާމައެއް. އަމީރުއަށް އެނގޭތަ މި ދުނިޔޭގަ ހުރި އަލިފާނާ ނަރަކައިގެ އަލިފާނުގަ ހުރި ތަފާތު. އަމީރުމެން ތި ހަދާ ބާބަކިޔު އެއްޗެހި ހެދުމަށް ރޯކޮށްލާ ހުޅުގަނޑު އަދި އެ ނިވުމަށްފަހު އެ ހުންނަ ހޫނުގަނޑަށްވެސް މި ފެންނަނީ އިންސާނުންނަށް ކެތްނުވެގެން އުޅޭތަން. ނަރަކައިގެ އަލިފާނަށް އިންސާނާ ސިކުންތުކޮޅަކަށް ހުށެހެޅުނަސް އެމީހާ މުޅި ދުނިޔޭގަކުރި ހުރިހާ ކަމެއް މަތިން ހަނދާންނެތޭނެ. ވީމާ އެންމެ ފުރުތަމަ ކުރަންވީ ކަމަކީ ތައުބާ ނަމާދުކުރަންވީ އެއަށްފަހު ގަވައިދުން ނަމާދުކުރަން އާދަކުރަންވީ. ރޭގަނޑު މުހިންމު ކަމެއް ނެތިއްޔާ އަވަހަށް ނިދަންވީ.
އަމީރު : އަހަރެން ވަރަށް މަސައްކަތްކުރާނަން
މުހީން : އެންމެ ރަނގަޅު ޓެސްޓް އަކަށް އަހަރެން މިބުނާ ކަމެއް ފުރުތަމަ ކޮށްލަބަލަ
އަމީރު : އެއީ ކޮންކަމެއް
މުހީން : އަމީރު އަތުގާ ހުރި އެންމެ އަގުބޮޑެތި އެއްޗެހި އަމީރު ހަތިމް ހިފައިން ކިޔަވަން އިންނައިރު ހަތިމް ކައިރީ ބަހައްޓާލަބަލަ ކިޔަވަމުންދާއިރު އަމީރުއަށް އިހުސާސްވާނެ ވަރަށް ބޮޑު އެއްޗެއް.
އަމީރު : ޝުކުރިއްޔާ މިރޭ ތިކަމާ އުޅޭނަން

ދެ ރަހްމަތްތެރިން ވަކިވެ މުހީން އަވަސް އަވަހަށް ގެޔަށް ދިޔައެވެ. ގޭތެރޭގަ ކުރަން ހުރި ކަންތައް ނިންމާލުމަށްފަހު ފެންވަރާލާގެން ގަޑި ފަތިސް ނަމާދަށް ސޯނާކޮށްގެން ނިދަން އޮށޯތެވެ.

އަމީރު ގެޔަށްގޮސް މުހީން ބުނި ގޮތަށް މަސައްކަތްފެށިއެވެ. އެންމެ ފުރުތަމަވެސް ވުޝޫކޮށްލައިގެން ތައުބާ ނަމާދުކޮށްލިއެވެ. އެއަށްފަހު ހަތިމް ނަގާ އެނދުމަތީ ބޭއްވުމަށްފަހު ހުޅުވާލިޔެވެ. އަދި ހަތިމް ކައިރީ އަމީރުގެ އެންމެ އަގުބޮޑު ފޯނާ ލެޕްޓޮޕް ބޭއްވިއެވެ. އެއަށްފަހު ކިޔަވަން ފެށިއެވެ. ހިނދުކޮޅެއްތެރޭގަ އަމީރުގެ މުޅި މޫނު ހިވީ ހަތިމް ތެރެޔަށް ދަމާގަތްހެނެވެ. ހަމަ ހިލާ އެހެން ދިމާލަކަށް ނަޒަރު ހިނގާ ނުލެވުނެވެ. ގުރުއާންގެ އާޔަތްތަކުގެ މާނަ ހިތަށް އަމިއްލައަށް ވަންނަންފެށިއެވެ. އެ ފޮތުގެ މާތްކަން އިހުސާސްވެގެންދިޔައެވެ. އެތައް އިރަކު ކިޔަވަން އިނުމަށްފަހުވެސް އެ ފޮތް ލައްޕާލާ ހިތްވެސް ހަމަނުވިއެވެ. މިހެން އިންދާ ފަތިސްނަމާދު ބަންގީގެ އަޑު އިވުނެވެ. ގަޑި ދިޔަގޮތްވެސް ނޭންގުނެވެ. އަވަސް އަވަހަށް ފަތިސް ނަމާދަށްދިޔައެވެ. އެކުވެރި މުހީންއާވެސް ބައްދަލްވުމުގެ އުންމީދުގައެވެ. ހުރިހާ އެއްޗެއް ކިޔާދޭންހުރީ ޝައުގުވެރިވެފައެވެ.

ފަތިސްނަމާދުކޮށް ނިމުނުއިރުވެސް މުހީންގެ ހަބަރެއްނުވެއެވެ. ގުޅާ ގުޅާ ފޯންވެސް ނުނަގައެވެ. އެންމެ ފަހަށް ކަމެއް ގޯސްކަން އެނގިގެން މުހީންގެ ގޭދޮށަށްދިޔައެވެ. ގޭމީހުން ދިން ޙަބަރުން ހިތް ފަޅަފަޅައިގެންދިޔައެވެ. މި ފަނާވަނިވި ދުނިޔެއާ މުހީން ވަކިވި ހަބަރު ލިބުމުން ވަރަށްވެސް އަމީރު ހިތާމަކުރިއެވެ. އަވަސް އަވަހަށް މުހީންގެ ކަށުކަމާކެމީގެ ކަންތައް އަމީރު ހަރަދުގާ ހަމަޖައްސާދިނެވެ. އަދި ކަށުނަމާދުގާ ބައިވެރިވެ އެކުވެރިޔާގެ ސަންދޯލްގާ ހިފާލަން ފުރުސަތު ހޯދިއެވެ. އެކުވެރިޔާގެ ސަންދޯކް ވަޅަށް ތިރިކުރެވި ފަސްދާނުލާން ވެލިއަޅަމުން ދިޔައިރު އަމީރު ހިތާ ހިތުން ” މާދަމާއަކީ އެއްވެސް ޔަގީންކަމެއް ހުރިދުވަހެއްނޫނޭ ” ކިޔާލަ ކިޔާލަ ހުއްޓެވެ.

ތިބާގެ އަމިއްލަ ނަފްސަށް ގެއްލުން ދިނުމަކީ ކިހާ ބޮޑު ފާފައެއްކަން ތިބާއަށް އެނގޭހެއްޔެވެ؟ އެއީ ކަނޑައެޅިގެން ﷲ سُبْحَانَهُ وَ تَعَالَى ހަރާމްކުރައްވާފާވާކަމެކެވެ. ތިބާގެ އަމިއްލަ ނަފްސު ގަތުލްކުރި ގޮތަކަށް ތިބާއަށް ނަރަކައިގަ އަބަދުގެ އަބަދަށް އަޒާބްދެވޭނެކަން މާތް ނަބިއްޔާ محمد‎ صلى الله عليه وسلم ވެސް ވަނީ ހަދީސްކުރައްވާފައެވެ.

ލުގްމާންއަކީ މޮޅަށް ކިޔަވަމުން އަންނަކުއްޖެކެވެ. ގްރޭޑް ބާރާގަ ތައުލީމް ހާސިލްކުރަމުން މޮޅު ވަނަތައް އޭނާވަނީ ގެންނަންފަށާފައެވެ. ލުގްމާންގެ އެންމެ ބޮޑު ހިތްވަރަކީ އޭނާގެ މައިން ބަފައިންނެވެ. އެމީހުންގެ އޯގާތެރިކަމާ ކެތްތެރިކަމުގެ ސަބަބުން ލުގްމާންއަށް އަބަދުވެސް ކުރިޔަށް ދިޔުން ފަސޭހަވެއެވެ. ބައްޕަ ބުރަ މަސައްކަތްކުރަމުން ހޯދާ ހަލާލް އާމްދަނީއިން ލުގްމާން ކިޔެވުމަށް ބޭނުންވާ ކޮންމެ އެއްޗެއް ހޯދާދެއެވެ. މީރު ކެއުންތައް ކައްކަން އެނގޭ މަންމަ އަބަދުވެސް ލުގްމާން ގެޔަށް އަންނައިރު ހުންނަނީ ލުގްމާންގެ ހަށިގަނޑަށް ފައިދާވާފަދަ މީރު ކެއުންތައް ތައްޔާރުކޮށްފައެވެ.

