ނުވަ މަސްދުވަހުގެ ގަދަވޭނަށްފަހު ތިބާ މިދުނިޔެއަށް ގެނުވާ މީހަކީ ތިބާގެ މަންމައެވެ. އެ މަންމައަކީ މިއަދު ނިކަމެއްޗަކަށް ނުވަތަ މުއްސަންޖަކަށްވެސް ވެދާނެއެވެ. ނަމަވެސް އެ މަންމަ ތިބާއަށްޓަކައި ވާ ގުރުބަނީއަކީ ތިބާއަށް ދުވަހަކުވެސް އަދާ ނުކޮއްދެވޭނެ އެއްޗެކެވެ.

ރުހާމްއަކީ އޭނާގެ މަންމަގެ ހަމައެކަނި ހުރި ދަރިއެވެ. ރުހާމްގެ ބައްޕަވަނީ ވަރަށް ކުޑައިރު ދުނިޔެ ދޫކޮއްފައެވެ. ރުހާމްގެ މަންމައަކީ އެހާ ފޯރުންތެރި މީހެއްނޫންކަމުން ދިރިއުޅުން ހުރީ ވަރަށް ދަތިކޮއްށެވެ. މަންމައަކީ ފަހާ މީހެއްކަމުން ބައެއްފަހަރު ލިބޭ އާމްދަނީ ކުޑައެވެ. ގިނަފަހަރު މީހުން މަންމަ ލައްވާ މަސައްކަތްކުރުވާފައި ފަހުން ލާރި ދޭނަމޭކިޔާފަ ނުދެއެވެ. މިކަން ރުހާމް ދިޔައީ ގާތުން ބަލަމުންނެވެ. އަދި ކެތްތެރިކަމާއެކު މަންމަ ހޯދި އެއްޗަކުން ބަނޑު ފުރައިގެން ކިޔަވަން ގަދައަޅާ މަސައްކަތްފެށިއެވެ.

ސްކޫލްދައުރު ނިމި ރުހާމް ނަތީޖާ ގެނެސް މަންމަ އަތަށްދިނެވެ. މަންމަ ހިނިތުންވެފައި ރުހާމްގެ ބޮލުގައި ފިރުމާލިއެވެ. ރަނގަޅު ވަނަތައް ހާސިލްކުރެވުނީތީ ރުހާމްވެސް ހުރީ ވަރަށް އުފާވެފައެވެ. ދުވަސްކޮޅަކު އަރާމްކޮއްލުމަށްފަހު ވަޒީފާއެއް ހޯދަން ރުހާމް ނުކުތެވެ. ވަޒީފާ ލިބުނީ ފޯނު ވިއްކާ ފިހާރައަކުންނެވެ. މެދު މިނެއްގެ އުޖޫރައަކާއެކުއެވެ. ކޮންމެ މަހަކުވެސް މަންމަ އަތަށް ލާރި ފޮރުވަންދެއެވެ. އަދި ރުހާމް އަމިއްލަ ކަންކަމު ބޭނުންކޮއްލާވަރަށް ޖީބުގައި ފައިސާ ބަހައްޓައެވެ. ރުހާމްގެ މަސައްކަތް ރަނގަޅުކަމުން ގިނަދުވަހެއްނުވެ ފޯނު ފިހާރައިގެ މެނޭޖަރު މަގާމްއަށް ބަދަލްކުރެވުނެވެ. ލިބެމުން އައި އުޖޫރަވެސް ބޮޑުވިއެވެ. ފުރުތަމަ ކަމަކަށް މަންމައަށް ގަނެދިނީ ފޯނެކެވެ. ރުހާމް ކިތަންމެ ދުރުގައި ހުއްޓަސް މަންމަގެ ކަންތައް ބަލަން ބޭނުންވާތީއެވެ. މަންމައާ ފޯނު ހަވާލުކޮއް އެއާ ކުޅެން ދަސްކޮއްދިނެވެ.

އެއްދުވަހެއްގެ ހެނދުނެވެ. ރުހާމް ފިހާރައަށް ދިޔުމުން ވެރިމީހާ ރުހާމްއާ ބައްދަލްކުރިއެވެ. އަދި ފިހާރައިގެ ބަދަލުގައި އޮފީހުގައި މަސައްކަތްކުރަން މީގެފަހުން އައުމަށް އެންގިއެވެ. މިކަމާ ރުހާމް ވަރަށް އުފާކުރިއެވެ. އަދި މަންމައަށް ޙަބަރުދިނެވެ. މިހާރު ރުހާމްއަށް ރަނގަޅު އާމްދަނީއެއްލިބި އިތުރަށްވެސް ލިބެއެވެ. މި ފައިސާއިން ރުހާމް އިތުރަށް ކިޔަވަން ބޭނުންވާ ވާހަކަ މަންމަ ކައިރީ ބުނިއެވެ. މަންމަ އެކަމަށް ހިތްވަރުލާދިނެވެ. އަދި ކުރިޔަށް ދެވެންއޮތީޔާ ދާން ނަސޭހަތްދިނެވެ.

ރުހާމްގެ ކިޔެވުން ފެށިއްޖެއެވެ. ގެއަށް އާދެވުމުން މަންމަ ކައިރީ އަބަދުވެސް ކިޔަވާ ތަކެތި އުދަނގޫ ކަމުގެ ޝަކުވާ އުފުއްލައެވެ. ނަމަވެސް މަންމަ ހިނިތުންވެލާފައި ބުނަނީ އަބަދުވެސް އެކައްޗެކެވެ. ދަރިފުޅާ ކުރިޔަށް ދާށެވެ. މަންމަ މިހުރީ ހިތްވަރު ދޭންށެވެ. ރެޔާ ދުވާލު ރުހާމް ކުރަމުން ދިޔަ ބުރަ މަސައްކަތުގައި މަންމަވެސް ދިޔައީ ބައިވެރިވަމުންނެވެ. ދަރިފުޅު ފާސްވެގެން އަންނާނެ ދުވަހެއްގެ އިންތިޒާރުގައެވެ. އިމްތިހާންވެސް އައިސް ނިމިއްޖެއެވެ. ސެޓްފިކެޓް ބަލާ ދާން އޮތްދުވަހު ރުހާމްއާއެކު މަންމަވެސް ދިޔައެވެ. ފަޙްރުވެރިކަމާއެކު ދެމައިން ގެއަށްއައީ އުފާވެރި މޫނަކައިގެންނެވެ.

ކިޔަވާ ނިމުމުން ރުހާމް އާ ވަޒީފާއަކަށްވަނެވެ. ވަޒީފާގެ މާހައުލުން ދިމާވި ކުއްޖަކާ ލޯބީގެ ގޮތުން ގުޅި ކައިވެނިވެސް ކުރެވިއްޖެއެވެ. ނަމަވެސް އަލަތު އަނބިމީހާ މަންމައާމެދު އެހާބޮޑު ސަމާލުކަމެއް ނުބަހައްޓާކަން ރުހާމްއަށް ފާހަގަވިޔެވެ. މަންމަ ސައިހެދިޔަސް ސައިނުބޮއެ ބޮޑާ ހާކައިގެން ބޭރުން ކާން އަބަދުހެންމެ މަސައްކަތް ކުރެއެވެ. މަންމަ ބަލިވެއްޖެނަމަ އަޅާލަނީކީނޫނެވެ. އެންމެ ކުޑަމިނުން ބޭހެއްވެސް ދެނީކީނޫނެވެ. މިގޮތުގައި ދުވަސްތައް ދަނިކޮއް އެއްރެޔަކު ރުހާމް ކައިރީ އޭނާ އަނބިމީހާ މަންމައާ ވަކިން އެހެންތަނަކަށް ދިރިއުޅުން ބަދަލްކުރަން ބުނެލިއެވެ. މި ބަސްތައް ވެގެން ދިޔައީ ރުހާމް ގާތަށް ނުހަނު ރުޅިއައި ބަސްތަކަކަށްށެވެ. ހިތުގައި ފޮރުވިފައިވާ ހުރިހާ އެއްޗެއް އަނބިމީހާއާ ދިމާލަށް ބޭރުކޮއްލިއެވެ. އަދި އަނބިމީހާގެ އެންމެ ބޮޑު ސިއްރުވެސް ރުހާމް ބޭރުކޮއްލިއެވެ. ރުހާމް ނެތްގަޑީ މަންމައަށް އަނީޔާކުރިކަމެވެ. އެ މަންމަ ނުބުންޏަސް ގޭގައި ހަރުކޮއްފައި ހުންނަ ކެމެރާތަކުން ނެގިފައިވާ ވީޑިޔޯ ލޯމައްޗަށް ދައްކާލިއެވެ. އިސާހިތަކު އަނބިމީހާ އެގެއިން ނުކުމެގެން ދިޔައީ ރުހާމްގެ މަންމައާ ދިމާލަށް ހެއްދެވި ނެހެއްދެވިއެއް ގޮވަމުންނެވެ. ރައްދުގައި ރުހާމްވެސް ވަކި ދުލެއްނުދިނެވެ. ޖެހިގެން އައި ދުވަހު އަނބިމީހާ ވަރިކޮއްފިއެވެ.

ރުހާމްގެ އެކަނިވެރިކަމާ މާޔޫސްކަން އޭނާގެ މަންމަގެ ހިތަށް ދިޔައީ ނެގެމުންނެވެ. ރަނގަޅު ބައިވެރިޔަކު ދަރިފުޅަށްޓަކައި ހޯދާދިނުމަށް މަންމަ މަސައްކަތްފެށިއެވެ. ދީންވެރި ރަނގަޅު ކުއްޖަކު ހޯދާ ރުހާމްއަށް ގުޅުވިއެވެ. ކަންވެގެން ދިޔައީ ހީވެސް ނުކުރާ ގޮތަށްށެވެ. ގިނަ ދުވަސްތަކެއްނުވެ ކައިވެނިކުރެވިއްޖެއެވެ. އަދި މާމާ ދަރިއަކުވެސް ލިބިއްޖެއެވެ. ނަމަވެސް މާމަ ދަރި ލިބުންތާ ގިނަދުވަހެއްނުވެ މަންމަ ވަރަށް ބޮޑަށް ބަލިވެއްޖެއެވެ. ހޮސްޕިޓަލްގައި މަންމަ ކައިރީ ގިނަވަގުތު ހޭދަކުރަނީ ރުހާމްއެވެ. މިގޮތުން އެއްރެޔެއްގެ ފަތިހު މަންމަ ރުހާމްއަށް ގޮވާލިއެވެ. މަންމަ ރުހާމް ބޮލުގައި އަތުން ފިރުމަންފެށިއެވެ. އަދި ބުނަންފެށިއެވެ.

” އޭ މަގޭ ލޯބިވާ ދަރިފުޅާއެވެ. ދަރިފުޅު މިއަދު ތިޔަވަނީ އުފާވެރި ދިރިއުޅުމެއް ލިބިފައެވެ. ދެކުދިންވެސް ރަނގަޅަށް އުޅޭތި. މަންމަ ވަރަށް ލޯބިވޭ ތި ދެކުދިންދެކެ. ލޯބިވާ ދަރިފުޅާ. މިއަދު އަހަރެންގެ ހިތްރުހުން ތި ދަރިފުޅަށް ދީފިން ތިޔައީ އަހަރެންގެ ފައިތިލަދަށުން ސުވަރުގެ ވަންނާނެ ދަރިޔެއް. މިއަދު ދަރިފުޅަށް ތިހިސާބަށް އާދެވިފައި ތިހުރީ މަންމަގެ ދުއާއިން. މަންމަ ދުވަހަކުވެސް ދުއާކުރުން ހުއްޓައެއްނުލަން. ދަރިފުޅާ މަންމަގެ ވަގުތު އައިސް ޖެހިއްޖެ. މަންމަ…. ބަލާ،،،،،، އައިސް…….. އެބަހުރި…… لَا إِلٰهَ إِلَّا ٱلله ” އެހިނދު މަންމަގެ އޯގާތެރި ފިރުމަމުންދިޔަ އަތް އެނދުމައްޗަށް ވެއްޓިިޖެއެވެ. إِنَّا لِلّهِ وَإِنَّـا إِلَيْهِ رَاجِعونَ

– ނިމުނީ –

ޒަމާނަށް އަންނަ ބަދަލާއެއްކޮއް އެތައް ކަމެއް މިއަދުވަނީ ފަސޭހަވެގެން ގޮސްފައެވެ. ކިތަންމެ ދުރުގައި ހުރި މީހަކަށްވެސް ސިކުންތެއް ތެރޭގައި މިހާރު ގުޅާލެވެއެވެ. އަދި ހަމައެކަނި ގުޅާލުމަކުން ނިމުނީކީނޫނެވެ. ބޭނުންވާ ކަމެއް ސިއްރިއްޔާތުގައި ބުނެލުމުގެ ގާބިލްކަން މިއަދު ވަނީ އިންސާނުންނަށް ލިބިފައެވެ. މެސެޖްގެ ޒަރިއްޔާއިންވެސް އެ ބޭނުންވާކަމެއް ބައެއްގެ ތެރޭގައި ހާމަ ކުރަން ބޭނުންނުވާނަމަ ބުނެލެވެއެވެ.

ރޫމާއަކީ އާއިލާއެއްގައި ހުރި ހަމައެކަނި އަންހެންކުއްޖާއެވެ. މައިން ބަފައިންގެ ލޯބި އެންމެ ގަދައަށް ލިބެމުން އަންނަ ކުއްޖާއެވެ. ރޫމާ ބުނި އެއްޗެއް ލަހެއް ފަހެއް ނުކޮއް އޭނާ މައިންބަފައިން ހޯދާދެނީ އޭނާ ކިޔެވުމަށްވެސް މޮޅުވެ ފަރުވާ ބަހައްޓާތީއެވެ. ރޫމާގެ ރަހްމަތްތެރިންވެސް ފިސާރެ ގުނައެވެ. އަންހެން އަދި ފިރިހެންވެސް ގުނާ އަދަދު ނުކުރެވެއެވެ. ކޮންމެ މީހެއްގެ ސިއްރެއް އޮވެއްޖެނަމަ ރޫމާއަށް ކިޔާދެއެވެ. ސަބަބަކީ ރޫމާއަކީ މީހުން ފަލީހަތްކުރާ މީހުން ބޭޒާރުކުރާ ކުއްޖަކަށްނުވާތީއެވެ. ރޫމާއާ ރައްޓެހިވާން އެތައް ކުދިންނެއް އެކި ގޮތްގޮތަށްވަނީ މަސައްކަތްކޮއްފައެވެ. ނަމަވެސް ރޫމާ އެކަމާ އަބަދުވެސް އިދިކޮޅުހަދައެވެ. ރޫމާއަށް ކަމުދާ މީހަކު ފެންނަންދެން އޭނާ މަޑުކުރަނީ ސަބަބެއް އޮވެގެންނެވެ.

ސްކޫލް ނިމުމުން ހުރިހާ ކުދިން ވަކިވުމުގެ ކުރިން ދަތުރެއްދާން ނިންމިއެވެ. މިދަތުރުގައި ރޫމާވެސް ބައިވެރިވިއެވެ. ވިލިމާލެއަށްގޮސް ބާބަކިއުހަދާ އެންމެ މޫދަށްއެރި ސަކަރާތުގައި އުޅުނެވެ. ނަމަވެސް ރޫމާ މޫދަށް ނޭރި އަތިރިމަތީ ދެފައި ވައްކޮއްލައިގެން އިންދެ ދިޔައީ ފޮޓޯ ނަގަމުންނެވެ. ކުއްލިއަކަށް ރޫމާ ސިއްސައިގެން ދިޔައީ ބޯޅައެއް އައިސް ރޫމާ ބުރަކަށީގައި ޖެހުމުންނެވެ. ފަހަތަށް އެނބުރި ބޯޅަ ނަގައި ވެރިފަރާތެއް ފެނޭތޯ ހުއްޓާ ޒުވާނަކު ދުވަމުން އަތްހޫރުވަމުން އައިތަން ފެނުނެވެ. އެއީ ރޫމާ ދުވަހަކުވެސް ދެކިފައިނުވާފަދަ ރީތި ޒުވާނެކެވެ. އިސްތަށިގަނޑު ދިގު ދޮންހަމެއް ލިބިފައިވާ ޒުވާނާ އައިގޮތަށް އައިސް ފުރުތަމަވެސް އެދުނީ މައާޕްއަށްށެވެ. އަދި ބޯޅަ ރޫމާ އަތުން ނަގަން އުޅުމުން ރޫމާ އިސްވެ އެޒުވާނާއާ ވާހަކަ ދެއްކިއެވެ. އަދި އަމިއްލައަށް ތައާރަފްވުމުން އެޒުވާނާވެސް ތައާރަފްވިއެވެ. އެޒުވާނާގެ ނަމަކީ ސާމީކަމަށް ބުނިއެވެ. ރޫމާ އަތުން ބޯޅަ ހޯދައިގެން އެޒުވާނާ ގޮސް ލޮލުކޮޅަށް ގެއްލުމުގެ ކުރިން ރޫމާ ވަގުވަގަށް އެ ޒުވާނާގެ ފޮޓޯއެއް ނަގާލިއެވެ.

ދަތުރު ނިންމާފައި އައިސް ގެއަށްވަދެ ފެންވާރަލައިގެން ރޫމާ އެނދުމައްޗަށް ވެއްޓިގަނެ ދަތުރު ފޮޓޯތައް ބަލަމުން ގޮސް ސާމީގެ ފޮޓޯ ފެނުނެވެ. އަދި ސާމީގެ ހުރިހާ މައުލޫމާތެއް ހޯދަން ރޫމާ ނިންމިއެވެ. މިގޮތުން މީސް މީޑިއާ ހާވަންފެށިއެވެ. ނަމަވެސް ސާމީގެ އައިޑީއެއް ނުފެނުވެ. މިކަމާ ފޫހިވެގެން ރޫމާގެ އެންމެ އިތުބާރުހިފޭ ރަހްމަތްތެރިން ތިބޭ ވައިބާ ގްރޫޕްއަށް ސާމީގެ ފޮޓޯލިއެވެ. އިސާހިތަކު މުޅި ވައިބާ ގްރޫޕް ރޫމާއާ ދިމާކުރަންފެށިއެވެ. ނަމަވެސް ރޫމާގެ ޕްރިންސް ހޯދައިދޭނެ ވާހަކަ އެންމެން ބުނިއެވެ. ހުރިހާ އެންމެނަށް ރޫމާ ޝުކުރުއަދާކޮއްފައި އެރޭ ނިދޭތޯ ވަރަށް މަސައްކަތްކުރިއެވެ. ނަމަވެސް ނުނިދުނެވެ. ރޫމާއަށް އިހްސާސްތަކެއްވާތީއެވެ. ފުރުތަމަ ފަހަރަށް ރޫމާ މީހަކަށް ހިތްކިޔައިފިކަން ރޫމާއަށް އެނގިއްޖެއެވެ.

ޖެހިގެން އައި ދުވަހު އެކަނި ވިލިމާލެއަށް ރޫމާ ހަވީރުގަޑީ ދިޔައެވެ. ސަމީ ފެނޭތޯއެވެ. ވިލިމާލެއަރާ އަތިރިމަތިން ހިނގަމުންދަނިކޮއް މީހަކު ފަހަތުން ރޫމާގެ ނަން ގޮވާލިއަޑުއިވުނެވެ. ފަހަތް އެނބުރި ބަލާލިއިރު ސާމީ ހުއްޓެވެ. ކީއްތޯ ކުރަނީ ސާމީ އަހާލުމުން ޖަވާބުގައި ރޫމާ ހަމަ ޖައްސާލީކަމަށް ބުނިއެވެ. އަދި ސާމީގާތު ވަގުތު އޮތިއްޔާ ކޮފީއެއް ބޯލަން ދެވިދާނެތޯ ރޫމާ ސުވާލުކޮއްލިއެވެ. ޖަވާބުގައި ސާމީ އެއްބަސްވިއެވެ. ދެމީހުން ކޮފީގައި އެތައް ވާހަކައެއް ދެކެވުނެވެ. އަދި އެކަކު އަނެކަކު ނަމްބަރު ދިނުމަށްފަހު އެރެޔަށް އަލްވަދާއުކިޔާ ރޫމާ މާލެއައެވެ. އައި ގޮތަށް ގެއަށްވަދެ އޭނާގެ ރަހްމަތްތެރިން ތިބޭ ވައިބާ ގްރޫޕްގައި މިޝަން އެކޮންމްޕްލިޝް ޖަހާލިއެވެ. އަދި ހުރިހާ އެއްޗެއް ކިޔާދިނެވެ. އެއަށްފަހު ނިދަން އޮށޯވެ ސާމީއަށް ފުރުތަމަ ގުޑްނައިޓް މެސެޖް ރޫމާ ފޮނުވާލިއެވެ. އެ މެސެޖްގެ ޖަވާބު ގިނަ ހިނދުތަކެއްނުވެ ލިބުނެވެ. ސާމީވެސް އޮތީ ގުޑްނައިޓް ކިޔާފައެވެ.