ދުވަސްތައް ފާއިތުވެގެންގޮސް ލުގްމާންގެ ބައްޕަ ވަރަށް ބޮޑަށް ބަލިވިއެވެ. މަސައްކަތަށް ނުނިކުމެވޭތީ އަތުގާ އެއްޗެއްވެސް ނޯވެއެވެ. މިކަމާ ލިގްމާން ވަރަށް ފިކުރުބޮޑުވިއެވެ. އަދި ވަގުތީގޮތުން ބައްޕަ ރަނގަޅަުވަންދެކަށް ވަޒީފާއަކަށްދާންފެށިއެވެ. ނަމަވެސް ބައްޕަ ހޯދަމުންދިޔަފަދަ އާމްދަނީއެއް ނުލިބޭނެކަން ލުގްމާންއަށްވެސް އެނގެއެވެ. ހިތްވަރުކޮށްފާ ކުރިޔަށްދާން ނިންމި ލުގްމާންއަށް އަނެއްކާވެސް އިތުރު ދެރަޔަކާ ކުރިމަތިލާންޖެހުނެވެ. ލޯބިވާ މަންމަވެސް އެންމެ ފަހަށް ބަލިވެއްޖެއެވެ. މިކަމުގެ ސަބަބުން ލުގްމާން ކާބޮއެ ހަދަންޖެހެނީ ބޭރުންނެވެ. ކޮންމެއަކަސް ޖެހުނީ ހިތްވަރުކޮށް ކުރިޔަށްދާށެވެ. ލިބޭ މުސާރައިން ދެކޮޅުޖައްސާށެވެ.

މިއަދުވެސް ލުގްމާން ވަޒީފާއަށްނުކުތީ ހިތްވަރާއެކުގައެވެ. މަންމައާ ބައްޕައަށްޓަކައެވެ. ކެތްތެރިކަމާއެކު ވަޒީފާއަދާކުރަމުން ދަނިކޮށް ތަނުގެ މެނޭޖަރު ލުގްމާންގެ ތައުލީމީ ފެންވަރު ރަނގަޅުވެފާ މަސައްކަތަށް ރަނގަޅުކަމުން ލުގްމާންއަށް އިތުރު މުސާރައަކާއެކު މަތީ މަގާމްއެއްދިނެވެ. ލުގްމާން މިކަމާ ވަރަށް އުފާކުރިއެވެ. މި އުފާވެރި ޙަބަރު އެންމެ ފުރުތަމައަށްވެސް ދޭންބޭނުންވީ މައިންބަފައިންނަށްށެވެ. ނަމަވެސް އުފާވެރިކަން ހިތާމައަށް ބަދަލްވީ ހިނދުކޮޅެއްތެރޭގައެވެ. ލުގްމާންގެ ބައްޕަ އެދުވަހު މި ފަނާވަނިވި ދުނިޔެއަށް އަލްވަދާއުކިޔާފިއެވެ. އޭގެ ދެމަސްފަހު ލޯބިވާ މަންމަވެސް މި ފަނާވަމުންދަނިވި ދުނިޔެއަށް އަލްވަދާއުކިޔެވެ. ލުގްމާން މުޅިންހެން އެކަނިވީޔެވެ. ލުގްމާންގެ ހިތާމަތަކާ އެކަނިވެރިކަމަށް އާދިރުމެއް ގެނެސްދިނީ ލުގްމާންގެ ކްލާސް ކުއްޖެއްކަމުގާވާ ޒައިނަބެވެ. ޒައިނަބްއަކީ ލުގްމާންއަށް ވަރަށް އޯގާތެރި ރަހްމަތްތެރިޔެވެ. ނަމަވެސް އެ އޯގާތެރިކަން ފަހަތުގައި އޮތީ ނުބާ ރޭވުމެކެވެ. ލުގްމާންގެ އެކަނިވެރިކަމުގެ ފައިދާނަގާ ޒައިނަބް ގިނަ ގިނައިން އެގެޔަށް އަންނަންފެށިއެވެ. އޯގާތެރިކަމުގެ ތެރެއިން ފާހިޝް އަމަލުތަކުގެ ތެރެޔަށް ލުގްމާން ވައްދާ ލުގްމާންގެ ހިތުގާ ޒައިނަބްގެ މައްޗަށް ލޯބިޖެއްސިއެވެ. މިހާރު ލުގްމާން ހުންނަނީ ޒައިނަބްއާހެދި ހޭބަލިވެފައެވެ. އެއްދުވަހު ނަޔަސް ގުޅާ އާދޭސްކޮށްގެންވެސް އެގެޔަށް ގެނެއެވެ. ނައިސްފިނަމަށް އެތައް ޒުވާބެއް ދެމީހުން ދެމެދުގާ ހިނގައެވެ. އެންމެ ފަހަށް ޒައިނަބްގެ ބޮލަށްވެސް ލުގްމާންއާހެދި އުނދަގޫވާންފެށިއެވެ. ލުގްމާން ދޫކޮށްލުމަށް ޒައިނަބް ކުރެވުނުހާ މަސައްކަތެއްކުރިޔެވެ. ނަމަވެސް ލުގްމާން ވަކި ދުލެއްނުދިނެވެ. އޭނާއަށްވަނީ ޒައިނަބްދެކެ ވަރަށް ބޮޑަށް ލޯބިވެވިފައެވެ. އެންމެ ފަހަށް ޒައިނަބްއަށް ބިރުވެސް ދައްކަންފެށިއެވެ. ނައިސްފިނަމަ އަމިއްލައަށް މަރުވާނެކަމަށްވެސް ބުނަންފެށިއެވެ. މިކަމުގެ ސަބަބުން ޒައިނަބް ހިތުގާ ބިރުވެރިކަން އުފެދި އެގެޔަށް ދާންފެށިއެވެ.

ދުވަސްގަނޑަކަށްފަހު ޒައިނަބް އާދަޔާ ހިލާފަށް ބަލިވާންފެށިއެވެ. މިވަނީ ކީއްކަން އޭނާއަކަށްވެސް ނޭނގެއެވެ. ބޯ އަނބުރާ ހޮޑުލަވައެވެ. މީހާ ގަޔަކު ވަރެއްނުހުރެއެވެ. އެންމެ ފަހަށް ލުގްމާންއާއެކުގޮސް ޑޮކްޓަރަށް ދެއްކުމުން ބަނޑުބޮޑުކަން އެނގުނެވެ. މިކަމާ ދެމީހުން ވަރަށް ބިރުގަތެވެ. ފަލީހަތްވެދާނެތީއެވެ. ހާސްވެފާހުރި ލުގުމާން ޒައިނަބް ގޮވައިގެން ގެޔަށްދިޔަގޮތަށް ޒައިނަބްގެ ކޯމަތީ އެތިފަހަރެއްއެޅިޔެވެ. އަދި އެއީ ޒައިނަބްގެ ކުށެއްކަމަށް ބުންޏެވެ. ޒައިނަބް އައިރުޅީގާ ލުގްމާން ގާގަ ތަޅާގަތެވެ. ނަމަވެސް ލުގްމާންގެ އަނިޔާވެރިކަން އެޔަށްވުރެ ވަރުގަދައެވެ. ގޮއްމުށުން ޒައިނަބްގެ ބުރަކަށިގާ ތަޅާގަނެ މުޅި މީހާ ތިރިކޮށްލިޔެވެ. ރޯން އޮތް ޒައިނަބް އިރުކޮޅަކުން ތެދުވެގެން އެގެއިން ނުކުމެގެންދިޔައެވެ.

ލުގްމާންއާ ޒައިނަބް އެކަކު އަނެކަކާ ދިމާނުވާތާ އެތައް ދުވަހެއްވެއްޖެއެވެ. މިކަމާ ލުގްމާން ވަރަށްވެސް ހާސްވިއެވެ. އެތައް ފަހަރަކު ކޮންމެ ދުވަހަކު ފޯނަށް ގުޅައެވެ. ނަމަވެސް ޒައިނަބްގެ ޙަބަރެއްނުވާތީ އެންމެ ފަހަށް އެގަޔަށްދިޔައެވެ. ނަމަވެސް ޒައިނަބް ނެތުމުން ކޮންތާކުތޯވީ އޮޅުންފިލުވުމުން އެނގުނީ އޭނާ ރާއްޖެ ދޫކޮށްދިޔަކަމެވެ. ލުގްމާން އައި ރުޅީގަ ގޮސް ފޭސްބުކް ހުޅުވާގެން ޒައިނަބްއަށް އެތައް މެސެޖެއްކުރަނިކޮށް ޒައިނަބް ޖަވާބުދިނެވެ. ދަރިފުޅު ވައްޓާލިވާހަކަ ބުނުމާއެކު ލުގްމާންއަށް ހީވީ ދެފާދަށުން ބިންގަނޑު ދަމާގަތްހެނެވެ. މޮޔައެއްހެން ތެޅިތެޅިފާ ޒައިނަބްއަށް އަނބުރާ އައުމަށް އާދޭސްކުރިޔެވެ. ނަމަވެސް ޒައިނަބް ދެން ލުގްމާންއަށް ނުފެންނާނެކަމަށް މެސެޖްކުރިއެވެ. އެއަށްފަހު ލުގްމާން ބްލޮކްކޮށްލިޔެވެ.

ލުގްމާން ކޮޓަރިން ނުނުކުމެ އޮންނަތާ އެތައް ދުވަހެކެވެ. އޭނާގެ މުޅި ހަށިގަނޑުވަނީ ހިކި އަނަރޫފަވެފައެވެ. ޒައިނަބްނޫން މީހަކު އޭނާ ފެންނާކަމަށް ބޭނުމެއްނުވެއެވެ. ދޭތެރެޔަކުން ތޫނު އެއްޗަކުން އަމިއްލަ ހަށިގަނޑުގާ ޒައިނަބްގެ ނަން ލިޔެލައެވެ. މިގޮތަށް އޭނާގެ އަމިއްލަ ހަށިގަނޑު ކަފަމުން ގޮސް އެންމެ ފަހަށް ކަފާލާނެ ތަންކޮޅެއްވެސްނެތެވެ. އެންމެ ފަހަށް ވާގަނޑެއް ހޯދިއެވެ. އަދި ފަންކާގާ ވާގަނޑު އައްސާލުމަށްފަހު ދަންމަޅިއެއްހަދާލިޔެވެ. އެއަށްފަހު ކޮޓަރީގެ މުޅި ފާރުގާ ޒައިނަބްދެކެ ލޯބިވާކަން މާކަރަކުން ލިޔެލިއެވެ. އެއަށްފަހު ގޮނޑިއެއްގެނެސް އޭގެ މައްޗަށްއަރާ ކަރަށް ދަންމަޅި މަހާލިއެވެ. ކަރުނައަޅާ ގިސްލަމުން ގޮނޑިން ލުގްމާން ފުންމާލިޔެވެ. އިރުކޮޅަކުން ނޭވާ ހާސްވެ ތެޅެންފެށި ލުގްމާންއަށް މިހެދެނީ ގޯހެއްކަން އިހްސާސްވިއެވެ. ނަމަވެސް ވަގުތު ފާއިތުވެއްޖެއެވެ. މަރުގެ މަލާއިކަތާ އެހުރީ ލުގްމާން ބަލާ އައިހެވެ.

– ނިމުނީ –

ލޮބުވެތި ކިޔުންތެރިންނޭވެ. ތިބާގެ އަމިއްލަ ނަފްސަށް ގެއްލުންދީ މަރަށް ތިޔަ ހުށަހަޅަނީ އަލުން އަނބުރާ އަންނާނެކަމަށްހެެއްޔެވެ. ނުވަތަ ތިބާ ދަނީ މިދުނިޔެ ދޫކޮށް ސުވަރުގެޔަށް ކަމަށްހެއްޔެވެ. ހަމަ ހިލާ އެހެނަކުން ނުވާނެއެވެ. މިއީކީ ފިލްމެއްނޫނެވެ. ތިބާގެ މަރާމެދު ބަޔަކު ހަމްދަރުދީވެ ވާހަކަދައްކާ އަދި ހިތާމަކުރާނީ ކުޑަދުވަސްކޮޅަކުއެވެ. އެއަށްފަހު އެމީހުންގެ އާއްމު ދިރިއުޅުމަށް އަނބުރާދާނެއެވެ. ތިބާމަތިން ހަނދާންވެސް ނުހުންނާނެއެވެ. ތިބާގެ އަމިއްލަ ނަފްސު މަރަށް ހުށަހަޅަން ހިތަށްއަރާނަމަ ދެ ރަކްއަތް ނަމާދެެއްކޮށް ސަޖިޖާގާއޮވެ ތިބާގެ ރައްބަށް ހުރިހާ ޝަކުވާއެއްދަންނަވަބަލާށެވެ. ފަހެ އެއީ އެންމެ އޯގާވެރިވަންތަ އިލާހެވެ.

ޒިޔާދުއަށް ހޭލެވުނީ ބާލިދީއަކަށް ފެންތިކިތަޅާ އަޑަށްށެވެ. ކަނުބަނދެވިފައިވާ ޒިޔާދުގެ ދެއަތްވަނީ ފުރަގަހުން ބަނދެވިފައެވެ. ދެފައިވެސްވަނީ ބޭނދިފާއިން ގޮނޑިއާލާ އެއްސިފައެވެ. ހާސްވެ ކަންބޮޑުވުން އިސާހިތަކު ޒިޔާދުގެ ހަތް ފަތަހަކޮށްލިއެވެ. އޭނާ އެފަދަ ހާލެއްގާ އިންނަޖެހުނީ ކީއްވެކަން ޙުދު އޭނާއަކަށްވެސް ނޭނގެއެވެ.

ޒިޔާދު : މީހެކޭ…. މީހެކޭ މަ ސަލާމަތްކުރޭ….. މީހެކޭ
އަޑަކުން : އާ…. ޒިޔާދު ހޭލެވިއްޖެދޯ
ޒިޔާދު : ކާކުތީ؟ ކީއްވެ އަހަރެންނަށް މިހެން ހެދީ؟
އަޑަކުން : (ކުޑަކޮށް ހީލާފަ) ކަލެޔަށް ރަނގަޅަށް އެނގޭނެ ކަލޭ މިތަނަށް ގެނެވުނު ސަބަބު
ޒިޔާދު : އަޖައިބެއް މަ ކީއްތަ ކުރީ؟
އަޑަކުން : އަހަރެންނަށް އެނގޭގޮތުގަ ކަލޭތީ ވަރަށް ގިނަ އަންހެންކުދިންގެ ހިތް ކަތިލާފަވާ މީހެއް. މިއަދު އޭގެތެރެއިން ތިން ކުއްޖަކުވަނީ މި ދުނިޔެ ދޫކޮށް ގޮސްފަ. ހާއްސަކޮށް ކަލޭ ރައްޓެހިވަނީވެސް ބަލި ކުދިންނާ. އެކުދިންނަށް އޯގާތެރިވާ ކަމަށްހެދިގެން ކަލޭ އެމީހުން ފަރާތުން އެތަށް ނާޖައިޒް ފައިދާއެއްވަނީ ނަގާފަ.
ޒިޔާދު : ކޮންބަޔެއްގެ ވާހަކަ ތި ދައްކަނީ؟ މަ ތިހެންނެއްނޫޅެން
އަޑަކުން : 2008 އާތިފާ ސައީދު ހިތުގެބަލި ހުންނަކުއްޖެއް. ހިތުގެ ފުންމިނުން އެކުއްޖާ ކަލޭދެކެވީ ލޯބި ފުނޑު ފުނޑުކޮށްލުމަށްފަހު ފިލައިގެން އުޅުނީ އެންމެ ފަހަށް އެކުއްޖާ އެ ހިތާމާގަ 2010 ގަ މިދުނިޔެ ދޫކޮށްދިޔައީ
ޒިޔާދު : ކަލޭ ތި ހަދަނީ ދޮގު… ކަލޭ ތީ ކާކު…… މަ އޭނާއަށް އެހެންނެއް ނުހަދަން
އަޑަކުން : އަހަރެން ދެކުނިން އެމަންޖެ އުޅުން ހާލު ކަނީކީނޫން ބޮނީކީނޫން އެންމެ ފަހަށްކުރި ފޯންކޯލްއާ މެސެޖްވެސްވަނީ ކަލެޔަށްކޮށްފަ މިއީ ދޮގެއްތަ؟
ޒިޔާދު : (ހާސްވެފަ) އަހަރެންނަކަށް ނޭނގެ
އަޑަކުން : އަދިވެސް ކަލޭ ދޮގުތަ ހަދަން ގަސްތުތިކުރަނީ. އަދިވެސް ކިޔާދޭންވީތަ؟
ޒިޔާދު : ހުއްޓާލާ…. މަ ދޫކޮށްލާ އޭރުން ކަލޭ ބުނިވަރަކަށް ފައިސާދޭނަން
އަޑަކުން : 2011 އާމިނަތު ނަޒްމާ ދެ ކިޑްނީ ފެއިލްވެފާވާ ކުއްޖެއް. ކަލޭ އޭނާ ކައިރި އާދޭސްކޮށް ރޮއެގެން ހިތް ފަތަހަކުރީމެންނު. އަދި އެއަށްފަހު ކަލޭއަށް ވާވަރަށް ހިތްފުރުނީމާ އޭނާގެ ލޯބިވެސް މުގުރާލީމެއްނު. އެކުއްޖާ ކުރި އާދޭސް އަޑެއް ނާހާ ފެނުނީމަ ދަންނަ ކަމަށްވެސްނުހަދާ އެންމެ ފަހަށް މަގުމަތީ އެކުއްޖާ ފަލީހަތްވެސްކުރީމެއްނު. 2014 ގަ ނަޒްމާވަނީ އަމިއްލައަށް ދަންޖެހިގެން މަރުވެފަ. ކަލޭގެ ސަބަބުން
ޒިޔާދު : (ހާސްވެ މޫނުމަތިން ދާހިއްލާހާލު) ކަލެޔަށް ކިހިނެއް ތިވަރަށް މައުލޫމާތު ލިބުނީ… ކަލޭތީ ކާކު… ޔަގީނޭ ހަމިއްޓެކަން…. ކަލޭ މަށާ ގާތްކޮށްއުޅެމުން މަށަށް ކީއްވެ ތިހެން ތިހަދަނީ
އަޑަކުން : ހަމިއްޓެ؟ އޭނާ ތިޔޮށްތީނު ކަލޭ ކައިރީގަ ކަތިލެވިފަ
ޒިޔާދު : ދޮގު ތި ހަދަނީ
އަޑަކުން : ފާގަ އެއްޗެއް ޖޭހޭހެން ހީވޭތަ؟
ޒިޔާދު : (ފާގަ ފެން ޖެހޭހެން ހީވެގެން) އާނ
އަޑަކުން : އެއީ ހަމިއްޓެގެ ލޭ
ޒިޔާދު : ޔާރައްބީ….. ނުވާނެ ތިޔައީ ދޮގު
އަޑަކުން : 2016 މައިމޫނާ ހުސެން ތެލެސީމިޔާ ކެރިޔަރެއް. ކަލޭ އޭނާ ފަހަތުން އާދޭސްކޮށްގެން ކައިވެނިކުރާނަމޭ ކިޔާގެން އެތައް ދުވުމެއްދުވި. އެންމެ ފަހަށް އެކުއްޖާގެ ފަރާތުން ނާޖައިޒް ފައިދާނެގުމަށްފަހު ކަލޭ އޭނާ ދޫކޮށްދިޔައީ އަދި އޭނާގެ ފޮޓޯތައް ލީކްކޮށްލާ ފަލީހަތްކޮށްލީ އޭގެ ސަބަބުން އެކުއްޖާ އަމިއްލައަށް ފުރާނަ ދުއްވާލީ ކަނޑުފެތިގެން.
ޒިޔާދު : ކަލޭ ތީ ކާކުތަ؟ ކަލެޔަށް ކިހިނެއް ތިވަރަށް އެނގެނީ؟
އަޑަކުން : އަމިއްލަ ސިކުނޑިން ވިސްނާފިއްޔާ އެނގޭނެ މަމީ ކާކުކަން. ދެން ބައްދަލްވާނީ މާދަމާ
ޒިޔާދު : މަޑުކޮށްބަލަ…. ނުދޭބަލަ… މަ ދޫކޮށްލާ ހެޔޮނުވާނެ