ސާމީއާ ރޫމާގެ މެސެޖްތައް ފޯނުކޯލްތަކަށް ބަދަލްވެގެންދިޔައެވެ. ދެމީހުންގެ ގުޅުން ދިޔައީ ދުވަހެއް ދުވަހަކަށް ވަރުގަދަވަމުންނެވެ. އެކުގައި ބައްދަލްކޮއް ވަގުތު ހޭދަކުރުން ގިނަވެއްޖެއެވެ. ރޫމާގެ އަލަތު ލޯބީގެ ފޮނިރަހަތަށް އޭނާއަށް އަބަދުވެސް ސާމީ ފަރާތުން ލިބެއެވެ. ނަމަވެސް ބައެއް ފަހަރު ސާމީއަށް ނުހުރެވޭ ފަހަރުވެސްދެއެވެ. ކޮންމެ ދެމަހުން އެއްމަހު ލަންކާއަށް އޭނާ ދާންޖެހޭތީއެވެ. ދާ މީހާ ގޮސް ޙަބަރެއްވެސްނުވެއެވެ. ސާމީ ލަންކާގައި ހުންނަނީ ވަރަށް ދުރު ހިސާބެއްގައި ކަމުން ރޫމާގެ އެއްވެސް މެސެޖެއް އޭނާއާ ހަމައަށް ނުދާވާހަކަ ބުނެއެވެ.

ލަންކާއިން ސާމީ އައިދުވަހެއްގައި އޭނާއާ ބައްދަލްކުރަން ބޭނުންވާ ވާހަކަ މެސެޖަކުން ރޫމާ ބުނެލިއެވެ. ނަމަވެސް ޖަވާބު އަންނަން ގިނައިރުވާތީ ސާމީއަށް ރޫމާ ގުޅިއެވެ. ދެ ތިންފަހަރު ގުޅިއިރުވެސް ނުނެގުމުން ނިދުނީކަމަށް ހިތާ ސާމީ ގުޅަންދެން ރޫމާ މަޑުކޮއްލިއެވެ. ހަވީރުވުމުން ރޫމާ ސާމީއަށް ހޭލީތޯ ބަލަން މެސެޖްކޮއްލިއެވެ. ޖަވާބުއައީ ރޫމާ ހީވެސް ނުކުރާފަދަ ގޮތަކަށްށެވެ. ސާމީގެ ރުޅިގަދަ މެސެޖްގައި ރޫމާއާ ހެދި ކިހާ ބޮޑު ބަލާއެއްހޭ ޖަހާފައި އޮތްތަންފެނުމުން ރޫމާ ހިތްދަތިވިއެވެ. ސާމީއަށް ގުޅާލުމުން ނަމްބަރު ބިޒީ ކޮއްލައެވެ. ރޫމާ ދޫނުކޮއް މެސެޖްކުރަމުން ދިޔައެވެ. އޭނާގެ ކުށަކީ ކޮބާތޯ އަހަމުން ދިޔައެވެ. ނަމަވެސް ސާމީ ދިޔައީ ރުޅިވެރިކަމުގެ މެސެޖްތަކުން ރޫމާގެ ހިތްފަޅަމުންނެވެ. ގޮވުނު އައުގުރާނައެއް ގޮވަމުންނެވެ. އެންމެ ފަހަށް އައި މެސެޖްގައި ސާމީއަކީ މީހެއްގެ ފިރިއެއްކަމަށް ބުނިއެވެ. ރޫމާގެ ސަބަބުން އެ ދެމީހުން ވަރިފަށަށް އަރައިގެން އުޅޭވާހަކަވެސް ބުނިއެވެ. އަދި މެސެޖް ނުކުރުމަށް ނުގުޅުމަށް އަމުރުކުރިއެވެ. ރޫމާ މިކަމާ ވަރަށް ބޮޑަށް ހިތްދަތިވިއެވެ. ރޫމާގެ ކުށަކީ ކޮބައިކަން ތަކުރާރުކޮއް ސާމީ ކައިރީ އޮޅުން ފިލުވައިދިނުމަށްއެދި ކޮންމެ ދުވަހަކުވެސް ދިޔައީ މެސެޖްކުރަމުންނެވެ. އެންމެ ފަހަށް ސާމީގެ މެސެޖްއެއް އައުމުން ރޫމާ އެ މެސެޖް ހުޅުވާލިއެވެ. އޭގައި ވަނީ ރޫމާ އަމިއްލައަށް މަރުވާންވީއެއްނޫހޭ ޖަހާފައެވެ. ރޫމާގެ ހިތް އިތުރަށް ފަޅަފަޅައިގެން ދިޔައެވެ. ދުނިޔެމަތިން ފޫހިވިއެވެ. އަދި ކޮޓަރި އަނދިރިކޮއްލުމަށްފަހު ނިދޭތޯ ވަރަށް މަސައްކަތްކުރިއެވެ.

ހެނދުނު ސައިބޯން ރޫމާ ނާންނާތީ އޭނާގެ ޙަބަރެއް ބަލަން މަންމަ ގޮސް ދޮރުގައި ޓަކިދޭން ފެށިއެެވެ. އެތައް އިރަކު ޓަކި ޖަހައިގެން ނުހުޅުވުމުން ރޫމާ ބައްޕަ ޑަބަލް ތަޅުދަނޑި ހިފައިގެން އައިސް ރޫމާގެ ކޮޓަރު ހުޅުވާލިއެެވެ. ހުޅުވާލުމާއެކު ރޫމާގެ މަންމަ ” އަސްތާ މަގޭ ދަރި ” މިހެން ކިޔާފައި ހަޅޭއްލަވައިގަތެވެ. މަންމަގެ އަޑަށް ސައިބޯން ތިބި ރޫމާގެ އާއިލާ އެންމެ ދުވެފައި ކޮޓަރި ކައިރިއަށްއައެވެ. އެންމެގެ ލޯބިވާ ރޫމާ އެހުރީ ފަންކާގައި އަމިއްލައަށް ދަންޖެހިގެން މަރުވެފައެވެ.

– ނިމުނީ –

ތައުބާގެ ދޮރަކީ ހުޅަނގު ފަރާތުން އިރު އަރަންދެކަށް ހުޅުވިފައިވާ އެއްޗެކެވެ. ގިޔާމަތުގެ އަލާމާތެއް ކަމުގައިވާ ހުޅަނގުފަރާތުން އިރުއެރުމުން ތައުބާގެ ދޮރު އެއްކޮއް ބަންދުވާނެއެވެ. މިކަމާމެދު ވިސްނާލަނީ އަޅުގަނޑުމެންތެރެއިން ކިތައް މީހުންބާއެވެ. ދުވަހެއް ދުވަހަކަށް މި ފެންނަމުންދަނީ ގިޔާމަތުގެ ކުދި އަލާމާތްތަކެވެ. މިހެންގޮސް ބޮޑު އަލާމާތެއްކަމުގައިވާ ހުޅަނގުފަރާތުން އިރުއަރާފައިހުރިތަން ފެނުމުން އިންސާނާއަށް ބުނެވޭނީ ދެންކީކޭބާއެވެ. އެއިރު އޮންނާނީ ވަގުތު ފާއިތުވެފައެވެ.

ޒަމީރުއަކީ މިޒަމާނުގެ ޒުވާނެކެވެ. މިޒަމާނުގެ ފެޝަނަކީ އޭނާ ލޯބިކުރާ އެއްޗެކެވެ. ޒަމީރުގެ ހެދުން އެޅުމުގައި މުޅިންވެސް ލައިއުޅެނީ އިރައިގެން ގޮސްފައިވާ އަންނައުނެވެ. ކަރުގައި އެޅުނު ފަށެއްއަޅާ ތޮރުފުނު ތަނަކުން ތޮރުފައިގެން ހިތުހުރި ގޮތަކަށް އޭނާގެ ދިރިއުޅުން ގެންދަމުންދެއެވެ. ޒަމީރުގެ ބައްޕައަކީ މަހުޖަނެއްކަމުން އޭނާ ވަޒީފާއަށް ދާކަށް ނުޖެހެއެވެ. އަތުން ފައިން މަސައްކަތެއްނުކޮއް މައިންބަފައިންގެ ޙަރަދުގައި ބޭނުން ތާކަށްގޮސް އަރާމު ދިރިއުޅުން އުޅެމުންނެވެ.

މިއަދުވެސް ޒަމީރު ދިޔައީ ދަތުރެއްދާން ރާވަމުންނެވެ. އޭނާއާ އޭނާގެ ރަހްމަތްތެރިން މިއަދު ދާން ނިންމާފައި އޮތީ މަކުނުދޫއަށްށެވެ. ދަތުރުދިޔުމަށް ޒަމީރުގެ އަމިއްލަ ލޯންޗަގައި އޭނާގެ ރައްޓެހިންނާއެކު ނައްޓާލިއެވެ. މަކުނުދޫއަށް ލެފުމާއެއްކޮއް ޒަމީރުމެން ބަލާ އޭނާގެ މަކުނުދޫ އެކުވެރިޔާ އައިސް ހުއްޓެވެ. މަކުނުދޫގައި އެދުވަހުން ހިންގަންވީ ކަންތައްތައް ރަހްމަތްތެރިޔާވަނީ ޒަމީރުމެންނަށް ތައްޔާރުކޮއްދީފައެވެ. މިގޮތުން އެންމެ ފުރުތަމަ ދިޔައީ މަސްދަތުރެކެވެ. މަސްދަތުރު ނިންމާފައި އެރޭ އައިސް މަސްފިހުމުގެ ކަންތަކުގައި އެންމެން އުޅުނެވެ. ބޭނުނު މަސްތައް އިތުރުވެފައި ހުރުމުން ޒަމީރުގެ ރަހްމަތްތެރިޔާ މަސްބަލާ އަންނަން މީހަކަށް ގުޅިއެވެ. ޒަމީރު މަސްފިހަން އަލިފާންގަނޑު ރޯކޮއް ބާކީވެފައި ހުރި މަސްކޮޅު ހަވާލުކުރަން ތައްޔާރުވެގެން ހުއްޓާ އައީ ކަޅު ހެދުމުން ނިވާވެގެންހުރި ދޮން ރީތި ކުއްޖެކެވެ. އެކުއްޖާ އައިސް ޒަމީރު އަތުގައި ހުރި މަސްކޮތަޅުގައި ހިފީ އިސްދަށަށް ޖަހާލައިގެންހުރެއެވެ. އެކުއްޖާ އަނބުރާ ދިޔުމުން ޒަމީރު އޭނާގެ ރަހްމަތްތެރިޔާގާތުގައި އެއީ ކޮންކުއްޖެއްތޯ ސުވާލުކުރިއެވެ. ރަހްމަތްތެރިޔާ ހީލާފައި އެކުއްޖާއާށް ހިތްކީދޯއޭ ބުނެލިއެވެ. އަދި އެއީ ވަރަށް ނިކަމެތި އަޙްލާގި ރަނގަޅު ކުއްޖެއްކަމަށް ބުނެލިއެވެ.

އެރޭ މަސްފިހެގެން ކައި ނިންމާލައިގެން ނިދަން އެންމެންވަނެވެ. ނަމަވެސް ޒަމީރުއަކަށް ނިދޭގޮތްނުވިއެވެ. އޭނާގެ ހިތަށް އަންނަނީ އެކުއްޖާއެވެ. އެކުއްޖާގެ ރީތިކަމުގެ ފޮނިރަހަ އޭނާ ބޭނުންވިއެވެ. މިގޮތުން ޖެހިގެން އައިދުވަހު ރައްޓެހިންނަށް ބަހަނާއެއް ދައްކާފައި ޒަމީރު ރަށުތެރެ ބަލައިލަން ނުކުތެވެ. އެކުއްޖާ ފެނޭތޯއެވެ. ނަސީބަކުން އަތިރިމައްޗަށް ނުކުތްއިރު އެކުއްޖާ އަތިރިމަތީ އިން ޖޯއްޔެއްގައި އިންތަން ފެނުނެވެ. ލަހެއް ފަހެއް ނުކޮއް ގޮސް ޖެހިގެން ޖޯލީގައި ޒަމީރު އިށީންދެ އެކުއްޖާއާ ވާހަކަ ދެއްކޭތޯ ވަރަށްވެސް މަސައްކަތްކުރިއެވެ. ނަމަވެސް އެކުއްޖާ ޒަމީރުއަށް ހިނިތުންވުމެއްހާހިސާބުވެސްނުދީ އިންތަނުން ތެދުވެގެން ދިޔައެވެ. މިކަމާ ޒަމީރު ވަރަށް ދެރަވިއެވެ. އޭނާއަކީ އާއްމުކޮއް އަންހެންކުދިންގެ ހިތް ފަތަހަކުރާ މީހެކެވެ. ނަމަވެސް މިކުއްޖާ މީ އާދަޔާ ޙިލާފް ކުއްޖެއްކަން އޭނާއަށް ވިސްނުނެވެ. މިކުއްޖާއާ ބެހޭގޮތުން ޒަމީރުގެ އެކުވެރިޔާއާ އޭނާގެ ޝުއޫރުތައް ހިއްސާކުރިއެވެ. ރަހްމަތްތެރިޔާ ޒަމީރު ބުރަކަށީ ފިރުމާލާފައި އެކަން ހަނދާންނައްތާލުމަށް ބުނެލިއެވެ. އެއީ ޒަމީރުމެންފަދަ މީހުންނަށް ގުޑާނުލާނެ ކުއްޖެ ކަމަށް ބުނެލިއެވެ. މިކަމާ ޒަމީރު ވަރަށް ހިތްހަމަ ނުޖެހުނެވެ. އަދި އޭނާގެ މައްސަލައަކީ ކޮބާތޯ ސުވާލުކުރުމުން އެކުވެރިޔާ ދިނީ ވަރަށް ކުރު ޖަވާބެކެވެ. އެކުއްޖާއަކީ އާޙިރަތަށްޓަކައި މަސައްކަތްކުރާ ކުއްޖެއްކަމަށްށެވެ. ދުނިޔެއެއް އޭނާއަށް މުހިންމުނުވާކަން އެކުއްޖާ އަބަދުވެސް ބުނާވާހަކަ ބުނެލިއެވެ. މި ބަސްތައް އިވިފައި އެކުއްޖާއާ ޒަމީރު ދިމާކުރަން ވިސްނިއެވެ.

ޖެހިގެން އައި ދުވަހުވެސް އެކުއްޖާ ހޯދަން ޒަމީރު ނުކުތެވެ. މިފަހަރު އެއްވެސް ގޮތަކަށް ނުފެނި އުޅެނިކޮއް އެކުވެރިޔާއާ ދިމާވިއެވެ. ހީލާފައި އެކުއްޖާ ދޯއޭ ތި ހޯދަނީ ކެރެންޏާ އެކުއްޖާ ގެއަށް ގޮސްބަލާށޭ ކިޔާފައި ގެ ހުރިތަން ކިޔާދިނެވެ. ލަހެއް ފަހެއް ނުކޮއް ޒަމީރު އެކުއްޖާ އުޅޭ ގެއަށް ދިޔައެވެ. އެ ގެޔަކީ ކުދިގަލުން ހެދިފައިވާ ފުދޭވަރަކަށް ހަލާކުވެފައި ހުރި ގެއެކެވެ. ޓިނުތަކުގައިވަނީ ދަބަރު ޖަހާ ފޫގޮސްފައެވެ. ޒަމީރު ދެފަހަރަކު ސަލާމްގޮވާލުމުން ނުކުތީ އަސާއެއްގެ އެހީގައި ހިނގަމުން އައި މުސްކުޅިއެކެވެ. ކީއްކުރަން ކާކު ހޯދަން އައި ކުއްޖެއްތޯ ސުވާލުކޮއްލުމުން ބުނާނެ އެއްޗެއް ނޭނގިފައި ޒަމީރު ހުއްޓާ އެތެރެއަށް އައިސް އިށީނުމަށް އެބޭބެ ދައުވަތުދިނެވެ. ޒަމީރު ވަދެ އިށީނުމުން އެ މުސްކުޅި މީހާ ހިނިތުންވެލާފައި ޒަމީރު އައީ ކީއްކުރަންކަން އެނގިޖެކަން ބުނެލިއެވެ. އެއަށްފަހު އެ ބޭބެ އެތެރެއަށް ގޮސް އަންހެން ކުއްޖާ ގޮވައިގެން އައިސް ޒަމީރު ކައިރީ ބޭނދުމަށްފަހު ފަށައިގަތެވެ.

” އަހަރެންނަކަށް ތިކަމަކާ އެއްވެސް އެއްޗެއް ބުނެވޭކަށްނެތް. އެކަމު އަހަރެންގެ ދަރިފުޅު ތިބާއާ ރުހެންޏާ ކައިވެނިކޮއްދޭން މިހުރީ ތައްޔާރަށް. ފުރުތަމަ ތިބާއަށް އަހަރެންގެ ދަރިފުޅަކީ ކާކުކަން މި ކިޔާދެނީ. އޭނާ މަންމަ ވަނީ ވިހެއުމުގެ ތެރޭ ނިޔާވެފަ. އޭނާއަކީ ތިބާހެން ދުނިޔެއާ ހެދި އުޅޭ މީހެއްނޫން. އޭނާ މަސައްކަތްކުރަނީ އާޙިރަތަށް. އޭނާއަކީ ފިރިހެނަކަށް އިސްވެ ދުވަހަކުވެސް ބަލާ މީހެއްނޫން. ދެން އޮތީ އެންމެ މުހިންމު ކަންތައް. އޭނާ ތިބާއާ ވާހަކަ ނުދެއްކީ އެނާއަކީ މަންމަން ކުއްޖަކަށްވާތީ. ނަމަވެސް މަންމަން ކުއްޖެއްނޫނަސް އޭނާއަކީ އެއްވެސް އިރެއްގައި ހިލޭ ފިރިހެނަކާ އަނގައިންބުނާނެ މީހެއްވެސްނޫންކަން އަހަރެންނަށް އެނގޭ. ތިބާ އަހަރެންގެ ދަރިފުޅާ ކައިވެނި ކުރަން ބޭނުންނަމަ ތިބާ އޭނާއަށް ދެރައެއް ނުދޭނެކަމަށް އުންމީދުކުރަން އަދި އިސްލާމީ ރިވެތި އުސޫލްތަކުގައި ހިފަހައްޓާނެކަމަށް އުންމީދުކުރަން. އަހަރެންގެ ފަރާތުން އެއްވެސް ކަމެއް ތިބާއަކަށް މަޖްބޫރެއްނުކުރާނަން އެއީ ތިބާގެ އަމިއްލަ ނިންމުމެއް ”

މުސްކުޅިޔާގެ ވާހަކަތައް އަޑުއަހައި ޒަމީރުއަށް ތިން މަސްދުވަސް ދިނުމަށް އެދުނެވެ. އަދި އެ ތިންމަސް ތެރޭގައި ޒަމީރު ބޭނުންވަނީ ދުރުގައި ހުރެ އެކުއްޖާއާ މުއާމަލާތްކުރަންކަން ބުނެލިއެވެ. އެދުވަހު ފުރައިގެން ދިޔަ ޒަމީރު ތިން މަސްތެރޭ ގަދައަޅާ މަސައްކަތްކުރީ އިލްމު ލިބިގަތުމުގައެވެ. އަމިއްލައަށް ހުރިހާ ކަމެއް ދަސްކުރިއެވެ. ފުރުތަމަ ކަމަކަށް ތައުބާގެ ނަމާދުކުރިއެވެ. އަދި އެއަށްފަހު ކީރިތި ގުރްއާން އަޑުއަހައި ދަސްކޮއްގެން ޙަތިމްއިން ފަށައިގަތެވެ. ރަށުގައި ހުރި ކުއްޖާއާ ދިޔައީ ގަވައިދުން މުއާމަލާތްކުރަމުންނެވެ. އެކުއްޖާގެ ފަރާތުން ލިބެމުން އައި އޯގާތެރިކަމުން ޒަމީރުގެ މުޅި ދިރިއުޅުން ބަދަލްވިއެވެ. ހެވާ ނުބައި ޒަމީރުއަށް ދަސްކޮއްދިނެެވެ. އަންނަން އޮތް ބިރުވެރި ދުވަހަށް ތައްޔާރުވުމަށް ހިތްވަރުލާދީ ދީނީގޮތުން ޒަމީރުގެ ހިތް ވަރުގަދަކޮއްދިނެވެ. ޒަމީރު ޒަމާނީ ފެޝަން ދޫކޮއްލިއެވެ. ތޮރުފައިފާ ހުރި ތަންތަނުގައި އަޅުވާފައި ހުރި އެއްޗެހިނެގިއެވެ. މުޅި މީހާ ސިފަ އެއްކޮއް ބަދަލު ކޮއްލީ ރިވެތި އަޙްލާގު ރަނގަޅު ޒުވާނަކަށްށެވެ. ތިންމަސްވުމުން މަކުނުދޫއަށް ޒަމީރު ދިޔައެވެ. ލޯންޗް ލެފުމުން ބަލާ އައިސް ހުރީ އޭނާގެ ރަހްމަތްތެރިޔާ އެކަންޏެއްނޫނެވެ. ވާން ތައްޔާރުވެފައި ހުރި އަނބިމީހާވެސްމެއެވެ.