ޒިޔާދު ހާސްވުމާ ކަންބޮޑުވުމަށް ގެނބިގެން ދިޔައެވެ. އެއްސިފާވާ ގޮނޑިން ސަލާމަތްވުމަށް އޭނާ ތެޅިފޮޅެންފެށިއެވެ. އެތައް އިރަކު މިހެން އުޅެނިކޮށް ގޮނޑިއާއެކު ޒިޔާދު ވެއްޓުނު ބޮނޑީގަ ބޯ ތަޅުންގަނޑުގާ ޖެހުނުލެއް ބާރުކަމުން ހޭނެތިއްޖެއެވެ.

ޒިޔާދުއަށް ހޭލެވުނީ މުޅި މީހާ ގަޔަށް ފެންއެއްޗެއް ޖެހިތަނުންނެވެ. މިފަހަރު ދެލޯމަތީ ބަނދެވިފާވާ ފޮތިގަނޑުވަނީ ނެގިފައެވެ. ނަމަވެސް ގޮނޑިޔާލާ ހަމަވަނީ ވަރުގަދައަށް އެއްސިފައެވެ. އަނދިރިކަން ގަދަ ތަނެއްގާ ބަނދެވިފާއިން ޒިޔާދުއަށް އަލިކަމެއްލިބެނީވެސް ޒިޔާދު ކުރިމަތީގަ އިން ހުދު ބޯޑަށް އެޅުވިފާވާ އަލިންނެވެ. އެ ބޯޑުގާވަނީ ތިން އަންހެންކުދިންގެ ފޮޓޯ ހަރުކުރެވިފައެވެ. އަދި ޒިޔާދު އެކުދިންނާއެކު ވާ ފޮޓޯތައްވެސްވަނީ ހަރުކުރެވިފައެވެ. ހަމައެކަނި ފޮޓޯއެއްނޫނެވެ. ކޮށްފާވާ ހުރިހާ މެސެޖެއްގެ ކޮޕީތައްވެސްމެއެވެ.

އަޑަކުން : ރަނގަޅަށް ނިދުނުތަ؟ ބަނޑުހާތަ؟
ޒިޔާދު : އަހަރެން ވަރަށް ބަނޑުހާ
އަޑަކުން : އެހެންވިއްޔާ ކަލޭ ކުރިމަތީ ތިހިރަ ބޯޑުން ބަނޑުފުރާ ކަލޭގެ ހިތްފުރިގޮތަށް
ޒިޔާދު : (ރުޅިއައިސްފަ) ކަލޭތީ ކާކުހޭ؟ މަ ދޫކޮށްލާށޭ
އަޑަކުން : (ހެމުން) ކަލޭތީ ކާކުހޭ މަ ދޫކޮށްލާށޭ
ޒިޔާދު : (އިތުރަށް ރުޅިގަދަވެފަ) މަ މީ ލޭމައްޗަށްދާ މީހެއް މަށަށް ކަމެއްވެދާނެ މަ ދޫކޮށްލާ
އަޑަކުން : އޯ… ޒިޔާދުވެސް ބަލި ދޯ….. ދެން ކަލޭ ކީއްވެ އެކުދިންގެ ހިތް ހަލާކުކުރީ؟ އެކުދިންނަކީވެސް ބަލި ކުދިންނޭ. އެކުދިން މިދުނިޔެ ދޫކުރީ ކަލެޔާހެދި.
ޒިޔާދު : ކަލޭ ބޭނުމީ ކޮންކަމެއް؟
އަޑަކުން : މަ ބޭނުމީ ކަލޭގެ ހިތް ފުރުވަން އަދި ބަނޑުވެސް ފުރުވަން. ކުރިމަތީގަ ތިހިރަ ހުރިހާ އެއްޗެއް ކާންދީގެން
ޒިޔާދު : (ހާސްވެފަ) ތިހެން ނުހަދާ އަހަންނަށް
އަޑަކުން : އެންމެ ރަނގަޅު… އެ ނުކަންޏާ ކަލޭގެ ކަނައަތްފަޅިގަ ބެހެއްޓިފާހުރި އެއްޗެހި ކާން ޖެހޭނީ

ޒިޔާދު އޭނާގެ ކަނާއަތް ފަޅިއަށް ބޯ އަނބުރާލިތަނުން ފެނިގެން ދިޔައީ ފަނޑު އަލިކަމެއް ލިބިފާވާ މޭޒެކެވެ. އެ މޭޒުމަތީގަ ތިން ފުޅި ބެހެއްޓިފާ ހުއްޓެވެ. ފުރުތަމަ ފުޅީގަވަނީ ކިސަޑުފެނެވެ. ދެވަނަފުޅީގަވަނީ ކުރަފިތަކެކެވެ. ތިންވަނަފުޅީގަވަނީ ފުޅައަޅާފަވާ ކާއެއްޗިއްސެވެ. މި މަންޒަރު ފެނުމުން ޒިޔާދު ވަރަށް ބިރުގަތެވެ.

އަޑަކުން : މީރުހެން ހީވަނީ ކޮންއެއްޗެއް؟
ޒިޔާދު : ކަލޭތީ މޮޔައެއް
އަޑަކުން : އަދި ނިމުނީކީނޫނޭ. ވައަތުފަޅީގަ ހުންނާނެ ވަކިން މީރު އެއްޗެހި

ޒިޔާދު އޭނާގެ ވައަތުފަޅިއަށް ބޯ އަނބުރާލިއިރު ފަނޑު އަލިކަމެއް ލިބިފާވާ މޭޒެއް ބެހެއްޓިފާ ހުއްޓެވެ. އެ މޭޒުމަތީގާ ތިން ތަށި ހުއްޓެވެ. ފުރުތަމަ ތަށީގާވަނީ ޖަންގްޝަން ނަޖިހެވެ. ދެވަނަ ތަށީގަވަނީ އިންސާނެއްގެ ހޮޑެވެ. ތިންވަނަ ތަށީގަވަނީ ކުޑަކުމުދާތަކެއްޗެވެ. މި މަންޒަރު ފެނުމުން ޒިޔާދު ވަރަށް ފަކުރުގަނެ ބިރުގަތެވެ.

އަޑަކުން : ވީމާ ކޮންއެއްޗެއް ކާނީ؟
ޒިޔާދު : ނުކާނަން އެކައްޗެއްވެސް
އަޑަކުން : ޕިސް ޕިސް ޕިސް… ޒިޔާދު… އެޔޮށް މީރުކޮށް ކާންހެދީމަ ތިއުޅެނީ ނުކާން. ނުކަންޏާ އަހަރެންނަށް ރަނގަޅު ބަނޑަށް މަރުވާނު. އެކަމުވެސް މިއަދު ކޮންމެވެސް އެކައްޗެއް ކަލެޔަށް މަ ކާންދޭނަން

އިރުކޮޅަކުން މުޅިތަން އަނދިރިވެގެން ދިޔައެވެ. ދެން އިވެންފެށި ފަހަތުން މީހަކު އަންނަ އަޑެވެ. އެމީހަކު ގޮސް ކަނައަތިފަޅީގަ ހުރި މޭޒުން ފުޅިތައް ތަޅުވާލިއަޑު އިވުނެވެ. އަދި އެއްޗެހިތަކެއް ޗަސްކުރާއަޑު އިވުނެވެ. ދެން އެމީހަކު ދިޔައީ ވައަތުފަޅިއަށްށެވެ. ގޮސް ވައަތުފަޅި ހުރި މޭޒު ތަށިތަކުގާ ސަމްސަލެއް ކާއްތާލިއަޑު އިވިނެވެ. އެއަށްފަހު އެމީހަކު އައިސް ޒިޔާދު ކުރިމަތީ ހުރި ބޯޑުން ކަރުދާސް ނިއުޅާ އަޑު އިވުނެވެ. ދެން އެމީހަކު ދިޔައީ ޒިޔާދުގެ ފުރަގަހަށްށެވެ. އެމީހާ ޒިޔާދުގެ ނިއްކުރީގަ ހިފަހައްޓާ ބޯ މައްޗަށް ނެގުމަށްފަހު އަނގަމައްޗަށް އެމީހާ ގެނޭ އެއްޗެހި އޮއްސާލުމަށްފަހު ގަދަކަމުން ޒިޔާދުއަށް އެތަކެތި ކާންދިނެވެ. އެއާއެކު ވަގުތުން ޒިޔާދު ހޮޑުދުއްވާލިއެވެ. އަދި ތެޅި ފޮޅެންފެށިއެވެ. އަދި އެތައް އިރަކު ހޮޑުލިޔެވެ. ލައިގެންހުރި ހުރިހާ އެއްޗެއް ހަރާބުވީއެވެ.

އަޑަކުން : ކޮބާ މީރު ދޯ؟ ބަނޑު ފުރިއްޖެތަ؟
ޒިޔާދު : (އޯކަށް ދެމެމުން) ކަލޭ….. ކަލޭތީ މޮޔައެއް. އަހަރެން ކަލޭ މަރާލާނަން
އަޑަކުން : (ހެމުން) ޒިޔާދު އަހަރެން މަރާފި…. ޒިޔާދު އަހަރެން މަރާފި… ދެން އިހަށް ގޮސްލީ

ކާންދެވުނު އެއްޗެއްގެ ސަބަބުން ޒިޔާދުގެ ހާލަތު ދިޔައީ ގޯސްވަމުންނެވެ. ބޭރަށް ހިނގަންވެސް ފަށާފިއެވެ. އަމިއްލަ ގަޔަށް ބޮޑުކަމު އެތައް ފަހަރަކު ދެވިއްޖެއެވެ. މިއީ ދުވަހަކުވެސް އޭނާ ދެކޭނެފަދަ ދުވަހެއްކަން އޭނާ ހީވެސް ނުކުރެއެވެ.

އިރުގަނޑެއްފަހު ފަހުން އަނެއްކާވެސް މީހަކު ފުރަގަހުން އަންނަ އަޑު އިވުނެވެ. އެމީހަކު އައިސް ޒިޔާދު ގަޔަށް އިންޖެކްޝަންއެއް ހަރާލިޔެވެ. އެއަށްފަހު އެމީހަކު އަނބުރާދިޔައެވެ.

އަޑަކުން : ޒިޔާދު ހާދަ ހަޑިކޮށް ތިހުރީ
ޒިޔާދު : (މާނޭވާލަމުން) ކަލޭ ކޮން އިންޖެކްޝަންއެއް އަހަރެން ގަޔަށް ތިޖެހީ
އަޑަކުން : (ހެމުން) ގަޔަށް ގުއިރުން ހުއްޓުވަން
ޒިޔާދު : ކަލޭ……. ކަލޭ…… ކަލޭ އަހަރެން މަރާލަބަލަ
އަޑަކުން : އޭރުން ކިހިނެއް ސުޒާނާއަށްވާނީ؟
ޒިޔާދު : ކަލޭ ސުޒާނާއާ ނުބެހޭތި
އަޑަކުން : އާނ ސުޒާނާ… 2018 ޖެނުއަރީ ފަހެއް. ކަލޭ އޭނާގެ ހިތް އަތުލަން މަސައްކަތްފެށިދުވަސް ބަރާބަރު ދެ މަސްތެރޭ އެތައް އާދޭހެއްކޮށްގެން އޭނާގެ ހިތްއަތުލާފި. ނަމަވެސް ސުޒާނާއަކީވެސް ބަލިކުއްޖެއް އެހެންނޫންތަ؟ މެޑިކަލް ރިކޯޑް ދައްކާގޮތުން އޭނާގެ ހިތުގަ ލޯވަޅެއް އިނދޭ. މީގެ ހަފްތާއެއްކުރިންނެއްނު ކަލޭ އޭނާ ކައިރި އިންނަންއެހީ. އެހުމަށްފަހު ނާޖައިޒްފައިދާ ނަގަން މަސައްކަތްކުރުމުން އެކުއްޖާ ކަލޭ ކައިރިން ސަލާމަތްވާން މަސައްކަތްކުރީ ނަމަވެސް ކަލޭ އޭނާ އިއްފަތް ނަގާލީމެއްނު. ގަދަކަމުން ބެހުނީމެއްނު. އެއީވެސް އިތުރަށް ކަލެޔަށް ހިތްޖައްސަން ކުރުވިކަމެއްނު. މިއީ ދޮގެއްތަ؟
ޒިޔާދު : ނޫން. އަހަރެން އެއްބަސްވަން.
އަޑަކުން : ކަލޭ އެހެންވިއްޔާ މިނިވަންވާން ވަރަށް ކައިރިވެއްޖެ. އަބަދުވެސް ތެދު ހަދަންޏާ މިނިވަންވާލެއް އަވަސްވާނެ. ދެން އިހަށް ގޮސްލީ.