– ނިމުނީ –

ސަލާންޖެހުމަކީ މިއަދު މުޖުތަމައުގައި ވަރަށް ގިނައިން ފެންނަ މަންޒަރެކެވެ. ހާއްސަކޮއް ޒުވާން ކުދިން ނުކުމެ ފެޝަނަކަށްވެސް މޮޅުވާހަކަ ދައްކައިގެން އެތައް ދޮގެއް ހަދައިގެން ސަލާން ޖަހައެވެ. ތިމާ ގައިގާ ވަރުހުރި ދުވަހު އަތުން ފައިން މަސައްކަތެއްނުކޮއް ގޮސް މިސްކިތްތައް ކައިރީ ނަމާދެއްނުކޮއް މީހުން ނަމާދުން ފައިބާ ގަޑީގައި ސަލާންޖަހަނީ މަދު ބަޔެއްނޫނެވެ.

އުމަރުއަކީ މިފަދަ ޒުވާނެކެވެ. އޭނާއަކީ ސަލާން ޖަހައިގެން ކައިބޮއެހަދާ ޒުވާނެކެވެ. މީހުންނަށް އޮޅުވާލައިގެން އެތައް ދޮގެއް ހަދައިގެންވެސް ފައިސާ ހޯދައެވެ. ބައެއްފަހަރު މީހުންނަށް އުނދަގުވާ ހިސާބަށްވެސް އުމަރުގެ ކަންތައްދެއެވެ. އޭޓީއެމްއަށް ކާޑު ޖަހާލައި ފައިސާ ނަގަން ތިބޭ މީހުން ކައިރިއަށްގޮސްވެސް ފައިސާދޭން ކިޔައެވެ. މިކަމުގެ ސަބަބުން އުމަރަށްވަނީ އިންޒާރުދެވިފައެވެ. ބޭންކްގެ އެއްވެސް އިމާރާތެއްގެ އެތެރެއަށް ވަދެއްޖެނަމަ ކަމާބެހޭ ފަރާތާ ހަވާލުކުރެވޭނެކަން އަންގާފައެވެ. ހޮޓާތަކަށް ސައިބޯން ވަންނަ މީހުންނަށްވެސް އުމަރުގެ އުނދަގޫ ވަކި ކުޑައެއްނޫނެވެ. ފަހަރަކު މޭޒެއްކައިރިއަށްގޮސް އިށީނުމަށްފަހު ކާނެ އެއްޗެއް ނުވަތަ ސަޔެއް ދިނުމަށް ފަހަރަކު މީހަކު ކައިރީ އާދޭސްކުރެއެވެ. ބައެއްފަހަރު މިހެން އުޅުމުގެ ތެރޭގައި މީހުން އޭނާއަށް ލަނޑުވެސްދެއެވެ. ސައިދީފައި ބިލް އަމިއްލައަށް ދައްކާށެބުނެ ސައިދޭމީހާ ގަދަ ދައްކާލުމުން އުމަރު ޖެހެނީ ފިލަން މަސައްކަތްކުރާށެވެ. ނަމަވެސް ގިނަފަހަރު ވޭޓަރުންގެ އަތުވެ އެތައް އަނިޔާއެއް ލިބެއެވެ.

އެއްދުވަހެއްގެ މެންދުރެވެ. މީހުންތައް މިސްކިތުން ނަމާދުކޮއްގެން ފައިބަނިކޮއް އުމަރު އޭނާގެ މަސައްކަތް ފަށައިގަތެވެ. މިސްކިތް ދޮރުމަތީ ހުއްޓިހުރެ ދާ ކޮންމެ މީހަކަށް އަތްދިއްކުރެއެވެ. މިގޮތުގައި ހުއްޓާ މީހުންތައް ހުސްވެއްޖެއެވެ. ހަމަ ހިލާ އެންމެ ރުފިޔާއެއްވެސް ނުލިބުނެވެ. މިސްކިތްކައިރިން ދާންވެގެން އެންބުރުނުއިރު ކުރިމަތީގައި ހިނިތުންވެފައިހުރި ޒުވާނަކު ހުއްޓެވެ. އުމަރު އޭނާގެ މަސައްކަތް ވަގުތުން ފަށައިގަތެވެ. ހެދުނު ދޮގެއްހަދާ ފައިސާއެއްހޯދަން މަސައްކަތްކުރިއެވެ. އެޒުވާނާ އުމަރުގެ ވާހަތައް އަޑުއެހުމަށްފަހު އޭނާއާއެކު ނަމާދަށް އައުމަށް ދައުވަތުދިނެވެ. ނަމަވެސް އުމަރު އެކަމާ ދެކޮޅުހަދަން ފެށުމުން ޒުވާނާއާއެކު ނަމާދުކޮއްފިިނަމަ އުމަރުއަށް އެހީއެއްދޭނެކަމަށް ބުނިއެވެ. ފައިސާއަށް ދަހިވެތިވެފައިވާ އުމަރު ޒުވާނާއާއެކު ނަމާދަށްއަރާ އަވަސްއަރުވާލާފައި ނަމާދުކޮއް ފައިބާ ޒުވާނާގެ އިންތިޒާރުގައި ދޮރުކައިރި މަޑުކުރިއެވެ. ޒުވާނާ ނަމާދުން ފައިބާފައި ފަސްރުފިޔާ ޖީބުންނަގާ ދިއްކޮލިއެވެ. އަދި އުމަރު އޭގައި ހިފުމުން އުމަރު ކުރާ ކޮންމެ ނަމާދަކަށް ފަސްރުފިޔާދޭން އެޒުވާނާ ވައުދުވިއެވެ. ޒުވާނާގެ ބަސްކޮޅު އަޑުއިވިފައި އުމަރު ހައިރާންވިއެވެ. އަދި އެދުވަހަށް އަލްވަދައުކިޔާ ދެމީހުން ވަކިވިއެވެ.

ކޮންމެ ދުވަހަކުވެސް މިސްކިތްދޮށުގައި އުމަރު އެޒުވާނާގެ އިންތިޒާރުގައިހުރެއެވެ. ކޮންމެ ނަމާދަކަށްވެސް އަރައި އުމަރު އެޒުވާނާ ދޭ ފައިސާގައި ހިފައެވެ. މިގޮތަށް މަސްދުވަސް ފާއިތުވެއްޖެއެވެ. އުމަރު ފަހަކަށް އައިސް އެޒުވާނާ ދޭ ފައިސާގައި ނުހިފައެވެ. ޒުވާނާ ފެނުމުން ލަދުން އެތަނަކުން ދުރަށްދެއެވެ. މިކަމާ ޒުވާނާ އުމަރުއާ އެއްދުވަހަކު ސުވާލުކޮއްލިއެވެ. އުމަރު ކަރުނަ ބާލާހާލުގައި ވެގެން އުޅޭގޮތް ކިޔާދިނެވެ. ޒުވާނާ އަތުން އޭނާ ނަގާ ފައިސާ ނެގުމަކީ ރަނގަޅުކަމެއްނޫންކަމަށް އޭނާއަށް އަމިއްލައަށްފެނުނީ ނަމާދުގެ މުހިންމު ކަމުންނެވެ. ނަމާދުކުރަންފެށުމުން އުމަރުގެ ހިތް މުޅިން ބަދަލްވި ވާހަކަ ބުނިއެވެ. އެންމެ ފަސްރުފިޔާއާ ނަމާދުން ލިބޭ ސަވާބު އަޅާވެސް ނުކިޔޭތީއެވެ. ނަމާދުކުރަން ފެށުމުން މިއަދު އަމިއްލަ ދެއަތުން މަސައްކަތްކޮއްގެން ހަލާލް އާމްދަނީ ހޯދުމަށް ހިތްވަރު ލިބިއްޖެކަންވެސް އުމަރު ބުނެލިއެވެ. ޒުވާނާ މިކަމާ ވަރަށްވެސް އުފާކުރިއެވެ. އިތުރަށް އުމަރަށް ހިތްވަރުލާދިނެވެ. މިއަދު އުމަރުވަނީ އޭނާގެ ފަރާތުން އުނދަގޫފޯރި އެންމެންގެ ކިބައިން މައާފް ހޯދަން ނުކުމެފައެވެ. އަދި އަމިއްލަ މަސައްކަތްފަށާ ދާ އޮހޮރައިގެން ހަލާލް ފައިސާ ހޯދަން ފަށާފައެވެ. އުމަރަކީ މިއަދު ކިތަންމެ ބުރަކޮއް އުޅޭމީހަކަސް ވަގުތަށް ނަމާދަށްދާ މީހެކެވެ.

– ނިމުނީ –

ސެކިއުރިޓީއެއްގެ ވަޒީފާ އަދާކުރުމަކީ ބުރަކަމެކެވެ. އަރާމު ނިންޖާ އަމިއްލަ މުހިންމު ބައެއް ކަންތަ ގުރުބާންކުރަންޖެހެއެވެ. ގިނަފަހަރު ރަނގަޅު އާމްދަނީއެއްވެސް ލިބެނީ ގިނަ ދަންފަޅި ނަގައިގެންނެވެ. ވަޒީފާގައި އުޅޭއިރު އެކި މީހުންނަށް އެކި ހާދިސާތައް ދިމާވެއެވެ. ބައެއްފަހަރު އެ ހާދިސާތައް ކިޔާދިނުމަކީވެސް އެހާ ރަނގަޅު ކަމެއްނޫނެވެ.

މޫސަބެއަކީ ސެކިއުރިޓީ އެއްގެ ވަޒީފާ އަދާކުރަމުން އަންނަ އުމުރުން ސާޅީސް ފަސްއަހަރުގެ މީހެކެވެ. މޫސަބޭއަކީ މާލޭގައި ކުއްޔަށް އުޅެމުން އަންނަ މީހެކެވެ. ސެކިއުރިޓީ ވަޒީފާ އަދާކުރާ ދެމީހަކާ ގުޅިގެން ކޮޓަރިއެއް ބަހައިގެން ހިފައިގެން އުޅޭ މީހެކެވެ. ކޮންމެ މީހަކުވެސް ވަޒީފާ ނިންމާފައި އަންނަންވާއިރަށް އަނެއް މީހާ ކޮޓަރި ހުސްކޮއްދެއެވެ. އަރާމު ނިދިކޮޅެއް ނިދާލެވެންވެސް އޮންނަނީ މިކަހަލަ ގޮތަކަށްށެވެ. ހުސް ކޮޓަރިއެއްގައި އެކަނި ނިދާލުމަށް ކޮންމެ މީހަކުވެސް ބޭނުންވާތީ އެންމެންވެސް ދަންފަޅި ބަހަނީ އެގޮތަށް ދިމާވާ ގޮތަށްށެވެ.

މޫސަބެއަކީ ހިނގާފައި އުޅޭ މީހެއްކަމުން ބައެއްފަހަރު ލަހުންވެސް އާދެވޭގޮތްވެއެވެ. ނަމަވެސް ވެރިފަރާތުން މޫސަބެއަށް ވަރަށް އިހްތިރާމްކުރެއެވެ. ލަހުން އާދެވުނަސް ހަމަޔަށް މުސާރަދެއެވެ. ބައެއްފަހަރު ވަޒީފާގައި މޫސަބެއަށް އެކި މިޒާޖުގެ އެކި މީހުންނާ ކުރިމަތިލާންޖެހެއެވެ. މިގޮތުން ބައެއް ޒުވާނުންގެ އުނދަގޫ ގިނަފަހަރު ޖެހެއެވެ. ނަމަވެސް މޫސަބެ އެކުދިންނަށް އަބަދުވެސް ހިތަނީ ހެޔޮކޮށެވެ. މިކަމުގެ ސަބަބުން ބައެއް ކުދިން މޫސަބެ ކައިރިއަށް އައިސް ވާހަކަ ދައްކާލަން މަޑުކޮއްލައެވެ.

ދުވަސްތައް ފާއިތުވަމުންގޮސް މޫސަބެއަށް ރަށަކުން އިންޖީނުގޭގެ ވަޒީފާ ލިބިއްޖެއެވެ. މޫސަބެ ލަހެއް ފަހެއްނުކޮއް މިކަން ވެރިފަރާތަށް އަނގާ ވަޒީފާއިން ވަކިވެގެން އެރަށަށް ދިޔައެވެ. އެއީ ވަރަށް މީހުން މަދު ރަށެކެވެ. މޫސަބެގެ ފުރުތަމަ ދަންފަޅި ޖެހުނީ ހަވީރުގަޑިއާއެވެ. ހަތަރެެއް ޖެހުމުން ފެންވަރާލައިގެން ވަޒީފާއަށް ނުކުތެވެ. އިންޖީނުގެ ހުންނަނީ މީހުން ދިރިއުޅޭ ހިސާބާ ކުޑަކޮއް ދުރުގައެވެ. އިންޖީނުގޭގައި ހުރި އާދަމްބެ މޫސަބެއަށް ހުރިހާ އެއްޗެއް ކިޔާދިނުމަށްފަހު ދިޔައެވެ. ފޫހިކަމެއްނެތި ވަޒީފާ އަދާކުރުމުގައި މޫސަބެ އުޅެނިކޮއް އިރުއޮއްސި ދިހައެއް ޖަހާފިއެވެ. އިންޖީނުގެ ވަށާ އިންނަނީ އެންމެ ދެ ހޮޅިބުރި ޖަހާފަކަމުން އެހާބޮޑު އަލިކަމެއް މަގަކަށް ނުލިބެއެވެ. މޫސަބެ އިންޖީނުގޭގެ ޖޯލީގައި އޮއްވާ އަންހެނުންތަކެއް ހޭއަޑު އިވުނެވެ. އަޅާވެސް ނުލާ މޫސަބެ އޮއްވާ ދެން އިވުނީ ކުޑަކުއްޖަކު ރޯ އަޑެވެ. ހައިރާންވާ ކަމަކީ އެއަޑު އިވެނީ އިންޖީނުގެއާ ވަރަށް ކައިރިންނެވެ. މޫސަބެ ބައްތި ނަގާ އަޑު އައި ދިމާލަށް އަލިކޮއްލިއިރު އެއްވެސް މީހެއްގެ ހިލަމެއްވެސްނެތެވެ. މެންދަމު ބާރަ ޖަހަންދެން އިރު އިރުކޮޅާ އެކުއްޖާ ރޯ އަޑު އިވުނެވެ. މިހެން އޮއްވާ ދަންވަރު ދަންފަޅީގެ މީހާ ކަމުގައިވާ ބަކުރުބެ އަތުވެއްޖެއެވެ. ބަކުރުބެ އައިސް މޫސަބެ ގެއަށް ފޮނުވާލިއެވެ. މޫސަބެ ގެއަށް ގޮސް އިވުނު އަޑުތަކާމެދު މާކަށް ބޮޑަށް ނުވިސްނާ ނިދަން އޮށޯތެވެ.

ޖެހިގެން އައި ދުވަހުގެ މެންދަމު ޑިއުޓީއަށް މޫސަބެ ދިޔައިރު ބަކުރުބެ ހުރީ މޫސަބެ އިންތިޒާރުގައެވެ. ބަކުރުބެ ދިޔުމުން މޫސަބެ ޖަނަރޭޓަރަށް ތެޔޮއަޅާ މުޅިތަން ސާފުކުރަމުން ދަނިކޮއް ބަކުރުބެ ބޭރުން މޫސަބެއަށް ގޮވާލިއެވެ. މޫސަބެ ނުކުތް އިރު އެކަކުވެސް ފެންނާކަށްނެތެވެ. އަޑު އިވުނު ގޮތޭ ހިތަށް އަރާ އިންޖީނުގެ އެތެރެއަށްވަދެ ޓޯޗް ދިއްލޭތޯ ބަލާލިއެވެ. ޓޯޗް ދިއްލާފައި ނިއްވާލިއެވެ. އަދި ހުރިހާ މީޓަރެއް ބަލާ ޗެކުކޮއްފައި ބޭރަށް ނުކުންނަން ހިނގައިގަތްތަނުން ޖަނަރޭޓަރު ނިވިއްޖެއެވެ. ޓޯޗް ބައްތި ދިއްލައިގެން އެތެރެއަށް ވަދެ ޖަނަރޭޓަރު ހިންގަން މަސައްކަތްފެށިއެވެ. އެތައް އިރަކު އުޅެގެންވެސް އެކަން ނުވުމުން ޖޯއްޔަށް މީހަކު އާދޭތޯ ނުކުމެ އިންނެވެ. މީހެއްގެ ފިޔަވަޅުތަކެއްގެ އަޑު އިވެން ފެށުމުން އެދިމާލަށް ޓޯޗުން އަލިކޮއްލިއިރު ބަކުރުބޭ ހުއްޓެވެ. ބަކުރުބެ ކައިރީ ޖަނަރޭޓަރު މައްސަލަ ޖެހިގެން އުޅޭ ވާހަކަ ބުނުމުން ބަހެއްވެސް ނުބުނިއެވެ. ދެއަތް ފުރަގަހަށް ލައިގެން ހުރި ބަކުރުބެ އެތެރެއަށް ވަދެ އިސާހިތަކު ޖަނަރޭޓަރު ހިންގާލިއެވެ. އަދި ނުކުމެގެން ދަމުން ހީލާފައި ދިޔައެވެ.

މެންދަމުން އަނބުރާ ތިނެއް ޖެހީއެވެ. މޫސަބެއަށް އެކިކަހަލަ އަޑުތައް އިވެންފެށިއެވެ. މޫސަބެއަށް ބައެއްފަހަރަކު މީހަކު ގޮވާ އަޑާ އަދި ކުޑަ ކުއްޖާ ރޯއަޑު ކެނޑިނޭޅި އިވެމުންދެއެވެ. އަދި އެ ނިމުނީކީ ނޫނެވެ. ކުޑަކުދިން ދުވާއަޑާ އަންހެނުން ހޭ އަޑުވެސް އިވެއެވެ. މި ކުޅިގަނޑު ނިމުނީ ފަތިސްނަމާދު ބަންގި ގޮވުމުންނެވެ. މޫސަބެ ފޮނުވާލުމަށް އާދަމްބެއާ ބަކުރުބެއައެވެ. އެ ދެމީހުންނަށް އެރޭ ހިނގި ހުރިހާ ކަމެއް ކިޔާދިނެވެ. މޫސަބެ ގޮވައިގެން އެ ދެމީހުން ޖޯލީގައި އިށީނދެފައި ބަކުރުބެ ފަށައިގަތެވެ.