ނަޖިހާއެކު ފޯވެފާވާ ޒިޔާދު ކެތްތެރިކަން ކޮޅުންލިޔެވެ. ސަލާމަތްވާން އޭނާ މަސައްކަތްފެށިއެވެ. ގޮނޑި ކޮޅުކޮޅަށް ހަލުވަމުންގޮސް އެންމެ ފަހަށް ގޮނޑިއާއެކު އޭނާ ވެއްޓިއްޖެއެވެ. އަތުގާ އައްސާފާ އޮތް ވާގަނޑު މޮހަން މަސައްކަތްފެށިއެވެ. ވަރަށް އިރުން އެކަން ކާމިޔާބުވުމުން ދެން ފާގަ ހުރި ވާގަނޑު މޮހާލިޔެވެ. އެއަށްފަހު އަނދިރިގަނޑުތެރޭ ހިނގަނިކޮށް އެއްޗެއްގަ އަޅާގަނެފާ ޒިޔާދު ވެއްޓިއްޖެއެވެ. އެއީ ކޮން އެއްޗެއްތޯ ބަލަން ޒިޔާދު ބޭނުންވެގެން އަތް ކާތަނިކޮށް އިންސާނެއްގެ މޫނުގާ އަތްޖެހުނެވެ. އެއާއެކު ބިރުން ސިހިގެން ދިޔައެވެ. އިރުކޮޅަކުން މީހަކު އަންނަ އަޑު އިވިގެން ކަނައަތުފަޅީ ހުރި މޭޒު ހޯދައިގެން އެތަނުން ބިއްލޫރި ފުޅިއެއް ހަލާލުކޮށްލުމަށްފަހު އަންނަ މީހާއަށް ހަމަލާދޭން ޒިޔާދު ތައްޔާރުވިއެވެ. އިރުކޮޅަކުން ފީ އަޑެއް އިވިފާ ދޮރެއް ހުޅުވުނުއަޑު އިވިގެންދިޔައެވެ. އެތެރެޔަށް އައި މީހާއާ ދިމާލަށް ޒިޔާދު ދުވެފާގޮސް ހަލާކުކޮށްފާވާ ބިއްލޫރި ފުޅި އެމީހާގެ ކަރަށް ގަންބާލިގޮތަށް މަރާލިޔެވެ. އެއާއެކު މުޅިތަން ދިއްލިގެން ދިޔައެވެ. ޒިޔާދު ހަމަލާދީ މަރާލެވިފާވަނީ އޭނާގެ ލޯބިވެރިޔާ ސުޒާނާއެވެ. އެއާއެކު ޒިޔާދުގެ ހިތްފަޅައިގެންދިޔައެވެ. އަދި އަޑުން އަޑުނަގާ ރޯންފެށިއެވެ. އެތައް އިރަކު ރުއިމަށްފަހު ރަނގަޅަށް ތަނަށް ނަޒަރު ހިނގާލިއެވެ. އެއީ ސުޒާނާމެން ގޭ ސިޓިންގްރޫމްއެވެ. އެއަށްފަހު މަރުވެފާވާ މީހާއަށް ނަޒަރު ހިނގާލިއެވެ. އެއީ އޭނާގެ ގާތް އެކުވެރިޔާ ހަމިއްޓެއެވެ. އޭނާ އޮތީ ބަންޑުންނެވެ. އޭނާ ގައިން ނުކުމެފަވާ ލޭތައްވަނީ ހިކިފައެވެ. ކުއްލިއަކަށް އިވުނީ މީހަކު ވާހަކަދައްކަންފެށިއެވެ.

އަޑަކުން : ޕިސް ޕިސް ޕިސް…. ޒިޔާދު ކީއްތިކުރީ…..
ޒިޔާދު : (ހާސްވެފަ) މީ މަކުރިކަމެއްނޫން މީ ކަލޭކުރިކަމެއް
އަޑަކުން : ޕޮލިހުން އެބަ އާދޭ
ޒިޔާދު : ރަނގަޅު މަ އޭރުން ހުރިހާ އެއްޗެއް ކިޔާދޭނަން
އަޑަކުން : އެމީހުން ގަބޫލްކުރާނެހެންހީވޭތަ؟ ކަލޭ އާއިލާ މީހުން ގަބޫލްކުރާނެހެން ހީވޭތަ؟ ކަލޭ އަމިއްލަ އަތުން ކަލޭ ލޯބިވެރިޔާވެސް މަރާފި
ޒިޔާދު : (ރުޅިގަދަވެފަ) މަށެއް ނޫން
އަޑަކުން : ދެން އޮތީ ދެ ގޮތެއް އެއްގޮތަކީ ކަލޭ އަމިއްލައަށް ދަންޖެހިގެން މަރުވުން އެހެންނޫނީ މުޅި ދުނިޔެއަށް ކަލޭ ފަލީހަތްވުން ފޮލިހުން އަންނާނެ ދިހަ މިނެޓްތެރޭ

ޒިޔާދު ވަރަށް ބޮޑަށް ހާސްވިއެވެ. އަދި ދެކޮޅަށް ތެޅެންފެށިއެވެ. އޭނާ ފަލީހަތްވާން އޭނާ ބޭނުމެއްނުވިއެވެ. އޭނާ އަތުން އޭނާ ލޯބިވެރިޔާވަނީ މަރުވެފައެވެ. ބޯ ހާސްވެފާއިން ޒިޔާދުއަށް ބިންމަތީގަ އޮތް ބޮޑު ފޮތިގަނޑެއް ފެނުނެވެ. އެ ފޮތިގަނޑު ފަންކާގަ އެއްސުމަށްފަހު އޭނާ ކަރުގާ އަވަސްއަވަހަށް ފޮތިގަނޑުން މަޅިއެއްހަދާ ބާރަށް އައްސާލުމަށްފަހު ގޮނޑިއެއް ގެނެސް އޭގެ މައްޗަށް އެރިއެވެ. އެންމެ ފަހު ފަހަރަށް މުޅި ތަނަށް ނަޒަރު ހިނގާލުމަށްފަހު ޒިޔާދު ހުރި ގޮނޑިން އޭނާ ފުންމާލިއެވެ. މަރަށް ތެޅިތެޅި އޮތް ޒިޔާދުއަށް ފެނިގެންދިޔައީ ދޮރުން މީހަކު ވަދެގެން އައިތަނެވެ. އެއީ ޒިޔާދު އެންމެ ފުރުތަމަ ރައްޓެހިވި އާތިފާ ސައީދުގެ ބޭބެކަމަށްވާ ހުސިން އަހްމަދްއެވެ. އޭނާ އައިސް ޒިޔާދު ފައިދަށަށް ގޮނޑި އަލުން ލިޔެވެ. އެއަށްފަހު ހިނިތުންވެލިއެވެ. ހުސިން އަހްމަދު ފަހަތުން ހަތަރު ފުލުހުންވެސްވަނެވެ. އަދި ވަގުތުން ޒިޔާދު ހައްޔަރުކުރިއެވެ.

ތަހްގީގްކުރާ ކޮޓަރީގަ ހުސިން ދިޔައީ ޒިޔާދުއާ ފުލުފުލުން ސުވާލުތައްރަމުންނެވެ. އަދި ކަން ހިނގާ ދިޔަގޮތް ކިޔާދިނުމަށް އަމުރުކުރިއެވެ. ޒިޔާދު އޭނާއަށް ދެވުނު އެންމެ ފުރިހަމަ ގޮތަކަށް ޖަވާބުދިނެވެ. ޒިޔާދުގެ ވާހަކަތައް ނިމުމުން ބޭރުގާ ހުރި ފުލުހަކަށް ހުސިން އިޝާރާތްކޮށްލިއެވެ. އެއާއެކު ކޮތަޅަކަށް ލާފަވާ ޓޭޕް ރިކޯޑަރެއް ހިފައިގެން އެމީހަކުވަނެވެ. ޓޭޕް ރިކޯޑަރު މޭޒުމަތީ ބޭނދުމަށްފަހު އޭތީގަވާ ޓޭޕް ޕްލޭކޮށްލިއެވެ. އޭގާވަނީ ސުޒާނާ ރޭޕްކުރިކަމަށް ޒިޔާދު އެއްބަސްވެފާވާކަމެވެ.

ހުސިން : ޒިޔާދު ކަލޭ ގަދަކަމުން ބަދްއަޙްލާގީ އަމްލް ހިނގިކަމާ އަދި އެއަށްފަހު އެކުއްޖާ އެކަން ފަލީހަތްކޮށްފާނެތީ ކަލޭ އޭނާ މަރާލީކަން މިއޮތީ އެނގިފަ
ޒިޔާދު : މަށެއްނޫން
ހުސިން : ފައިލްއެއްނަގާ މޭޒުމައްޗަށް އެއްލާފަ. އަހަރެންނަކީ ފޮރެންސިކް އެންމެ މަތީ އެކަކު އަދި އަހަރެންނަކީ މިތަނުގެ އެންމެ އިސް މީހާ ތިޔަ ފައިލްގަވަނީ ކަލޭގެ ޑީއެންއޭ ދިމާވާކަމަށް (އިތުރު ގަނޑެއް ނަގާފަ) މިއީ ކަލޭގެ ޔޫރިން ޓެސްޓް ކަލޭ މަސްތުވާ ތަކެތި ބޭނުން ކުރިކަން އެބަހުރި އެނގެން އަދި އިތުރު ހެކި ދައްކަންވީތަ ކެމެރާއިން

ތަހްގީގް ކުރާ ކޮޓަރީގަ އިން ޓީވިން ހުސިން ސެކިއުރިޓީ ކެމެރާއިން ނެގިފާހުރި މަންޒަރުތައް ދައްކާލިއެވެ. އޭގެން ފެންނަނީ މަސްތުގެ ހާލުގާހުރި ޒިޔާދުގޮސް ސުޒާނާމެންގޭ ދޮރުމަތީ މަޑުކޮށްގެންހުރި އޭނާގެ އެންމެ ގާތް އެކުވެރިޔާ ހަމިއްޓެ ގޮވައިގެން އެގެޔަށް ވަންނަތަނެވެ. އޭގެ އެއްގަޑިއިރުފަހު ސުޒާނާ ގެއަށް އައިސް ވަންނަތަން ކެމެރާއަށް އަރާފައިދެއެވެ.

ކުއްލިޔަކަށް ކަންތައް ހިނގާ ދިޔަގޮތް ޒިޔާދު ލޯމައްޗަށް ފެނިގެންދާންފެށިއެވެ.

ޒިޔާދުއާ ހަމިއްޓެ ސުޒާނާމެންގޭ ސިޓިންގްރޫމްގަ
=======================
ޒިޔާދު : ކޮބާ ނޫސްވެރިކަން ކިހިނެއްދަނީ
ހަމިއްޓެ : ރަނގަޅު ބުރޯ
ޒިޔާދު : ކޮބާ ކަލޭ ގެންގުޅޭ ބާ ޓޭޕް ރިކޯޑަރުގަނޑު
ހަމިއްޓެ : އެ ހިފާނެއްނު ދެން އަބަދުވެސް އުޅޭނީ
ޒިޔާދު : ހޫނ މަށަށް ތިކަން އެނގޭ
ހަމިއްޓެ : ބުރޯ ކިހިނެއް މިރޭ ހަދާނީ އެމަންޖެއަށް
ޒިޔާދު : ހަމަ ރޭޕް
ހަމިއްޓެ : އެމަންޖެ އަންނާނެ ގަޑިޔެއްވެސް ނޭނގޭނު
ޒިޔާދު : އަންނަންދެން ކަމެއް ކުރީމަ ވީނު
ހަމިއްޓެ : (ޖީބުން މަސްތުވާތަކެތި ނަގާފަ) މިއީ އެންމެ ފަހުގެ. ވަރަށް ބާރުގަދަވާނެ މީހާއަށް އެކި ގޮތްގޮތްވާނެ ބައެއްފަހަރު މީހަކު ވާހަކަދައްކާހެންވެސް ހީވާނެ. ރީއްޗަށް ބުނާނަމަ ހެލޫސަނޭޝަންސް ފެނުން އެކަށީގެންވޭ. ރަނގަޅުވާނީ އިހަށް އައްސައިގެން މި ޓެސްޓްކުރިއްޔާ
ޒިޔާދު : އޯކޭ.. މަމީ ކަލޭގެ ހޮސްޓެޖްއެއް. އަވަސްކުރޭ
ހަމިއްޓެ : (ގުޅަތައް ފެންތައްޓަކަށް އަޅަ ގިރުވާލާފަ) އަން
ޒިޔާދު : ދެން ކޮށްބަލަ ހޮސްޓެޖުންނާ ކުރާކަހަލަ ސުވާލުތައް. ޓޭޕް ރިކޯޑަރުގަނޑު ޖައްސާތި
ހަމިއްޓެ : (އެތައް އިރަކަށްފަހު އެންމެ ފަހު ސުވާލަކަށް ޓޭޕްރިކޯޑަރު ޖައްސާލަމުން) އާނ ސުޒާނާ… 2018 ޖެނުއަރީ ފަހެއް. ކަލޭ އޭނާގެ ހިތް އަތުލަން މަސައްކަތްފެށިދުވަސް ބަރާބަރު ދެ މަސްތެރޭ އެތައް އާދޭހެއްކޮށްގެން އޭނާގެ ހިތްއަތުލާފި. ނަމަވެސް ސުޒާނާއަކީވެސް ބަލިކުއްޖެއް އެހެންނޫންތަ؟ މެޑިކަލް ރިކޯޑް ދައްކާގޮތުން އޭނާގެ ހިތުގަ ލޯވަޅެއް އިނދޭ. މީގެ ހަފްތާއެއްކުރިންނެއްނު ކަލޭ އޭނާ ކައިރި އިންނަންއެހީ. އެހުމަށްފަހު ނާޖައިޒްފައިދާ ނަގަން މަސައްކަތްކުރުމުން އެކުއްޖާ ކަލޭ ކައިރިން ސަލާމަތްވާން މަސައްކަތްކުރީ ނަމަވެސް ކަލޭ އޭނާ އިއްފަތް ނަގާލީމެއްނު. ގަދަކަމުން ބެހުނީމެއްނު. އެއީވެސް އިތުރަށް ކަލެޔަށް ހިތްޖައްސަން ކުރުވިކަމެއްނު. މިއީ ދޮގެއްތަ؟
ޒިޔާދު : ނޫން. އަހަރެން އެއްބަސްވަން.

ބާރުގަދަ މަސްތުވާތަކެތީގެ ސަބަބުން ޒިޔާދު ކޮންޓްރޯލުން ނެއްޓިއެވެ. އައްސާފަ އިން ގޮނޑިން ވާގަނޑުތައް ނައްޓާލުމަށްފަހު ހަމިއްޓެއަށް ހަމަލާދެމުންގޮސް އޭނާގެ ބަނޑަށް ބިއްލޫރި ފުޅިއެއް ތަޅާލުމަށްފަހު ހަރާލިއެވެ. އަދި ހަމިއްޓެ މަރާލުމަށްފަހު ގޮސް ގޮނޑީގަ އިށީންދް ގަދަޔަށް ހޮޑުލިޔެވެ. އެއަށްފަހު މީހަކު އަންނަ އަޑު އިވިގެން އަނެއްކާވެސް ހަމަލާދޭން ތައްޔާރުވިއެވެ. ދޮރު ހުޅުވާފަވަތް ސުޒާނާގެ ކަރަށް ދުވެފަ އައިސް ތަޅާލާފަވާ ފުޅި ހަރާލިތަނުން ޒިޔާދުއަށް ހޭވެރިކަންވީކަން އޭނާ ހަނދާނަށްއައެވެ.
===============================
އިތުރު ގޮތެއްނެތި ތަހްގީގަށް އެއްބަރުލުންދިނެވެ. ދެމީހުންގެ ގާތިލް ޒިޔާދު އުމުރަށް ޖަލަށް ލެވިގެން ދިޔައެވެ. ފަސްއަހަރު ފަހުން އިވިގެން ދިޔައީ ޒިޔާދުއަށް ކުރެވުނު ކަންތަކާހެދި ކެތްނުވެގެން އަމިއްލައަށް ދަންޖެހިގެން މަރުވި ޙަބަރެވެ.

ކޮންމެ އިންސާނަކީވެސް ބަލިވާނެ މީހެކެވެ. ކުޑަ ނުވަތަ ބޮޑު ބައްޔެއްވުމީ އަބަދުވެސް ގާތްކަމެކެވެ. އެހެނެއްކަމަކު ބަލިވިޔަސް ބަލި މީހެކޭ ކިޔާފައި ކަރު އެލުވާލައިގެން ހުންނާކަށް ނުޖެހެއެވެ. އޮތީ ފަރުވާ ހޯދުން ކުރެވުނުހާ ހިތްވަރެއްކުރާށެވެ.

އެއީ މީގެ އަހަރުތަކެއްކުރިޔެވެ. އަހަރެން ބޮޑު ބަލިމަޑުކަމަކާ ކުރިމަތިލާން ޖެހުނު ދުވަސްވަރެވެ. ލޭގެ ޕްރެޝަރު ހުރީ 190 ގައެވެ. އެދުވަސްވަރު އަބަދުވެސް އުޅެންޖެހެނީ ބޮލަށް ތަދުވެ ބޯ އަނބުރާ ވަރުބަލިވާތީއެވެ. އަވަސް އަވަހަށް ރުޅިވެސް ގަދަވެއެވެ. މަސައްކަތުގެ މާހައުލުގެ ޕްރެޝަރާ އެކަނި އުޅެން ޖެހުމުގެ ބުރަކަމުގެ ސަބަބުން ސިކުނޑިއަށް ހިލާ އެއްވެސް އަރާމެއް ނުލިބެއެވެ. ޑޮކްޓަރުގެ އެތައް އިންޒާރަކަށްފަހު ކުޑަ ސްޓްރޯކެއް އަހަރެންނަށް ޖެހުނުކަން އެނގުނީ އެއްރެޔަކު ބައި ގަޑިއިރަށް އަހަރެންގެ އެއްފަޅި މަސައްކަތްނުކުރާންފެށުމުންނެވެ. ފުރުތަމަ ތުންފަތުގެ އެއްފަޅި ވާގިނެތުނެވެ. އެއަށްފަހު އަތް ހިއްލާވެސް ނުލެވެއެވެ. އަދި ފިޔަވަޅު އަޅަންވެސް އުނދަގުވިއެވެ. ސިޑިން ފައިބަން އުޅެނިކޮއް ނުވެއްޓުނީ ހަމަ ކިރިޔާއެވެ. މިކަންތައް ދިމާވެ ރަނގަޅުވުމުން އަހަރެން އަވަހަށް ޑޮކްޓަރަށް އެޕޮއިންޓްމެންޓްއެއްހަދާ ދެއްކީމެވެ. ނަމަވެސް ޑޮކްޓަރު ހިތްވަރު ދިނުމުގެ ބަދަލުގައި އަހަރެންގެ ހިތް މަރާލީއެވެ. އޭނާ ބުނީ އަހަރެންނަށް ސްޓްރޯކެއް ޖެހުނުކަމެވެ. އެކަމު އިތުރަށް ކަމާ ނުގުޅޭ އެތައް އެއްޗެއް ކިޔެވެ. އެގޮތުން ކިޑްނީ ފެއިލްވާނެކަމާ ދެލޯވެސް އަނދިރިވާނެކަމެވެ. މިހެން ކިޔާ އެތައް ޓެސްޓްއެއް ހަދުވާ ބޭސް ފުންޏެއްދިނެވެ.