” މޫސާ. މި އިންޖީނުގެއަށް ރޭގަ އަހަރެންނެއް ނާންނަން އަހަރެން އޮތީ ގަދަ ނިދީގައި އެންމެ ކުޑަމިނުން ކަރަންޓު ދިޔަކަންވެސް އިހުސާސްއެއްނުވޭ. ދެން ތި އިވޭ އަޑުތައް. އަހަރެން އެންމެ ފުރުތަމަވެސް އާދަމްބެ ކައިރި އެހިން މޫސަބެއަށް މިކަން ވާނެހޭ. އާދަމްބެ ބުނި ވާނެޔޭ ބުނީމަ މި ގެނައީ. މޫސަ ކައިރި މި ބުނަނީ މި އިންޖީނުގެ ހަދާފައި މިހުރީ ގަބުރުސްތާނެއް މަތީގައޭ. މިތަނުގެ އަހުލުވެރިންގެ އަޑު ކޮންމެ ރެޔަކުވެސް އިވޭނެ އެކަމާ އަޅާނުލުން އެންމެ ރަނގަޅުވާނީ. މިގޮތަށް ނޫނީ މިވަޒީފާ އަދައެއްނުކުރެވޭނެ. މިތަނަށް އައި އެކަކުވެސް މިތަނުގެ ހަގީގަތް އެނގުމަށްފަހު ވަޒީފާއަކަށް ނުނުކުމޭ. ވީމާ މޫސަގެ ނިންމުމަށް އަހަރުމެން އިހްތިރާމްކުރާނަން ”

ބަކުރުބެ ވާހަކަ ނިމުމުން މޫސަބެ ފުންކޮއް ވިސްނާލިއެވެ. އަދި ކޮންމެ ކަމެއް ވިޔަސް މަޑުކުރަން ނިންމިއެވެ. ސަބަބަކީ މޫސަބެމެން ކަހަލަ މީހުންނަށް ގިނަފަހަރު ވަޒީފާވެސް ނުލިބޭތީއެވެ

ފެބްރުއަރީ 14 ގެ ހަގީގަތްވަނީ އެތައް ގޮތަކަށް ހާމަކުރެވިފައެވެ. ނަމަވެސް އެ ހަގީގަތް ގަބޫލްކުރަނީ މިއަދު މަދު ބައެކެވެ. ކްރިސްޓިއަން ފާދިރީ ވެލެންޓެއިންގެ ހަނދާން އާކުރުމުގެ ގޮތުން ލޯބިވެރިންގެ ދުވަހޭކިޔައިގެން الله سبحان و تعالىٰ ނަހީ ކުރެއްވި އެތައް ފާފައަކަށް މިއަދު ޒުވާން ހިތްތައްވަނީ އަރައިގެންފައެވެ.

ސޮބީހާއަކީ ގްރޭޑް އަށެއްގައި ކިޔަވަމުން އަންނަ ކުއްޖެކެވެ. މޮޅެތި ވަނަތައް ހޯދައި އޭނާގެ މައިން ބަފައިން އުފާކޮއްދޭ ކުއްޖެކެވެ. ސޮބީހާ އަބަދުވެސް ކޮންމެ ހަފްތާއަކު އެއްފަހަރު އިތުރުގަޑި ކްލާސް ނަގައެވެ. އެއީ އޭނާގެ ކިޔެވުން އިތުރަށް ރަނގަޅުކުރުމަށްށެވެ. ސޮބީހާއަށް އެންމެ ބޮޑަށް އެހީވަމުން އަންނަނީ އޭނާ އެންމެ އިތުބާރުކުރާ އެކުވެރިޔާ އާތިރުއެވެ. އާތިރުއާ ސޮބީހާ ދިމާވެފައިވަނީ ޓިއުޝަން ނަގަންދާ ކްލާހުންނެވެ.

ސޮބީހާ ތާކަށް ދިޔަޔަސް މައިން ބަފައިންގެ ހުއްދަ ހޯދައިގެން އާތިރުއާއެކުގައި ދެއެވެ. އާތިރު އަބަދުވެސް ސޮބީހާ އެގާރާއިގެ ކުރިން ގެއަށް ގެނެސްދެއެވެ. ދުވަސްތައް ފާއިތުވަމުންގޮސް ސޮބީހާއާ އާތިރުގެ ގުޅުން އިތުރަށް ވަރުގަދަވެ ލޯތްބަށް ބަދަލްވެގެން ދިޔައެވެ. މިކަން ދެމީހުންވެސް ސިއްރިއްޔާތުގައި ކުރިޔަށް ގެންދިޔައެވެ. މައިންބަފައިންނަށް އަންގާލުމެއްވެސްނެތިއެވެ. ކޮންމެއަކަސް އެކަކު އަނެކަކު ދުރު ނުވެވޭވަރަށް ލޯބިވެއްޖެއެވެ. ޗާލު ފޮޓޯތައް ނެގުމާއި ދަންވަރު ފޯންކުރުން ގިނަވެއްޖެއެވެ. ކުރިމައްޗަށް އޮތީ ލޯބިވެރިންގެ ދުވަސްކަމުން އާތިރު އެދުވަސް އޭނާގެ ލޯބިވެރިޔާ ސޮބީހާއަށް ހާއްސަކޮއްލަން ބޭނުންވިއެވެ. މިގޮތުން އެކި ހޮޓަލްތަކުން އެދުވަހަށް ހުރި ޕެކޭޖްތައް ބަލާ އެންމެ އަގުބޮޑު އެންމެ ޙިދްމަތް ރަނގަޅު ހޮޓަލުން ތިންހާހުގެ ޕެކޭޖެއްނަގާ ކޮޓަރި ބުކްކޮއްފިއެވެ.

ފެބްރުއަރީ ސާދަވަނަ ދުވަސް އައުމުން އާތިރު ސޮބީހާއަށް ހެޕީ ވެލެންޓައިންސްޑޭ ޖަހާފައި މެސެޖެއް ކުރިއެވެ. ބަދަލުގައި ސޮބީހާ ތީ ކާފިރުން ފާހަގަ ކުރާ ދުވަހެއްނޫންހޭ ޖަހާ މެސެޖްކޮއްލިއެވެ. ނަމަވެސް އާތިރު ދުލެއް ނުކުރިއެވެ. އެންމެ ފަހަރަކު އެދުވަސް ފާހަގަ ކޮއްލުމަކީ ކުށަކަށް ނުވާނެކަމަށްބުނެ އެތައް މެސެޖެއްކޮއް ސޮބީހާ އެމަޅީގައި ޖައްސާފިއެވެ. އެރޭ ސޮބީހާ މައިންބަފައިންކައިރީ އާތިރުއާ ދެމީހުން ކުރިޔަށް އޮތް އިމްތިހާނަށް ތައްޔާރުވުމަށް އިތުރުގަޑީ ކްލާހަށް ދާކަމަށްބުނެ އާތިރުއާއެއްކޮށް ބޭރަށްދިޔައެވެ. އެތައް ދުއްވުމެއް ދުއްވުމަށްފަހު އައިސް ކޮޓަރި ނަގާފައިހުރި ހޮޓަލްއަށް ސޮބީހާ ގޮވައިގެން އައެވެ. ކީކުރަން އައި ތަނެއްތޯ ސޮބީހާ އަހާލުމުން އާތިރު އޭނާ އަތުގައި ހިފައިގެން ބުކް ކޮއްފައި އިން ކޮޓަރިއަށް ދިޔައެވެ. ދޮރު ހުޅުވާލިއިރު ފިނިފެންމާތަކަކުން އެނދުގައި ހިތެއް އަޅާފައިއޮތެވެ. މި މަންޒަރު ފެނިފާ ސޮބީހާ ވަރަށް ހައިރާންވިއެވެ، އަދި އުފަލުން އާތިރު ގައިގާ ބާރަށް ބައްދާގަތެވެ. ގިނައިރުތަކެއް ނުވެ ދެމީހުން ތިބީ ހެއްދެވިގޮތަށްށެވެ. ފާހިޝް ބޮޑު އަމަލްކަމަށްވާ ޒިނޭގެ އަރާމުގައެވެ.

ގަޑިން ބާރަޖެހީއެވެ. ސޮބީހާ ގެއަށް ނާންނާތީ ކަންބޮޑުވެފައި ތިބި ބެލެނެވެރިން ދިޔައީ އޭނާ ފޯނަށް ގުޅަމުންނެވެ. ނަމަވެސް ޖަވާބެއްނުދެއެވެ. މިކަމާ ކަންބޮޑުވެގެން އާތިރުގެ އާއިލާއަށްވެސް ގުޅާފިއެވެ. ފޯނުނެގީ އާތިރުގެ ބައްޕައެވެ. ނެގުމާއެއްކޮއް ރޮއެ ހޭރިގަނެ މިވެނި ހޮޓަލެއް ކައިރިއަށް ވަރަށް އަވަހަށް އައިސްދިނުމަށް އެދުނެވެ. ސޮބީހާގެ އާއިލާއިން އެ ހޮޓާ ކައިރިއަށް ދިޔަތަނުން އާތިރުގެ ބައްޕަ އައިސް ސޮބީހާ ބައްޕަ ގައިގާ ބާރަށް ބައްދާގަނެ ހިތްވަރުކުރުމަށް ބުނެލިއެވެ. ވެގެން އުޅޭގޮތް ސާފުކޮއްދިނުމަށް ސޮބީހާގެ ބައްޕަ އެދުމުން އާތިރުގެ ބައްޕަ ސޮބީހާ ބައްޕަ ގޮވައިގެން އާތިރު ހިފި ކޮޓަރި ކައިރިއަށް ދިޔައެވެ. އެހިނދު ސޮބީހާ ބައްޕަ ދޮރުހުޅުވާލުމާއެކު ފެނުން މަންޒަރުން ހިތް ކުދިކުދިވިއެވެ. ސޮބީހާއާ އާތިރުވަނީ ޒިނޭގެ އަމަލްމަތީގައި މަރުވެފައެވެ. އެ ދެމީހުންގެ ލޯބިވެރިންގެ ދުވަސް ވެގެން ދިޔައީ އެމީހުންގެ ހަޔާތުގެ އެންމެ ފަހު ދުވަހަށްށެވެ.

ހެޔޮނިމަމަކީ ކޮންމެ އިންސާނަކުވެސް ދެކެން ބޭނުންވާނެ ދުވަހެކެވެ. ދުނިޔޭގައި ކުރެވުނު ހެޔޮއަމަލެއްކޮއް الله سبحان و تعالىٰ ގެ އަރިހަށް ދިޔުމަށް ދަތުރުހަދަނީ މިއަދު އެތައް ބަޔެކެވެ. އެކަލާނގެ ވައުދު ކުރައްވާފައިވާ ސުވަރުގެ ލިބިގަތުމަށް އެބައި މީހުންވަނީ ދަހިވެތިވެފައެވެ. ނަމަވެސް ފަނާވަމުންދާ މި ދުނިޔޭގައި އެދަތުރު ދާން ނުއެދޭމީހުންވެސް ލައްކަ ގިނައެވެ. ތިމާ ހިތުހުރިގޮތަކަށްއުޅެ ތިމާގެ ނިމުން އަންނަން އޮތްގޮތާމެދުވެސް ވިސްނާނުލައެވެ. ހަމަކަށަވަރުން އެބައި މީހުންނަށް الله سبحان و تعالىٰ ވައުދުކުރައްވާފައިވާ ނަރަކަވަނީ ތައްޔާރުކުރެވިފައެވެ. އެތަނަކީ ޙިޔާލަށް ނުގެނެވޭހާވެސް ބިރުވެރި ތަނެކެވެ.

އުބެއިދުއަކީ އެހާ ރަނގަޅު ޒުވާނެއްނޫނެވެ. ހަތަރުދަމު އުޅެނީ ބޭރުގައެވެ. މާރާމާރީއާ އެކި ފާޑުފާޑުގެ ނުބައި އަމަލްތައް ހިނގައެވެ. މުސްކުޅިއެއް ޒުވާނެއް އަދި ކުޑަކުއްޖެއް އޭނާއަކަށް ނޯވެއެވެ. އޭނާގެ ދޫ އެހާމެ ހަޑިއެވެ. މުޙާތަބުކުރުންވެސް ހަމަ މުޑުދާރެވެ. މީހާ ލާ އަންނައުނު ހުންނަނީ ތަންތަނުން އިރައިގެން ގޮސްފައެވެ. ކަރުގަ ބޮޑެތި ފައްތައް އަޅާ ތޮރުފުނު ތަނަކުން ތޮރުފާ މުދިލައްވައިގެން އޭނާގެ ހުރި ގައްޑާކަން އެހެން މީހުންނަށް ދައްކައެވެ.

އެއްދުވަހެއްގެ ހަވީރުވަގުތެވެ. އުބެއިދު އާ އޭނާގެ އެކުވެރިން ކަންތައް ގަނޑެއް ރޭވުމަށް ސައްލާކުރަން މަގުމަތީ ތިބިއެވެ. އާއްމުކޮއް އެ ސަރަހަދުން އިސްލާމީ ރިވެތި ފޭރާމުން ފޮރުވިގެންވާ އުޙްތެއް ހިނގާ ބިނގާވެ އުޅޭތީ އެ އުޙްތާއަށް ޖެއްސުންކުރުމަށް އުބެއިދު ހުރީ ފާރަ ލައިގެނެވެ. އެ އުޙްތާ އަންނަތަން ފެނުމުން އުބެއިދު ފުރުތަމަ ކަމަކަށް އެ އުޙްތާއާ ސަލާމްކުރަން އަތްދިއްކޮއްލިއެވެ. ނަމަވެސް އެ އުޙްތާ އޭނާ ފަހަނައަޅާ ދާންފެށުމުން ބޯންހުރި މައިލޯ ޕެކެޓް އެ އުޙްތާ ގަޔަށް އެއްލިއެވެ. މައިލޯ ޕެކެޓް ޖެހުމާއެއްކޮއް އޭގާ ހުރި މައިލޯތައް އުޙްތާގެ މުޅި ހެދުމަށް ބުރައިގެން ދިޔައެވެ. އުޙްތާ އެނބުރި އުބެއިދުއާ ދިމާލަށް އައިސް ހަމަކޮއްފައި އޭނާ އެކުރި ކަންތަކަށް މައާފްކޮއްފިން ކަމަށް ބުނުމަށްފަހު ހިނގައިގަތެވެ. އެބަސްކޮޅުން އުބެއިދުގެ ހިތައް އެއްވެސް އަސަރެއްނުކޮއް ޖެހިގެން އަންނަ ދުވަހު ދިމާކުރަން ނިންމިއެވެ.

ޖެހިގެން އައި ދުވަހު އެއްގަޑިއެއްގައި އުޙްތާއާ ދިމާކުރުމަށް އުބެއިދު ތައްޔާރުވިއެވެ. އުޙްތާ އަންނަތަން ފެނުމުން އުބެއިދު ބޯ ކަހާކަމަށް ހަދަމުން ގޮސް އުޙްތާގެ މޫނު ނިވާކޮއްފައިވާ ފޮތިކޮޅަށް ދަމައިގަތެވެ. އެވަގުތު އުޙްތާގެ ފޮތިކޮޅު ނެއްޓުނެވެ. ނަމަވެސް ހެދުމުން މޫނު ވަގުތުން ނިވާކުރިއެވެ. އަދި އުބެއިދު ކުރި އަމަލަށް މައާފްދީޕީމޭ ބުނެލިއެވެ. މި ބަސްތަކުން މިފަހަރު އުބެއިދުގެ ހިތް ގުޑުވާލިއެވެ. އަދި ކުރެވުނު ކަންތަކާ ފުރުތަމަ ފަހަރަށް ލަދުގަތެވެ. އަދި ގެއަށްވަދެ ފުން ވިސްނުމަކަށް ވެއްޓިގަތެވެ. އުބެއިދު އިހާނެތިކޮއް އެ އުޙްތާއަށް ކަންކުރިއިރުވެސް މައާފް ދޭތީ އޭނާ ހަމަ ހައިރާންވިއެވެ. ނަމަވެސް ވިސްނުމުން ނެރުނީ އައި ފޯންއަކުންނެވެ. އެއީ އުބެއިދުގެ ރަހްމަތްތެރިންނެވެ. އުބެއިދުގެ ރައްޓެއްސަކު މަރަށް ތެޅޭތީ އައިސް ދިނުމަށް އެދުނެވެ. އުބެއިދު ދުވެފައި އޭނާގެ ރަހްމަތްތެރިޔާ ކައިރިޔަށް ދިޔައެވެ. އަދި ކައިރީ އިށީނެވެ. ކިހިނެއްވަނީތޯ ސުވާލުކުރުމުން ރަހްމަތްތެރިޔާގެ މޫނުމަތިން ބިރުވެރިކަން ފާޅުވިއެވެ. ހުރިހާ ރައްޓެހިން އޭނާ ހިފަހައްޓައިގެން ތިބި އިރު ދެފައި ތަޅަތަޅާފައި ހީވަނީ ފިލަން ދުވަން އުޅޭހެންނެވެ. އިރުކޮޅަކުން ނޭވާހާސްވާތީ ކަރުގައި ދެ އަތްއެޅިއެވެ. ހީވަނީ މީހަކު އޭނާ ކަރަށް ފިއްތާލައިގެން ހުރިހެނެވެ. ދެލޯ ބޮޑުވިއެވެ. ނުބައި އަޑެއް ނެރުނެވެ. އެއަށްފަހު އޭނާގެ ފުރާނަ ހަށިގަނޑާ ވަކިވެއްޖެއެވެ.

ރަހްމަތްތެރިޔާގެ ޖަނާޒާގެ ހުރިހާ ކަމެއްކޮއް ވަޅުލެވިއްޖެއެވެ. އުބެއިދު ގެއަށްގޮސް ބޯ ހަމަޖައްސާލުމަށް މީސްމީޑިއާއަށްވަނެވެ. ނަމަވެސް އެކުވެރިޔާ މަރުވިވަގުތު ކަންހިނގި ގޮތް އޭނާގެ ހިތާ ސިކުނޑިއަކުން ފުހެނުލެވުނެވެ. މިކަމާ އޭނާ ވަރަށް ބޮޑަށް ވިސްނިއެވެ. އަދި އިންޓަނެޓްގެ ޒަރިއްޔާއިން އެކި އެއްޗެހި ހާވަމުން ދަނިކޮއް ކުރު ދަރުސްއެއް ފެނުނެވެ. އެއީ މަރާ ބެހޭގޮތުން ބޭރުގެ ޝެއިޙްއެއް ދެއްވާފައިވާ ދަރުހެވެ. ފަސް މިނިޓްގެ އެ ދަރުސް އަޑުއަހާ ނިމުން އިރު އުބެއިދުގެ ދެލޯވަނީ ކަރުނައިން ފޯވެފައެވެ. އެންމެ ފުރުތަމަ ކަމަކަށްވެސް ނިންމީ އުޙްތާއާ ބައްދަލްކޮއް މައާފްއަށް އެދުމަށްށެވެ. މިގޮތުން އުޙްތާ ފެނޭތޯ އެތައް ދުވަހަކު އުބެއިދު ހަވީރުގަޑީ އިންތިޒާރުގައި މަޑުކުރެއެވެ. ނަމަވެސް ދިމާނުވުމުން އެ އުޙްތާ ހޯދުމުގެ މަސައްކަތް އެކި ގޮތްގޮތަށްފެށިއެވެ. ވަރަށް ގިނަގުނަ މަސައްކަތުން އުޙްތާގެ ނަމްބަރުވެސް ހޯދިއްޖެއެވެ. އެތައް އިރަކު ނަމްބަރަށް ބަލަހައްޓައިގެން އިން އުބެއިދު އެންމެ ފަހަށް ގުޅާލިއެވެ. ދެ ރިންގް ވީތަނުން އުޙްތާ ފޯނު ނެގިއެވެ. ނެގުމާއެކު އުބެއިދު ސަލާމް ގޮވާލިއެވެ. ޖަވާބުގައި އުޙްތާ ސަލާމް ބަލައިގަތެވެ. އުބެއިދު ވަގުތުން މައާފްއަށް އެދުނެވެ. އަދި ގުޅައިގެން ހުރީ އުބެއިދުކަން ކިޔާދިނެވެ. އަދި ރަހްމަތްތެރިޔާގެ ހާދިސާ އުޙްތާއާ ހިއްސާކުރިއެވެ. އުޙްތާ ފުން ނޭވާއެއްލުމަށްފަހު އުބެއިދުއަށް ދުނިޔޭގައި ހުއްޓާ الله سبحان و تعالىٰ އެ ދެއްވީ އިންޒާރެއްކަން ބުނެލިއެވެ. ލޯ މައްޗަށް އެ ދެއްކެވީ އިންސާނަކު ނުބައި މަރެއްގައިވާތަންކަން ބުނެދިނެވެ. އަދި އިސްލާހްވުމަށް ނަސޭހަތްތެރިވިއެވެ. އުބެއިދު އުޙްތާގެ ބަސް ގަބޫލްކުރިއެވެ. އަދި ފަހު ސުވާލެއްގެ ގޮތުން އުޙްތާއާ ބައްދަލްވާނީ ކޮންދުވަހަކުންތޯ އަހާލިއެވެ. ޖަވާބުގައި އުޙްތާ ބުނެލީ އެންމެ ވާހަކައެކެވެ. އުބެއިދު އިސްލާހްވުމަށް ފަހު ދެ ހެކިވެރިން ގޮވައިގެން އައުމަށްށެވެ.

މިއަދު އުބެއިދުއަކީ ހެޔޮލަފާ ޒުވާނެކެވެ. ހެޔޮކަންތަކަށް ގިނަގިނައިން ގޮވާލާ ޒުވާނެކެވެ. އޭނާގެ ދޫ ވަނީ ހުސްވަގުތެއްވެއްޖެނަމަ الله سبحان و تعالىٰ އަށް ޒިކުރުކުރުން މަތީގައެވެ. އެންމެ ނަމާދެއްވެސް ވައްޓާނުލައެވެ. މަހަކު ޙަތިމްއެއް ކުރެއެވެ. މިއަދު އުބެއިދު ގަދައަޅާ އެ މަސައްކަތްކުރަނީ ހެޔޮ ނިމުމަކަށްށެވެ.

ކައިވެނި ކުރުމަކީ އިސްލާމްދީން ބާރުއަޅާކަމެކެވެ. ކައިވެނީގެ ސަބަބުން އެތައް ފާފަޔަކާ އިންސާނާ ދުރުކޮއްދެއެވެ. އުފާވެރި ހަޔާތެއްފެށި ކުރިޔަށް ދިޔުމަށް ދެމީހުންގެ އިތުބާރަކީވެސް އެހާމެ މުހިންމު އެއްޗެކެވެ.

ޒުހޭރު އާ ޝަކީބްއަކީ ދެ އެކުވެރިންނެވެ. ޒުހޭރުއަކީ ނިކަމެއްޗެކެވެ. އެހާ މޮޅަށް ކިޔެވިފައިވާ މީހެއް ނޫނެވެ. ޒުހޭރަކީ މުދާ އުފުލާ ބޯޓެއްގައި ކުޑަ އާމްދަނީއަކަށް ބުރަކޮއް މަސައްކަތްކުރާ މީހެކެވެ. ނަމަވެސް ޝަކީބްއަކީ ހެޔޮވަރެއްގެ މުއްސަނދިކަމެއް ލިބިފައިވާ މީހެކެވެ. އޭނާއަކީ ބޭރުން ތައުލީމް ހާސިލްކޮއް ސްކޫލެއްގައި ކިޔަވާދެމުން އައި މީހެކެވެ.

އެއްދުވަހަކު ދެ އެކުވެރިން ދިމާވެގެން ސައިބޯން ހޮޓަލަށްވަނެވެ. ޝަކީބް ޒުހޭރުކައިރީ ހާލު އަހުވާލު އޮޅުން ފިލުވާލިއެވެ. އަދި އަތްމަތި ދަތިނަމަ އެހީވާން ބޭނުން ވާހަކަ ބުނެލިއެވެ. ޖަވާބުގައި ޒުހޭރު ކުރާ ބުރަ މަސައްކަތުން އޭނާއަށް ފުދޭކަމަށް ބުނެލިއެވެ. ޝަކީބް އޭނާގެ ރަހްމަތްތެރިޔާ އެކަނި އުޅޭތީ އެކަމާ ހިތާމަ ކުރާ ވާހަކަ ބުނެލިއެވެ. އަދި ރަނގަޅު ބައިވެރިޔަކު ހޯދުމަށް ނަސޭހަތްދިނެވެ. ޖަވާބުގައި ވަރަށް ދެރަވެލާފައި ޒުހޭރު ކަހަލަ ކުޑަ އާމްދަނީއެއް ލިބޭ މީހަކާ އިންނާނީ ކާކުހޭ ބުނެލިއެވެ. އެހިނދު ނަމާދުކޮއް ގިނަ ގިނައިން ދުއާ ކުރުމަށް ޝަކީބް ނަސޭހަތްދިނެވެ. ޖަވާބުގައި ނަމާދުކޮއް ދުއާ އަބަދުވެސް ކުރާ ވާހަކަ ޒުހެރު ބުނެލިއެވެ. ސައިބޮއެގެން ދެ ރަހްމަތްތެރިން އެކަކު އަނެކަކަށް އަލްވަދާއު ކިޔާ އެދުވަހަށް ވަކިވިއެވެ.

ޒުހޭރުއާ ވަކިވިތާ ތިން މަސްފަހުން ޝަކީބްއަށް ފޯނުކޯލްއެއްއައެވެ. އައި ފޯންކޯލްއަކީ އުފާވެރި ޙަބަރެވެ. ޒުހޭރު ކައިވެނިކޮއްފިކަމެވެ. މިކަމުގެ އުފަލުގައި ބައިވެރިވާކަމަށް ޝަކީބު ބުނެލިއެވެ. އަދި ދެމަފިރިންނަށް ރަނގަޅަށް ނަސޭހަތް ދިނުމަށްފަހު ފޯނު ކަނޑާލިއެވެ. ޒުހޭރު ފޯން ބާއްވާފައި އޭނާގެ އަނބި މީހާއާއެކު ވަގުތުތައް ގުނާ އުފާވެރި ދުވަސްތަކައިގެން ކުރިޔަށް ދިޔައެވެ. ލިބޭ ކުޑަ އާމްދަނީގެ ބޮޑުބައި އަނބި މީހާއާ ހަވާލުކޮއް ދަތުރުވަރެއްގައި އައިސް ސައިބޯލެވޭވަރަށް އަތުގައި ޒުހޭރު ލާރި ބަހައްޓައެވެ.

ކައިވެންޏަށް ތިން އަހަރުވީއެވެ. ނަމަވެސް ދެމަފިރިންނަށް ދަރިޔަކު ނުލިބެއެވެ. މިކަން އަބަދުވެސް
ދަތުރުވަރެއގައި އާދެވުމުން އެކުވެރި ޝަކީބްއާ ޒުހޭރު ހިއްސާކުރެއެވެ. އަދި އެހެން މީހަކާ އިންނާކަށް ހިޔާލުވެސް ނުކުރާ ވާހަކަ ބުނެލިއެވެ. ސަބަބަކީ އަލަތު އަނބި މީހާއަށް އެކަމުން ހިތާމައެއް ލިބިދާނެތީއެވެ. ޒުހޭރުގެ ވާހަކަތައް އަޑުއަހާފައި ހިތްވަރުކުރުމަށް ޝަކީބް ނަސޭހަތްދިނެވެ. އަދި ދުއާކުރުން ހުއްޓާ ނުލުމަށް ނަސޭހަތްދިނެވެ. ޒުހެއިރު ރަށަށް އައުމުން އަނބި މީހާ ޒުހެރުއަށް ކާންދީހަދާފައި އޮލަ ވާހަކަތަކަށް ވެއްޓިގަތެވެ. ދެމީހުން ސަކަރާތުގައި ވަގުތުތައް ހޭދަކުރިއެވެ. އެކަކު އަނެކަކު ލޯބި ހާމަކޮއް އުފާކޮއްދީ ހިތްހަމަ ޖައްސާދިނެވެ.

އެއްދުވަހެއްގެ ހެނދުނެވެ. ޒުހޭރު ގެއަށް އައި އިރު އަންހެނުން އޮތީ ބިންމައްޗަށް ވެއްޓިފައެވެ. ނަގައިގަނެގެން މަރުކަޒަށް ގެންދިޔައެވެ. ޑޮކްޓަރު ބަލާފައި ހިނިތުންވުމާއެކު ދިނީ އުފާވެރި ޙަބަރެކެވެ. ޒުހޭރު ބައްޕައަކަށް ވާ ވާހަކައެވެ. މި ބަސްތައް އިވުމާއެކު ހުރިތަނަށް ޒުހޭރު ޝުކުރުގެ ސަޖިދަޖެހިއެވެ. އަދި އުފާވެރި ޙަބަރު ރަހްމަތްތެރި ޝަކީބްއަށްދިނެވެ. އަދި މާބަނޑު ދުވަސްވަރު ބައެއް ޙަރަދު ބަރަދު ބޮޑުވެދާނެތީ ކުޑަ އެހީއެއް ލިބޭނެތޯ އަހާލިއެވެ. ނަމަވެސް އެކުވެރިޔާ ދިނީ ހިތާމަވެރި ޙަބަރެކެވެ. އޭނާވެސް އަނބިދަރިންގެ ޙަރަދުތައް ހުރިގޮތުން މިވަގުތު ދަތި ވާހަކައެވެ. ހިތާމައާއެކު ފޯނު ބާއްވާލުމަށްފަހު އަންހެނުން ގޮވައިގެން ގެއަށް ދިޔައެވެ. ޒުހޭރުގެ މާޔޫސްވެފައިވާ މޫނު ފެނުމުން އަންހެނުން ކޮން ކަމަކާތޯ ކަންބޮޑުވެފައިހުރީ އަހާލިއެވެ. ޖަވާބުގައި ހުރިހާ އެއްޗެއް ކިޔާދިނުމުން އަންހެނުން ފުން ނޭވާއެއްލުމަށްފަހު ޒުހޭރު ބޮލުގައި ފިރުމާލާފައި ހާސްނުވުމަށް ބުނެލިއެވެ. އަދި އަލަމާރިއަށް އިޝާރާތްކޮއް އޭގައި އިން އަންހެނުންގެ ކުޑަ އަންނައުނު އަޅާ ފޮށި ގެނެސްދިނުމަށް އެދުނެވެ. ފޮށި ގެނައުމުން އެ ހުޅުވާލުމަށް އަންހެނުން ޒުހޭރު ކައިރީ އެދުނެވެ. މާޔޫސްވެފައި އިން ޒުހޭރު އެ ފޮށި ހުޅުވާލިއެވެ. ދެލޯ ދިޔައީ ބޮޑުވެގެންނެވެ. މުޅި ފޮށި ފުރާ ހުރީ ހުސް ފައިސާއެވެ. މިކަމާ ހާސްވެގެން ކޮންތާކުން ހޯދި ފައިސާއެއްތޯ ސުވާލު ކުރިއެވެ. ޖަވާބުގައި އަންހެނުން ހިނިތުންވެލާފައި އެއީ ޒުހޭރު އޭނާއަށް ކުރި އިތުބާރުގެ ނަތީޖާކަން ބުނެލިއެވެ. ކޮންމެ މަހަކު ލިބޭ ކުޑަ އާމްދަނީއިން އަންހެނުނާ ހަވާލު ކުރި ފައިސާ ބޭނުން ކުރުމަށް ފަހު ބާކީ ކަމަށް ބުނެލިއެވެ. ޒުހޭރު މިކަމާ ބުނާނެ އެއްޗެއް ނޭންގުނެވެ. ލޮލުން ކަރުނަ ފޯވިއެވެ. އަދި الله سبحان و تعالىٰ ދެއްވި ނިއުމަތެއް ފަދަ ޙަޒާނާއަށް ޝުކުރު ދެންނެވިއެވެ.

– ނިމުނީ –

މިދުނިޔޭގައި އިންސާފް ހޯދުމަކީ ދަތިކަމެކެވެ. ނުފޫޒާ ބާރު އޮތް މީހުންގެ ސަބަބުން އެތައް ބަޔަކުވަނީ އިންސާފް ލިބުމަށް މަހްރޫމްވެފައެވެ. ނަމަވެސް އެންމެ އިންސާފްވެރި ދުވަސް އައުން އޮތީއެވެ. އެދުވަހަކުން އެމީހަކު ކުރި ކަމެއްގެ ޖަޒާ އެމީހަކަށް ދެއްވާނީ އެންމެ އިންސާފްވެރި الله سبحان و تعالىٰ އެވެ.

ނަބީލްއަކީ ނިކަމެތި އާއިލާއަކަށް ނިސްބަތްވާ ކުއްޖެކެވެ. ކިޔެވުމުގައި ރަނގަޅު ވަނަތައް ހާސިލްކުރަމުން އަންނަ ކުއްޖެކެވެ. ނަބީލްގެ ހުވަފެނަކީ ގަނޫނީ ވަކީލަކަށްވުމެވެ. ކިޔެވުމަށް ފައިސާ ހޯދުމަށް ނަބީލް ނުކުރާކަށް މަސައްކަތެއްނެތެވެ. މަސައްކަތުން ލިބޭ އާމްދަނީ މަންމަ އަތަށް ފޮރުވަންދެއެވެ. އަދި ބޭނުން ކުރަނީ މަދު ފައިސާކޮޅެކެވެ. ލިބޭ އާމްދަނީއަށް އަބަދުވެސް ނަބީލް ޝުކުރުކުރެއެވެ. އަދި ގަވައިދުން ނަމާދުކޮއް ކާމީޔާބު ދެއްވުމަށް އެދި الله سبحان و تعالىٰ އަށް އަބަދުވެސް ދުއާ ދަންނަވައެވެ.

ނަބީލްގެ އެކުވެރި ޝާމްއަކީ އޭނާއަށް އެންމެ ހިތްވަރުދެމުން އައި ރަހްމަތްތެރިޔާއެވެ. ޝާމްއަކީ އޭނާގެ އާއިލާގެ ހުރި ހަމައެކަނި ދަރިއެވެ. މަންމައާ ބައްޕަ އެންމެ ލޯބިވާ ރަންދަރިއެވެ. ޝާމްއަކީ ކިޔަވާ ނިންމައިގެން ރަނގަޅު ވަޒީފާއެއް އަދާކުރާ ޒުވާނެކެވެ. ނަބީލް ކުރަމުން އައި މަސައްކަތްތައްފެނި އެކަމާ ހަމްދަރުދީވެ ޝާމް ކައިރިއަށް މަސައްކަތު އައުމަށް ދައުވަތުވެސްދިނެވެ. ނަމަވެސް ނަބީލް ބުނަނީ އޭނާ ކިޔަވާނީ މީހެއްގެ އެހީއާ ނުލައެވެ. ޝާމްއަށް އެ ޖަވާބު ބައެއްފަހަރު ވަރަށް މަޖާވެއެވެ. އަދި ސަމާސާއަށްވެސް ބަނގާޅީއޭ ކިޔާ ނަބީލްއާ ދިމާކުރުމުން ނަބީލްވެސް ދޫނުދީ މިއީ ބޮންދެކޭ ބުނެލައެވެ.

އެއްދުވަހެއްގެ ހެނދުނެވެ. މަސައްކަތުގައި ނަބީލް އުޅެނިކޮއް ޝާމް ސައިކަލްގައި އައިސް ސައިބޯންދާން ދައުވަތުދިނެވެ. އެކުވެރިޔާގެ ދައުވަތު ގަބޫލްކޮއް ސައިބޯން ދިޔައެވެ. ވާހަކަތަކަށް ގެއްލި ވަގުތު ހިނގައްޖެއެވެ. ޝާމް ނަބީލް ކައިރީ ސައިކަލް މަޑިދަށުގައި އޮތް ސިނގިރޭޓްފޮށި ނަގައިގެން އެބަ އަންނަމޭ ކިޔާފައި ނުކުތެވެ. މަޑި ހުޅުވާލައިގެން ސިނގިރޭޓު ފޮށި ނަގައި ނަބީލްއަށް ދައްކާލުމަށް އެނބުރުނު ވަގުތު ޝާމްގެ ކަރަށް މީހަކު ވަޅިއެއް ހަރާލާފިއެވެ. ވަޅި ހަރާލި މީހާ ރީތިކޮއް ނަބީލްއަށް ފެނުނެވެ. ބަލަން ނުއިނދެ ވެއްޓެމުން ދިޔަ ރަހްމަތްތެރިޔާ ހިފަހައްޓަން ދުއްވައިގަތެވެ. ޝާމްގެ ކަރަށް ވަޅިޖެހި މީހާ ދުވެފައިގޮސް ސައިކަލަކަށް އަރައިގެން ބާރު ބާރަށް ނައްޓާލިއެވެ. ރަހްމަތްތެރިޔާގެ މަރަށްތެޅި ފުރާނަ ވަކިވެގެން ދިޔައީ ނަބީލް ކުރިމަތީގައެވެ. ނަބީލްގެ ހަމައެކަނި އެކުވެރިޔާ މިދުނިޔެއާ ވަކިވީއެވެ. ކަން ހިނގާ ދިޔައިރު އެހީވުމުގެ ބަދަލުގައި ބަލަން ތިބި މީހުން ދިޔައި ފޮޓޯ ނަގާ ވީޑިއޯ ކުރެވޭތޯ ބަލަމުންނެވެ. ނަބީލް އެމީހުންނަށް ނަޒަރު ހިނގާލިއެވެ. އަދި އެއަށްފަހު ސީސީޓީވީ ކެމެރާތައް ހުރި ދިމާތައް ފާހަގަ ކުރިއެވެ.

އެކުވެރިޔާގެ ކަށުކަމާކެމީގެ ކަންތައްކޮއް ނިމި ވަޅުލެވިއްޖެއެވެ. ނަބީލް ބޭނުންވީ އޭނާގެ އެކުވެރިޔާއަށް އިންސާފް ހޯދާދޭށެވެ. މިގޮތުން ފުލުހުންނަށް ހާދިސާ ހިނގިގޮތުގެ ތަފްސީލް ކިޔާދިނެވެ. ކުއްވެރިޔާ ހުރި ސިފަތައްވެސް ކިޔާދިނެވެ. މާކަށް ގިނަދުވަހެއްނުވެ ކުއްވެރިޔާ އަތުކޮއްފިއެވެ. ކޯޓަށް އެތައް ފަހަރަކު ގެންދެވިއްޖެކަން ޙަބަރުތަކުން ގޮވިއެވެ. މިގޮތަށް މައްސަލަ ދާތާ މިހާރު ތިން އަހަރުވީއެވެ. ޖަލުން ކޯޓަށް ކޯޓުން ޖަލަށް ކުއްވެރިޔާ ގެންދާ ވާހަކަ ޙަބަރުތަކުގައި ލިޔެވިފައިވެއެވެ. އެންމެ ފަހަށް އިސްތިއުނާފަށް ހުށެހެޅި ޙަބަރުވެސް ނަބީލްއަށް ފެނިއްޖެއެވެ. އަދި ވާވަރަށް ހެކި ނުލިބުމުގެ ސަބަބުން ކުއްވެރިޔާ މިނިވަން ކޮއްފި ވާހަކަ ޙަބަރުގައި ލިޔެވިފައި އޮތްތަން ފެނުމުން ނަބީލް ގާތަށް ވަރަށް ރުޅިއައެވެ. އެންމެ ފަހަށް ކުއްވެރިޔާއާ އަމިއްލައަށް ދިމާކުރިއެވެ. ކީއްވެގެން ކުރި ކަމެއްތޯ އަހާލުމުން ލިބުނީ ވަރަށްވެސް ކުރު ހެއްވާ ޖަވާބެކެވެ. އެއީ އޮޅިގެން ކަމަށްށެވެ. މިކަމާ ނަބީލް ވަރަށް މާޔޫސްވިއެވެ. އަދި ކުރިއަށް އޮތްތާ ވަރުގަދަ އަޒުމަކާއެކީ އޭނާގެ އެކުވެރިޔާއަށް އިންސާފް ހޯދާދޭން މަސައްކަތްފެށިއެވެ. މިފަހަރު ކިޔަވަންފެށީ ގާނޫނީ ވަކީލަކަށް ވުމުގެ ނިޔަތަކު ނޫނެވެ. ގާޒީއަކަށްވުމަށްށެވެ.