ގެޔަށް ގޮސް ތަރުތީބުން ބޭސްކާންފެށިމެވެ. ނަމަވެސް އެއްވެސް ހައްލެއް މިކަމުން ނުލިބުނެވެ. އިތުރު އެހެން ޑޮކްޓަރަކަށް ދެއްކުމުގެ ކުރިޔަށް ހިޖާމަވެސް ޖެހީމެވެ. ހިޖާމަ ޖެހުމުން ވަރަށް ބޮޑު ލުއިކަމެއް ބޮލަށް ލިބިގެން ދިޔައެވެ. އެޔަށްފަހު ދެވަނަ ޑޮކްޓަރަކާ އެޕޮއިންޓްމެންޓް ހެއްދީމެވެ. އޭނާ ކަމުގެ ހަގީގަތް ވަރަށް ރީތިކޮއް ކިޔާދިނެވެ. ކުރިޔަށް އޮތްތާ ވަރަށް ބަލައިގެން އުޅެން ނަސޭހަތްދިނެވެ. ކަސްރަތުކޮއް ކެއުމަށް ބަލައިގެން އުޅެން އެންގިއެވެ. އަދި އެޔަށްފަހު އަހަރެންގެ ފައިލްގެ ރިޕޯޓްތައްނަގާ އޭނާ ބެލުމަށްފަހު ބޭސްފުނި ކެއުން ވަގުތުން ހުއްޓާލަން އެންގިއެވެ. ދީފައި ހުރީ މުޅިންވެސް ކަމާ ނުގުޅޭ ބޭސްކަން ބުނުމަށްފަހު އެންމެ ދެ ބޭސް ލިޔެލާފައިދިނެވެ. އަދި ބޭސް ހުސްވުމުން ޓެސްޓްތައް ހަދައިގެން އައުމަށް އެންގިއެވެ.

އަހަރެންގެ މަސައްކަތްފެށީ އުންމީދާއެކުއެވެ. ދުވަން ދާން ފެށިމެވެ. ފުރުތަމަރޭ ޓްރެކްދަނޑުގެ އެއްފަޅިވެސް ނުދުވެވުނެވެ. ހަމަ ހިނގިއްޔެވެ. ނަމަވެސް މަސްދުވަހު ގަވައިދުން ދާންފެށުމުން ޓްރެކްދަނޑު ވަށާ ނުހުއްޓި ދުވެފައި ތިންބުރު ޖެހެއެވެ. އަހަރެން ކެއުމަށް ބަދަލް ގެނައިމެވެ. ތަރުކާރީ ކާން ފެށީމެވެ. ރޮށީގެ ބަދަލް ޕާން އަދި ޖޫސް ބޭނުން ކުރަންފެށީމެވެ. އާއްމުކޮއް ބޭނުންކުރަނީ ބްރައުން ބްރެޑްއެވެ. ކޮފީ ބުއިން ހުއްޓާލީމެވެ. ސަބަބަކީ ކެފެއިންއަކީ ވަރަށް ނުރައްކާ އެއްޗަކަށްވާތީއެވެ. ކަޅު ސައިވެސް ހުއްޓާލީމެވެ. ގިނައިން މޭވާގެ ބާވަތްތައް ބޭނުންކޮއް ގިނައިން ފެންބުއިން އާދަކުރީމެވެ.

ދެވަނަ މަސް ނިމުނުއިރު އަހަރެންނަށް ނުހުއްޓި ޓްރެކްދަނޑު ވަށާ ހަ ބުރު ޖެހެއެވެ. ދެވަނަމަހު ކަސްރަތު އިތުރަށް ފުޅާ ކުރުމުގެ ގޮތުން މޫދަށް ދާންފެށީމެވެ. ކޮންމެ ދުވަހަކު ދުވެ ނިންމާފައި މޫދަށްދަމެވެ. ސައިކަލްގައި ކައިރި ތަންތަނަށް ނުގޮސް ހިނގާފައި އުޅުން އާދަކުރީމެވެ. ތާޒާ ވައި ޖައްސާލަން އަބަދުވެސް އަތިރިމަތީގައި ރޭގަނޑު ވަގުތުތައް ހޭދަކޮއްލީމެވެ. އަހަރެންނަށް އަހަރެންގެ ބަރުދަންވެސް ލުއިވާހެން ހީވެއްޖެއެވެ. މިގޮތުން ބަރުދަން ބެލިއިރު 89 ގައި ހުރި ބަރުދަން 80 އަށް ހުރީ ވެއްޓިފައެވެ. ވަރަށްވެސް އުފާވިއެވެ. އަދި ހިތްވަރު އެލުވާނުލާ ކުރިޔަށްދާން ނިންމީމެވެ.

ތިންވަނަ މަސް ނިމުނުއިރު ޓްރެކްދަނޑު ވަށާ އަހަރެންނަށް ނުހުއްޓި 10 ބުރު ޖެހެއެވެ. ކުރީގަ ހުންނަ ނޭވާ ކުރުވުންވެސް ރަނގަޅުވެއްޖެއެވެ. ބޭސް ހުސްވުމުން ޑޮކްޓަރު ބުނި ޓެސްޓްތައް ހަދައިގެން އަހަރެން ދިޔައީމެވެ. ނުކަނޑާއޮތް ރިޕޯޓް ޑޮކްޓަރު އަތަށް ދިއްކޮއްލުމަށްފަހު ނޭވާ ހިފަހައްޓާލައިގެން އިންދާ ޑޮކްޓަރު ވަރަށް ހިނިތުންވެލާފައި އަހަރެންގެ ނަތީޖާ ވަރަށް ރަނގަޅު ވާހަކަ ބުނެލިއެވެ. އަދި އެއަށްފަހު ލޭގެ ފްރެޝާރު ބެލިއެވެ. 190 ގައި ހުރި ލޭގެ ޕްރެޝަރު މިހާރު ހުރީ 130 ގައެވެ. މިކަމާ އަހަރެން ވަރަށް އުފާވިއެވެ. އަދި ޑޮކްޓަރު ކައިރިން ނުކުމެގެން ގޮސް މިސްކިތައް އަރާ މާތް ﷲ އަށް ޝުކުރުގެ ސަޖިދަކުރީމެވެ. ކޮންމެ ކަމަކީވެސް ހިތްވަރު ކޮއް ކެތްތެރިވުމުން ހައްލުވާނެ ކަންތަކެވެ. ބަލި މީހެކޭ ކިޔާފަ މިއަދު އަހަރެން އޮތްނަމަ އެއްވެސް ހައްލެއް އަހަރެންނަކަށް ނުލިބުނީހެވެ.

– ނިމުނީ –

ލޮބުވެތި ކިޔުންތެރިންނޭވެ. އަޅުގަނޑުމެނަށް ކިތަންމެ ޑޮކްޓަރަކަށްވެސް ދެއްކިދާނެއެވެ. އަދި ކަސްރަތު ކޮއް ހަށިގަނޑުވެސް ވަރުގަދަ ކުރެވިދާނެއެވެ. ނަމަވެސް ވިސްނާލަން ޖެހޭ އެއްޗަކީ ކޮންމެ ކަމަކަށްވެސް ޝިފާ ދެއްވާނީ މާތް ﷲ އެވެ. ވީމާ ނަމާދު ނާޅާ އެއްވެސް ކަމެއް ނުކުރާށެވެ. އިންސާނާއަށް އޮތް އެންމެ ބޮޑު ފަރުވާއަކީ ނަމާދެވެ.