އިންސާނުން ދުނިޔެ ފޮނުއްވާފައިވަނީ الله سبحان و تعالىٰ އަށް އަޅުކަން ކުރާށެވެ. އެގޮތުން އިންސާނުންގެ މައްޗަށް 5 ނަމާދު ކުރުމަށް އެކަލާނގެވަނީ އަމުރު ކުރައްވާފައެވެ. ނަމަވެސް މިއަދު އިންސާނުންވަނީ ހައްދުފަހަނައަޅާ ގޮސް ދުނިޔެއަށް ގެއްލިފައެވެ. ނަމާދަކީ ބޭނުން އިރަކު ކުރެވޭނެ އެއްޗެއްކަމަށް ގިނަމީހުން ދެކިގެން އުޅެއެވެ.

އަޒީޒްއަކީ ޒުވާނެކެވެ. ރީތިކަމާ މުއްސަނދިކަން އޭނާއަށް الله سبحان و تعالىٰ ވަނީ ދެއްވާފައެވެ. އަޒީޒްގެ މައިންބަފައިން ތިބެނީ އޭނާ އުޅޭ ގެއާ ދުރުހިސާބެއްގައި ކަމުން ކޮންމެ ހުކުރު ދުވަހަކު އޭނާ އެމީހުންނަށް ޒިޔާރަތްކުރެއެވެ. ނަމަވެސް އެ ޒިޔާރަތް އަބަދުވެސް ކުރުވެފައި އޮންނަނީ އަޒީޒްގެ މައިންބަފައިން އޭނާ އަޑުއަހަން ބޭނުންނުވާ ސުވާލުތައް ކުރާތީއެވެ. އަޒީޒްގެ މައިންބަފައިން އަބަދުވެސް އަޒީޒް ނަމާދު ކުރިންތޯ ސުވާލުކުރެއެވެ. ނަމަވެސް އަޒީޒް އެމީހުންނަށް ހެދުނު ދޮގެއް ހަދާ ވާހަކަ އޮޅުވާލަން މަސައްކަތްކުރެއެވެ. ނަމަވެސް މައިންބަފައިން އެމީހުންގެ ނަސޭހަތް އަޒީޒްއަށް ނުހުއްޓި ތަކުރާރުކުރެއެވެ. ނަމާދުގެ މުހިންމުކަމާ އޭގެން ލިބޭ ސަވާބާ ފައިދާގެ ވާހަކަތައް ކިޔަން ފެށުމުން އަޒީޒް އެގެއިން ނުކުމެގެން ދެއެވެ. ނަމަވެސް ދަނިކޮއްވެސް އަލްވަދާއުގެ ގޮތުގައި މައިންބަފައިން ބުނަނީ ދަރިފުޅާ ނަމާދެވެ.

މައިންބަފައިން ކައިރިން އާދެވުމާއެކު އަޒީޒް އޭނާގެ ދިރިއުޅުމައިގެން ކުރިއަށްދެއެވެ. ހަތަރުދަމު ފޯނުގައި ކުދިންނާ ވާހަކަ ދައްކައިގެން އޭނާގެ މުއްސަނދިކަމުގެ ވީޑިއޯތައް މީސްމީޑިއާގައި ހިއްސާކުރެއެވެ. އަދި ކޮންމެ ރެޔަކު ދުނިޔޭގެ އުފާތައް ހޯދުމަށް ކްލަބްތަކަށް ގޮސް މަސްތުވުންފަދަ ކަންކަންވެސް ކުރެއެވެ. މިގޮތުގައި ރޭ ހަތަރުދަމު ހޭދަކޮއްފައި ގެއަށް އަންނަނީ އިރުއެރުމުންނެވެ. މިގޮތަށް އަޒީޒްގެ ދުވަސްތައް ދާއިރު އޭނާ އެއްގޮތަކަށްވެސް އާޙިރަތާމެދު ވިސްނާނުލައެވެ. މީސްމީހުން މަރުވެގެން ގެންދާތަން އަޒީޒްއަށް ފެނުނަސް ކަންފުޅެއްވެސް ހިތަކަށް ނާރައެވެ.

އެއްރެޔެއްގެ ދަންވަރެވެ. އަޒީޒް ނައިޓް ކްލަބް ތެރޭގައި ފޯރިނަގާ އުފާތައް ހޯދަމުން ދިޔައެވެ. ފަހަރަކު އަންހެނެއްގައި ކޭއްތެމުން ފައިސާތައް އުކަމުން އޭނާ ބާރަށް ހީހީފައި ރާބޮއެހަދައެވެ. ނެށުމުގެ ފޯރީގައި ހުއްޓާ މީހުންތައް ހަޅޭއް ފަޅޭއްޖަހައިގެންފިއެވެ. ވެގެން އުޅޭގޮތް ބަލާލިއިރު މުޅި ކްލަބް ވަށާ ވަނީ އަލިފާން ރޯވެފައެވެ. އެތަނުން ނުކުމެވޭނެ ގޮތެއް ހޯދުމަށް އަޒީޒް މަސައްކަތްފެށިއެވެ. ކައުންޓަރު މައްޗަށް އަރާ ސީލިންގް ފަޅާލައިގެން ވެންޓިލޭޝަންތެރެއިން އަޅާފައި މަގުމައްޗަށް ނުކުތެވެ. އަޒީޒް ލޯ ކުރިމަތީ މުޅި ކްލަބް އަނދާ އަޅިއަށް ވެއްޖެއެވެ. އިރުކޮޅަކުން އަޒީޒް ފޯނު ރިންގްވާން ފަށާފިއެވެ. އެއީ އަޒީޒްގެ މައިންބަފައިންނެވެ. ފޯނު ނަގާ ކަންފަތުގައި ޖެހުނުތަނުން އަޒީޒް ސަލާމަތުން ހުރި ވާހަކަ ވަގުތުން މައިންބަފައިންނަށް އެނގިއެވެ. މައިންބަފައިން އަޒީޒްއަށް ދިމާވި ހާދިސާއާމެދު ވިސްނާ ފިކުރުކުރުމަށް ނަސޭހަތްދިނެވެ. އަދި އަވަހަށް ތައުބާވެ ނަމާދުކުރުމަށް ނަސޭހަތްދިނެވެ. ނަމަވެސް މައިންބަފައިންނަށް ބަހަނާ ދެއްކުމަށްފަހު ފޯނު ކަނޑާލާ އެވަރުކަމެއް ނޫންކަމަށް ހިތާ ކާރަށް އަރާ ގެއާ ދިމާލަށް ދިޔުމަށް ދުއްވާލިއެވެ. ހައިވޭ ހުރަސްކޮއް ޖަންގަލީގެ މަގުން ގެއާދިމާލަށް ދުއްވާ ދުއްވާ ހުއްޓާ ކުއްލިއަކަށް ކާރުމައްޗަށް ވެއްޓުނީ ގަހެކެވެ. ގަސް ވެއްޓުމާއެކު ކާރު ކޮންޓްރޯލުން ނައްޓައިގެން ގޮސް މަގުގެ އެއްފަރާތައް އަރިއަޅާލިއެވެ.

ޒަޙަމްވެފައިވާ އަޒީޒްއަށް އެހީވުމަށް މީހަކު ނާންނަތާ އެއްގަޑިއިރުވީއެވެ. ދުއްވާ އެއްޗެއްގެ ހިލަމެއްވެސް އެމަގަކަށްނުވެއެވެ. ނުވިތާކަށް ފޯނުގެ ރޭންޖްވެސް ނުލިބެއެވެ. މިހާލުގައި އަޒީޒް އޮންނަތާ މިހާރު ހަތަރު ގަޑިއިރުވީއެވެ. ގައިން ފައިބަމުން ދިޔަ ލޭތައް ނުހުއްޓި މުޅި މީހާ ހުދުވާން ފަށާފިއެވެ. އަޒީޒްގެ ކަންފަތައް ކުޑަވަރެއްގެ އަޑެއް އިވުނެވެ. އެއީ އިންސާނެއްގެ ފިޔަވަޅުގެ އަޑެވެ. އަޒީޒްގެ މެރި މެރި އޮތް ލޮލަށް އެމީހެއްގެ މޫނު ފެނުނެވެ. އެއީ ޕޮލިހެކެވެ. އޭނާ ކިޔަމުންދަނީ އެންމެ އެއްޗެކެވެ. ކޮއްކޯއެވެ لَا إِلٰهَ إِلَّا ٱلله ކިޔާށެވެ. ނަމަވެސް އަޒީޒްގެ ދޫ މި ލުއި ކަލިމަ ކޮޅު ކިޔުމަށް ހަމަ ހިލާ ގުޑާވެސް ނުލިއެވެ. ކުއްލިއަކަށް ނޭވާ ހާސްވާން ފަށާފިއެވެ. މަރުގެ މަލާއިކަތާ ހާޒިރުވެ އަޒީޒްގެ ފުރާނަ ހަށިގަނޑާ ވަކިކޮއްފިއެވެ.

– ނިމުނީ –

އިންސާނާ ފުރިހަމަ ސިއްޙަތެއްގައި ހުރުމަށް ކަސްރަތު ކުރަންޖެހެއެވެ. ކަސްރަތު ނުކުރުމުގެ ސަބަބުން މުސްކުޅި އުމުރުގައި އެތައް ބަޔަކުވަނީ އެތައް އުނދަގުލަކާ ކުރިމަތިލާންޖެހިފައެވެ.

އިޔާޒުއަކީ ކުޑައިރުއްސުރެ ކެއުމަށް ފޯރި ހުންނަ ކުއްޖެކެވެ. އިޔާޒުގެ މަންމަ އޭނާ ބުނި ކޮންމެ އެއްޗެއް ހަދާފަ ކާންދެއެވެ. އިޔާޒުގެ އުމުރުން ފަނަރަ އަހަރުގައި އޭނާގެ ބަރުދަން ފަންސާސް ކިލޯއަށްވަނީ އަރާފައެވެ. ކޮންމެއަކަސް އޯލެވެލް ނިންމުމަށްފަހު ފުރުތަމަ ވަޒީފާއަށް އިޔާޒުވަނެވެ. މޭޒެއް ދޮށުގައި އިންދެ މަސައްކަތްކޮއްލުމަކީ އިޔާޒް އަބަދުވެސް ދެކެމުން އައި ހުވަފެނެކެވެ.

ފުރުތަމަ މަހުގެ މުސާރަ އިޔާޒްއަށް ލިބުމުން އޭނާގެ އޮފީސް ކުދިން ގޮވައިގެން ކެއުމަކަށް ދިޔައެވެ. އިޔާޒުގެ އޯޑަރު ފެނިފައި ހުރިހާ ކުދިން ތިބީ ހައިރާންވެފައެވެ. އޭނާގެ އޯޑަރު އޭނާއަށް ހުސްވާނެތޯ ކުއްޖަކު ސުވާލުކޮއްލުމުން ހިނިގަނޑަކާއެކު އެކަން ވާނެކަމަށް ބުނިއެވެ. އޮފީސް ކުދިން މަދުން ކާތީ އެކަމާ އިޔާޒް ޝަކުވާކުރިއެވެ. ނަމަވެސް އެކުދިން ދިން ޖަވާބުން އިޔާޒް އައީ ރުޅިއެވެ. މާ ގިނައިން ކެއުމަކީ މީހާ ކަންނެތްވެ ނުރައްކާތެރި ބަލިތައް ހަށިގަނޑުގައި އުފެދުމުގެ ފުރުސަތު ބޮޑުވާނެ ވާހަކަ ބުނުމުންނެވެ. ކެއުން ނިންމާލުމަށްފަހު ބިލް ދެއްކިގޮތަށް އިޔާޒް ގެއަށް ގޮސް ނިދަން އޮށޯތެވެ. ނަމަވެސް އޮފީސް ކުދިންގެ ނަސޭހަތުގެ ބަސްތައް ކަންފަތްތެރޭ ގުގުމާވަރުން އޭނާއަށް ރަނގަޅަށް ނުނިދުނެވެ.

ޖެހިގެން އައި ދުވަހު އޮފީހަކަށް އިޔާޒް ނުދެއެވެ. އޭނާ ބޭނުންވީ މުޅި ދުވަސް އެއްކޮއް އޭނާ އަމިއްލަ ކަންތައްތަކުގައި އުޅެލާށެވެ. މިގޮތުން ބާޒާރުކޮލުމަށް ނުކުމެ ދުއްވުންތައް ދުއްވާލުމަށްފަހު އެދުވަހު މެންދުރު ކެއުން ކެއީ ބޭރުންނެވެ. އެއަށް ފަހު ރަހްމަތްތެރިއަކާއެކީ ކޮފީއަކަށް ގޮސް ކޮފީ ނިންމާލުމަށްފަހު ހަވީރު ސައިބޯން ހޮޓަލަކަށްވަދެ ތަށި ފުރާ ސާމާނު އަޅައިގެން ކައި ހުސްކޮއްލިއެވެ. އަދި ގެގައަށް ގޮސް ކާގަޑި ޖެހެންދެކަށް ކޮމްޕިޔުޓަރ ކައިރީ ވަގުތުތައް ހޭދަކުރިއެވެ. ކާގަޑި ޖެހުމާއެއްކޮއް ކައިގެން އޮށޯވެ ނިދައިފިއެވެ. މިގޮތުގައި އިޔާޒްގެ ދުވަސްތައް ހޭދަކުރަމުންގޮސް މީހާ ކުރިއަށްވުރެ ފަލަވެއްޖެއެވެ. އިޔާޒްގެ ބަރުދަނަކީ މިހާރު ސަތޭކަ ވިހި ކިލޯއެވެ. ކުރިން އިޔާޒް ލަމުން އައި އެކްއެލް ގަމީސް މިހާރު ތްރީ އެކްސެލްއަށް ބަދަލްވެއްޖެއެވެ. މިކަމާ އިޔާޒް އެއްވެސް ވަރަކަށް ކަންބޮޑެއްނުވެއެވެ. ނަމަވެސް އިޔާޒްގެ މަންމަ އެކަމާ ކަންބޮޑުވެ ކަސްރަތުކުރުމަށް ނަސޭހަތްދޭންފަށާފިއެވެ. މިކަމާ އިޔާޒް ހިތްހަމަ ނުޖެހެއެވެ. އެހެންވެ ގޭގެ ކެއުން ނުކައި ބޭރުން ކެއުން ގިނަކުރިއެވެ.

އެއްދުވަހެއްގެ ހެނދުނެވެ. އިޔާޒް އޮފިހަށްދާން ތެދުވެ ފެންވަރައިގެން ނުކުމެ ރީތިވެލައިގެން ނުކުމެވުނީ ގޭ ދޮރާއްޓާ ހަމައަށްށެވެ. ކުއްލިއަކަށް މެޔަށް ތަދެއް އަރައިފިއެވެ. ވީ ތަދުން ހަޅޭއްވެސް ލަވަގެންފިއެވެ، އިޔާޒްގެ މަންމަ އައިސް ވެގެން އުޅެނީ ކީއްތޯ އަހާލިއެވެ. ނަމަވެސް އިޔާޒްއަށް ޖަވާބު ނުދެވުމުން ގޭދޮށު ބައެއްގެ އެހީގައި އޭނާ ހޮސްޕިޓަލްއަށް ގެންދެވުނެވެ. ޓެސްޓްތައް ހަދާ ނަތީޖާ ލިބިއްޖެއެވެ. އިޔާޒްގެ މަންމަ ޑޮކްޓަރު އައުމުން ނަތީޖާ ދިއްކޮއްލިއެވެ. ޑޮކްޓަރ ވަރަށް ސީރިއަސްވެފައި އިޔާޒް މޫނަށް ބަލާލާފައި އިޔާޒްގެ ލޭ ވަރަށް މަތިވެ އެއާއެކު ކޮލެސްޓްރޯލްވެސް ހުރީ ވަރަށް މަތީގައި ކަމަށް ބުނެލިއެވެ. މިކަމުގެ ސަބަބުން ވެދާނެ ގެއްލުންތައްވެސް ކިޔާދިނެވެ. އަދި ކެއުން މަދުކޮއް ކަސްރަތުކުރުމަށް އިރުޝާދު ދިނެވެ. މިކަންކަން ނުކޮއްފިނަމަ ދާއިމީ ކޮއް ބޭސްކާންޖެހި ބޮޑު ބައްޔަކަށް ބަދަލްވެ އަދި ފުރާނައަށް ގެއްލުންވުން އެކަށީގެންވާކަން ކިޔާދިނެވެ. އަދި އުމުރު މަތިވާވަރަކަށް މިކަމުގެ ވޭން ވަކިން ބޮޑުވާނެކަމުގެ އިންޒާރު ދިނުމަށްފަހު އިޔާޒް ފޮނުވާލިއެވެ.

ޑޮކްޓަރުގެ ނަސޭހަތުން އިޔާޒްއަށް އިވުނީ އެއްބައެވެ. ދުވަސްކޮޅަކު ކަސްރަތުކުރަން ދާންފެށިއެވެ. ނުދެވޭނަމަ ގޭގައިވެސް ކުޑަކޮއް ކޮއްލައެވެ. ނަމަވެސް އިޔާޒް ދެވިހިފާފައިވާ ކެއުމުގެ އާދައަށް ހުއްޓުމެއް ނާދެއެވެ. ގެއިން ބޭރަށް ގޮސްފިއްޔާ އަންނީ ކޮންމެސް ތާކަށް ވަދެ ކާލައިގެންނެވެ. މިގޮތުގައި އުޅެނިކޮއް އެއްދުވަހަކު އިޔާޒް ހޮޓަލުން ނުކުތްތަނުން މީހާ ހުއްޓުން އެރިއެވެ. އަދި އެއްފަޅި ވާގިގޮސްގެން ބިންމައްޗަށް ވެއްޓުނެވެ. ހޮޓަލުގައި ތިބި ބަޔެއްގެ އެހީގައި އިޔާޒް ހޮސްޕިޓަލަށް ގެންދެވުނެވެ. އިމަޖެންސީ ކޮޓަރިއަށް ވައްދާ މެޝިންތައް ގުޅިއެވެ. ޑޮކްޓަރު އައިސް ބަލާފައި އިޔާޒްގެ މަންމަ ހޮސްޕިޓަލްއަށް ގެނެސް އިޔާޒްއަށްވަނީ ސްޓްރޯކްއެއް ޖެހިފައިކަން ބުނިއެވެ. އަދި ޖެހުނީ ފުދޭވަރަކަށް ބޮޑު ސްޓްރޯކްއެއް ކަމުން އިޔާޒްގެ އެއްފަޅިވަނީ ދިގު މުއްދަތަކަށް ވާގިގޮސްފައިކަން އެންގިއެވެ. އިޔާޒްގެ މަންމަ ކަރުނައަޅާ ހާލު އިޔާޒް ކައިރިއަށް އައިސް އިޔާޒްއާ ކައިރީ އިށިންދެފައި މަންމަގެ ނަސޭހަތް އަޑު ނޭހުމުން މިއަދު އިޔާޒްއަށް ލިބުނު ނަތީޖާ ކިހާ ހިތިކަން ބުނެލިއެވެ. މި ބަސްތައް އިވުމާއެކު އިޔާޒްވެސް ލޮލުން ކަރުނައަޅާ ރޯންފެށިއެވެ. އަދި މައާފްއަށްވެސް އެދުނެވެ. ނަމަވެސް މިއަދު ކުރާނީ ކީއްހެއްޔެވެ. އިޔާޒް އެވަނީ ދާއިމީކޮއް ބަލިމީހަކަށް އޭނާގެ އުމުރުން އެންމެ ވިހި އަހަރުގައިވެފައެވެ.

– ނިމުނީ –

ރޫހާނީ ކަންތައްތައް އެކި މީހުންނާ ދިމާވަނީ އެކިގިތަށްށެވެ. އެކަމެއް ދިމާވުމުން އެމީހަކު އެވާހަކަ ހިއްސާކުރިޔަސް ގިނަފަހަރު މީހުން އެކަން ގަބޫލްކުރަނީ އެފަދަ ހާދިސާއެއް ދިމާވުމުންނެވެ.

ޓެކްސީ ޑްރައިވަރެއްކަމުގައިވާ ޝަރީޕްއަކީ ދަންވަރު ޑިއުޓީއަށް އަބަދުވެސް ނުކުންނަ މީހެކެވެ. ދުވާލު އަމިއްލަ މަސައްކަތްކޮއް އަދި އާއިލާއާއެކު ވަގުތު ހޭދަކުރުމަށްފަހު އޭނާ ފަތިސް ނަމާދަށް ގޮވަންދެކަށް ޓެކްސީ ކުރުމުގައި ވަގުތުތަށް ހޭދަކޮއްލައެވެ. ފަހަކަށް އައިސް ޙަބަރުތަކުގައި ހައިވޭމަތިން ރޫހާނީ ކަންތައް ފެންނަ ވާހަކަ ޝަރީފްގެ ކަންފަތުގައިވެސް ޖެހިއްޖެއެވެ. ނަމަވެސް މިހާތަނަށް އޭނާ ކޮއްފައިވާ ދަތުރުތަކުން އެފަދަ އެއްވެސް ކަމަކާ ދިމާނުވެއެވެ.

މިރޭވެސް މެންދަމު ބާރަޖެހުމުން ޝަރީފް ނުކުތީ އޭނާގެ ޑިއުޓީއަށްށެވެ. ދެތިން ދަތުރެއް ކޮއްލުމަށްފަހު އޭޑީކޭ ކައިރިން ލަނބައިލާގެން މަޖީދީމަގުން ހެންވޭރަށް ދުއްވާލާފައި ދަނިކޮއް ހެންވޭރު ކުރީގެ ޔޫތް ކެފޭ ކައިރިން އަންހެން ކުއްޖަކު ކާރާ ދިމާލަށް އަތްހޫރުވާތަންފެނިގެން ޝަރީފް މަޑުކޮއްލިއެވެ، އެއިރު ގަޑިން މެންދަމު ދޭއް ޖަހާފިއެވެ. އެކުއްޖާ ޓެކްސީއަށް އެރިއެވެ. ކޮންތާކަށް ދާންވީތޯ އަހާލުމުން ހުޅުމާލޭ ހޮސްޕިޓަލަށް ކަމަށް ބުނިއެވެ. ދެފަރާތުން ވާހަކަ ދައްކައިގެން އަގު ހަމަ ޖައްސާފައި ދަތުރުފެށިއެވެ. ބުރިޖުން އަރައި ހައިވޭއަށް ފައިބައިގެން އާދައިގެ ދުވެއްޔެއްގާ ޝަރީފް ދިޔައީ ދުއްވަމުންނެވެ. ހައިވޭގެ މެދަކަ ހަމައަށް ދިޔަ ތަނުން ކާރު ހުއްޓެން ފަށައިފިއެވެ. އެންމެފަހަ އެއްކޮއް ހުއްޓި ޝަރީފް ފަސިންޖަރު ކައިރީ އެތެރޭ މަޑުކުރުމަށް ބުނެފައި ފާބައި އިންޖީނަށް މައްސަލައެއް ދިމާވިތޯ ބަލާލިއެވެ. އެއްވެސް މައްސަލައެއް ނެތުމުން އަރާ ސްޓާޓްކުރަން މަސައްކަތް ކޮއްކޮއް ނުވިއެވެ. ކުއްލިއަކަށް ފަހަތުން އިން އަންހެންކުއްޖާ ތުރުތުރުއަޅާ އަޑަކުން ” ބޭބޭ އެހުރީ ކޮން ކުޑަކުއްޖެއް ކާރު ކުރިމަތީ ” ޝަރީފް ކާރުގެ ކުރިޔަށް ބަލާލިއިރު އެކަކުވެސް ފެންނާކަށްނެތެވެ. ސަމާސާ ނުކުރުމަށް ޝަރީފް އެކުއްޖާއަށް އެންގިއެވެ. އަދި ކާރު ސްޓާޓްވޭތޯ ވަރަށް މަސައްކަތް ކުރަނިކޮއް ވެއްޖެއެވެ. ނަމަވެސް ދުއްވާލަން އުޅެނިކޮއް އަންހެންކުއްޖާ އަޑުގެ ނެތްކޮޅަށް ހަޅޭއްލަވައިގަނެ ” ބޭބޭ އެހުރީ އަންހެނަކާ ކުޑަކުއްޖެއް މިހާރު. ހަމަ ކާރު ކުރިމަތީ ” ޝަރީފް ކާރުގެ ކުރިޔަށް ބަލާލިއިރު ހަމަ އެކައްޗެއްވެސް ފެންނާކަށްނެތެވެ. މިކަމާ ޝަރީފް ވަރަށް ރުޅިއައިސް އަންހެން ކުއްޖާއާ ދިމާލަށް އެއްޗެހި ގޮވާލުއެވެ. އަދި ބަރަށް ދުއްވާފައިގޮސް ހުޅުމާލޭ ހޮސްޕިޓަލަށް އެކުއްޖާ ބޭލުމަށްފަހު އަނބުރާ މާލެ ދިޔުމަށް ހައިވޭއިން ދަތުރުފެށިއެވެ.

ހައިވޭގެ މެދާހަމައަށް ޝަރީފްއަށް އާދެވުމުން އަނެއްކާވެސް އިންޖީނު ހުއްޓިއްޖެއެވެ. އިންޖީނު ބަލައިލުމަށް ޝަރީފް ކާރުން ފައިބާ އިންޖީނު ބަލާ ނިންމާލާފައި ކާރުގެ ކުރީ މަތިގަނޑު ލެއްޕިތަނުން ލޮލުގައި އަޅާގަތީ ކާރު ފަހަތު ސީޓުގައި އޭނާ އުފުލި އަންހެންކުއްޖާ އިންތަނެވެ. އެކުއްޖާ އިނގިލި ޝަރީފްއާ ދިމާލަށް ދިއްކޮއްލާ ފަހަތް ބަލާލުމަށް އިޝާރާތްކުރިއެވެ. ޝަރީފް ފަހަތް ބަލާލިއިރު ވަރަށް ކައިރީގައި ހެވިފައި ހުރި ކުޑަކުއްޖެއް ހުރިއެވެ. ދުލަށް އައިހާ ހެޔޮ އެއްޗެއް ކިޔަން ފެށުމާއެކު އެ ކުޑަކުއްޖާ ގެއްލުނެވެ. އަދި ފަހަތު ސީޓަށް ބަލައިލިއިރު އެއްކަލަ އަންހެން ކުއްޖާވެސް ނެތެވެ. އަވަސް އަވަހަށް ކާރަށް އަރައި ސްޓާޓް ކޮއްލައިގެން މާލެއަރާ މަޖީދީ މަގުން ދަނިކޮއް ކުރީގެ ހެންވޭރ ޔޫތްކެފޭއާ ހަމައިން މީހާކު އަތް ހޫރުވާތަން ފެނުމުން ކައިރި ކުރިއިރު ހުރީ ހުޅުމާލެ ގެންދިޔަ އަންހެން ކުއްޖާއެވެ. ޝަރީފް އެކުއްޖާ ނާރުވާން އިދިކޮޅު ހެދުމުން ކީއްވެތޯ އެކުއްޖާ ސުވާލުކުރިއެވެ، ޖަވާބުގައި ޝަރީފް ދިމާވި ކަންތައް ކިޔާދިނުމުން އެކުއްޖާ ހައިރާންވެފައި ހުރެ ޝަރީފްއަށް އޭނާ ހުޅުމާލެދާން ނުކުތީ އަދި ކިރިޔާކަން ބުނެލިިއެވެ.

– ނިމުނީ –

މުސްކުޅިން ބުނެއުޅެއެވެ. ތިމާ ފޭހުނު އިލޮށިހެރޭނީ ތިމާގެ ލޮލަށްށެވެ. މި ބަސްކޮޅުގެ މާނަ ފިސާރެ ފުނެވެ. އެތައް އިބްރަތެއް މި ބަސްކޮޅުގައި ހިމެނެއެވެ.

އައްޔޫބްއަކީ ވަރަށްބޮޑު ނިކަމެއްޗެކެވެ. ގިނަ ފަހަރު ކާނެ އެއްޗެއް ނުލިބި ދުވަސްތައް ގުނަންވެސް ޖެހެއެވެ. އައްޔޫބް ލައްވާ އެތައް ބަޔަކު އެތައް މަސައްކަތެއް ކުރުވުމަށްފަހު އޭނާއަށް ދޭންޖެހޭ އުޖޫރަ ނުދެއެވެ. ނަމަވެސް އައްޔޫބު އެކަމާ އެއްވެސް ޝަކުވާއެއްނުކުރެއެވެ. ސަބަބަކީ އޭނާއަށް މި ދުނިޔެއަކީ އެހާ މުހިންމު އެއްޗަކަށް ނުވާތީއެވެ. އޭނާގެ ހިތަކީ މުއްސަނދިކަމުން ފުރިގެންވާ ހިތެކެވެ. އީމާންކަން ގަދަ އައްޔޫބް އެންމެ ނަމާދެއްވެސް ވައްޓާނުލައެވެ. ސަހަރާތަކާ ވާދީ ތަކުގައި ދަތުރުކުރިޔަސް ގަޑިއަށް ނަމާދަށް އަރައެވެ.

އެއްދުވަހެއްގެ ހެނދުނެވެ. އައްޔޫބް ބަނޑުހައި ހޫނުކަން ފިލުވާލުމަށް ކާއެއްޗެއް ލިބޭތޯ މަގުމައްޗަށް ނުކުމެ ހިނގަންފެށިއެވެ. އެތައް ބަޔަކަށް އާދޭސްކޮއްގެންވެސް ކާނެ އެއްޗެއް ނުލިބި މެންދުރުވުމުން ނަމާދުކޮއް ނިންމާލައިގެން ގޭދޮށުގައި ކެތްތެރިކަމާއެކު މަޑުކޮއްލައިގެންއިނެވެ. މިހެން އިންދާ އަވަށުގެ މަހުޖަނަކު އައިސް އައްޔޫބް ގާތު އޭނާއާއެކު ދަތުރެއް ގޮސްދިނުމަށް އެދުނެވެ. އައްޔޫބް މަހުޖަނު ކައިރިން ކާއެއްޗަކާ ބޯނެ ފެންފޮދެއް ދިނުމުން ދާނެކަން ބުނެލިއެވެ. މަހުޖަނު ގޮސް ފާނަކާ ފެންޖަގެއް ގެނެސް އައްޔޫބްއަށް ދިނެވެ. އައްޔޫބް ކައި ނިމިގެން މަހުޖަނާއެކު އޭނާ އެބުނާ ދަތުރެއް ކުރުމަށް ހިނގައިގަތެވެ. މަހުޖަނު އާއެކު އައްޔޫބްގޮސް އޭނާ މުދަލާއެކު ތައްޔާރުކޮއްފައިވާ ދެޖަމަލާ ހަވާލުވެ ހިނގައިގަތެވެ. މަހުޖަނު އޭނާގެ އަހުގައި ޖަމަލުތަކުގެ ފަހަތުން އާދެއެވެ.

ދަތުރުގެ ތެރޭގައި އަސުރު ވަގުތު ޖެހުމުން އައްޔޫބް ދެ ޖަމަލުއަށް ފެންފޮދެއް ދިނުމަށްފަހު ނަމާދަށް އެރިއެވެ. އަހުގައި އިން މަހުޖަނު މީހާ އިނީ މޫނު ހަދައިގެންނެވެ. ސަބަބަކީ އޭނާގެ ދަތުރު ލަސްވާތީއެވެ. ނަމާދުކޮއް ނިމުމުން އަނެއްކާވެސް ދަތުރު ފަށައި އިރުއޮއްސެންދެން ފަރުބަދަ ތަކުގެ ތެރެއިން ދަތުރު ކުރިޔަށް ގެންދިޔައެވެ. އިރުއޮއްސުމުން އައްޔޫބް ޖަމަލުތައް ބަހައްޓާފައި މަޢްރިބްއަށް އެރިޔެވެ. މަހުޖަނު ކަލޭގެ މަންޒަރުބަލަން އޭނާގެ އަހުގައި ނުފައިބާ އިނެވެ. ނަމާދުކޮއް ނިމުމުން އައްޔޫބްއަށް ރޭގަނޑު ދަތުރު ނުކުރެވޭނެ ވާހަކަ މަހުޖަނު ކައިރީ ބުނެލިއެވެ. ސަބަބަކީ ރޭގަނޑު ދަތުރުކުރުމަކީ އެހާ ރަނގަޅު ކަމެއް ނޫންކަމަށް ވާތީއެވެ. ނަމަވެސް ދަހިވެތި މަހުޖަނު ބޭނުންވީ ކުރާށެވެ. މިކަމާ އައްޔޫބަކަށްވެސް ދެކޮޅު ހަދާކަށް ބޭނުންނުވީ އޭނާއަށް މަޖުބޫރުވެގެންނެވެ.

ރޭގަނޑުގެ ކަނު އަނދިރީގައި ދަތުރުފަށައިގޮސް މެންދަމު އަތަށް އަޅާފިއެވެ. އައްޔޫބް ވަރުބަލިވެގެން ނިދަން ބޭނުންވާ ވާހަކަ މަހުޖަނު ކައިރީ ބުނުމުން މަހުޖަނު ކަލޭގެ އަހުން ފައިބާ އަލިފާންގަނޑެއް ރޯކުރިއެވެ، އަދި އައްޔޫބް ކައިރީ ނިދަން ބުނިއެވެ. އައްޔޫބް ނިދުމުން މަހުޖަނު ކަލޭގެ މަޑުމަޑުން ޖަމަލްތަކާ އަސް ހިފައިގެން ހުނގައިގަތެވެ. އައްޔޫބް އެކަނި ދޫކޮއްލާފައި އޭނާގެ މުދާތަކައިގެން ދާންވީ މަންޒިލްއަށް ދިޔުމަށް ދަނިކޮއް ދެ މަގަކާ ޖެހިއްޖެއެވެ. ކަނައަތުން ފެންނަން އޮތީ ވަލުތެރެއެވެ. އަދި ވައަތުން އޮތީ ސަހަރާ ފެންނާށެވެ. މަހުޖަނު ކަލޭގެ ކަނައަތުމަގުން ވަދެ އޭނާގެ ދަތުރު ފެށިއެވެ. ދެވޭ ނުދެވޭ ދިމާލެއް ނޭގެއެވެ. މިހާލުގައި ހުއްޓާ ވަލު ޖަނަވާރު ގޮވާއަޑު އިވެންފެށުމުން އޭނާ ހިފަހައްޓައިގެން ހުރި އަހާ ދެ ޖަމަލު އޭނާ ދޫކޮއް ފިލައިފިއެވެ. މަހުޖަނު ކަލޭގެ އެކަނިވުމުން ބިރުން ހުރެ ކުރިއަށް ދާންފެށިތަނާ ވަލު ކުއްތާ ބައިގަނޑަކާ ދިމާވެ މިކަލޭގެ އެ ކައްތާތަކުގެ ޝިކާރައަކަށް ވެއްޖެއެވެ.

އައްޔޫ ފަތިސް ނަމާދަށް ހޭލިއިރު މަހުޖަނުއާ އޭނާގެ ދެ ޖަމަލު ނެތުމުން ހޯދަންފެށިއެވެ. ތާޒާ ފިޔަވަޅުތައް ހޯދަމުން ވަކި ހިސާބަކަށް ދެވުނުތަނާ ދެޖަމަލު ފެނިއްޖެއެވެ، އެ ދެ ޖަމަލު ގަހެއްގައި އައްސާ ފަތިސް ނަމާދުކޮއްގެން އައްޔޫބް މަހުޖަނު ހޯދަން ފެށިއެވެ. މިގޮތުގައި އުޅެނިކޮއް އެއްކަލަ ދެ މަގާ ހަމައަށް އާދެވިއްޖެއެވެ. އެ ދެމަގު ފެށޭ ހިސާބުގައި މަހުޖަނުގެ އަސް އޮތެވެ. ދުވާލުގަޑިކަމުން އައްޔޫބް ވަލުތެރެއަށް ވަދެލިއެވެ. މާކަށް ދުރުނޫން ހިސާބުގައި މަހުޖަނުގެ ފުރާނަނެތް މަސްގަނޑު އެކި ތަންތަނުން ކައި ދެބުރި ކޮއްލާފައި އޮތެވެ. މި މަންޒަރު ފެނިފައި ވީ އެންމެ އަވަހަކަށް އަވަށް އެނބުރިގޮސް އިމާމަކު ހޯދިއެވެ. އަދި ވީކަންތައް ކިޔާދިނެވެ. އިމާމް މީހާ އައްޔޫބް ގާތު ހިތްވަރުކުރުމަށް އެދުނެވެ އަދި އައްޔޫބްގެ އެއްވެސް ކުށެއް ނެތްވާހަކަ ބުނިއެވެ. މަހުޖަނު އައްޔޫބްއަށް ލަނޑުދޭން ހަދައިގެން އޭނާއަށް އެކަމުން ލިބުނީ ރަނގަޅު ފިލާވަޅެއްކަން އިމާމް މީހާ ބުނެލިއެވެ.

ކޮއްކޮއިންނަކީ ރަނެކެވެ. ބައެއް ފަހަރު އުނދަގުލަކަށްވިޔަސް އާއިލާގެ މުޅި މާހައުލަށް އުފާވެރިކަން ގެނުވާދޭ ބައެކެވެ. ކޮއްކޮއެއް ހުރުމަކީ އެތައް ހަނދާންތަކެއް އުފައްދާދޭ ކަމެކެވެ.

އަހަރެންގެ ލޯބިވާ ކޮއްކޮ މިދުނިޔެއަށް އުފަންވީސުރެ އޭނާއާމެދު އަބަދުވެސް ހާއްސަކަމެއް ބަހައްޓަމެވެ. ހަލަންޏަކަސް ބަހެއް ނުބުނެ ވޭތޯ ވަރަށް މަސައްކަތްކުރަމެވެ. ކޮއްކޮ ބޮޑުވަމުން އައިވަރަކަށް އާ ކަންކަން ދަސްކުރަން މަސައްކަތްކުރެއެވެ. އެގޮތުން އެއްދުވަހަކު ސްކޫލުން އަހަރެން އައި އިރު ބޭބެހުރީ ކޮއްކޮ އުރައިގެންނެވެ. މުޅި އަނގައިގާ އޮތީ ލެއެވެ. ކިހިނެއްވީތޯ އަހާލުމުން ފެންބޯ ތައްޓެއް ކާލި ވާހަކަ ބޭބެ ބުނިއެވެ. އަހަރެންގެ ދެލޯ ބޮޑުވިއެވެ. ނަމަވެސް ކުރާނީ ކީއްހެއްޔެވެ.

ކޮއްކޮ ބޮޑުވަމުން އައީ ފިސާރި މޮޅު ނަތީޖާތަކާ ވަނަތައް ސްކޫލުން ހޯދަމުންނެވެ. ނަމަވެސް އަހަރެންގެ ލޯ މައްޗަށް ކޮއްކޮ ގެއްލުނީ ކިޔަވަން ލަންކާއަށް ބަދަލުވިފަހުންނެވެ. އަހަރު ތަކަކު ޙަބަރެއް ނުވެ ހުއްޓާ ފޭސްބުކް މެދުވެރިކޮއް ދެމީހުން ދިމާވިއެވެ. އަދި ހާލު އަހުވާލުއެހުނެވެ. އެދުވަސްވަރު ކާފާވެސް ބަލިވެގެން ކޮއްކޮ ކައިރިއަށް ވަނީ ގެންދެވިފައެވެ. ކާފަ ކޮއްކޮ ކައިރިއަށް ކުރީ ވަދާއީ ޒިޔާރަތެވެ. މި ދުނިޔެއާ ކާފަ ވަކިވެގެން ދިޔައީ ކޮއްކޮމެނާ ބައްދަލްކޮއްފައި އައިތާ ހަފްތާއެއް ވީ ފަހުންނެވެ. ކާފަ ނިޔާވުމުން އަހަރެންނަށް ލިބުނު ހިތާމަގައި ކޮއްކޮ ބައިވެރިވެ ހިތްވަރު ދިނެވެ.

ކާފަ ނިޔާވިތާ އަހަރުތަކެއްފަހުން އަހަރެންނަށް ކޮއްކޮ ކައިރިއަށް ދެއަހަރަށް ކިޔަވަން ދިޔުމުގެ ފުރުސަތު ލިބިގެން ދިޔައެވެ. އެއްގެއަކަށް ދެވުމުން ވަރަށް އުފާވިއެވެ. އަދި އެކި މީސްމީހުންނާ ކޮއްކޮ އަހަރެން ރަހްމަތްތެރި ކުރުވިއެވެ. އެމީހުންގެ ސަބަބުން އެތައް ގިނަގުނަ ފައިދާހުރި ފިލާވަޅުތަކާ މަޖާ ވަގުތުތަކުގެ ސަބަބުން އަބަދުވެސް ފަޅުފިލައެވެ. މިގޮތުން އެންމެ ބޮޑަށް ހަނދާނަށް އަންނަނީ ކޮއްކޮއާއެކު ލަންކާގެ ނޫރައްލިޔާއަށް ދިޔަ ދަތުރެވެ. އެއީ އަހަރެންގެ ހަޔާތުގައިވެސް ނުދާހާ ފިނި ތަނެކެވެ. ނޫރައްލިޔާގައި ދެދުވަސް ހޭދަކުރަން ޖެހުނީވެސް އެއް ޖިންސް މަތިން އަނެއް ޖިންސް ލައިގެނެވެ. މިކަމާ ކޮއްކޮ ވަރަށް މަލާމާތްވެސް ކުރިއެވެ. ނޫރައްލިޔާ ދަތުރު ނިންމާލުމަށް ފަހު ޗުއްޓީ ހަމަވުމުން ކިޔެވުމާގެން ކުރިޔަށް ދިޔައީމެވެ. ފުރުތަމަ ޑިޕްލޮމާ ހާސިލްކުރުމުން އެކަމަށް އެންމެ ފުރުތަމަވެސް މަރުހަބާކީ ކޮއްކޮއެވެ.

ކޮންމެއަކަސް ކިޔަވާނިމި އަހަރެން މާލެ އައިތާ މާ ގިނަދުވަހެއްނުވެ އިތުރު އުފާވެރި ޙަބަރު ލިބިގެން ދިޔައެވެ. އެއީ ޑޮކްޓަރުކަން ކިޔެވުމަށް ކޮއްކޮ ރަޝިއާއަށް ދިޔުމަށް ފުރުސަތު ލިބުނު ޙަބަރެވެ. ރަޝިއާގައި ކޮއްކޮ ދުވަސްތައް ހޭދަކުރަމުންދާގޮތް އަހަރެން ދިޔައީ މީސްމީޑިއާއިން ގާތުން ބަލަމުންނެވެ. ކޮއްކޮގެ އުފާވެރި ފޮޓޯތަކުގެ ތެރެއިން އެންމެ ފާހަގަވީ ސްނޯގައި ނަގާފައިވާ ފޮޓޯތަކެވެ. ނަމަވެސް ކަންތައްތައް ދިމާވިގޮތުން ކޮއްކޮ އަނބުރާ މާލެ އަންނަންޖެހުނެވެ. އެއަށް ފަހު ވަގުތުތަށް ހޭދަކުރީ އަމިއްލަ ކަންތަތަކުގައެވެ. އާއިލާ ފަޅުފިލުވައިދިނުމުގައެވެ. ރޯދަމަސްތަކުގައި އަހަރެން ދަހި ކުރުމުގައެވެ. މިގޮތުގައި ދުވަސްތައް ހޭދަކުރަމުން ގޮސް އަހަރެންގެ ކައިވެނީގެ އުފާވެރި ޙަބަރު ކޮއްކޮއަށް ދިނީމެވެ. ވާން އުޅޭ ފަހަރަވެރިޔާ ދައްކާލާ އެންމެންނާ އެކު ހީ ސަމާސާ ކޮއްލުމަށްފަހު ކައިވެންޏަށް ފުރައިގެން އައިތަނާ ވީ އެންމެ ބާރާދުވަސްތެރޭ މި ލިބުނީ ހިތްފަޅައިގެން ދާފަދަ ޙަބަރެކެވެ. އަހަރެންގެ ލޯބިވާ ކޮއްކޮ މިދުނިޔެއަށް އަލްވަދާއު ކިޔައިފިކަމެވެ. ފުރުތަމަ އަހަރެން ގަބޫލްވެސް ނުކުރަމެވެ. ނަމަވެސް ކޮއްކޮގެ ބައްޕައަށް ގުޅާލުމުން ޙަބަރު ތެދުކަން އެނގުނެވެ. ހުރި ހިތާމައެއްގެ ބޮޑުކަމާއެވެ. އަހަރެންގެ ލޯބިވާ ކޮއްކޯއެވެ. އަހަރެންނަށް ހުރެވުނުތަނެއްވެސް ނޭނގުނެވެ. ހިތްވަރުކޮއް ކަރުނަ ހިފަހައްޓައިގެން ހުއްޓެއްކަމަކު އަހަރެންގެ ހިތްވަނީ ކުދިކުދިވެފައެވެ. ލޯބިވާ ކޮއްކޮއަށް އަބަދުވެސް އަހަރެން ހެޔޮދުވާކުރާނެމެވެ.

– ނިމުނީ –

( މިއީ އަޅުގަނޑުގެ ލޯބިވާ ކޮއްކޮ މުހަންމަދު ނާއިފް ނަޝީދުގެ ހަނދާންތައް އާކޮއްލުމަށް ލިޔެވިފައިވާ ވާހަކައެކެވެ. މަރްހޫމްގެ ފުރާނައަށް الله سبحان و تعالىٰ ބަރަކާތްލައްވާށެވެ. އަދި ފާފަ ފުއްސަވާންދޭވެ.)

އިންސާނުންނަށް ޖިންނީން ފޮރުވިފައިވާ ބައިވަރު ސަބަބުތައް ހުރެއެވެ. އެސޮރުމެންނަށް އިންސާނެއްގެ ފަރާތުން ގޯނާއެއް ވެއްޖެނަމަ އެމީހަކު ހަމަ ހިލާ ދޫނުކުރާނެކަން ކަށަވަރެވެ. އެސޮރުމެންގެ ފަރާތުން އަޅުގަނޑުމެން ރައްކާތެރިކަން ހޯދޭނެ މަގުތައްވަނީ އިސްލާމްދީންގައި އުނގަންނާދެވިފައެވެ.

ރާއްޖޭގެ މަޝްހޫރު ރިސޯޓެއް ހުޅުވުމުގެ މަސައްކަތް އަހަރެންގެ ކުންފުންޏަށް ލިބުނެވެ. މަސައްކަތް ފެށުމަށްޓަކައި ބިދޭސީން ގެންނަންފެށީމެވެ. ގެންނަ ކޮންމެ ބިދޭސީއަކު ލަހެއް ފަހެއްނުކޮއް ވީ އެންމެ އަވަހަކާ ރިސޯޓަށް ފޮނުވާލަމެވެ. މި ގޮތުން އައި އެންމެ ފަހު ބިދޭސީ މީހާއާއެކު އަހަރެންވެސް ރިސޯޓަށް ފުރާފީމެވެ. ބައެއް ބިދޭސީންނަކީ ފަރުވާ ކުޑަ ބަޔަކަށް ވާތީ އަހަރެން އެމީހުންގެ މަސައްކަތްތައް ގެންދަންވާ ގޮތް ކިޔާދޭން އިރު އެރީސުރެ އިރު އޮއްސެންދެން ހުންނަމެވެ. ބިދޭސީންގެ ކައްކާއަކަށް ހުންނަ ބާބޫ އަކީ އަހަރެން އެންމެ އިތުބާރު ކުރާ އެކަކެވެ. އެހެން ބިދޭސީންނާ ޙިލާފަށް އަބަދުވެސް އަހަރެން ކައިރިން ހުއްދަ ހޯދައިގެން ނޫނީ އެއްވެސް ތާކަށް ނުދާނެއެވެ. ބާބޫ އަކީ ވަރަށް ބޮޑު ނިކަމެއްޗެކަމުން އަހަރެން ފަރާތުން އަބަދުވެސް އޭނާގެ އާއިލާއަށް ކަމެއް ދިމާވެއްޖެނަމަ އެހީތެރިވަމެވެ.

މަސައްކަތު ބިދޭސީއެއް ކަމަށްވާ ޝުމޮން އަކީ ފިސާރި ކަންތައްބޮޑުކުރާ ސޮރެކެވެ. މިއަދުވެސް މީނާގެ އުނދަގޫ އަހަރެންނަށް ޖެހުނެވެ. ބުނާ އެއްގޮތެއްވެސް ނުހަދައެވެ. މަސައްކަތުގައި އެހާ ފަރުވާކުޑައެވެ. އޭނާގެ އުނދަގޫ ބޮޑުވެގެން އެތައް ބިދޭސީންނެއްގެ ޝަކުވާއާއެކު އޭނާ ފޮނުވާލަން އަހަރެން ވަނީ ނިންމާފައެވެ. އިރުއޮއްސި މަސައްކަތް ނިމުމުން އަހަރެން ޝުމޮންއަށް ގުޅާފައި އަހަރެން ކައިރިއަށް އަންނަން ބުނީމެވެ. އޭނާ އައީ ރުޅި މޫނު ހަދާފައެވެ. އައިސް އަހަރެން ކުރިމަތީ އެތައް ޒުވާބެއްކޮއް ގަޔަށް ބޮލަށް އަރާ ހިސާބަށް ދިޔުމުން ބާކީ ތިބި ބިދޭސީން އައިސް އޭނާ ދުރަށް ގެންދިޔައެވެ. އަދި ޝުމޮން ފޮނުވާލުމަށް ފަހު އެންމެން ކާން ދިޔައެވެ. ކައި ނިމުން އިރުވެސް ޝުމޮން ނާންނާތީ އޭނާ ހޯދަން ދިޔުމަށް އަހަރެން ދެ ބިދޭސީން ފޮނުވީމެވެ. ފޮނުވިތާ ގިނައިރެއް ނުވަނީސް އަހަރެންނަށް ފޯނުކޯލްއެއް އައެވެ. ފޯނުކުރީ ޝުމޮން ހޯދަން ފޮނުވި ބިދޭސީއެއްކަމަށްވާ ރާޖާއެވެ. އޭނާ އަހަރެން ގާތުގައި ވަރަށް އަވަހަށް އޭނާ ހުރި ތަނަށް އައިސް ދިނުމަށް އެދުނެވެ. އަހަރެން ދިޔައިރު ޝުމޮން އޮތީ ބިންމަތީގައެވެ. އޭނާއަށް ވެފައިވަނީ ކީއްތޯ ބަލަން ރިސޯޓް ކްލިނިކްގެ ޑޮކްޓަރު ގެނެއިމެވެ. ޑޮކްޓަރު ބަލާފައި އަހަރެންކައިރީ ބުނީ އެއްވެސް ކަމެއް ނުވާކަމަށްށާ ހަމަ ހޭނެތިފަވާ ކަމަށްށެވެ. އަހަރެންގެ އަމުރަށް ރާޖާ ޝުމޮން ގެންގޮސް އެމީހުން ނިދާ ކޮޓަރީގައި ބޭއްވިއެވެ. އަދި އެންމެން ނިދާ ގަޑި ޖެހުމުން ނިދަން ދިޔައީމެވެ.

ގަޑިން މެންދަމު ދޭއް ޖެހީއެވެ. އަހަރެން ނިދާފައި އޮއްވާ ފޯން ރިންގްވާން ފެށުމުން އަހަރެންނަށް ހޭލެވުނެވެ. ފޯން ނަގެތަނުން ސިއްރުން ވާހަކަ ދެއްކީ ރާޖާއެވެ. ” ބޮސް…. މިރޫމް އަންހެން މީހާ ހުންނަނީ….. ބޮސް އޭނާ ހުންނަނީ ޝުމޮން ބެޑް ކައިރީ….. ބޮސް އަވަސް އާދޭ ” ރާޖާ ބުނި ވާހަކައިން އަހަރެން ގައިން ހީބިހި ނަގައިގެން ދިޔައެވެ. ސަބަބަކީ އެރަށުގައި އެއްވެސް އަންހެނެއް ނޫޅޭތީއެވެ. ނަމަވެސް ކަމުގެ ހަގީގަތް ބަލާލުމަށް އަހަރެން ރާޖާމެން ނިދާ ކޮޓަރިއަށް ގޮސް ދޮރު ހުޅުވާލީމެވެ. ހުޅުވާލިއިރު ޝުމޮންގެ އެނދުކައިރީ އެކަކުވެސް ނެތުމުން އެއީ އެމީހުން ޖެހި ސަކަރާތެއް ކަމަށް ހިތާ އަހަރެން އެމީހުންނާ ދިމާލަށް ބަވާލުމަށްފަހު ގޮސް އަހަރެންގެ ކޮޓަރިއަށް ވަދެ ނިދީމެވެ.

ޖެހިގެން އައި ރޭވެސް ހަމަ ކަންތައް ހިނގީ އެހެންނެވެ. ހަމަ ދޭއް ޖެހިތަނާހެން ރާޖާ އަހަރެންނަށް ގުޅާ އެއްކަލަ އަންހެން މީހާ ހުރި ވާހަކަ ބުނިއެވެ. މިފަހަރެވެސް އަހަރެން ދިޔައިރު އެބުނާ އަންހެން މީހާ ނެތުމުން އަހަރެން ވަރަށް ރުޅިގަދަވިއެވެ. އަދި ރާޖާ ކައިރީ މާދަންރޭ އަހަރެންނާ ބާބޫ އާ ޝުމޮން އެ ކޮޓަރީގައި ނިދާނެ ވާހަކަ ބުނީމެވެ. އެނެއް ދުވަހުގެ އިރު އެރުމާއެކު ޝުމޮންއާ އަހަރެން ސުވާލު ކޮއްލީމެވެ. ނަމަވެސް ޝުމޮންއަށްވެސް މި ބުނާ އަންހެނެއް ނުފެންނަށް ވާހަކަ ބުނެއެވެ. ދަންވުމުގެ ކުރިން ޝުމޮންއަކީ ނިދާ މީހެއްކަމަށް ބުނިއެވެ. އޭނާ އަކީ ލޭމައްޗަށް ދާ މީހަކަށް ވާތީ އެހެން ބިދޭސީން ގޮތަށް ގިނައިރު ހޭލާވެސް ނޫޅޭކަމަށް ބުނިއެވެ.

ކޮންމެއަކަސް ދުވަހުގެ މަސައްކަތް ނިމި އެންމެން ކައިގެން ނިދަން ވަނެވެ. އަހަރެންނާ ބާބޫ މިރޭ ނިދީ ރާޖާއާ ޝުމޮން ނިދާ ކޮޓާރީގައި ޝުމޮންވެސް ގޮވައިގެނެވެ. ޝުމޮން އެނދުގައި ޖެހުމާއެކު ގިނައިރެއް ނުވެ ނިދާ ގުގުރި ދަމަން ފަށައިފިއެވެ. ގުގުރި ދަމާވަރުން އަހަރެންނަށް ނުނިދި އުޅެނިކޮއް މެންދަމު ދޭ ޖެހާފިއެވެ. ދޭއް ޖެހިތަނާހެން އަހަރެން ތާއްޔާ ޖެހެން ފަށައިފިއެވެ. ނަމަވެސް ނިދި ނަގާލީ އަހަރެންގެ ލޮލުގައި އަޅާގަތް އެއްޗަކުންނެވެ. ޝުމޮންގެ އެނދު ކައިރީ ރަތް ލިބާޙެއްފަދަ ހެދުމެއްގައި އިސްތަށިގަނޑު ދިގު އަނހެނެއް ފުރަގަހަށް އެނބުރިގެން ހުއްޓެވެ. އަދި އަތުން ޝުމޮންގެ ކަރަށް އިޝާރާތް ކޮއްލިތަނާހެން ޝުމޮންގެ އަނގައިން ފޮނު ފައިބަން ފަށައިފިއެވެ. އަހަރެން ގަތް ބިރުން ބާބޫ ގައިގާ ކޮއްޓާލީމެވެ. ބާބޫއަށް ހޭލެވުނުތަނުން އަހަރެން އިނގިލިން އިޝާރާތްކޮއް ބާބޫއަށް މަންޒަރު ދެއްކީމެވެ. ބާބޫ ތެދުވެ ކިޔުނު ހެޔޮ އެއްޗެއް ކިޔަން ފެށުމުން ދުމެއް ޖެހިހެން އެ އަންހެން މީހާ ފިލާފިއެވެ.

ޝުމޮންއަށް ދިމާވި ކަންތަކާހުރެ ރުގްޔާ ކިޔަވާ މީހަކު އަހަރެން ގެނެއިމެވެ. އޭނާ ޝުމޮންއަށް ރުގްޔާ ކިޔެވުމަށްފަހު ޖިންނި ހާޒިރުކޮއް މައްސަލަ ބެލިއެވެ. ބެލި ބެލުމުން މި އެނގުނީ ޝުމޮން އޭނާ ގަޔަށް ކުޑަކަމު ދިޔަ ކަމެވެ. އެއީވެސް އޭނާގެ ގޭގައި އިންދާ ކަމެވެ. އޭނާގެ ގެއަކީ ކޮބާތޯ އެހުމުން ޖަވަބުގައި ރަށުގެ ދެކުނުގައި ހުރި މަގޫފަތް ތަކުތެރޭގައި ހުރި މަހާނައެއްގެ ވާހަކަ ބުނިއެވެ. އެއީ އެރަށު އިހުޒަމާނެއްގައި އުޅުނު އެންމެ ރީތި ކަމަނަ ރެހެންދި ކިޔާ އަންހެނެއް ގެ މަހާނަ ކަމަށްވެސް އެ ޖިންނި ބުނިއެވެ. ޝުމޮންއަށް އުނދަގޫ ކުރުން ހުއްޓާލާނީވެސް އެންމެން ރަށުން ފޭބީމަކަން އެ ޖިންނި ބުނިއެވެ. އަދި އެރަށުގައި ތިބޭނަމަ އިތުރަށް އުނދަގޫތައް ބޮޑުވާނެކަމަށް ބުނިއެވެ.

ރުގްޔާ ކުރާ މީހާ އަހަރެމެން އެރިސޯޓުން އިހަށް ފޭބުމަށް އެންގިއެވެ. ނަމަވެސް ލިބެން އޮތް އާމްދަނީ އާ ނިންމަން އޮތް ވަގުތު ކުޑަތަން ވެފައިވާތީ ގަދަހަދާފައި އެރަށުގައި އަހަރެމެން މަޑު ކުރީމެވެ. އަދި ނުވިތާކަށް އެ ބުނި މަގޫ ގަސްތައް ހާވަ ބެލީމެވެ. ބެލިއިރުގައި ރީތި ހުދު މަހާނަ ޒުޔާރަތެއް އިނެވެ. އޭގައި އެއްވެސް ކޫރުމެއް އަދި ހަލާކުވުމެއްވެސް ނެތެވެ. ހަމަ ހީވެނީ އިހައްދުވަހު ޖެހި މަހާނައެއްހެނެވެ. ކޮންމެޔަކަސް ކޮންމެ ރެޔަކުވެސް އަހަރެމެންނަށް ކަމަނަ ފެނެއެވެ. ފެންނަނީ އެކި ރޭ އެކި މީހުންނަށްށެވެ. ގިނަ ފަހަރު ނިދާފައި ތިބޭއިރު އައިސް ކައިރީގައި އިށީނދެ ކޯމަތީތަޅާ ފަޔަށްވެސް ދަމައެވެ. އަދި މަސައްކަތު ގަޑީ އެކި ސާމާނުވެސް ގެއްލެއެވެ. އަދި ބައެއްފަހަރު ލަކުޑިބުރި އެއްޗެހިވެސް ވައިތެރޭ އުދުހިފައި އައިސް މަސައްކަތްކުރާ މީހުންގެ ގައިގާ ޖެހެއެވެ. ކަންތައްތައް މާ މައްޗަށް ދިޔުމުން އިތުރަށް ގޯސްވެދާނެތީ އަހަރެމެން އެންމެން އެރިސޯޓުގެ މަސައްކަތް އަހަރު ދުވަހަށް ހުއްޓާލަން މަޖްބޫރުވިއެވެ.

– ނިމުނީ –

( ނޯޓް : މީ ހަގީގީ ހާދިސާއަކަށް ބިނާކޮއް ލިޔެވިފައިވާ ވާހަކައެކެވެ. )